मत्ती 26
26
येशू सेने जाल चेब
मर्कूस १४:१-२; लूका २२:१-२; यूहन्ना ११:४५-५३
1कन्छ्वाब येशूदे अम्ब पोयू टक्कने य चेनमेस्ये रङ्से स्यूस्स्यायूने यदे, 2#प्रस्थान 12:1-27“नमयूने थाने ख्यङ्, जेम्सेजे ङ्हीयाङ्येदे निस्तार-दीन्बर रीय, होर्दे मीजे च क्रूसने खील् ठोक्दीदेबे पीलने चूङ्गीसे पीन्क्य।”
3होर्दे कैयाफा मीन् ख्यब पात्ता केन् पूस्र्याजे दरबारने पूस्र्या केन्यू मेस्ये मीयूजे धर्म गुरुयू रूप् क्यूत्दे। 4मेस्ये थमयूदे येशूने केर्बे छेल्लीदे चूङ्देबे से यदेबे मोतो चीत्दे। 5तर थमयूदे यदे, “दीन्बरजे बीलने दी। नत्र मीयूदे खैलाबैला चीक्क्य।”
बेथानियाने येशूने अत्तर छेल्मेब
मर्कूस १४:३-९; यूहन्ना १२:१-८
6येशू बेथानियाने कुष्ठबीद लादीकब मी सिमोनजे कीम्ने ख्यङ्ब, 7#लूका 7:37,38मदी त्या लूङ्गार्जे बोतोल त्याने कूम लू पर्देब अत्तर टेल्देबे येशूट्याने रदे, मेस्ये येशू चसे चने टूनूब ङूदे हम्ब अत्तर येशूजे टने फैम्मीदे। 8कन्छ्वाब स्यूस्स्यायूदे अम्ब तङ्दे, हन्छ्वाब थमयू छी लङ्दे, मेस्ये थमयूदे यदे, “अम्ब चेने खेर चे? 9चेनेयलो अम्ब अत्तर कूम लूने सोङ्देबे हम्ब नोर् दूख्प्रेब मीयूने पीन ख्व ख्यङ्दे।”
10तर हम्ब था प्रेत्देबे येशूदे थमयूने यदे, “नमयूदे अम्ब मदीने चेने छरङ् पीन? ङूदे ङैने सोरो ज्य काम त्या चे ख्यङ्। 11#व्यवस्था 15:11चेनेयलो दूख्प्रेब मीयू नमयूप्रे येतार्ने क्यूक्क्य, तर नमयूप्रे ङ येतार्ने क्यूस्ये त्वो। 12अम्ब अत्तर ङैजे ङ्वने फन्देबे ङैने खङ्सने बोप्पजे लागि तयार चीम्मे ख्यङ्। 13तम्दम्ने, ङ नमयूने यीय, संसारभरी केने-केने अम्ब सूगब खबर प्रचार चीक्क्य, होने-होने अम्ब मदीदे चेब कामजेये ह्वे चीक्क्य।”
यहूदादे धोका पीनब
मर्कूस १४:१०-११; लूका २२:३-६
14होन्छ्वाब बाह्र जना स्यूस्स्यायू नङ्ने यहूदा इस्करियोतब केन् पूस्र्यायू ट्याने गीलीदे, 15#जकरिया 11:12मेस्ये यदे, “कादेये येशूने ङैदे नमयूजे लाने चूङ्स्ये पीन्देयलो, ङैने च पीन्क्य?” थमयूदे ङूने चाँदीजे मन्द्रामूली सूम्च्यू चील्देबे पीन्दे। 16हम्ब बीलमेस्ये यहूदादे येशूने चूङब मौका च्यूक्तीदे।
आखिरीजे चसे
मर्कूस १४:१२-२६; लूका २२:७-२३; यूहन्ना १३:२१-३०
17अखमिरी क्यङ् दीन्बरजे खूम्जे दिन स्यूस्स्यायू येशू ट्याने रदेबे लोत्दे, “निस्तार दीन्बरजे भत्यार् चने नैजे लागि ङीदे ने केने मील्ले?”
