Luka 8

Roḡae Roḡaeꞌa Iesu Dananiro

1Eꞌe enogano Iesuꞌe haba nunu zu ne ꞌahoga ꞌahoga onamadu Badiꞌaꞌa ibitohauꞌeteꞌe habaꞌa, hariḡa manoḡa haraminu ebu tahiꞌaḡa 12 zuni ane ḡatininu. 2Ebu vine sauꞌaniꞌa ragano reiroteꞌe zu ugi nunuꞌa meiroteꞌe roḡaeḡa roḡaeḡaꞌe ugize manoradu Iesu duḡuru danaziro. Ze boꞌaḡano Magadala neḡa roḡae niḡa Maria aniꞌe vine sauꞌa 7 raganonoꞌo hegone buniroteꞌe roḡaeḡa. 3Ebu Kuza inuḡa niḡa Ioana. Kuza aniꞌe kiniḡa Heroda gau zu neḡa taufeꞌeteꞌe vazeḡa. Roḡae ꞌahoga niḡa Susana zu roḡae ꞌahoga ꞌahoganiꞌa zeḡe zeḡe ḡau hina Iesu ebu ane tahiꞌatahiꞌa danaziro.

Ezone Feune Ḡoraroteꞌe Hari Idaidaḡa

(Mataio 13:1-23, Mareko 4:1-20)

4Mada ꞌahogano vaze ḡuḡuvaḡaniꞌa Iesu haba nunuonoꞌo Iesu vaḡe ariro. ꞌOugadu Iesuꞌa hari ꞌahoga idaniro, raenaꞌa,

5“Hihi vazeḡa ꞌahoganiꞌa mebaḡano ezone ḡora onamiro. Ani mebaḡano ezone feune ragavirotene, nuꞌe oda ibiḡano rururaro. Eꞌe ezoneḡaꞌe vazeꞌa rana edau oname onainu zu niniꞌa onadu au hauḡiro. 6Ezone nuꞌe hadi habaꞌano rururaro. Eꞌe ezoneḡaꞌe ḡuhuriro, rehano roraro, mazaḡa rahaꞌe mene abuꞌa. 7Ezone nuꞌe ve renogano rururaro. Ebu ezone zu ve renoga tibano ḡuhure bororaro. Rehano ve renoganiꞌa ezone ḡuhuḡa simarinadu mene iniro. 8U ezone nuꞌe raha manoḡano rururadu faine ḡuhure bororaro, ebu vesu hugaꞌe ḡae 100 hudaro.” Iesu ani ḡoere hauḡirotene, ani ḡihau ḡoeriro, raenaꞌa, “Teḡaḡeta vazeḡaꞌe faifaine egadu huga ederoꞌi!”

9Ebu Iesu tahiꞌatahiꞌaꞌa hari eꞌe huga ani ḡadiniro. 10Iesuꞌa naenaeziro, raenaꞌa, “Zaꞌe Badiꞌaꞌa ibitoziniꞌeteꞌe moneo ꞌuꞌuru tiꞌeteꞌe ihozeꞌohe. Rehano vaze nuꞌe hari huga niduꞌa hari idaidaḡa hina ihozeꞌohe, eꞌanoꞌo zeꞌe huga mene ederiꞌuma. Peroveta azaḡaniꞌa amahi ꞌahige reiro, raenaꞌa,

'Zeꞌe Badiꞌaꞌa nagini haḡaeꞌetaꞌe horoneꞌohe rehano, hugaꞌe mene horoniꞌuma.

Zeꞌe Badiꞌaꞌa nagini raꞌetaꞌe igiꞌohe rehano, eꞌe hugaꞌe mene ederiꞌuma.'

