मर्कूस 1
1
बप्तिस्मा पीनब यूहन्ना
मत्ती ३:१-१२; लूका ३:१-१८; यूहन्ना १:१९-२८
1परमेश्वरजे च येशू ख्रीष्टजे सूगब खबर येरे सुरु क्यूक्क्य। 2#मलाकी 3:1यशैया अगमवक्तादे येरे लिख्दीये ख्यङ्:
“ले, परमेश्वरदे, न यली खूम्खूम् ङैजे दूत कूल्बीय, ङूदे नैजे लागि लम् तयार चीक्क्य यदेबे य ख्यङ्।”
3 #
यशैया 40:3
“मी अन्टोङब चनमन नेने मीत्या येरे यदेबे पारापून्न ख्यङ्, ‘परमप्रभुजे लम् बन्दी, ङूजे लम्यू सोझो ची’।”
4बप्तिस्मा पीनब यूहन्नादे पाप क्षमा चेने पश्चात्ताप चेब बप्तिस्माजे बारेने हम्ब नेजे मीयू क्वानेने स्य्वेदे स्य्वेदे मी अन्टोङब चनमन नेने फ्योरदे। 5यहूदिया देश मेस्ये यरूशलेमजे मीयू क्वाने यहून्ना ट्याने योङ्रदे। मेस्ये थमयूदे रङ्सेदे रङ्सेने पापी ख्यङ् यदेबे यूहन्नाजे लादे यर्दन होङ्ने बप्तिस्मा कीन्दे। 6#२ राजा 1:8यूहन्नादे ऊँटजे फूदे ताब कोला ह्वे ख्य। मेस्ये ढप्ने खूस्यजे कूच्यू ख्या ख्य, ङूदे रीक्प्रे ना-ओमजे खूदू च ख्य। 7ङूदे मीयूने येरे यदेबे स्य्वेत्दे, “ङ यली ङ्येदेरब ङू थेप् शक्तिशाली ख्यङ्, मेस्ये ङ कूत्तू क्यूत्देबे ङूजे पूङ्गीजे थब फा लायकजे त्वो। 8ङैदे नमयूने क्यूदे बप्तिस्मा पीन ख्यङ्, तर ङूदे नमयूने पवित्र आत्मादे बप्तिस्मा पीन्क्य।”
येशूजे बप्तिस्मा मेस्ये जाँच
मत्ती ३:१३-१७; ४:१-११; लूका ३:२१-२२; ४:१-१३
9हम्ब दिनने येशू गालीलजे नासरतदे रदे, मेस्ये यूहन्नादे यर्दन होङ्ने ङूने बप्तिस्मा पीन्दे। 10येशू क्यू नङ्दे कन्छ्वाब लङ्रदे हन्छ्वाबने स्वर्ग पूक्देबे पवित्र आत्मा धोङ्रप्र ङू फ्याने रेनब तङ्दे। 11#उत्पत्ति 22:2; भजनसंग्रह 2:7; यशैया 42:1; मत्ती 3:17; 12:18; मर्कूस 9:7; लूका 3:22होर्दे स्वर्गदे येर के त्या तैरदे, “न ङैजे छेब च ख्यङ्। नेप्रे ङ सोरो सूग ख्यङ्।” 12खात्याने परमेश्वरजे पवित्र आत्मादे येशूने मी अन्टोङब चनमन नेने स्योल्गीदे। 13शैतानदे जाँच चीत्देबे ङू ङ्यील्लङ् दिनसेमे मी अन्टोङब चन-मन नेने टूङ्दे। ङू नाजे जन्तूयूप्रे टूङ्दे, मेस्ये स्वर्गदूतयूदे ङूजे सेवा चीत्दे।
स्यूस्स्यायूने क्वब
मत्ती ४:१८-२२; लूका ५:१-११; यूहन्ना १:३५-४२
