کُوطٜ نٜلَابٜٔ 4
4
ࢡٜنغُلِّ ݠِيٜرْ عٜ يُحَنَّ حَا دَوْرٛوࢡٜ يَحُودُعٜنْ
1يَاکٜ ݠِيٜرْ عٜ يُحَنَّ طٛنْ مبٛلْوَنَ يِمْࢡٜ، لِمَنْعٜنْ عٜ مَوْطٛ عَيْنٛوࢡٜ حَيْکَلِيرُ عٜ سَدُکِعٜنْ نغَرِ حَا مَࢡّٜ؞ 2ࢡٜتِکِّ مَسِنْ نغَمْ نٜلَاࢡٜ غٛ طٛنْ عٜکِّتِنَ يِمْࢡٜ نٛ اَللَّه عُمِّتِنِ عِيسَى اَلْمَسِيحُ دِغَ مَايْدٜ، ندٜنْ مَايْࢡٜ ڢُو تَمِّ عُمِّتِنٜىٰغٛ؞ 3ࢡٜنَنغِ ࢡٜ، ࢡٜمَࢡِّ ࢡٜ حَا سُودُ ڢُرْسِنَ#4:3 سُودُ ڢُرْسِنَ مَلَّ سُودُ يَنغَدَ؞ حَا ڢَجِرِ، نغَمْ حِيرِ؞ 4عَمَّا طُوطْࢡٜ حَا نَنْࢡٜ بٛلّٜ نٜلَاࢡٜ ࢡٜعٜ نُطِّنِ، حَا لِمْغَلْ وٛرْࢡٜ وَطِ بَاکِنْ عُجِنٜ نجٛوِ؞
5جَنغٛ مَنْ مَوْࢡٜ يَحُودُعٜنْ عٜ ندٛتِّعٜنْ عٜ مٛودِࢡّٜ تَوْرٜىٰتَ کَوْتِ حَا عُرُسَلِيمَ؞ 6ࢡٜکَوْتِ بٜى عَنَّسْ حٛورٜىٰجٛ لِمَنْعٜنْ عٜ کَيَڢَسْ عٜ يُحَنَّ عٜ عَلٜکْسَنْدِرٜ عٜ يِمْࢡٜ سَارٜ حٛورٜىٰجٛ لِمَنْعٜنْ وٛطْࢡٜ ڢُو؞ 7ࢡٜندَرْنِ نٜلَاࢡٜ يٜىٰسٛ مَࢡّٜ، ࢡٜࢨَمِ ࢡٜ: «بٜى بَاوْطٜ طٜيٜ مَلَّ بٜى عِنْدٜ مٛيْ مبَطّٛنْ طُمْ؟» 8ندٜنْ ݠِيٜرْ، کٜبِّنَاطٛ رُوحُ شٜنِيطٛ جَابِ، وِعِ ࢡٜ: «يَا عَرْدِيࢡٜ عُمَّاتٛورٜ عٜ ندٛتِّعٜنْ، 9مِنْ نغُلَّامَ يٜىٰسٛ مٛنْ حَنْدٜ نغَمْ دَلِيلَ کُوغَلْ بٛوطْنغَلْ نغَلْ مِنْ مبَطَنِ بٛوسْطٛ عٜ نٛيْ عٛيَمْطِتِرِ؞ 10عٛنٛنْ بٜى إِسْرَاءِيلَعٜنْ ڢُو، سٜيْ عَنْدٛنْ: نٜطّٛ دَرِيطٛ يٜىٰسٛ مٛوطٛنْ عٛو، عٛجَمٛ نغَمْ دَلِيلَ عِنْدٜ عِيسَى اَلْمَسِيحُ مٛ نَسَرَتُ مٛ عٛنْ نغَاڢِ، عَمَّا اَللَّه عُمِّتِنِمٛ دِغَ مَايْدٜ؞ 11کَنغْکٛ وٛنِ:
حَيْرٜ ندٜ عٛنٛنْ مَحٛوࢡٜ، عٛنْ نغُدِنِ،
کَيْرٜ لَاتِ حَيْرٜ تَلْکُمٛورٜ ࢡُرْندٜ سَمَنْ#جَبُورَ 118:22؞؞
12حَا مَاکٛ تَنْ کٜࢡٜتٜنْ کِسْندَمْ، نغَمْ وَلَا غٛطّٛ ڢٜىٰرٜ حَا دُنِيَارُ سَمْ، مٛ اَللَّه حٛکِّ بَاوْطٜ حَا عٜنْ کٜࢡَ حِسْرُغٛ بٜى مُوطُمْ؞»