11Eḡeꞌa ezone feune ḡorauꞌeteꞌe hariḡa idaidaḡa hugaꞌe rae deheniꞌuma. Ezoneꞌe Badiꞌa ḡoere. 12Ezone ibio ruruneꞌetaꞌaꞌe, vazeꞌa Badiꞌa ḡoere igiꞌohe. Rehano zeꞌa Badiꞌa ḡoere mene mae ḡihinadu ḡabone mene hidifine, Sataniꞌa zeḡe zamaonoꞌo Badiꞌa ḡoere mae vaḡineꞌohe. 13Ezone hadi habaꞌano rururuꞌetaꞌe, Badiꞌa ḡoere igiꞌetene matuꞌuzeta mae ḡihineꞌohe. Rehano ze fieꞌe ire taiga oꞌoꞌa heuḡa, eꞌanoꞌo mada tahiḡa daꞌo fieꞌohe. Ebu Sataniꞌa tuhuze nuriꞌetene uiteꞌohe. 14Ezone ve renoga zamaḡano rururuꞌetaꞌe, ze Badiꞌa ḡoere igiꞌohe. Rehano radiuꞌeteꞌe madaḡano, zamarone aduga borofeꞌohe, haba toheḡa ufeta zamareꞌohe zu haba ḡauḡa manomano hina ufeta matuꞌeꞌohe. Eꞌanoꞌo zeꞌe mene iniꞌohe. 15U ezone raha manoḡano rururuꞌetaꞌe, mene ḡurireꞌenaꞌa zama manoḡano Badiꞌa ḡoere igiꞌohe. Ebu zeꞌe aduga hideꞌe rehano, Badiꞌaꞌa matuꞌeꞌeteꞌe haḡaiḡa haḡaeꞌenaꞌa, hudauꞌohe.

Ihure Hari Idaidaḡa

(Mareko 4:21-25)

16Vaze ꞌahoganiꞌa ihure hufine siuva hina mene ogone tiꞌuma ga fata ꞌuꞌuḡano mene tiꞌuma. Rehano ne diuḡeꞌeteꞌe vazeꞌa agaḡa horonoga veize, midau tiꞌeteꞌe habaꞌano midauꞌohe. 17Ihureꞌa ḡau niduꞌa aganeꞌeteꞌe teige, ꞌuꞌuru radiuꞌeteꞌe ḡauḡa niduꞌa fureraꞌuma. Ebu ogone ḡahineꞌeteꞌe ḡauḡa zuni horoniꞌuma. 18Eꞌano'o eḡeꞌa ziꞌeteꞌe ḡoeꞌa faine zamare egoꞌi! Faifaine zamare igiꞌeteꞌe azaḡaꞌe, Badiꞌaꞌa edeḡa boro ziniꞌuma. U mene faine zamare igiꞌeteꞌe azaḡaꞌe, Badiꞌaꞌa zeꞌe tahiḡa edeḡa rae zamareꞌeteꞌe zuni mae vaḡiniꞌuma.

Iesu Viꞌa ebu Negoḡa

(Mataio 12:46-50, Mareko 3:31-35)

19Eꞌe enogano Iesu viꞌa ebu negoḡa duḡuruꞌa ani vaḡe onamiro, rehano vaze ḡuḡuvaḡa ꞌahine ani uhiḡa onamoga mene idararo. 20Ebu vaze ꞌahoḡaniꞌa Iesu niro, raenaꞌa, “Ḡa viꞌu zu negoḡo duḡuruꞌa ḡiaꞌihi radu ne enona edau radiuꞌohe.” 21Ebu Iesuꞌa naenaeziro, raenaꞌa, “Badiꞌa ḡoere egadu haḡaiḡa haḡaeꞌeteꞌe azaḡaꞌe eḡe nanu zu eḡe nego.”

Zavara ꞌUiro

(Mataio 8:23-27, Mareko 4:35-41)

22Mada ꞌahogano Iesuꞌa ane tahiꞌatahiꞌa teite ḡasio tiradu ze ziro, raenaꞌa, “Aro, duꞌura moneafa fare onamihi.” Ebu ze fare onamiro. 23Ze fare onameꞌeteꞌe zamaḡano, Iesu ani baziro. Ebu zavara boroꞌa feuradu vuꞌa ḡasi kafere diuḡadu foꞌariro. Zeꞌe ariga runeo diuḡiro! 24ꞌOugirotene, Iesu tahiꞌatahiꞌaꞌa ani evaniro, raenaꞌa, “Zuhiꞌa Boro, Zuhiꞌa Boro, eme izidi hunuhuneꞌohe!”

Ebu Iesuꞌa evatadu zavara zu saꞌu riḡa ḡoreziro, raenaꞌa, “Sifu radadu roḡeranoꞌi!” Ani ꞌouge reirotene, zavara zu saꞌuꞌa hauḡiro zu duꞌuraꞌa roḡeraro. 25Ebu Iesuꞌa ziro, raenaꞌa, “Za eḡe mazao mene fieꞌohe!” Rehano, zeḡe niduꞌa rihauꞌenaꞌa zu zaguzagauꞌenaꞌa, ḡadititiro. “Ahiꞌe iniu? Aniꞌa zavara zu saꞌu riḡa ḡorezitene, ḡoeꞌa egohuꞌohe!”

