يُحَنَّ 18
18
نَنغٜىٰکِ عِيسَى
(مَتَّ 26:47-56؛ مَرْکُسْ 14:43-50؛ لُکَ 22:47-53)
1ندٜ عِيسَى تِمِّنِ بٛلّٜ طٜعٜ، عٛدِلِّ بٜى ݠُکَرَعٜنْ مَاکٛ غَطَ مَايٜلْ کٜدٜرٛنْ؞ وٛودِ جَرْنٜ حَا نٛکُّورٜ مَنْ، عٛنَسْتِ تٛنْ بٜى ݠُکَرَعٜنْ مَاکٛ؞ 2يَحُودَ، زَمْبٛتٛوطٛ مٛ بٛو عَنْدِ نٛکُّورٜ مَنْ، نغَمْ عِيسَى عٜ ݠُکَرَعٜنْ مُوطُمْ مبٛووِ حَوْتُغٛ حَا تٛنْ؞ 3يَحُودَ يَحْدِ حَا جَرْنٜ مَنْ بٜى سٛوجٜعٜنْ عٜ نٜلَاࢡٜ مَوْࢡٜ لِمَنْعٜنْ عٜ ڢَرِسَعٜنْ، ࢡٜطٛنْ نجٛغِ بَلْمِ عٜ ݠِتِّرْلَاجِ عٜ جَمٜ يِيتٜ عٜ بَلْمِ؞ 4عِيسَى عَنْدِ کٛ حٜࢡَتَ مٛ ڢُو؞ عٛوُرْتِ، عٛࢨَمِ ࢡٜ: «مٛيْ عٛنْ طَࢡِّتِتَّ؟» 5ࢡٜنجَابِمٛ: «مِنْ طٛنْ طَࢡِّتَ عِيسَى مٛ نَسَرَتُ؞» عِيسَى وِعِ ࢡٜ: «طُمْ مِنْ؞»
يَحُودَ، زَمْبٛتٛوطٛ مٛ بٛو طٛنْ دَرٛدِ تٛنْ بٜى مَࢡّٜ؞ 6ندٜ عِيسَى وِعِ: «طُمْ مِنْ»، ࢡٜلٛرِ ࢡَاوٛ ࢡَاوٛ، ࢡٜندٛعِّ حَا لٜسْدِ؞ 7عِيسَى ࢨَمِ ࢡٜ ڢَحِنْ: «مٛيْ عٛنْ طَࢡِّتِتَّ؟» ࢡٜنجَابِ: «عِيسَى مٛ نَسَرَتُ؞» 8عِيسَى وِعِ: «مِوِعِ عٛنْ، طُمْ مِنْ؞ تٛ طُمْ مِنْ عٛنْ طَࢡِّتِتَّ کَمْ، عَشّٜ يِمْࢡٜ ࢡٜعٜ ندِلَّ؞» 9طُمْ لَاتِ نٛنْ نغَمْ غٛونغْطِنْغٛ وٛلْدٜ ندٜ عِيسَى وِعْنٛ: «مِمَجِّنَايْ کٛو غٛوتٛ ندٜرْ يِمْࢡٜ ࢡٜ عَ حٛکِّ يَمْ؞»
10سِمٛنْ ݠِيٜرْ وٛودِنٛ کَاڢَحِ، عٛلٛسِ کِ، عٛسٛݠِّ سُکَ حٛورٜىٰجٛ لِمَنْعٜنْ، عٛتَعِمٛ نٛڢْرُ ࢩَامْرُ؞ عِنْدٜ سُکَ عٛو، مَلْکُسْ؞ 11عَمَّا عِيسَى وِعِ ݠِيٜرْ: «وَاتُ کَاڢَحِ مَاطَ حَا سُودُ مَاکِ؞ مِيَرَتَا جَرْدُغٜلْ بٛنٜ نغٜلْ بَابِرَاوٛ عَمْ حٛکِّ يَمْ نَ#مَتَّ 26:39؛ مَرْکُسْ 14:36؛ لُکَ 22:42؞؟»
عِيسَى يٜىٰسٛ عَنَّسْ
