लूका 1
1
1कूम मीयूदे मीयूङ्मेस्येजे ङीन अन्द्रने घट्देब घटनायूजे बारेने पोयू फूङ् पूत्देबे चेलाबे छीप्-छीप् लिख्देब काम चे ख्यङ्। 2येर्बे थमयूदे मीयूङ्मेस्येने परमेश्वरजे वचन रङ्से म्यादे तङ्देबे गवाही पीनब मेस्ये वचन स्य्वेब मीयू ख्य, थमयूदे अम्ब पोयू लिख्देने ङीने जिम्मा पीन्दे। 3ङैदे गेसेन् पीन पर्देब थियोफिलस, ङैदे सुरुमेस्येने साप्ता पोयू होस्स्यार चीत्देबे मेले ख्यङ्, मेस्ये नैजे लागि चेलाबे छीप्-छीप् मील्लीदेबे लिख्देब ङैने सोरो ज्य थेको, 4चेनेयलो नने स्य्वेब पोयू तम्दम् ख्यङ् यदेबे नने था क्यूस्स्य।
बप्तिस्मा पीनब यूहन्ना जन्मेदेब पो खूम्ने यब
5 #
१ इतिहास 24:10
यहूदियाजे मूरुम् हेरोदजे पोलोने, अबियाजे खलकने जकरिया यब पूस्र्या त्या ख्य। ङूजे मज हारून-वंशजे ख्य मेस्ये ङूजे मीन् एलीशिबा ख्य। 6थम ङ्ही परमेश्वरजे खूम्ने धर्मी ख्य, मेस्ये परमप्रभुजे आज्ञा प्रे धर्मजे छ्यप्यू क्वाने चेलाबे मन्दीदेबे सीदसरी क्यूत्देबे प्रेनब ख्य। 7मेस्ये थमयूजे च-चीमी त्व ख्य, चेनेयलो एलीशिबा थर ख्य, मेस्ये थम ङ्हीजे लो कूम गीले ख्य।
8कन्छ्वाब जकरिया परमेश्वरजे खूम्ने रङ्से खलकजे पोलोने पूस्र्या काम चीन्न ख्य, 9हन्छ्वाब परमप्रभुजे मन्दिर नङ्ने क्योदेबे धूप नैनब कामजे लागि पूस्र्यादे चीन्नब छ्यप् अनुसार चिट्ठा थाब जकरियाने पर्दीदे। 10धूप नैनब बीलने मीहुल फीने प्रार्थना चीन्न ख्य।
11परमप्रभुजे स्वर्ग दूत त्या धूप नैनब चाक्क्यजे स्येत्ते योर्दे मेर्नब तङ्-रदे। 12ङूने तङ्देबे जकरिया आतीकदे, मेस्ये लैगदे। 13तर दूतदे ङूने यदे, “अम्फलाची जकरिय, चेनेयलो नैजे प्रार्थना तैक ख्यङ्। जेम्से नैजे मज एलीशिबादे नैजे लागि च त्या प्रेक्क्य, मेस्ये ङूजे मीन् नदे यूहन्ना ये। 14न सोरो सूग्देबे आनन्द क्यूक्क्य, मेस्ये कूम मीयू ङू जन्मीदीब सूग्क्य। 15#गन्ती 6:3चेनेयलो ङू परमप्रभुजे खूम्ने सोरो केन् क्यूक्क्य। ङूदे अङ्गुरजे ची मेस्ये सूजो चीयू कलङ्बेये अन्थूङ्, मेस्ये रङ्से मजे गर्भ मेसेने ङू पवित्र आत्मादे भर्तीकब क्यूक्क्य। 16ङूदे इस्राएलजे कूम छगूम्-पूर्गूम्यूने थमयूजे परमप्रभु परमेश्वरतेले ल्वारेब काम चीक्क्य। 17#मलाकी 4:5,6पयूजे सेम् च-चीमी फ्याने मेस्ये आज्ञा अन्ङ्यीनयूने धर्मीयूजे बुद्धि तेलेयोर् ल्वाने मेस्ये प्रभुजे लागि ज्य बन्दीयेब जात त्या तयार चेने प्रभुजे खूम्दे ङू एलियाजे आत्माप्रे शक्तिने प्रीय।”
18होर्दे जकरियादे दूतने यदे, “अम्ब पो ङैदे केर्बे पत्ते स्व? ङ कम्ब क्यूरी मेस्ये ङैजे मजजे लो कूम गीले ख्यङ्।”