14यूहन्ना चूङ्गमेस्ये परमेश्वरजे सूगब खबर मीयूने स्य्वेदे-स्य्वेदे येशू गालीलने रदे। 15#मत्ती 3:2येशूदे यदे, “बील पूरा क्यूरे ख्यङ्, मेस्ये परमेश्वरजे राज्य ट्याने फ्योर ख्यङ्। होरेक्यूत्देबे नमयूदे पश्चात्ताप चीत्देबे पाप चेब काम क्यापी, मेस्ये सूगब खबरने विश्वास ची।”
16येशू गालील-समुद्रजे नने प्रेनूब सिमोन मेस्ये ङूजे च्योन् आन्द्रियासदे जाल छानब ङूदे तङ्दे। थमयू ङ सेब मी ख्य। 17येशूदे थमयूने यदे, “ङैजे ङ्येदे ख, मेस्ये ङैदे नमयूने ङ चूङ दी, मीयूने परमेश्वरजे राज्यने रेब मीयू चीक्क्य।” 18होरे यबने थमयूदे रङ्सेजे जालीयू पोङ्गीदेबे ङूजे ङ्ये-ङ्ये गीलीदे।
19होर्दे छीत्या तीलाने गीलेङ्येदे ङूदे जब्दियाजे च ङ्ही याकूब मेस्ये यूहन्ना डुङ्गाने टूङ्देबे जालीयू रोप्नब तङ्दे। 20ङूदे थमयूने तुरुन्तै कोदे, मेस्ये रङ्से प जब्दियाने काम फरब मीयूप्रे डुङ्गाने पोङ्गीदेबे थमयू येशू ङ्ये-ङ्ये गीलीदे।
अशुद्ध आत्मा ख्यब मी
लूका ४:३१-३७
21थमयू कफर्नहुम तने गीलीदे, होर्दे आराम टोङब दिनने यहूदीजे सभा-कीम्ने गीलीदेबे ङूदे शिक्षा पीन्दे। 22#मत्ती 7:28,29येशूदे लोम्मेब शिक्षा तदेबे थमयू हार्मन्दीकदे, चेनेयलो ङूदे यहूदी पन्डेयूदेप्र दीलाबे, हुकुम चील्ले मीदेप्र लोम्मीदे। 23हन्छ्वाबने हम्ब यहूदीजे सभा-कीम्ने अशुद्ध आत्मा ख्यब मीत्या ख्य। 24हम्ब मीदे येरे यदेबे पारा पूत्दे, “नासरतजे येशू, नदे ङीने च चे मे? न ङीने नाश चेने र औ? न परमेश्वरजे पवित्र च यदेबे ङैदे स्ये ख्यङ्।”
25तर येशूदे ङूने फ्राजीदे, “पारा अम्पूल्लाबे हम्ब मीजे ङ्व नङ्दे योङ्ब।” 26हम्ब अशुद्ध आत्मादे हम्ब मीने लछर्-पछर् चीत्देबे के केन् योन्देबे हम्ब मीजे ङ्व नङ्दे फीने योङ्गी।
27मीयू क्वाने हार्मन्दीकदे, मेस्ये थमयू त्यादे त्याने लोत्दे, अम्ब च यी? अम्ब सर् शिक्षा टोङ्। ङूदेब हुकुम चील्ले मीदेप्र अशुद्ध आत्मायूने आज्ञा चे टोङ्, मेस्ये अशुद्ध आत्मायूदेये ङूजे आज्ञा मन्दे टूङ्। 28होर्दे खात्याने येशूजे न-मीन् गालील नेजे का-मुलुकने ड्वाङ्गे क्यूरी।
कूम नबयू तम् क्यूरेब
मत्ती ८:१४-१७; लूका ४:३८-४१
29खात्याने येशू सभा-कीम्दे योङ्रदेबे याकूब, यूहन्नाप्रे सिमोन मेस्ये आन्द्रियासजे कीम्ने गीलीदे। 30हैयाने सिमोनजे य्वामी खङ्सीङ् रदेबे अमीन् क्यून्न ख्य, मेस्ये थमयूदे छाट्टे येशूने ङूजे पो स्योत्दे। 31येशू ङू ट्याने गीलीदेबे ङूजे ला चूङ्देबे लङ्दे, मेस्ये खङ्सीङ् अन्रक्यूरी। होर्दे ङूदे थमयूजे सेवा चीत्दे।
