Yauhaas 4

Yexus Hab Tug Quaspuj Xamalis

1Cov Falixais nov tas Yexus muaj thwjtim hab muab tuabneeg ua kevcai rausdlej coob dlua Yauhaas. ( 2Qhov tseeb tag, Yexus yeej tsi tau muab leejtwg ua kevcai rausdlej, tsuas yog Nwg cov thwjtim muab xwb.) 3Thaus Yexus nov le ntawd, Nwg txawm tawm huv xeev Yudas hab rovqaab moog rua peg xeev Kalilais; 4Txujkev kws Nwg yuav taug yuavtsum tau hlaa lub xeev Xamalis moog.

5Yexus moog txug ntawm ib lub nroog huv xeev Xamalis kws hu ua Xikhas, lub nroog ntawd nyob ze ntawm thaaj aav kws Yakhauj muab rua nwg tug tub Yauxej. #Chiv 33:19; Yaus 24:32 6Yakhauj lub qhovdlej kuj nyob rua ntawd, thaus Yexus taug kev lug Nwg lim heev, Nwg txhaj nyob quastsawg ntawm lub qhovdlej ntawd. Lub sijhawm ntawd yog thaus taavsu.

7Muaj ib tug quaspuj Xamalis tuaj nqaa dlej, Yexus has rua tug quaspuj ntawd tas, “Thov koj muab ib qhov dlej rua Kuv haus.” ( 8Yexus cov thwjtim moog yuav zaub-mov rua tom nroog lawm.)

9Tug quaspuj ntawd teb Yexus has tas, “Koj yog tuabneeg Yudais, hab kuv yog tuabneeg Xamalis, uacaag Koj laam thov dlej ntawm kuv haus?” (Cov Yudais yeej tsi laam siv tej khob hab tej taig kws cov Xamalis siv le.)#4:9: Cov Yudais yeej tsi laam siv tej khob hab tej taig kws cov Xamalis siv le; lossis Cov Yudais yeej tsi koom ib yaam dlaabtsi nrug cov Xamalis le. #Exala 4:1-5; Nehemi 4:1-2

10Yexus teb nwg has tas, “Yog koj paub yaam kws Vaajtswv pub, hab paub tug kws taabtom thov dlej ntawm koj haus, tes koj yeej yuav thov ntawm Nwg, hab Nwg yuav muab cov dlej kws muaj txujsa rua koj haus.”

11Tug quaspuj ntawd has tas, “Koj tub tsi muaj lub thoob ntaus dlej, hab lub qhovdlej nuav tub heev. Koj yuav muab cov dlej kws muaj txujsa qhovtwg lug? 12Peb yawmkoob Yakhauj yog tug kws muab lub qhovdlej nuav rua peb; nwg hab nwg cov tub hab nwg tej tsaj puavleej haus dlej huv lub qhovdlej nuav. Koj tseem luj dlua peb yawmkoob Yakhauj hab lov?”

13Yexus teb tas, “Txhua tug kws haus cov dlej nuav tseem yuav rov nqhes dlua, 14tabsis tug kws haus cov dlej kws Kuv yuav muab rua nwg, nwg yuav tsi rov nqhes dlua ib zag le lawm. Cov dlej kws Kuv muab rua nwg yuav dlhau moog ua cov dlej cawmsav txhawv huv nwg lub sab hab muab tau txujsa moog ibtxhis rua nwg.”

15Tug quaspuj ntawd has rua Yexus has tas, “Thov Koj muab cov dlej kws Koj has ko rua kuv! Sub kuv txhaj yuav tsi rov nqhes ib zag ntxiv le lawm hab txhaj tsi tau rov tuaj nqaa dlej huv lub qhovdlej nuav.”

16Yexus has rua nwg tas, “Koj cale moog hu koj tug quasyawg hab rov tuaj ntawm nuav.”

17Tug quaspuj ntawd teb tas, “Kuv tsi muaj quasyawg.”

Yexus has tas, “Qhov kws koj has tas koj tsi muaj quasyawg, koj has yog lawm. 18Koj tub yuav tsib tug quasyawg lug lawm, tug kws taamsim nuav koj nrug nyob ntawd yeej tsi yog koj tug quasyawg hab. Tej kws koj qha rua Kuv ntawd, koj has tseeb lawm.”

