ປະຖົມມະການ 17
17
ພິທີຕັດເປັນໝາຍສຳຄັນແຫ່ງພັນທະສັນຍາ
1ເມື່ອອັບຣາມອາຍຸໄດ້ 99 ປີ; ພຣະເຈົ້າຢາເວໄດ້ປາກົດແກ່ເພິ່ນ ແລະກ່າວວ່າ, “ເຮົາເປັນພຣະເຈົ້າອົງຊົງຣິດອຳນາດຍິ່ງໃຫຍ່. ຈົ່ງເຊື່ອຟັງເຮົາ ແລະປະພຶດແຕ່ສິ່ງທີ່ຊອບທຳ. 2ເຮົາຈະເຮັດພັນທະສັນຍາກັບເຈົ້າ ແລະຈະໃຫ້ເຈົ້າມີເຊື້ອສາຍຢ່າງຫລວງຫລາຍ.” 3ອັບຣາມກົ້ມຂາບລົງທີ່ພື້ນດິນ ແລະພຣະເຈົ້າກ່າວວ່າ, 4“ນີ້ແມ່ນພັນທະສັນຍາທີ່ເຮົາເຮັດກັບເຈົ້າຄື: ເຮົາສັນຍາວ່າ ເຈົ້າຈະເປັນບັນພະບຸລຸດຂອງຊົນຊາດທັງຫລາຍ. 5ຊື່ເຈົ້າຈະບໍ່ແມ່ນອັບຣາມອີກຕໍ່ໄປ, ແຕ່ເຈົ້າຈະມີຊື່ໃໝ່ວ່າ ອັບຣາຮາມ ເພາະເຮົາກຳລັງໃຫ້ເຈົ້າເປັນບັນພະບຸລຸດຂອງຫລາຍໆຊົນຊາດ. 6ເຮົາຈະໃຫ້ເຈົ້າມີເຊື້ອສາຍຢ່າງຫລວງຫລາຍ ແລະບາງຄົນໃນເຊື້ອສາຍນັ້ນຈະເປັນເຖິງກະສັດ. ເຈົ້າຈະມີເຊື້ອສາຍຢ່າງຫລວງຫລາຍ ຈົນກາຍເປັນປະຊາຊາດຕ່າງໆ.
7ເຮົາຈະຕັ້ງພັນທະສັນຍາລະຫວ່າງເຮົາ ກັບເຈົ້າ ແລະເຊື້ອສາຍຂອງເຈົ້າ ໃຫ້ເປັນພັນທະສັນຍາສືບໄປສຳລັບຄົນເຊັ່ນຕໍ່ໆໄປ. ເຮົາຈະເປັນພຣະເຈົ້າຂອງເຈົ້າ ແລະພຣະເຈົ້າຂອງເຊື້ອສາຍຂອງເຈົ້າ. 8ເຮົາຈະມອບດິນແດນ ທີ່ເຈົ້າອາໄສຢູ່ປັດຈຸບັນໃນຖານະເປັນຄົນຕ່າງດ້າວນີ້ ໃຫ້ແກ່ເຈົ້າແລະເຊື້ອສາຍຂອງພວກເຈົ້າ. ດິນແດນການາອານທັງໝົດ ຈະເປັນຂອງພວກເຈົ້າຕະຫລອດໄປ ແລະເຮົາຈະເປັນພຣະເຈົ້າຂອງພວກເຂົາ.”
9ພຣະເຈົ້າໄດ້ກ່າວແກ່ອັບຣາຮາມວ່າ, “ເຈົ້າເອງ ແລະເຊື້ອສາຍຂອງເຈົ້າເຊັ່ນຕໍ່ໄປກໍດີ ຈົ່ງຮັກສາພັນທະສັນຍາທີ່ເຈົ້າມີໄວ້ກັບເຮົາ. 10ນີ້ຄືພັນທະສັນຍາຂອງເຮົາທີ່ມີຕໍ່ເຈົ້າກັບເຊື້ອສາຍຂອງເຈົ້າຕ້ອງຮັກສາ ຄືໃຫ້ຜູ້ຊາຍທຸກຄົນຈະຕ້ອງ ເຮັດພິທີຕັດ. 11ຕັ້ງແຕ່ນີ້ຕໍ່ໄປ ເຈົ້າຈົ່ງເຮັດພິທີຕັດ ມັນຈະເປັນໝາຍສຳຄັນ ລະຫວ່າງເຮົາກັບເຈົ້າ 12ຜູ້ຊາຍທຸກຄົນເມື່ອເຂົາອາຍຸໄດ້ແປດວັນ. ໃຫ້ເຮັດພິທີຕັດ ລວມທັງຄົນຮັບໃຊ້ຜູ້ທີ່ເກີດໃນຄອບຄົວຂອງເຈົ້າ ແລະຜູ້ທີ່ຖືກຊື້ມາຈາກຊາວຕ່າງດ້າວ. ການກະທຳເຊັ່ນນີ້ ຈະສະແດງເຖິງພັນທະສັນຍາລະຫວ່າງເຈົ້າກັບເຮົາ. 13ແຕ່ລະຄົນຕ້ອງເຮັດພິທີຕັດ ແລະຈະຕ້ອງໝາຍໄວ້ໃນຮ່າງກາຍ ເພື່ອສະແດງວ່າພັນທະສັນຍາຂອງເຮົານັ້ນດຳລົງຢູ່ສືບໄປ. 14ຊາຍຄົນໃດທີ່ບໍ່ຍອມເຮັດພິທີຕັດ ຊາຍຄົນນັ້ນກໍຈະຖືກຕັດອອກຈາກພີ່ນ້ອງຂອງຕົນ ເພາະລາວບໍ່ຮັກສາພັນທະສັນຍາທີ່ໄດ້ມີໄວ້ກັບເຮົາ.”