19 #
दानिएल 8:16; 9:21 स्वर्गदूतदे ङूने यदे, “ङ गब्रिएल न, ङ परमेश्वरजे खूम्ने मेर्न ख्यङ्। नेप्रे बात्सेने मेस्ये अम्ब सूगब सम्चर् स्य्वेने ङ कूल्बे ख्यङ्। 20कन्छ्वासेमे अम्ब पो पूरा अन्क्यूर्, हन्छ्वासेमे न लर क्यूक्क्य, मेस्ये पो क्यम अङ्ख्व क्यूक्क्य, चेनेयलो नदे ङैजे वचन अम्पत्ती, अम्ब वचन रङ्सेजे बीलने पूरा क्यूक्क्य।”
21फीने मीयू रेन्न ख्य, मेस्ये मन्दिर नङ्ने जकरिया कूम गदेबे थमयू हार्मन्दीकदे। 22जकरिय फीने योङरब थमयूप्रे क्यम अङ्खू, मेस्ये ङूदे मन्दिर नङ्ने दर्शन तङटोङ् यदेब थमयूदे मन्दे। ङूदे थमयूने लतप् चेने सुरु चीत्दे, होर्दे ङू लरने क्यून्नूदे।
23ङूजे सेवा चेब दिन जेङ्क ङ्येदे ङू रङ्सेजे कीम्ने गीलीदे। 24होर्दे ङ्येदे ङूजे मज एलीशिबा पीच रदे, ल ङ सेमे छ्यूप्दे टूङ्दे मेस्ये येरे यदे, 25“मीयूजे अन्द्रने ङैजे बेइजत मल्बेने जेम्से परमप्रभुदे ङैफ्याने येर्बे कृपा चीम्मे ख्यङ्।”
येशू जन्मेदीय यदेबे खूम्ने यब
26पीच रदे ल र्वाने परमेश्वरदे गब्रिएल स्वर्गदूतने गालीलजे नासरत सहरने कूल्बीदे। 27#मत्ती 1:18हम्ब स्वर्गदूत कन्या-चम्च त्या ट्याने गीलीदे मेस्ये हम्ब चम्च दाऊद खलकजे योसेफ यब मीत्यादे स्येग ख्य। हम्ब कन्याजे मीन् मरियम ख्य। 28स्वर्गदूत मरियम ट्याने गीलीदेबे यदे, “नने परमेश्वरजे शान्ति क्यूस्स्य! प्रभु परमेश्वरदे नने कूम अनुग्रह चे ख्यङ् मेस्ये ङू नैप्रे ख्यङ्।”
29तर ङू स्वर्गदूतजे पोदे सोरो फैगदेबे केर्चे केर्चे क्यूदे, मेस्ये ङूदे अम्ब पोजे अर्थ च स्व मन्देबे सेम्ने ह्वे चेने सुरुचीत्दे। 30स्वर्गदूतदे ङूने यदे, “अम्फलाची मरियम, चेनेयलो परमेश्वरदे सोरो केन् कृपा चे ख्यङ्। 31#मत्ती 1:21जेम्से ले, न पीच रीय, मेस्ये च त्या प्रेक्क्य, मेस्ये नदे ङूजे मीन् येशू येक्क्य। 32#2 शमूएल 7:12,13,16; यशैया 9:7ङू पात्ता केन् क्यूक्क्य, मेस्ये पात्ता केन् परमेश्वरजे च यीय, मेस्ये परमप्रभु परमेश्वरदे ङूने ङूजे मेमे दाऊद मूरुम्जे सिंहासन पीन्क्य। 33येशूदे याकूबजे वंश फ्याने येतार्ने राज्य चीक्क्य, मेस्ये ङूजे राज्य कलङ्बेये अन्जेङ्क।” 34मरियमदे स्वर्गदूतने यदे, “अम्ब केर्बे क्यूर खूइय, चेनेयलो ङ कन्या ख्यङ्।”
35स्वर्गदूतदे ङूने जवाफ पीन्दे, “पवित्र आत्मा नने रीय, मेस्ये पात्ता नङ्ने केन् परमेश्वरजे शक्तिजे ल नैफ्याने पर्दीय। होरेक्यूत्देबे जन्मीदीसे ख्यब पीच ङू पवित्र, मेस्ये परमेश्वरजे च यीय। 36ले, नैजे रङ्से मी एलीशिबा थर ख्य, मेस्ये ङू पीच रदेबे ल र्वा क्यूर ख्यङ्, यूम क्यूरीलीने च प्रेमै ख्यङ्, 37#उत्पत्ति 18:14चेनेयलो परमेश्वर्दे चे अङ्ख्वब से चैत्याये त्वो।”