18येशूदे यदे, “सहरने ख्यब मी त्या ट्याने प्र, मेस्ये ङूने य, ‘गुरुदे य ख्यङ्, ङैजे बील फ्योरदे। ङ रङ्से स्यूस्स्यायूप्रे निस्तारजे दीन्बर नैजे कीम्ने मन्दीय’।” 19होर्दे येशूजे आज्ञा ङ्यीन्देबे स्यूस्स्यायूदे निस्तार दीन्बरजे साप्ताने मील्लीदे।
20कन्छ्वाब नूस्यूङ् क्यूट्टदे हन्छ्वाब येशू बाह्र जान स्यूस्स्यायूप्रे चसे चने टूङ्दे। 21थमयू चेन बीलने येशूदे यदे, “तम्दम्ने, ङ नमयूने यीय, नमयू नङ्ने त्यादे ङैने चूङ्स्ये पीन्क्य।”
22होर्दे थमयू सोरो अन्सूग क्यूत्दे मेस्ये थमयू त्या त्यादे येशूने लोत्दे, “प्रभु हम्ब ङ यीर?”
23 #
भजनसंग्रह 41:9
होर्दे येशूदे जवाफ पीन्दे, “सूदे ङैप्रे थल्ने क्यङ् नूक्न ख्यङ्, ङूदेने ङैने चूङ्से पीन्क्य। 24धर्मशास्त्रने केर्बे लिख्दीये ख्य मीजे च होर्बेने प्रने पर्दीय। तर हम्बने धिक्कार ख्यङ् सूदे मीजे चने चूङ्स्ये पीन्क्य! हम्ब मीब अन्जन्मीदीलो ङूजे लागि सोरो ज्य क्यूर ख्यङ्दे।”
25होर्दे येशूने चूङ्स्ये पीनब यहूदादे यदे, “ओ गुरु, हम्ब पक्कने ङ औ?”
येशूदे यदे, “न रङ्सेदेने यदे।”
26थमयू भत्यार् चेनूब येशूदे क्यङ् टेल्दे, मेस्ये असी पीनङ्येदे येशूदे हम्ब क्यङ् फाच्या चीत्दे मेस्ये स्यूस्स्यायूने पीन्देबे यदे, “ना च, अम्ब ङैजे ङ्व ख्यङ्।”
27होर्दे येशूदे ढोल्कये टेल्देबे धन्यवाद पीनङ्येदे थमयूने येरे यदेबे पीन्दे, “अम्ब नमयू क्वादेने थूङ्। 28#प्रस्थान 24:8; यर्मिया 31:31-34चेनेयलो अम्ब सर् करारजे ङैजे का ख्यङ्, अम्ब कूम मीयूजे पापजे पश्चाताप चीत्देबे परमेश्वरतेले ल्वाजे लागि बग्दीय। 29ङ नमयूने यीय, कम्ब दीन्सेमे ङैजे पजे राज्यने नमयूप्रे अम्बने सर् चीत्देबे अन्थूङ्दासेमे ङ अङ्गुरजे अम्ब सीदे फेरि थूङ्स्ये त्वो।”
30प्रू त्या प्वेमेस्ये थमयू जैतून गङ्ने गीलीदे।
पत्रुसदे ङ दी यदे
मर्कूस १४:२७-३१; लूका २२:३१-३४; यूहन्ना १३:३६-३८
31 #
जकरिया 13:7
होर्दे येशूदे थमयूने यदे, “दीनी मून्दे ङैजे कारणदे नमयूदे चेब विश्वास क्यापीय। चेनेयलो येर्बे लिख्दीये ख्यङ्, ‘ङैदे सोम्प्रङ्बने सेक्य, मेस्ये स्वान् बगल का-मुलुकने स्वा-स्वा थर्पीय।’ 32#मत्ती 28:16तर ङ सीबदेबे सोम्बो क्यूरङ्येदे गालीलने नमयूयली खूम् प्रीय।”
33पत्रुसदे येशूने जवाफ पीन्दे, “नैजे कारणदे क्वादेने विश्वास क्यापीलीने ङ कलङ्बेये अन्क्यापी।”