12ندٜنْ سٛوجٜعٜنْ عٜ مَوْطٛ مَࢡّٜ عٜ يَحُودُعٜنْ عَيْنٛوࢡٜ نَنغِ عِيسَى، کَࢡِّمٛ؞ 13عَرَنْ ࢡٜنجَحْرِمٛ حَا عَنَّسْ، کَنغْکٛ وٛنِ عٜسِرَاوٛ کَيَڢَسْ، حٛورٜىٰجٛ لِمَنْعٜنْ حِتَاندٜ مَاجُمْ؞ 14کَيَڢَسْ وٛنِ مٛ سَرْوُنٛ يَحُودُعٜنْ، وِعْنٛ ࢡٜ: «ندِکَّ غٛطّٛ غٛوتٛ مَايَ نغَمْ عُمَّاتٛورٜ ڢُو#يُحَنَّ 11:49-50؞؞»
ݠِيٜرْ يٜدِّ عِيسَى
(مَتَّ 26:69-70؛ مَرْکُسْ 14:66-68؛ لُکَ 22:55-57)
15سِمٛنْ ݠِيٜرْ عٜ ݠُکَرَاجٛ ڢٜىٰرٜ طٛنّٛ تٛکِّ عِيسَى؞ ݠُکَرَاجٛ عٛو، حٛورٜىٰجٛ لِمَنْعٜنْ عَنْدِمٛ، کَنغْکٛ عٛنَسْتِدِ بٜى عِيسَى حَا دَلْدَلْ سَارٜ حٛورٜىٰجٛ لِمَنْعٜنْ؞ 16عَمَّا ݠِيٜرْ طٛنّٛ دَرِ يَاسِ، کٛمْبِ دَمُّغَلْ؞ ندٜنْ ݠُکَرَاجٛ مٛ حٛورٜىٰجٛ لِمَنْعٜنْ عَنْدِ طُمْ غٛ وُرْتِ وٛلْوَنِ دٜبّٛ عَيْنَنْطٛ دَمُّغَلْ، نَسْتِنِ ݠِيٜرْ ندٜرْ سَارٜ؞ 17دٜبّٛ مَنْ وِعِ ݠِيٜرْ: «نَا عَنْ بٛو عَ ݠُکَرَاجٛ غٛرْکٛ عٛو؟» عٛجَابِ: «عَاعَ، نَا طُمْ مِنْ؞»
18حُووٛوࢡٜ عٜ عَيْنٛوࢡٜ کُࢡِّ يِيتٜ، طٛنْ عَيْتِنٛ تٛنْ، نغَمْ جَانغٛلْ طٛنّٛ وَطَ؞ ݠِيٜرْ بٛو طٛنّٛ دَرٛدِ بٜى مَࢡّٜ، طٛنّٛ عَيْتِنٛ؞
حٛورٜىٰجٛ لِمَنْعٜنْ ࢨَمِ عِيسَى
(مَتَّ 26:59-66؛ مَرْکُسْ 14:55-64؛ لُکَ 22:66-71)
19ندٜنْ حٛورٜىٰجٛ لِمَنْعٜنْ ࢨَمِ عِيسَى دٛوْ حَالَ ݠُکَرَعٜنْ مُوطُمْ عٜ عٜکِّتِنٛلْ مُوطُمْ؞ 20عِيسَى جَابِمٛ: «مِوٛلْوِ بٜى بَنغُطُمْ يٜىٰسٛ يِمْࢡٜ ڢُو؞ ڢٛرٛيْ مِوَازِ ندٜرْ شُوطِ دٜوَلْ يَحُودُعٜنْ عٜ ندٜرْ حَيْکَلِيرُ، حَا يَحُودُعٜنْ ڢُو مٛوࢡْتٛتٛ، مِوٛلْوَايْ کٛو طُمٜ بٜى سِرِّ؞ 21نغَمْ طُمٜ عَࢨَمَتَمِّ؟ ࢨَمْ نَنْࢡٜ يَمْ کٛ مِوٛلْوَنِ ࢡٜ، کَمْࢡٜ ࢡٜعَنْدِ؞» 22ندٜ عِيسَى وٛلْوِ بٛلّٜ طٜعٜ، غٛوتٛ ندٜرْ عَيْنٛوࢡٜ مَارِمٛ، وِعِ: «بَنَ نِي عَجَابٛرْتٛ حٛورٜىٰجٛ لِمَنْعٜنْ نَ؟» 23عِيسَى جَابِمٛ: «تٛ کَلُّکَ مبٛلْوُمِ، وَنغِنْ طُمْ؞ عَمَّا تٛ بٛوطُّمْ مبٛلْوُمِ، کٛنِ عَمَارِ يَمْ؟» 24ندٜنْ عَنَّسْ نٜلْدِمٛ عٛ کَࢡَّاطٛ حَا کَيَڢَسْ، حٛورٜىٰجٛ لِمَنْعٜنْ؞
ݠِيٜرْ دُلِّتِنِ عِيسَى ڢَحِنْ
(مَتَّ 26:71-75؛ مَرْکُسْ 14:69-72؛ لُکَ 22:58-62)
25سِمٛنْ ݠِيٜرْ طٛنّٛ دَرِ تٛنْ، طٛنّٛ عَيْتِنٛ؞ ندٜنْ ࢡٜمبِعِمٛ: «عَنْ بٛو نَا عَ غٛوتٛ ندٜرْ ݠُکَرَعٜنْ غٛرْکٛ عٛو نَ؟» عَمَّا عٛيٜدِّ طُمْ، عٛوِعِ: «عَاعَ، نَا طُمْ مِنْ؞» 26غٛوتٛ ندٜرْ سُکَعٜنْ حٛورٜىٰجٛ لِمَنْعٜنْ، بَنْدِرَاوٛ غٛطّٛ مٛ ݠِيٜرْ تَعِنٛ نٛڢْرُ مُمْ غٛ، وِعِمٛ: «مِيِعَايْ مَ ندٜرْ جَرْنٜ بٜى مَاکٛ نَ؟» 27عَمَّا ݠِيٜرْ يٜدِّ طُمْ ڢَحِنْ؞ سَاعِ مَنْ ندٜنْ عَسْغُمْرِ#18:27 عَسْغُمْرِ مَلَّ عَغُغُمْرِ؞ عُعِ؞
عِيسَى يٜىٰسٛ ݠِلَاتُ
(مَتَّ 27:1-2،11-14؛ مَرْکُسْ 15:1-5؛ لُکَ 23:1-5)
28جَنغٛ مَاجُمْ ڢَجِرِ شُبْ ࢡٜکٛوعِ عِيسَى حَا سَارٜ کَيَڢَسْ، ࢡٜنجَحْرِمٛ حَا سُودُ کِيتَ حَا سَارٜ نغٛمْنَ رٛمَعٜنْ؞ يَحُودُعٜنْ نَسْتَايْ سَارٜ مَنْ، نغَمْ تَا ࢡٜشٛࢡَ، حَا ࢡٜکٜࢡَ ࢩَامُغٛ ࢩَامْدُ ݠَسْکَ؞ 29ندٜنْ ݠِلَاتُ، وُرْتِ، وَرِ حَا مَࢡّٜ، ࢨَمِ ࢡٜ: «طُمٜ عٛنْ نغُلّٛرِ غٛطّٛ عٛو؟» 30ࢡٜنجَابِمٛ: «تٛ عٛلَاتَاکِنٛ کَلُّطٛ، مِنْ نغَدَّتَانٛ مٛ حَا مَاطَ؞» 31ݠِلَاتُ وِعِ ࢡٜ: «کٛوشٜ مٛ عٛنٛنْ، کِيتٜ مٛ ڢٛدّٜ تَوْرٜىٰتَ مٛوطٛنْ؞» يَحُودُعٜنْ نجَابِمٛ: «طُمْ دُنغَنَاکِ مِنْ مِنْ کِيتٛ غٛطّٛ کِيتَ مَايْدٜ؞» 32طُمْ لَاتِ نٛنْ نغَمْ غٛونغْطِنْغٛ بٛلّٜ طٜ عِيسَى وِعْنٛ، نغَمْ تِنْدِنغٛ نٛ عٛمَايْرَتَ#يُحَنَّ 3:14؛ 12:32؞؞