32हम्ब नूस्यूङ् मीया नूम्येङ्येदे मीयूदे येशू ट्याने नवयू मेस्ये छेत् लादीकब मीयू क्वाने रेत्दे। 33सहर भर्जे मीयू क्वाने ख्यो ल ट्याने रूप् क्यूत्दे। 34थर्-थर्जे नवयूने येशूदे तम् चीम्मीदे, मेस्ये छेत्यू कूम योम्बीदे, तर छेत्यूदे ङूने स्येदेबे, ङूदे छेत्यूने चेये यसे अम्पीन्।
चनमन नेने येशूजे प्रार्थना
लूका ४:४२-४४
35नप्दे म्या तङ यली खूम्ने ङू लङ्देबे चनमन क्यून्नब नेने गीलीदे, मेस्ये हैयाने प्रार्थना चीत्दे। 36सिमोन मेस्ये ङूप्रे ख्यब मीयूदे येशूने मल्गीदे। 37येशूने त्व ङ्येदे थमयूदे यदे, “मीयू क्वादेने नने मल्न ख्यङ्।”
38होर्दे येशूदे थमयूने यदे, “ख, ङीनयू यैयाबूरूजे सूजो सहरयूने प्रे, मेस्ये हैयाने ङैदे परमेश्वरजे पो स्य्वे प्रेस्स्य, चेनेयलो अम्बजे लागिने ङ र ख्यङ्।” 39#मत्ती 4:23; 9:35होर्दे गालीलजे का-मुलुकने ख्यब यहूदीजे सभा-कीम्यूने येशू गीलीदेबे परमेश्वरजे पो स्य्वेदे स्य्वेदे मेस्ये छेत्यू फीने योने-योने गीलीदे।
कुष्ठ-बीदजे नव तम् चीक्कब
मत्ती ८:१-४; लूका ५:१२-१६
40कुष्ठ-बीद लादीकब नव त्या येशू ट्याने रदे मेस्ये पूजी चोदेबे बिन्ती चीत्दे, “नदे तम् चीम्मेस्ये मन्लो ङ तम् क्यूर खूइय।”
41येशूदे हम्ब कुष्ठ-बीद लादीकब नवने सोरो ङ्येम्देबे ङूदे रङ्से लादे हम्ब नवने छूत्देबे यदे, “ङ सेम् चीक्क्य, न तम् क्यूप्प।” 42हन्छ्वाबने ङूजे कुष्ठ-बीद मैली, मेस्ये ङू तम् क्यूरी।
43येशूदे ङूने बोङ्बे आर्तीदेबे छाट्टे कूल्बीदे, 44#लेवी 14:1-32“ले, नदे अम्ब पो सूनेये अन्स्योल्लाची, तर रङ्से प्रदेबे पूस्र्या ट्याने तम्ब मेस्ये प्रमाणजे लागि न तम् क्यूरे ख्यङ् यदेबे मीयूने तम्ब मोशाजे आज्ञाने ख्यप्रने बलि चेर्दी।” 45तर ङू योङ्देबे गीली, होर्दे कुष्ठ-बीद तम् क्यूरेब पो ड्वाङ्गे चीप्पीदे, होरेक्यूत्देबे येशू ङ्येदे सहरने तङ्लाबे र अङ्ख्व क्यूरी, मेस्ये मीयू त्वब नेतेले टूङ्दे। तर मीयू का-मुलुकदेने ङूट्याने रदे।
Currently Selected:
मर्कूस 1: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