Vine Sauꞌaḡeta Vazeḡa Fainiro

(Mataio 8:28-34, Mareko 5:1-20)

26Eꞌe enogano, Iesu zu ane tahiꞌatahiꞌaꞌa Galilea duꞌuraḡa moneafa ruhau faradu Gerasa#8:26 Gerasaꞌe Iuda habaꞌa enogano azaḡa habao hebetiro. 27Iesu ani ḡasionoꞌo buarotene, eꞌe habaꞌano vine sauꞌa sauꞌaḡeta vazeḡa ꞌahoganiꞌa Iesu hidiro. Aniꞌe mada faḡa firina zu neḡano mene radiunu, rehano ꞌidu habaꞌano radiudo. 28-29Vine sauꞌaniꞌa vaze ꞌadiꞌe mada ḡehaḡa ibitohaudoteꞌe uꞌano, haba eꞌe azaḡaniꞌa auri miniḡa riḡa hina evoꞌa zu odaḡa batune teadu taufe radiudo. Rehano aniꞌa mini eꞌe riꞌi ḡuzuhadu vine sauꞌaniꞌa tuḡune haba bohaꞌa onamido.

Aniꞌa Iesu horonirotene, Iesuꞌa riḡa ḡoreniro, raenaꞌa, “Vine sauꞌa toraga, ani mazaonoꞌo buanoꞌi!” Ani Iesu zamao hiḡau bauradu ḡaniḡanaro, raenaꞌa, “Iesu, Ḡihiꞌahune Badiꞌaḡa Ubuga! Ḡaꞌe eḡe mazao nagini urateꞌohe? E umiꞌeꞌohe, aduga aḡo enoꞌi!” 30Ebu Iesuꞌa ḡadiniro, raenaꞌa, “Ḡa niḡo iniu?” Ebu aniꞌa naenaeniro. “E niꞌe Legioni!#8:30 Eꞌe huganiꞌe uti azaḡa 6000 heuḡa”, mazaḡa vine sauꞌa ḡehaḡa vaze eꞌe ranao radiunu. 31Vine sauꞌa sauꞌaniꞌa Iesu uminiro, raenaꞌa, “Eme hoꞌone ḡonaga oꞌoꞌano#8:31 vine sauꞌaniꞌa ḡutauꞌeteꞌe habaꞌa ago tuḡufoꞌi!” 32Eꞌe madaḡano aba ḡehaḡaꞌe haba maḡano ogaunu. Eꞌanoꞌo vine sauꞌa sauꞌaꞌa bare Iesu uminiro. “Eme aba eꞌe mazao diuḡoga tuḡufoꞌi!” Iesuꞌa naenaezinaꞌa, “Idaḡa, buꞌanadu onamoꞌi!” 33Ebu vine sauꞌa sauꞌa ꞌai vaze eꞌe mazaonoꞌo buanadu aba ḡehaḡa mazao diuḡe ḡouriro. Aba ḡehaḡa ꞌai maḡa beꞌanoꞌo dure ovoadu duꞌurao hunuhune rudaro.

34Aba taufeꞌeteꞌe azaḡaniꞌa naginiꞌa fureraroteꞌe horonadu, ferau uhiḡa neḡa zu habaꞌa habaꞌa onamiro. Ebu eꞌe hariḡa vazevaze mazao meꞌodiro. 35Vaze ḡehaḡaꞌa naginiꞌa fureraroteꞌe ḡianoga veize Iesu vaḡe onamiro. Ze onamirotene, vine sauꞌaḡeta vazeḡa eꞌe dabua vidanadu zamarone manoḡano Iesu oda babaḡano ehoriroteꞌe horoniro. Eꞌanoꞌo zeꞌe rihau ḡouriro. 36Ebu fureraroteꞌe haḡaiḡa niduꞌa horoniroteꞌe azaḡaniꞌa haba ꞌahoga ꞌahoganonoꞌo onairoteꞌe azaḡa mazao Iesuꞌa vine sauꞌaḡeta vaze eꞌe nougenouge ḡaboniroteꞌe meꞌodoziniro. 37ꞌOugadu Gerasa habaꞌa azaḡa niduꞌaꞌe rihoꞌa mae ḡouriro. Ebu zeꞌe Iesuꞌa eꞌe habaꞌanonoꞌo vaḡinoga veize uminiro. Eꞌanoꞌo Iesuꞌe ḡasio tiradu bare duꞌura moneafa fare onamiro.

