Mark 2

Faŋ Yeso nə shuꞌ wə faŋ way ŋwaa wi nə ku muꞌ

(Matiu 9.1-8; Lukas 5.17-26)

1Vəshi vəmɔ́ꞌ kɨ shɔɔ, Yeso bəŋ gə zìꞌ ntɨꞌ Kapernaum. Vɨɨ zɔ laa ŋwə lùu shɔ taa ŋii, 2vəŋ baytə shəŋ kɔ́ vəyaŋ yɨ ŋwə. Shəŋ nə kee baa lùu shɔ tɨ́ vɨɨ mɔ́ꞌ me, gə ziꞌ fu shuufɔ. Ŋwə nə fɨꞌtə nu Nwi tɨ́ vəŋ. 3Vɨɨ mɔ́ꞌ kɨ nii jwì nə wə tɨ́ ŋwə, faŋ way ŋwaa wi nə ku muꞌ. Vɨɨ yishwe nə shàꞌ ŋwə, jwì, 4kee yè jɨɨ shɔɔ gə yɨ Yeso me, buꞌ faŋ vɨɨ nə yàŋ dɨdɨꞌ nə. Vəŋ kee yè jɨɨ me, kòꞌ tɔ ŋii njyə faŋ Yeso nə luu tey yi nə, tɔ̀ ŋɔŋ tɔ ŋii yɔ́, shàꞌ wə ghɔ́ sheꞌ fuu kɨŋ ŋkɨə faŋ vəŋ nə jwì nə ŋwə fuu yi nə, sùꞌsə ŋwə taa ŋii. 5Yeso ye faŋ vəŋ nə nùŋ fwi vəŋ maa ŋwə, gì tɨ́ wə ghɔ́ faŋ ŋwaa wi nə kù way muꞌ nə laa, «Ŋwiŋ ŋwaa, mə naysə tɨ́ ghɔ laa yibɨsə yə mè.» 6Vɨɨ mɔ́ꞌ fɨ taa nwaa vɨɨ mədeesə ŋwaꞌlə Nwi, faŋ vəŋ nə luu yifi, zɔ, bɨꞌtə fɨ taa fwisə vəŋ laa, 7«Wə ŋwə̀ sii gì tɨ́ nee buꞌ kə? Ŋwə taw Nwi, ndì nshɨ-tɔ wi yaa Nwi. Kìi ndə kìi wutə maa məndenə yibɨsə vɨɨ? Maa kii sheꞌ Nwi nɨnɔŋ.» 8Sheꞌ yighee muꞌ Yeso kɨɨ fɨ taa fwi ŋwə laa vəŋ bɨꞌtə nɨniŋ. Ŋwə gi tɨ́ vəŋ laa, «Viŋ sii bɨ̀ꞌtə nu kə̀ taa fwisə viŋ buꞌ kə? 9Sii yàysə kə, maa məgi tɨ́ wə faŋ ŋwaa wi kù way muꞌ laa, vənu vəbwəvə vi me, mu maa məgi tɨ́ ŋwə laa ŋwə ndɔ fɨ nsi, tɨ̀ŋnə, shàꞌ kɨŋ ki, kɨ toꞌ? 10Nɨniŋ, bàw laa viŋ kɨɨ laa Nwi nùŋsə mə, faŋ mə nə jwi mbi gù wə, laa mə ndisə nu bwə faŋ ŋkə lùu maa vɨɨ shɨ nsi. Mə taa yɨ nu weꞌ kɔ́ nɨzi, tɨ́ kɨ kaꞌ viŋ kɨ̀ɨ.» 11Ŋwə kɨ nii gì tɨ́ wə ntɨə faŋ ŋwaa wi nə kù way muꞌ nə laa, «Mə gì tɨ́ ghɔ, ndɔ̀ yizɔ, shàꞌ kɨŋ kə, kɨ gə shiŋii!» 12Wə ghɔ́ ndɔ tɨ̀ŋnə, shàꞌ kɨŋ ki kɔ́ yighee muꞌ, fuu fu sɨ vɨɨ vənshə. Nu kɔ́ ghɔꞌ vɨɨ vənshə. Vəŋ bəŋsə yizii Nwi, gì laa, «Yia nə kee ta yè kwiŋ nu kə̀ me.»