38होर्दे मरियमदे यदे, “ले, ङ परमप्रभुजे त्वोम, ङैने नैजे वचन अनुसार क्यूस्स्य।” होर्दे स्वर्गदूत ङूप्रे छूर्दीदे गीली।
मरियम मेस्ये एलीशिबा त्वब
39हम्ब दिनने मरियम अतूर्-अतूर् गङ्तेले यहूदियाजे त त्याने गीलीदे, 40मेस्ये जकरियाजे कीम्ने क्योइदेबे एलीशिबाने नमस्कार चीत्दे। 41होर्दे मरियमदे नमस्कार यब एलीशिबादे तदे हन्छ्वाब ङूजे लोने ख्यब पीच चील्लीदे, मेस्ये एलीशिबा पवित्र आत्मादे फ्यादे, 42मेस्ये एलीशिबादे के केन् योन्देबे यदे, “मदीयू नङ्ने नदे कूम असी प्रे ख्यङ्, मेस्ये नैजे ख्वाजेने केलब पीचदे असी प्रेक्क ख्यङ्। 43ङै फ्याने केर्बे येर कृपा क्यूत्दे यी ङैजे प्रभुजे म ङै ट्याने रदे। 44चेनेयलो ले, नदे नमस्कार यब ङैजे नदे त बितीक्ने ङैजे ख्वाजेने पीच सूग्देबे ङ्यदे। 45ङू असी प्रेब ख्यङ्, परमप्रभुदे ङूने यब पो ङूदे पक्क क्यूक्क्य यदेबे विश्वास चीत्दे।”
मरियमदे चेब सार्याजे प्रू
46होर्दे मरियमदे यदे, “ङैजे प्राणदे परमप्रभुजे सार्या चे ख्यङ्,
47मेस्ये ङैजे आत्मा, ङैने मुक्ति पीनब परमेश्वरप्रे सूग ख्यङ्।
48 #
१ शमूएल 1:11
चेनेयलो ङूदे रङ्सेजे दूखी त्वोमने कृपा- चीत्देबे ले ख्यङ्,
ले, जेम्से अम्ब पुस्ताजे क्वादेने ङैने असी प्रेब यदेबे यीय।
49चेनेयलो परमेश्वर ङू सोरो बूल्ल्यो ख्यङ्, ङूदे ङैजे लागि सोरो केन् काम चीम्मे ख्यङ्। ङूजे मीन् पवित्र ख्यङ्।
50ङूने फब मीयू फ्याने ङूजे कृपा पुस्ता पुस्तासेमे टूनीय।
51ङूदे रङ्से लाजे बोङ् तन जेङ्क ख्यङ्। ङूदे सेम् नङ्ने ह्वे चीत्देबे केन्त्वेयूने स्वा-स्वा चीप्पे ख्यङ्।
52 #
अय्यूब 5:11; 12:19 ङूदे शक्तिशालीयूने थमयूजे सिंहासनदे योम्बे ख्यङ्,
मेस्ये दूखीयूने तो लङ ख्यङ्।
53ठेबयूने ङूदे सोरो ज्य सेयू पूरा रुप्दे पीम्मे ख्यङ्, मेस्ये फ्योवोयूने ङूदे ला थैन्देन्ने कूल्बे ख्यङ्।
54ङूदे रङ्से कृपा ह्वे चीत्देबे
रङ्सेजे सेवा चेब इस्राएलने साक्तीमे ख्यङ्,
55 #
उत्पत्ति 17:7
#
१ शमूएल 2:1-10
मेस्ये ङीनजे मेमेयूने यप्रने,
अब्राहाम मेस्ये ङूजे ङ्येजे छगूम्-पूर्गूम्यूने येतार्जे लागि दया चे ख्यङ्।”
56मरियम एलीशिबाप्रे धेन्ने: ल सोम् टूङ्देबे रङ्से कीम्ने ल्वाइदे।
बप्तिस्मा-पीनब यूहन्ना जन्मेदेब
57जेम्से एलीशिबा सूत्कीरी क्यूर बील रदे मेस्ये ङूदे च त्या प्रेत्दे। 58परमप्रभुदे ङू फ्याने ङूजे केन् अनुग्रह चे ख्यङ् यब तदेबे ङूजे खीम्चेयू मेस्ये रङ्से मीयू ङूप्रे सूग्दे।
