Lukas 17
17
Kev Txhum
(Mathais 18.6-7,21-22; Malakaus 9.42)
1Yexus has rua nwg cov thwjtim has tas, “Ua le caag los yeej yuav muaj ib yaam ua rua tuabneeg ua txhum, tabsis tug kws ua yaam ntawd, nwg yuav raug kev puamtsuaj! 2Yog tug ntawd ua rua cov mivnyuas nuav ib tug ua txhum, ca le muab hlua khi ib txhib zeb kws luj dlai rua tug ntawd cejdlaab hab coj nwg moog pov rua huv havtxwv yuav zoo dlua! 3Yog le ntawd, mej yuavtsum ceevfaaj zoo! #Mat 18.15
“Yog koj pum koj ib tug kwvtij ua txhum rua koj, koj yuavtsum ntuag nwg. Yog nwg leeg nwg tej kev txhum lawm, koj ca le zaam txim rua nwg. 4Yog ib nub nwg ua txhum rua koj xyaa zag, hab txhua zag kws nwg tuaj leeg rua koj has tas, ‘Kuv ua txhum lawm,’ koj yuavtsum zaam txim rua nwg.”
Kev Ntseeg
5Cov timthawj has rua Yexus has tas, “Thov koj paab kuas peb muab sab rau ntseeg ntxiv.”
6Tug Tswv has rua puab tas, “Yog mej muaj kev ntseeg luaj le lub noob zaub, mej yuav has rua tsob ntoo zaub kaab nuav has tas, ‘Koj ca le rhu hlo moog cog rua huv havtxwv,’ ces tsob ntoo zaub kaab ntawd yuav noog mej has.
Tug Tubkhai Teg Num
7“Mej cov yog leejtwg muaj ib tug tubkhai moog laij lag lossis moog yug yaaj lawm, thaus nwg rov qaab nraag laj lug, mej puas yuav has rua tug tubkhai ntawd tas, ‘Koj ca le lug noj mov?’ 8Mej yeej yuav tsi has le ntawd! Mej yuav has rua nwg tas, ‘Ca le tu cev khov kho moog ua mov rua kuv noj, thaus kuv noj kuv haus taag; koj maam le noj.’ 9Txawm yog tug tubkhai ua lawv le mej has los tsi taag mej yuav ua nwg tsaug. 10Mej cov los kuj ib yaam nkaus; thaus mej ua lawv le kuv kuas mej ua taag lawm, mej ca le has tas, ‘Peb yog cov tubkhai kws tsi tseemceeb dlaabtsi le, peb tsuas ua lawv le peb teg num xwb.’ ”
Yexus Khu Kaum tug Mob Ruas
11Thaus Yexus moog nraag lub nroog Yeluxalees, nwg hlaa lub xeev Kalilais moog. 12Thaus nwg taabtom yuav moog rua huv ib lub zog, nwg ntsib kaum tug mob ruas. Puab sawv dleb dleb 13hab hu nrov nrov has tas, “Tswv Yexus! Thov koj hlub peb!”
14Thaus Yexus pum dlheev puab, nwg has rua puab tas, “Mej ca le moog cuag cov povthawj kuas puab saib mej.”#Lek 14.1-32
Thaus cov tuabneeg mob ruas ntawd taabtom moog, puab tej ruas tub zoo lawm.#17.14 Tub zoo lawm: Saib 5.12. 15Puab cov ntawd muaj ib tug pum has tas, nwg tej ruas zoo taag lawm, nwg txawm rov qaab lug hab has nrov nrov ua Vaajtswv tsaug. 16Nwg txhus caug ndlua ntawm Yexus kutaw ua Yexus tsaug. Tug ntawd yog tuabneeg Xamalis. 17Yexus has tas, “Kaum leej tub zoo huv tuabsi lawm; cuaj leeg dlua twg taag lawm? 18Vim le caag tsuas muaj tuab leeg kws yog lwm Tsaav tuabneeg lug ua Vaajtswv tsaug xwb?” 19Hab Yexus has rua tug ntawd tas, “Koj ca le sawv tseeg moog tsev; koj txujkev ntseeg tub ua rua koj tej ruas zoo lawm.”