34येशूदे ङूने यदे, “तम्दम्ने, ङ नमयूने यीय, दीनीमून्दे कप ठ्वायली खूम् नदे ङैने सोम्फेसेमे अन्स्ये यदेब यीय।”
35पत्रुसदे येशूने यदे, “ङ नैप्रे सीब पर्तीलीने ङ नने अन्स्ये अन्-य।” सूजो स्यूस्स्यायू क्वादेने होरेने यदे।
येशू गेतसमनीने
मर्कूस १४:३२-४२; लूका २२:३९-४६
36होर्दे येशू गेतसमनी यब नेने थमयूप्रे गीलीदे, मेस्ये स्यूस्स्यायूने यदे, “नमयू अन्-याने टूङ्, ङ छीत्या तीलाने प्रदेबे प्रार्थना चीक्क्य।” 37येशूदे पत्रुस मेस्ये जब्दियाजे च ङ्हीने स्योल्गीदे होरदे येशू सोरो पीर् पर्दीदेबे चैर्बे क्यूत्दे। 38होर्दे येशूदे थमयूने यदे, “ङैजे प्राण सोरो पीर्पर्दीदेबे सीयेप्र क्यून्न ख्यङ्। नमयू अन्-यानेने टूङ्, मेस्ये ङैप्रे मून् जाग्ती।” 39ङू छीत्या तीलाने गीलीदे च्येने पून्छ्याल क्यूत्देबे प्रार्थना चीत्दे, “पाइ, खूदेयलो, अम्ब पील ङैट्यादे हर्दीमी। होरेयली ङैजे इच्छाने दी, तर नैजे इच्छा अनुसार क्यूस्स्य।”
40होर्दे येशू रङ्सेजे स्यूस्स्यायू ट्याने ल्वारदे थमयू ङ्यूम्नब तूरदे, मेस्ये पत्रुसने यदे, “नमयू कर ङैप्रे घण्टा तीत्याये मून् जाग्ते अन्ख्व? 41जाँचने अम्पर्दीस्य यदेबे मून् जाग्तीदे प्रार्थना ची। तम्दम्ने आत्माब तयार ख्यङ्, तर ङ्वब कमजोर ख्यङ्।”
42फेरि दोस्रो खेप् गीलीदेबे येशूदे प्रार्थना चीत्दे, “प ङैदे, अम्ब थूङने पर्दीलो नैजे इच्छा पूरा क्यूस्स्य।”
43येशू फेरि रलीने थमयू ङ्यूम्नब तूरदे, चेनेयलो थमयू ङ्यूम्-म्यादे म्या ले अन्ख्व क्यून्न ख्य।
44येरेक्यूत्देबे येशूदे थमयूने फेरि पोङ्गीदे, मेस्ये गीलीदेबे फेरि हम्ब पोयू दोहोर्तीदेबे तेस्रो पलोये प्रार्थना चीत्दे।
45होर्दे येशू स्यूस्स्यायू ट्याने ल्वारदेबे थमयूने यदे, “नमयू च चूजोसेमेने ङ्यूम्देबे आराम चीन्न औ? ले, बील क्यूट्ट ख्यङ्। जेम्से ङ, मीजे-च पापीयूजे लाने सूम्दीबे मैख्यङ्। 46लङ्, प्रे। ले ङैने चूङ्स्ये पीनब मी ट्यारङ्ने फ्योर ख्यङ्।”
येशू चूङ्गेब
मर्कूस १४:४३-५०; लूका २२:४७-५३; यूहन्ना १८:३-१२
47येशूदे येरे येनूब, बाह्र जान स्यूस्स्यायू नङ्ने यहूदा यब फ्योरदे। ङूप्रे पूस्र्या केन्यू मेस्ये जनताजे धर्म-गुरुयूदे कूल्बेब मीहुल केन् त्या लाने पार्ज्याप्रे पीर्गयू टेल्देबे रदे। 48येशूने चूङ्स्ये पीनब मीदे थमयूने च्यूनू त्या पीने ख्य, “सूने ङैदे मूइ चीक्क्य, ङू येशू ख्यङ्, ङूने चूङ्।” 49तूरून्तै येशू ट्याने गीलीदेबे यहूदादे यदे, “ओ गुरुज्यू, नमस्कार!” यदेबे ङूदे येशूने मूइ चीत्दे।