15ພຣະເຈົ້າຍັງບອກອັບຣາຮາມຕື່ມວ່າ, “ສ່ວນນາງຊາຣາຍເມຍຂອງເຈົ້ານັ້ນ ເຈົ້າຢ່າເອີ້ນນາງຊາຣາຍອີກຕໍ່ໄປ ເພາະ ຊື່ຂອງນາງແມ່ນຊາຣາ. 16ເຮົາຈະອວຍພອນນາງໃຫ້ມີລູກຊາຍຜູ້ໜຶ່ງ ແລະຈະອວຍພອນນາງໃຫ້ເປັນແມ່ຂອງຊົນຊາດທັງຫລາຍ ຈົນກະສັດຫລາຍຄົນຈະມາຈາກເຊື້ອສາຍຂອງນາງ.”
17ອັບຣາຮາມກົ້ມຂາບລົງຍິ້ມຢູ່ໃນໃຈ ແລະເວົ້າວ່າ, “ຄົນອາຍຸໜຶ່ງຮ້ອຍປີແລ້ວ ຈະມີລູກໄດ້ຈັ່ງໃດ? ແລະຊາຣາກໍອາຍຸເກົ້າສິບປີແລ້ວ ນາງຍັງຈະມີລູກໄດ້ຢູ່ບໍ?” 18ອັບຣາຮາມໄດ້ກ່າວຕໍ່ພຣະເຈົ້າວ່າ, “ຂໍໃຫ້ອິດຊະມາເອນມີຊີວິດຢູ່ຕໍ່ພຣະພັກຂອງພຣະອົງ!”
19ແຕ່ພຣະເຈົ້າໄດ້ກ່າວວ່າ, “ບໍ່, ແມ່ນຊາຣາເມຍຂອງເຈົ້າເອງ ທີ່ຈະເກີດລູກຊາຍໃຫ້ເຈົ້າ ແລະຈົ່ງໃສ່ຊື່ເດັກນັ້ນວ່າ ອີຊາກ. ເຮົາຈະຮັກສາພັນທະສັນຍາຂອງເຮົາໄວ້ກັບລາວ ແລະກັບເຊື້ອສາຍຂອງລາວຕະຫລອດໄປ. ມັນເປັນພັນທະສັນຍາອັນຕະຫລອດໄປ. 20ເຮົາໄດ້ຍິນເຈົ້າຂໍຮ້ອງກ່ຽວກັບອິດຊະມາເອນ; ເຮົາຈະອວຍພອນລາວແລະໃຫ້ລາວມີລູກຫລາຍຄົນ ແລະທັງມີເຊື້ອສາຍຢ່າງຫລວງຫລາຍ. ລາວຈະເປັນພໍ່ຂອງເຈົ້າຊາຍສິບສອງຄົນ ແລະເຊື້ອສາຍຂອງລາວກໍຈະກາຍເປັນປະເທດທີ່ຍິ່ງໃຫຍ່. 21ແຕ່ເຮົາຈະຮັກສາພັນທະສັນຍາຂອງເຮົາກັບອີຊາກ ລູກຊາຍຂອງເຈົ້າ ຜູ້ທີ່ຈະເກີດຈາກຊາຣາໃນທ້າຍປີໜ້າລະຫວ່າງລະດູນີ້.” 22ເມື່ອພຣະເຈົ້າກ່າວແກ່ອັບຣາຮາມແລ້ວໆ ພຣະອົງກໍຈາກເພິ່ນໄປ.
23ເພື່ອເຮັດຕາມທີ່ພຣະເຈົ້າໄດ້ສັ່ງໄວ້ໃນມື້ດຽວກັນນັ້ນ; ອັບຣາຮາມກໍເຮັດພິທີຕັດໃຫ້ແກ່ອິດຊະມາເອນ ພ້ອມທັງຄົນຮັບໃຊ້ທຸກໆຄົນກັບຜູ້ທີ່ເກີດໃນເຮືອນ ແລະຜູ້ທີ່ໄດ້ຖືກຊື້ມາ. 24ອັບຣາຮາມເຮັດພິທີຕັດ ເມື່ອເພິ່ນມີອາຍຸເກົ້າສິບເກົ້າປີ 25ແລະອິດຊະມາເອນກໍເຮັດພິທີຕັດ ເມື່ອລາວອາຍຸສິບສາມປີ. 26ພວກເຂົາທັງສອງເຮັດພິທີຕັດໃນມື້ດຽວກັນ 27ຮ່ວມກັບພວກຄົນຮັບໃຊ້ທຸກຄົນຂອງອັບຣາຮາມ.
Currently Selected:
ປະຖົມມະການ 17: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
