Yauhaas 3

Yexus Hab Nikaudemaus

1Cov Yudais muaj ib tug thawjcoj hu ua Nikaudemaus, nwg yog ib tug huv cov Falixais. 2Muaj ib mos nwg tuaj cuag Yexus hab has rua Yexus has tas, “Lanpis, peb paub tas Koj yog tug xwbfwb kws lug ntawm Vaajtswv lug. Vim tsi muaj leejtwg yuav ua tau tej txujci tseemceeb kws Koj ua nuav, tsuas yog tug kws Vaajtswv nrugnraim xwb txhaj ua tau.”

3Yexus teb tas, “Kuv qha tseeb rua koj has tas: yog leejtwg tsi yug dlua tshab,#3:3: dlua tshab lossis lug sau ntuj lug. tug ntawd yuav tsi pum Vaajtswv lub Tebchaws le.”

4Nikaudemaus nug Yexus has tas, “Ib tug tuabneeg kws tub laug lawm, yuav ua lecaag rov yug dlua tshab tau? Nwg yeej yuav moog tsi tau rua huv nwg nam plaab hab rov yug dlua zag thib ob hlo le!”

5Yexus teb tas, “Kuv qha tseeb rua koj has tas, yog leejtwg tsi yug lug ntawm dlej hab ntawm Vaaj Ntsujplig, tug ntawd yuav moog tsi tau Vaajtswv lub Tebchaws le. 6Tug kws yug lug ntawm saab nqajtawv yeej yog nqajtawv, tabsis tug kws yug lug ntawm Vaaj Ntsujplig yog ntsujplig. 7Koj tsi xob nyuajsab rua tej lug kws Kuv has rua koj has tas, mej yuavtsum yug dlua tshab.#3:7: dlua tshab lossis lug sau ntuj lug. 8Cua yuav ntsawj moog saab twg los yeej tau; koj nov cov cua ntawd lub suab, tabsis koj yeej tsi paub tas sov cua tuaj qhovtwg tuaj hab yuav moog rua qhovtwg. Txhua tug kws yug huv Vaaj Ntsujplig tes zoo ib yaam nkaus le ntawd.”

9Nikaudemaus nug has tas, “Yuav ua lecaag txhaj ua tau le ko?”

10Yexus teb tas, “Koj tub yog cov Yixalayees ib tug xwbfwb, ua lecaag koj tseem tsi totaub tej nuav hab? 11Kuv qha tseeb rua koj has tas: peb has tej kws peb paub hab tshaabxu txug tej kws peb pum, txawm le ntawd los mej yeej tsi muaj ib tug ntseeg tej lug kws peb has le. 12Kuv qha txug tej kws nyob huv lub nplajteb nuav xwb, mej tub tsi ntseeg; yogle ntawd, mej yuav ua lecaag ntseeg Kuv yog Kuv qha txug tej kws nyob sau ntuj ceebtsheej? 13Hab yeej tsi tau muaj dlua leejtwg moog txug sau ntuj ceebtsheej le, tsuas yog Tuabneeg Leejtub xwb, txhaj yog tug kws nqeg sau ntuj ceebtsheej lug.”#3:13: cov lug kws Yexus has nuav, has moog txug rua nqai 21 los tau.

14Mauxes tsaa tug naab tooj rua sau tug ncej tom taj suabpuam lecaag, Tuabneeg Leejtub yuav raug muab tsaa ib yaam le ntawd, 15sub txhua tug kws ntseeg Nwg txhaj yuav tau txujsa ntev dlhawv moog ibtxhis. 16Ruaqhov Vaajtswv hlub tuabneeg nplajteb kawg le, Nwg txhaj tau pub Nwg tuableeg Tub, kuas txhua tug kws ntseeg Nwg Leejtub txhaj tsi tuag, tabsis tau txujsa ntev dlhawv moog ibtxhis. 17Qhov kws Vaajtswv khaiv Nwg Leejtub lug rua huv nplajteb, tsi yog lug txavtxim rua nplajteb, tabsis lug ua nplajteb tug cawmseej.