33ݠِلَاتُ نَسْتِ سَارٜ مُمْ ڢَحِنْ، عٜوْنِ عِيسَى، ࢨَمِمٛ: «عَنْ وٛنِ لَامِيطٛ يَحُودُعٜنْ نَ؟» 34عِيسَى جَابِ: «عَوِعِ طُمْ بٜى حٛورٜ مَ نَا مَلَّ وٛطْࢡٜ نغٜشِّ مَ طُمْ؟» 35ݠِلَاتُ جَابِ: «مِنْ مِ يَحُودُوجٛ نَ؟ يِمْࢡٜ عُمَّاتٛورٜ مَاطَ عٜ مَوْࢡٜ لِمَنْعٜنْ نغُلِّ مَ حَا عَمْ؞ طُمٜ عَوَطِ؟» 36عِيسَى جَابِ: «لَامُ عَمْ لَاتَاکِ لَامُ دُنِيَارُ ندُ؞ تٛ لَامُ عَمْ لَاتِنٛ نغُ دُنِيَارُ ندُ، جَغِّيࢡٜ عَمْ نغَرَنّٛ حَࢡُغٛ نغَمْ عَمْ، نغَمْ تَا مِنَسْتَ جُوطٜ يَحُودُعٜنْ؞ عَمَّا غٛونغَ لَامُ عَمْ لَاتَاکِ لَامُ دُنِيَارُ ندُ؞» 37ݠِلَاتُ ࢨَمِمٛ: «عَ لَامِيطٛ کَدِ نَ؟» عِيسَى جَابِ: «عَنْ مَا عَوِعِ طُمْ: مِ لَامِيطٛ؞ مِدَࢩَامَ، مِوَرِ ندٜرْ دُنِيَارُ ندُعُ نغَمْ مِسٜىٰدَنٛ غٛونغَ؞ کٛو مٛيْ يِطِ غٛونغَ، حٜطِتِتّٛ کٛ مِوِعَتَ؞» 38ݠِلَاتُ ࢨَمِمٛ: «طُمٜ وٛنِ غٛونغَ؟»
عِيسَى حِيتَامَ کِيتَ مَايْدٜ
(مَتَّ 27:15-31؛ مَرْکُسْ 15:6-20؛ لُکَ 23:13-25)
ندٜنْ ݠِلَاتُ وُرْتِ ڢَحِنْ، وَرِ حَا يَحُودُعٜنْ، وِعِ ࢡٜ: «مِنْ مِتَوَايْ دَلِيلَ حِيتَاغٛ غٛرْکٛ عٛو سَمْ؞ 39عَمَّا بَنَ کٛ وٛووَ حَا مٛوطٛنْ، جُولْدٜ ݠَسْکَ ڢُو، مِيٛوڢَنَنْ عٛنْ کَࢡَّاطٛ غٛوتٛ مٛ عٛنْ نغِطِ؞ عٛنْ نغِطِ مِيٛوڢَنَ عٛنْ لَامِيطٛ يَحُودُعٜنْ نَ؟» 40عَمَّا ࢡٜنغٛوکِ ڢَحِنْ، ࢡٜمبِعِ: «عَاعَ، نَا کَنغْکٛ عَيٛوڢَتَ، مِنْ نغِطِ عَيٛوڢَنَ مِنْ بَرَبَّسْ!» بَرَبَّسْ مَنْ عٛ ݠَسٛووٛ؞
Currently Selected:
يُحَنَّ 18: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