Faŋ Yeso nə tìi Levi

(Matiu 9.9-13; Lukas 5.27-32)

13Yeso baa kɨ nii fùu gə̀ mbɨɨ maghia. Vɨɨ vəyaŋ shəŋtə yɨ ŋwə. Ŋwə deesə nu Nwi tɨ́ vəŋ, 14shɔ̀ɔ kii gə, yè Levi, wee Alfeɔs, faŋ ŋwə nə dùꞌ shuu ŋii məsa vətɔ. Yeso gi tɨ́ ŋwə laa, «Beꞌsə mə!» Levi ndɔ fɨ nsi, bèꞌsə Yeso. 15Ŋwə gə dùꞌ taa ŋii Levi, kɨ zɨ shɔ. Vɨɨ məsa vətɔ nə vɨɨ məyɨ vənu vəbwəvə jwi shɔ vəyaŋ nɨzi, kɨ zɨ ghɔ vɨ Yeso nə vɨɨ məzwetə nu ki , buꞌ laa kəŋ vɨɨ vɔ́ vəyaŋ nəə beꞌsə Yeso. 16Vɨɨ mədeesə ŋwaꞌlə Nwi nə vɨɨ fɨ taa nwaa vɨɨ Farisii ye laa ŋwə zɨ ghɔ vɨ vɨɨ məsa vətɔ nə vəyɨ-kəbwə, vəŋ gi tɨ́ vɨɨ məzwetə nu Yeso laa, «Sii yɨ̀ kə buu Yeso kɨ zɨ ghɔ vɨ vɨɨ məsa vətɔ nə vəyɨ-kəbwə?» 17Yeso zɔ yigisə vəŋ yɔ́, bə̀ŋsə tɨ́ vəŋ laa, «Vɨɨ mbɨə faŋ vəŋ lùu vətaa, kee yaa kɨ kəə tɨɨ ŋay me. Kəə sheꞌ vɨɨ mbɨə faŋ vəŋ zɨzasə kəə tɨɨ ŋay. Sheꞌ nee, mə kee jwì luu tɨ́ vɨɨ mbɨə faŋ vənu vəvəŋ luu vəloomə me. Mə jwì tii luu vəyɨ-kəbwə laa vəŋ kwiinə fwisə vəŋ.»

Faŋ Yeso nə gì kɔŋ nu məbaŋ fazɨ

(Matiu 9.14-17; Lukas 5.33-39)