13دَوْرٛوࢡٜ يَحُودُعٜنْ غٛ کَيْطِنِ نغَمْ ࢡٜنغِعِ ݠِيٜرْ عٜ يُحَنَّ کُلَايْ سَمْ، سَکّٛ ندٜ ࢡٜتَوِ نَا ࢡٜ تٜدُّࢡٜ، نَا ࢡٜ جَنغُࢡٜ بٛو؞ ندٜنْ ࢡٜعَنْدِتِ ࢡٜطٛنّٛ نغٛنْدِ بٜى عِيسَى؞ 14عَمَّا وَلَا کٛ ࢡٜمبَاوِ وِعُغٛ نغَمْ ࢡٜنغِعِ غٛطّٛ بٛوسْطٛ غٛ طٛنْ دَرِ بٜى ݠِيٜرْ عٜ يُحَنَّ، عٛجَمٛ؞ 15نغَمْ مَاجُمْ ࢡٜنغُرْتِنِ ݠِيٜرْ عٜ يُحَنَّ دِغَ سُودُ دَوْرِيندٜ، ࢡٜشَرْوٛوتِرِ، 16ࢡٜمبِعِ: «کٛ مبَطٜتٜنْ يِمْࢡٜ ࢡٜعٜ؟ شَکَ يِمْࢡٜ عُرُسَلِيمَ ڢُو وَلَا مٛ عَنْدَا عَلَامَ کَيْطِنِيکَ کَ ࢡٜمبَطِ؞ عٜنْ مبَاوَتَا يٜدُّغٛ طُمْ؞ 17عَمَّا نغَمْ تَا حَالَ کَعَ ࢡٜسْدَ سَنغْکِتَاغٛ شَکَ عُمَّاتٛورٜ، سٜيْ مبَرّٜنْ ࢡٜ تَا ࢡٜمٜىٰتَ وٛلْوَنْغٛ کٛو مٛيْ بٜى عِنْدٜ ندٜعٜ؞» 18ندٜنْ ࢡٜعٜوْنِ ࢡٜ ڢَحِنْ؞ ࢡٜکَطِ ࢡٜ، ࢡٜمبِعِ تَا ࢡٜمٜىٰتَ وٛلْوَنْغٛ عٜ عٜکِّتِنْغٛ يِمْࢡٜ بٜى عِنْدٜ عِيسَى سَمْ؞
19عَمَّا ݠِيٜرْ عٜ يُحَنَّ نجَابِ: «عٛنٛنْ بٜى کٛعٜ مٛنْ، تَعٜ حَالَ کَعَ؞ کٛ وٛوطِ يٜىٰسٛ اَللَّه: طٛوْتَنَاغٛ عٛنْ نَ مَلَّ طٛوْتَنَاغٛ اَللَّه؟ 20نغَمْ دٛولٜ مِنْ تٛکّٛ وٛلْوُغٛ کٛ مِنْ نغِعِ عٜ کٛ مِنْ نَنِ؞» 21دَوْرٛوࢡٜ مبَرِّ ࢡٜ ڢَحِنْ، ندٜنْ ࢡٜنجٛوڢِ ࢡٜ؞ ࢡٜتَوَايْ دَلِيلَ حِيتَاغٛ ࢡٜ، نغَمْ عُمَّاتٛورٜ ڢُو طٛنْ تٜدِّنَ اَللَّه نغَمْ کٛ لَاتِ؞ 22دُوࢡِ غٛطّٛ مٛ ࢡٜنجَمْطِتِنِ طُمْ بٜى کَايٜىٰڢِ، ࢡُرَنْ شَݠَّنْطٜ نَيِ؞
نُطِّنْࢡٜ تٛرِ اَللَّه حَا ࢡٜلَاتٛ تِيطَ-ࢡٜرْطٜعٜنْ
23ندٜ ࢡٜنجٛوڢِ ݠِيٜرْ عٜ يُحَنَّ، ࢡٜلٛرِ ࢡٜ طِطٛ ڢُو حَا يِمْࢡٜ مَࢡّٜ؞ ࢡٜنغٜشِّ ࢡٜ کٛ مَوْࢡٜ لِمَنْعٜنْ عٜ ندٛتِّعٜنْ مبِعِ ࢡٜ ڢُو؞ 24ندٜ يِمْࢡٜ مَࢡّٜ نَنِ طُمْ، ࢡٜ ڢُو ࢡٜتٛوْنِ سَوْتُ، ࢡٜتٛرِ اَللَّه بٜى ࢡٜرْندٜ وٛورٜ، ࢡٜمبِعِ: «يَا جَوْمِرَاوٛ، عَنْ وٛنِ تَغْطٛ عَسَمَ عٜ لٜسْدِ عٜ بٜىٰلِ بٜى کٛ وٛنِ تٛنْ ڢُو#غُرْتَاکِ 20:11؛ نٜحٜمِيَ 9:6؛ جَبُورَ 146:6؞! 25عَنْ وَطِ کَاکَ عَمِنْ دَاوُدَ، سُکَ مَاطَ، وٛلْوَ بٜى بَاوْطٜ رُوحُ شٜنِيطٛ، ندٜ عٛوِعِ:
کٛنِ عُمَّاتٛوجٜ عُمِّنْتَ حَالَ،