50येशूदे यहूदाने यदे, “ख्योन्, न च चेने रख्यङ्, हम्ब चीक्क।”
होर्दे थमयू खूम् रदेबे येशूने चूङ्देबे टेल्गीदे। 51हन्छ्वाबने येशूप्रे ख्यब स्यूस्स्यायू नङ्जे त्यादे रङ्सेजे पार्ज्या प्योदेबे केन् पूस्र्याजे त्वोजे ङ्यलम् न च्वाट्टे प्रेपीदे।
52येशूदे ङूने यदे, “नदे रङ्से पार्ज्या सीम्ने चङ्, चेनेयलो पार्ज्या टेलब मी क्वाने पार्ज्यादेने नाश चीक्कीय। 53न च मैन, च ङ रङ्से पने बिन्ती चीत्देयलो, मेस्ये ङूदे तुरुन्तै स्वर्ग दूतयू बाह्र पल्टनयली थेप् ङैजे लागि कूल्बे अन्ख्वया?
54तर कादेये ङैदे स्यदेयलो धर्मशास्त्रने येर्बे क्यूरपर्तीय यदेबे लिख्दीयेब पो केर्बे पूरा क्यूर खूइय?”
55 #
लूका 19:47; 21:37 हम्ब बीलने येशूदे मीयूने यदे, “च ङ डाँकू मनऔ, नमयू पीर्ग मेस्ये पार्ज्या टेल्देबे ङैने चूङ्रया? ङ दीनजेने मन्दिरने टूङ्देबे शिक्षा लोम्मीब, खै नमयूदे ङैने अन्चूङ्।
56तर अगमवक्तायूदे धर्मशास्त्रने लिख्दीयेब पोयू पूरा क्यूस्स्य यदेबे अम्ब टक्कने क्यूर ख्यङ्।” होर्दे स्यूस्स्यायू क्वादेने येशू पङ्गीदेबे ग्येयी।
येशू पात्ता केन् सभाजे खूम्ने
मर्कूस १४:५३-६५; लूका २२:५४-५५,६२-७१; यूहन्ना १८:१३-१४,१९-२४
57येशूने चूङ्देबे पात्ता केन् पूस्र्या कैयाफा ट्याने कूदीदे। हैयाने पन्डेयू मेस्ये धर्म-गुरुयू रूप् क्यूर ख्य। 58तर पत्रुस चीन्तङ्देमेस्येने पात्ता केन् पूस्र्याजे कीम्जे य्वेसेमे येशूजे ङ्ये-ङ्ये गीलीदे, मेस्ये आखिरीने च क्यूर टूङ् यदेबे, लेने नङ्ने गीलीदेबे सीन्त्रीयूप्रे टूङ्दे।
59केन् पूस्र्या मेस्ये पात्ता केन् सभाजे टक्कदेने येशूने सेजे लागि ङूजे विरुद्धने लूच्च गवाही मल्दे। 60तर लूच्च गवाही पीनब मीयू कूम रदे, तर थमयूदे गवाही चैत्याये अम्प्रे। आखिरीने मी ङ्ही खूम्दे रदे, 61#यूहन्ना 2:19मेस्ये यदे, “अम्ब मीदे ‘ङ परमेश्वरजे मन्दिर नोङ्देबे सोम्-म्याने अम्ब बन्दे खूइय’ यदे।”
62होर्दे पात्ता केन् पूस्र्या लङ्देबे येशूने यदे, “न चेने चैत्याये जवाफ अम्पीन्? अम्ब मीयूदे नैजे विरुद्धने पीनब गवाही कर थेको?” 63तर येशू पारा अम्पूल्लाबे टूङ्दे। पात्ता केन् पूस्र्यादे ङूने यदे, “सोम्बो परमेश्वरजे मीन्ने कसम चदेबे यीय, ङीने स्य्वे, न परमेश्वरजे च ख्रीष्ट औ?”