19Tug quaspuj ntawd has tas, “Kuv pum tas Koj yog ib tug xwbfwb cev Vaajtswv lug. 20Peb cov tuabneeg Xamalis cov yawmkoob ibtxwm pehawm Vaajtswv sau lub roob nuav, tabsis mej cov tuabneeg Yudais has tas huv lub nroog Yeluxalees txhaj yog lub chaw kws suavdlawg moog pehawm Vaajtswv.”

21Yexus has rua nwg tas, “Koj cale ntseeg Kuv tej lug, tub yuav txug lub sijhawm kws tuabneeg yuav tsi pehawm Leejtxiv sau lub roob nuav lossis nraag lub nroog Yeluxalees lawm. 22Mej cov tuabneeg Xamalis, mej tsi paub tas tug kws mej pehawm ntawd yog leejtwg; tabsis peb cov tuabneeg Yudais, peb paub tas tug kws peb pehawm ntawd yog leejtwg, ruaqhov txuj kev cawmdlim yog lug ntawm tsaav tuabneeg Yudais lug. 23Tabsis lub sijhawm ntawd taabtom lug hab tub lug txug ntawm nuav lawm, lug ntawm Vaajtswv tug Ntsujplig, tuabneeg yuav pehawm Leejtxiv ntawm saab ntsujplig hab qhov tseeb, ruaqhov Leejtxiv xaav kuas suavdlawg muaj nploojsab dlawbpaug pehawm Nwg tag. 24Vaajtswv yog Ntsujplig, cov kws pehawm Vaajtswv yuavtsum pehawm ntawm saab Ntsujplig hab qhov tseeb.”

25Tug quaspuj ntawd has rua Yexus has tas, “Kuv paub tas tug Mexiyas yuav lug, hab thaus Nwg lug lawm, Nwg yuav qha txhua yaam rua peb.”

26Yexus teb tas, “Kuv tug kws taabtom nrug koj thaam nuav yog tug ntawd ntaag.”

27Taamsim ntawd Yexus cov thwjtim txawm lug txug, puab pum Yexus nrug tug quaspuj ntawd thaam, puab xaav tsi thoob le. Tabsis tsi muaj ib tug nug has tas, “Koj xaav tau dlaabtsi?” Lossis, “Uacaag Koj nrug tug quaspuj ntawd thaam?”

28Tes tug quaspuj ntawd txawm muab nwg lub hub dlej tso plhuav tseg, nwg rovqaab moog rua tom nroog hab has rua cov tuabneeg tod has tas, 29“Mej cale moog saib ib tug txivneej kws Nwg qha txug txhua yaam kws kuv tau ua taag lug lawm huv tuabsi! Seb Nwg puas yog tug Mexiyas?” 30Tes suavdlawg txawm tawm zumzawg huv nroog tuaj saib Yexus.

31Thaus ntawd cov thwjtim has rua Yexus has tas, “Xwbfwb, cale lug noj mov tsaiv!”

32Tabsis Yexus teb tas, “Kuv tub muaj mov noj lawm, tej ntawd mej yeej tsi paub txug kag le.”

33Yogle ntawd, cov thwjtim txhaj sisnug has tas, “Puas yog leejtwg tub nqaa mov tuaj rua Nwg noj lawm?”

34Yexus has rua puab has tas, “Kuv tej mov yog ua lawvle tug kws khaiv Kuv lug lub sab nyam, hab ua tegnum kws nwg muab rua Kuv ua kuas tav. 35Muaj ib lulug kws mej txeev has tas, ‘Tshuav plaub hlis ntxiv maamle txug caij hlais nplej.’ Tabsis Kuv qha rua mej has tas, mej ua tuabzoo tsaa qhovmuag saib tej teb; nplej tub sav quas zab hab zoo hlais lawm! 36Tug kws hlais nplej tub tau nqezug lawm, hab tej kws nwg sau lug tub tau txujsa ntev dlhawv moog ibtxhis lawm; yog le, tug kws cog hab tug kws hlais obtug yuav zoosab kawg le. 37Lulug kws txeev has tas, ‘Muaj ib tug cog, hab muaj dlua ib tug hlais,’ lulug ntawd yeej muaj tseeb tag! 38Kuv tau khaiv mej moog hlais cov nplej huv dlaim teb kws tsi yog mej tug zug ua; dlaim teb ntawd yog lwmtug ua, tabsis mej tau sau tej kws yog lwmtug nqeg zug ua.”