کٛنِ جَمَعَاجٜ نُڢٛتٛ نُمٛوجِ مٜىٰرٜىٰجِ؟
26لَامِيࢡٜ دُنِيَارُ طٛنْ تَاسْکِ وَطُغٛ ڢِتِنَ،
عَرْدِيࢡٜ بٛو طٛنْ کَࢡَّ دَبَرٜ دٛوْ جَوْمِرَاوٛ
عٜ دٛوْ اَلْمَسِيحُ مُمْ#جَبُورَ 2:1-2؞؞
27نغَمْ بَنَ نٛنْ حِرُدُسْ عٜ ݠٛنْتِيُسْ ݠِلَاتُ عٜ عُمَّاتٛوجٜ عٜ إِسْرَاءِيلَعٜنْ ࢡٜ ڢُو ࢡٜکَوْتِ ندٜرْ بٜرْنِوٛلْ نغٛعٛلْ دٛوْ عِيسَى، سُکَ مَاطَ شٜنِيطٛ، مٛ عَوَطِ طُمْ اَلْمَسِيحُ#مَتَّ 27:1-2؛ مَرْکُسْ 15:1؛ لُکَ 23:1،7-11؛ يُحَنَّ 18:28-29؞؞ 28ࢡٜمبَطِ کٛ عَتَاسْکِتِنِ بٜى بَاوْطٜ مَ عٜ مُويٛ مَ دِغَ ࢡٛويْمَ؞ 29جٛنْتَ، يَا جَوْمِرَاوٛ، نَنْ بَرِّيَ مَࢡّٜ! حٛکُّ مَشُّࢡٜ مَ بَاوْطٜ وٛلْوُغٛ بٛلّٜ مَاطَ بٜى دَرْتَارٜ تِمِّدِدْندٜ! 30وَنغِنْ بَاوْطٜ مَاطَ حَا ࢩَوْࢡٜ نجَمْطِتَ، وَطْ عَلَامَاجِ عٜ کَايٜىٰڢِيجِ بٜى عِنْدٜ عِيسَى، سُکَ مَاطَ شٜنِيطٛ!» 31ندٜ ࢡٜتِمِّنِ وَطْغٛ دٛعَ، نٛکُّورٜ حَا ࢡٜطٛنّٛ کَوْتِ دِمْبِ؞ ࢡٜ ڢُو ࢡٜکٜبِّنَامَ رُوحُ شٜنِيطٛ، ࢡٜنغَازِ وٛلْدٜ اَللَّه بٜى دَرْتَارٜ؞
نُطِّنْࢡٜ شٜنْدِ جَوْدِ مُوطُمْعٜنْ
32جَمَعَارٜ نُطِّنْࢡٜ حَوْتِ ࢡٜرْندٜ وٛورٜ عٜ حَکِّيلٛ وٛوتٛ؞ وَلَا بِعْطٛ: «جَوْدِ عَمْ، مِنْ ڢٜىٰرٜ عَمْ جٜيِ»، عَمَّا ࢡٜکَوْتِ کٛ ࢡٜمَرِ ڢُو#کُوطٜ نٜلَاࢡٜ 2:44-45؞؞ 33بٜى بَاوْطٜ طُوطّٜ نٜلَاࢡٜ شٜىٰدِ عُمِّتِنٜىٰکِ جَوْمِرَاوٛ عِيسَى؞ اَللَّه بَرْکِطِنِ ࢡٜ ڢُو بٜى بَرْکَ طُوطْکَ؞ 34وَلَا تَلَکَاجٛ شَکَ مَࢡّٜ؞ مَرْࢡٜ غٜسٜ مَلَّ شُوطِ شٛورِّ طُمْ، نغَدِّ شٜىٰدٜ شٛغُّ مَنْ، 35نجٛعِّنِ حَا نٜلَاࢡٜ، کَمْࢡٜ ندٛکَّتَ شٜىٰدٜ مَنْ حَا کٛو مٛيْ ڢٛدّٜ حَاجٜ مُوطُمْ؞
36وٛودِ غٛطّٛ لٜوِيجٛ بِعٜتٜىٰطٛ يُوسُڢُ، دَࢩَاطٛ حَا کِݠْرُسْ؞ نٜلَاࢡٜ شٛومِمٛ بَرْنَبَسْ، بَنَ وِعْغٛ شٜمْبِطِنٛووٛ-يِمْࢡٜ؞ 37کَنغْکٛ بٛو عٛسٛورِّ نغٜسَ مَاکٛ، عٛوَدِّ شٜىٰدٜ مَنْ حَا نٜلَاࢡٜ؞
Currently Selected:
کُوطٜ نٜلَابٜٔ 4: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