64 #
दानिएल 7:13
येशूदे ङूने यदे, “नदेने येन ख्यङ्, होरनेयली नमयूने ङ यीय, नङ्ग नमयूदे मीजे च सर्वशक्तिमान परमेश्वरजे स्येत्तेयोर् टूङ्देबे स्वर्गदे मूक्पने रेनब तङ्क्य।”
65 #
लेवी 24:16
होर्दे पात्ता केन् पूस्र्यादे रङ्से कोला प्र्याङ्देबे यदे, “अम्ब मीदेब ईश्वरजे न-प्वे ख्यङ्! जेम्से ङीनने सूजो साक्षीयू चेने चैदे? नमयूदे चूजो ङूदे क्यमब ईश्वरजे न प्वेब तदे। सूजो थेप् गवाहीयूजे चै हर्जो पर्दीय? 66नमयूजे मोतो कर ख्यङ्?”
थमयूदे जवाफ पीन्दे, “अम्ब मी से पर्देब ख्यङ्।”
67 #
यशैया 50:6
होर्दे थमयूदे येशूजे त्वाने छ्योम थर्देबे मूर्कीदे खान्दीदे, मेस्ये त्या ङ्हीदे यरे यदेबे तैपदे ठरीदे। 68“औ ख्रीष्ट, कादेये न अगमवक्ता यलो! य नने ठरेब मी सू?”
पत्रुसदे दी यब
मर्कूस १४:६६-७२; लूका २२:५६-६२; यूहन्ना १८:१५-१८,२५-२७
69होर्दे पत्रुस फीने य्वेने टून ख्य। त्वोम त्या ङू ट्याने रदेबे यदे, “नैये गालीलजे येशूप्रे ख्यब तेया?”
70तर पत्रुसदे थमयू क्वाजे खूम्ने दी यदे, “नदे यब पो ङैदे अङ्को।”
71होर्दे ङू तक्लदे फीने गीलेमेस्ये सूजो मदीदे ङूने तङ्दे, मेस्ये होने ख्यब मीयूने यदे, “अम्ब मीये येशू नासरीप्रे ख्य।”
72ङूदे फेरि कसम चदेबे दी यदे, “ङैदे हम्ब मी अन्स्ये।”
73खात्यालाबे हैयाने मेर्नब मीयूदे पत्रुस ट्याने गीलीदेबे यदे, “तम्दम्ने, थमयू नङ्ने त्या नेये ख्यङ्, चेनेयलो नैजे बोलीदेने था ख्यङ्।”
74होर्दे ङूदे रङ्सेने ले-तपे तपे कसम चदे “ङैदे हम्ब मी स्येने अन्स्ये।” होर्दे तुरुन्तै कप ठ्वादे।
75होर्दे येशूदे येरे यब पो पत्रुसदे ह्वेरदे, “कप ठ्वायली खूम् नदे ङैने सोम्फेसेमे अन्स्ये यदेबे यीय।” होर्दे ङू फीने गीलीदेबे बेस्से ङूदे।
Currently Selected:
मत्ती 26: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