39Cov tuabneeg Xamalis kws nyob huv lub nroog ntawd lug ntseeg Yexus coob heev, vim tug quaspuj ntawd ua timkhawv has tas, “Nwg qha kuv txug txhua yaam kws kuv tau ua taag lug lawm huv tuabsi.” 40Yogle ntawd, thaus cov tuabneeg Xamalis tuaj cuag Yexus, puab cheem kuas Nwg nrug puab nyob, tes Yexus txawm nyob ntawd tau ob nub.

41Muaj coob leej lug ntseeg Yexus ntxiv, vim Nwg tej lug qha, 42hab puab has rua tug quaspuj ntawd tas, “Nwgnuav peb ntseeg, tsi yog vim tej lug kws koj has, tabsis vim peb tau nov Nwg tej lug, hab peb paub tas Nwg yog tuabneeg nplajteb tug Cawmseej tag.”

Yexus Khu Tug Thawj Tubrog Tug Tub

43Tomqaab kws Yexus nyob ntawd tau ob nub, Nwg txawm tawm moog rua peg lub xeev Kalilais lawm. 44Yexus tau has tas, “Cov xwbfwb cev Vaajtswv lug yeej tsi raug fwm nyob rua huv puab lub tebchaws.” #Math 13:57; Malak 6:4; Lukas 4:24 45Thaus Yexus moog txug peg xeev Kalilais, suavdlawg tuaj txaistog Nwg, ruaqhov puab tau moog ua kevcai Hlaa Dlhau nraag lub nroog Yeluxalees, puab tau pum txhua yaam kws Nwg ua nyob rua nraag. #Yauh 2:23

46Tes Yexus txawm rovqaab moog rua huv lub zog Kanas, xeev Kalilais kws thau Yexus muab dlej txa ua cawv txivmaab. Muaj ib tug nom nyob huv lub nroog Kapena-us, nwg tug tub tau mob. #Yauh 2:1-11 47Thaus nwg nov tas Yexus rovqaab nraag xeev Yudas lug txug rua huv xeev Kalilais lawm, nwg txhaj moog cuag Yexus hab thov kuas Yexus moog rua Kapena-us hab moog khu nwg tug tub kws taabtom mob heev tub yuav tuag. 48Yexus has rua tug nom ntawd tas “Yog mej tsi pum tej txujci tseemceeb, mas mej yeej tsi muaj ib tug kws yuav ntseeg le.”

49Tug nom ntawd has rua Yexus tas, “Tug tswv, tsheem kuv tug tub tseem tsi tau tuag, thov Koj cale nrug kuv moog!”

50Yexus has rua nwg tas, “Koj cale rov moog tsev, koj tug tub yuav tsi tuag!”

Tug txivneej ntawd ntseeg Yexus tej lug, nwg txawm rovqaab moog tsev lawm. 51Thaus nwg taabtom taug kev moog tsev, nwg cov tubqhe tuaj tog nwg hab qha rua nwg has tas, “Koj tug tub tub zoo lawm.”

52Nwg nug puab has tas thaus twg nwg tug tub pib zoo zujzug tuaj? Puab teb tas, “Naagmo thaus ib teev yaav taavsu dlua, tes nwg tug npaws txawm tu lawm.” 53Tes leejtxiv ncu tau has tas, thaus ntawd yog lub sijhawm kws Yexus has rua nwg tas, “Koj tug tub yuav tsi tuag.” Yogle ntawd, nwg hab nwg tsev tuabneeg txhaj lug ntseeg Yexus.

54Txij thaus Yexus rov nraag xeev Yudas lug txug rua huv xeev Kalilais, Nwg ua txujci tseemceeb ob zag rua zag nuav.

Currently Selected:

Yauhaas 4: HNJ2022

Highlight

Copy