Vaajtswv Lub Tebchaws Yuav Lug
(Mathais 24.23-28,37-41)
20Cov Falixais muaj qee leej nug Yexus has tas, thaus twg Vaajtswv lub Tebchaws maam le lug? Yexus teb has tas, “Thaus kws Vaajtswv lub tebchaws lug, yuav tsi muaj ib yaam dlaabtsi qha rua leejtwg paub. 21Tsi muaj leejtwg yuav has tas, ‘Mej saib, nwg nyob ntawm nuav’ lossis ‘Nyob tod!’; Rua qhov Vaajtswv lub Tebchaws tub lug lawm.”#17.21 tub lug lawm; lossis nyob nruab nraab ntawm mej; lossis yuav ca le tshwm lug rua ntawm mej.
22Yexus has rua cov thwjtim has tas, “Yeej yuav muaj ib lub sijhawm kws mej xaav pum nub kws Tuabneeg Leej Tub rov lug, tabsis mej yuav tsi pum. 23Yuav muaj tuabneeg has rua mej has tas, ‘Mej moog saib tod!’ lossis ‘Mej lug saib ntawm nuav!’ Tabsis mej tsi xob moog saib. 24Nub kws Tuabneeg Leej Tub lug, yuav muaj tsaglig xub laim sau nruab ntug, ib saab ntuj moog rua ib saab ntuj. 25Tabsis ua ntej ntawd, nwg tub xub raug kev tsimtxom ntau yaam hab cov tuabneeg tam nuav tsi leeg yuav nwg. 26Tam kws Nau-es ua neej nyob zoo le caag, lub sijhawm kws Tuabneeg Leej Tub lug yuav zoo ib yaam nkaus le ntawd.#Chk 6.5-8 27Tej tuabneeg suavdlawg naj nub noj haus, ua tshoob ua kug moog txug nub kws Nau-es nce moog rua huv nkoj, hab dlej lug nyaab tej tuabneeg ntawd tuag taag huv tuabsi.#Chk 7.6-24 28Lub sijhawm kws Tuabneeg Leej Tub lug yuav zoo ib yaam le tam kws Lauj nyob. Tej tuabneeg suavdlawg naj nub ua noj ua haus, ua laag ua luam, ua laj ua teb, hab ua vaaj ua tsev.#Chk 18.20–19.25 29Nub kws Lauj tawm huv lub nroog Xaudoos moog, txawm muaj nplaim tawg hab leejfaaj poob sau ntuj lug kub tej tuabneeg tuag taag huv tuabsi. 30Nub kws Tuabneeg Leej Tub lug, yuav zoo ib yaam nkaus le ntawd.
31“Nub ntawd tug kws nyob nrau zoov, tsi xob moog nqaa nwg tej qhov txhua chaw huv tsev; ib yaam le ntawd, tug kws moog rua tom teb lawm, tsi xob rov qaab lug rua huv tsev.#Mat 24.17-18; Mak 13.15-16 32Mej yuavtsum ncu ntsoov txug Lauj tug quaspuj! #Chk 19.26 33Tug kws khauvxwm nwg txujsa, tug ntawd yuav tsi tau txujsa; tug kws tsi khauvxwm nwg txujsa, tug ntawd yuav tau txujsa.#Mat 10.39; 16.25; Mak 8.35; Luk 9.24; Yhs 12.25 34Kuv qha rua mej has tas mo ntawd, ob tug tuabneeg kws pw ib txaag, yuav coj ib tug moog, tseg ib tug ca. 35Ob tug quaspuj kws zum zeb ua ke: yuav coj ib tug moog, tseg ib tug ca 36[Ob tug txivneej kws nyob tom teb, yuav coj ib tug moog, tseg ib tug ca.]”#17.36 Phoo (Good News Bible) tsi tso nqai 36 rua, (saib Mathais 24.40).
37Cov thwjtim nug Yexus has tas, “Tug Tswv, yuav muaj le ntawd nyob rua qhov twg?”
Yexus teb has tas, “Cev tuag nyob qhov twg, dlaav npoj yuav sau nthwv moog rua qhov ntawd.”
Currently Selected:
Lukas 17: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