18Nə luu maa yighee njyə faŋ vɨɨ məzwetə nu Jɔn nə vɨɨ Farisii nəə baŋ fazɨ, vɨɨ jwi yɨ Yeso, bìtə tɨ́ ŋwə laa, «Sii yɨ̀ kə, vɨɨ məzwetə nu Jɔn nə vɨɨ məzwetə nu vɨɨ Farisii baŋ fazɨ; vɨɨ məzwetə nu kə kee baŋ fazɨ me?» 19Yeso bəŋsə tɨ́ vəŋ, nàysə tɨ́ vəŋ maa yigisə tii kɔŋ nshɨ-tɔ wi nə vɨɨ vi laa, «Kɨ kaꞌ vɨɨ gə̀ maa məzɨ məndaa, gə̀ dùꞌ ghɔ vɨ wəndɔŋ məndaa, kɨ baŋ fazɨ mu? - Kaꞌ vəŋ kee bàŋ fazɨ faŋ ghɔ vɨ wəndɔŋ məndaa lùu mɔ́ꞌ me. 20Yighee ndɔ jwi faŋ Nwi ndɔ fi wəndɔŋ məndaa ghɔ́ fɨ ghɔ vəŋ. Ŋkə ndɔ luu maa shi kɔ́, vəŋ ndɔ baŋ fazɨ.» 21Yeso baa gì tɨ́ vəŋ laa, «Wə kee yaa kɨ ndi waytə njwi faŋ ŋkə kɨ bii kəfi, faŋ vɨ kee ta yisɔ me, gə̀ tà maa njwi yimwa. Kɨ ghaŋ ŋwə yɨ nɨniŋ, buu way fi kɔ́ taa shəŋtə sà njwi yimwa yɔ́, nyə bɨ shɔ̀ɔ faŋ nyə yaa dùꞌ.» 22Baa nə laa, «Wə kee yaa kɨ ndi məluꞌ məfimə, kwaŋ taa ntiasə məluꞌ məmwamə me. Kɨ ghaŋ ŋwə yɨ nɨniŋ, məluꞌ mbɔ́ taa twelə ntiasə sɔ́, fùu ndì; ntiasə sɔ́ bɨ nɨzi. Məluꞌ məfimə bàw sheꞌ taa ntiasə fisə.» (Yeso nə gì nɨniŋ maa mədə laa ŋkə kee yikuꞌnə maa məwasə nshinə yifi vɨɨ Nwi nə nshinə yimwa vɨɨ fɨ mbi me.)

Faŋ Yeso nə gì kɔŋ shi zwisə Nwi

(Matiu 12.1-8; Lukas 6.1-5)

23Kɨ luu shi mɔ́ꞌ faŋ nə luu shi zwisə Nwi, Yeso ghɔ vɨ vɨɨ məzwetə nu ki shɔɔ fɨ taa ndɨɨsə say. Vɨɨ məzwetə nu Yeso vɔ́ toꞌ, bɨꞌtə fɨ maa say ghɔ́, kwə. 24Vɨɨ Farisii jwi gì tɨ́ Yeso laa, «Sii yɨ̀ kə, vɨɨ məzwetə nu kə faꞌ faꞌ faŋ ŋkə kee yikuꞌnə laa vɨ faꞌ maa shi zwisə Nwi me?» 25Yeso gi tɨ́ vəŋ laa, «Maa viŋ nə ta tìi fɨ taa ŋwaꞌlə Nwi nu ŋkɨə faŋ fwàŋ Deyvid nə yɨ̀, faŋ jɨŋ nə ghɔ̀ꞌ ŋwə ghɔ vɨ vɨɨ mbɨə faŋ ghɔ vɨ vəŋ nə luu mɔ́ꞌ nə. 26Nə luu maa yighee njyə faŋ Abiata nə luu wuu kwalə məfeꞌ Nwi, fwàŋ Deyvid nə ŋìi taa ŋii Nwi, zɨ̀ yighɨsə bee faŋ vɨ nə nùŋ shɔ vɨsɨ Nwi, faŋ kɨ kaꞌ wə kee zɨ me, tɨ̀ lɨꞌ sheꞌ vɨɨ məfeꞌ Nwi. Abiata nə kɔ̀ bee kɔ́ tɨ́ fwàŋ Deyvid, ŋwə zɨ, kɔ̀ tɨ́ vɨɨ mbɨə faŋ ghɔ vɨ vəŋ nə luu mɔ́ꞌ nə nɨzi.» (Yeso nə gì nɨniŋ maa mədə fɨ taa ŋwaꞌlə Nwi laa kaꞌ vɨ meꞌtə nuŋsə yimɔ́ꞌ buꞌ nu weꞌ mɔ́ꞌ.) 27Ŋwə baa kɨ nii gì tɨ́ vəŋ laa, «Nwi nə nàysə shi Sabat tɨ́ vɨɨ, kee nàysə vɨɨ buꞌ shi Sabat me. 28Nɨniŋ, Wuu yinsəŋ Nwi lùu tɨɨ shi zwisə Nwi nɨzi.»

Currently Selected:

Mark 2: bav

Highlight

Copy