59 #
लेवी 12:3
पीच जन्मीदीदेबे येर्याने थमयू पीचजे खतना चेने रदे, मेस्ये ङूजे मीन् ङूजे पजेप्रने जकरिय येमेख्य, 60तर ङूजे मदे “अन्क्यूर्, ङूजे मीन् यूहन्ना ये पर्दीय” यदे।
61थमयूदे ङूने, “नैजे येर मीन् ख्यब रङ्सेजे मी सूत्याये त्वो” यदे।
62होर्दे ङ्येदे थमयूदे ङूजे पने लतप् चीत्देबे लोत्दे “न अम्ब पीचजे मीन् च यीत्तीङ् र?” 63ङूदे लिख्देब पाटी त्या स्यदे हम्बने “ङूजे मीन् यूहन्ना न” यदेबे लिख्दीदे। थमयू क्वाने हार्मन्दीकदे। 64हन्छ्वाबने ङूजे ङूर् पूक्दे मेस्ये ङूदे पो क्यम ख्व क्यूत्दे मेस्ये ङूदे परमेश्वरजे जै-जै चेने सुरु चीत्दे। 65थमयूजे खीम्चेयू क्वाने फैगदे। यहूदियाजे गङ् का-मुलुकने अम्ब घटनाजे पो ड्वाङ्गे क्यूत्दे। 66अम्ब पो तब मीयू क्वादेने नङ्ग अम्ब पीच कर क्यूक्क्य स्व यदेबे रङ्से सेम्ने मन्दे। चेनेयलो परमप्रभुजे ला ङू फ्याने ख्य।
जकरियादे चेब सार्याजे प्रू
67पीचजे प जकरिया पवित्र आत्मादे फ्यादेबे परमेश्वरजे वचन क्यमने सुरु चीत्दे,
68“इस्राएलजे परमप्रभु परमेश्वरजे जै-जै क्यूस्स्य,
चेनेयलो ङू रेक ख्यङ्, मेस्ये ङूजे मीयूने जूक्दीमीदे!
69ङूदे ङीनजे लागि रङ्से त्वो दाऊदजे वंशने मुक्ति पीनब बूल्ल्यो मीत्या तयार चीम्मे ख्यङ्,
70केर्बे ङूदे मीयूङ् तोङ्बो मेस्येने रङ्सेजे पवित्र अगमवक्तायूजे ङूर्दे क्यम्दे,
71ङीजे शत्रुयूप्रे मेस्ये ङीने घिन चेबयू क्वाजे लादे ङीने जूक्दीमीय-
72ङूदे ङीनजे मेमेयूने कृपा तनने, मेस्ये रङ्से पवित्र करार ह्वे चेने,
73कम्ब कसम ङूदे ङीनजे मेमे अब्राहामप्रे च ख्य,
74ङीनब ङीनजे शत्रुयूजे लाट्यादे जूक्तीमीस्य, मेस्ये अम्फलाबे
75ङीनजे पूरा जीया भरी पवित्र मेस्ये धार्मिकताने क्यूत्देबे ङूजे खूम्ने ङूजे सेवा चे प्रेस्स्य।
76 #
मलाकी 3:1
ओ चीद पीच, न पात्ता नङ्ने केन् परमेश्वरजे अगमवक्ता यीय, चेनेयलो न प्रभुजे खूम्खूम् ङूजे लम् तयार चेने प्रीय,
77ङूजे मीयूने पाप-क्षमा चीत्देबे मुक्तिजे ज्ञान पीनने,
78ङीन परमेश्वरजे कृपाजे कारणदे स्वर्गजे नप्जे ओथ्याङ् ङीन ङने पर्दीय,
79 #
यशैया 9:2
मेस्ये मून्दूङ्ने टूङबयू मेस्ये कालजे ङूर्ने पर्दीब मेल्नबयूदे ओथ्याङ् प्रेक्क्य,
मेस्ये ङीनजे तोप् शान्तिजे लम्तेले स्योल्क्य।”
80होर्दे पीच यूहन्ना ठोङ्रदे मेस्ये आत्माने बूल्ल्यो क्यूट्टदे, मेस्ये इस्राएलजे मीयू ट्याने खूल्ला रूप्ने अन्तङ्दा सेमे ङू मी अन्टूङब चनमन नेने टूङ्दे।
Currently Selected:
लूका 1: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