18Cov kws ntseeg Leejtub yeej tsi raug txavtxim; tabsis cov kws tsi ntseeg tub raug txavtxim lawm, ruaqhov puab tsi ntseeg Vaajtswv tuableeg Tub. 19Qhov kev txavtxim ntawd yogle nuav: qhov kaaj tub lug rua huv lub nplajteb lawm, tabsis tuabneeg xum nyam qhov tsausntuj tshaaj le nyam qhov kaaj, ruaqhov puab nyam ua phem ua qas. 20Cov kws nyam ua phem ua qas yeej ntxub qhov kaaj hab tsi kaam lug nyob rua ntawm qhov kaaj, ruaqhov puab tsi xaav kuas puab tej kev phem kev qas ntawd tshwm lug. 21Tabsis cov kws ua lawvle qhov tseeb yeej lug nyob rua ntawm qhov kaaj, sub qhov kaaj txhaj ci qha tau has tas tej kws puab ua yeej yog lawvle Vaajtswv lub sab nyam.

Yexus Hab Yauhaas

22Dlhau ntawd, Yexus hab Nwg cov thwjtim moog rua ntawm lub xeev Yudas, Nwg nrug puab nyob ntawd tau ib ntus hab muab tuabneeg ua kevcai rausdlej. 23Yauhaas kuj taabtom muab tuabneeg ua kevcai rausdlej huv lub zog Ainoos kws nyob tsi dleb ntawm lub zog Xalimes, ruaqhov nyob rua thaaj chaw ntawd muaj dlej ntau. Tuabneeg najnub tuaj cuag Yauhaas kuas nwg muab puab ua kevcai rausdlej. ( 24Lub sijhawm nuav yog uantej kws Yauhaas raug coj moog kaw rua huv tsev lojcuj.) #Math 14:3; Malak 6:17; Lukas 3:19-20

25Yauhaas cov thwjtim qeeleej nrug ib tug tuabneeg Yudais#3:25: ib tug tuabneeg Yudais; tej phoo ntawv qub kws xuas teg sau, muaj Yudais qeeleej. siscaav has txug txuj kevcai ntxuav. 26Tes puab txhaj moog cuag Yauhaas hab has tas, “Xwbfwb, koj puas ncu tau tug txivneej kws nrug koj uake ntawm tug dlej Yauladees saab nubtuaj kws koj has txug ntawd? Taamsim nuav Nwg taabtom muab tuabneeg ua kevcai rausdlej, hab suavdlawg taabtom moog cuag Nwg!”

27Yauhaas teb tas, “Txhua yaam kws tuabneeg muaj puavleej yog Vaajtswv pub xwb. 28Mej yog kuv cov timkhawv kws nov kuv has tas, ‘Kuv tsi yog tug Mexiyas, tabsis kuv yog tug kws Vaajtswv khaiv ua Nwg ntej lug xwb.’ 29Tug nkaujnyaab yog tug nraugvauv le quaspuj; tabsis tug phijlaaj tsuas yog tug kws sawv ntawm ib saab hab noog xwb, thaus nwg nov tug nraugvauv tej lug, nwg zoosab heev. Qhov nuav yog qhov kws ua rua kuv txuj kev zoosab tavlog. 30Nwg yuavtsum luj zujzug tuaj, tabsis kuv yuavtsum yau zujzug moog.”

Tug Kws Lug Sau Ntuj Lug

31Tug kws lug sau ntuj lug, Nwg yeej luj dlua txhua yaam. Tug kws lug huv nplajteb lug, nwg yeej yog tuabneeg nplajteb hab has tuabneeg nplajteb zaaj, tabsis tug kws lug sau ntuj lug, Nwg muaj fwjchim luj dlua txhua yaam. 32Nwg ua timkhawv txug tej kws Nwg pum hab tej kws Nwg nov rua suavdlawg, tabsis tsi muaj leejtwg leeg yuav Nwg tej lug. 33Tabsis tug kws leeg yuav Nwg tej lug, tug ntawd yeej ua timkhawv tau has tas Vaajtswv yog tug ncaajnceeg. 34Tug kws Vaajtswv khaiv lug, Nwg yeej has Vaajtswv tej lug, ruaqhov Vaajtswv pub Vaajtswv tug Ntsujplig puvnpo rua Nwg. 35Leejtxiv hlub Nwg tug Tub kawg le hab muab ibpuas tsaavyaam tso rua Nwg kaav huv tuabsi. 36Tug kws ntseeg Leejtub, tug ntawd tau txujsa ntev dlhawv moog ibtxhis; tabsis tug kws tsi noog Leejtub tej lug, tug ntawd yuav tsi tau txujsa, Vaajtswv txuj kev chim yuav nyob rua huv tug ntawd moog le.

Currently Selected:

Yauhaas 3: HNJ2022

Highlight

Copy