38Vine sauꞌaonoꞌo manoriroteꞌe vazeḡaꞌe Iesu teite onamoga veize uminiro. Rehano Iesuꞌa ani tuḡuneꞌenaꞌa, niro. 39“Mene. Ḡa bare neḡo onamadu Badiꞌaꞌa ḡae mazao haḡai manoḡa haḡateꞌe nabuḡo ihozoꞌi!” Eꞌanoꞌo ani bare onamadu ne niduꞌa ragaveꞌenaꞌa, Iesuꞌa ani mazao nagini haḡairoteꞌe haḡaiḡa meꞌodo ziniro.

Iairo Aboḡa ebu Ugi Roḡaeḡa

(Mataio 9:18-26, Mareko 5:21-43)

40Iesuꞌa faradu ruhau hebetirotene, vaze ḡehaḡaniꞌa hidadu mae ḡihiniro, mazaḡa zeꞌe mada faḡa guhiniro. 41Ebu vaze ꞌahoga niḡa Iairoꞌa onamadu Iesu oda babaḡano ḡuḡuriro. Aniꞌe nuꞌonuꞌo neḡa ḡianeꞌeteꞌe vazeḡa ḡihiꞌaḡa. Aniꞌa Iesu uminiro, raenaꞌa, “E ne aradu aboehe fainoꞌi!” 42Ani aboḡaꞌe tibuhuga eꞌe daꞌo zu muriḡaꞌe 12. Aniꞌe ugine sausaunadu ariga rudaro.

Ebu Iesuꞌa Iairo teite ane ne onamiroteꞌe zamaḡano vaze ḡuḡuvaḡaniꞌa naenaenoꞌo bibine runiro. 43Vaze ḡehaḡa boꞌaḡano, roḡae ꞌahogaꞌe roḡae ugiꞌa madu muri 12 zamaḡano adudu radiro. Rehano gohe vazeḡa ꞌahoganiꞌa zu manonoga mene idararo. 44Ebu aniꞌe ugiḡaniꞌa manoroga veize Iesu ḡaruna hegote aradu dabuaḡa ariḡa tuꞌiniro. ꞌOugirotene, ugiḡaniꞌa ḡarihe hune hauḡiro! 45Ebu Iesuꞌa ḡadimaro, raenaꞌa, “Iniuꞌa e tuꞌiheha?” Vaze niduꞌaꞌa naenaeninaꞌa, “Eme mene tuꞌiꞌeha.” Ebu Peteroꞌa raenaꞌa, “Zuhia Boro, vaze ḡuḡuvaḡaniꞌa bibiꞌeꞌeteꞌe uꞌano, vaze ḡehaḡaniꞌa ḡa tuꞌiꞌeha.” 46Rehano Iesuꞌa niro, raenaꞌa, “E edereha, vaze ꞌahoḡaniꞌa tuꞌihadu e mazaonoꞌo gigiꞌa inaraheꞌa buaneha, ebu vaze eꞌe faineha.” 47Iesuꞌa ꞌouge zirotene roḡae eꞌe ani mazao naginiꞌa fureraroteꞌe uꞌuranoga mene idaḡa rae zamariro. Ebu ani rihauꞌenaꞌa rereru Iesu vaḡe onadu ani oda babaḡano tuḡe ḡuḡuriro. Ebu ani nougadu Iesu dabuꞌa tuꞌinateꞌe, zu ḡarihe manorateꞌe hariḡa vaze niduꞌa ziro. 48Ebu Iesuꞌa roḡae eꞌe ninaꞌa, “Aboe, ḡaꞌe eḡe mazao fiateꞌe uꞌano, ugiḡoꞌa manoreha. Eꞌanoꞌo matuꞌuḡota onamoꞌi!”

49Iesu ani roḡae eꞌe ḡoreneꞌenoḡano vaze ꞌahoganiꞌa Iairo neonoꞌo onaadu Iairo niro, raenaꞌa, “Ḡa aboḡo ꞌai rudaneha. Eꞌanoꞌo ihore vazeḡaꞌa ḡa ne onamoga veize ago umine banoꞌi!” 50Rehano Iesuꞌa hari eꞌe egadu, Iairo ninaꞌa, “Zamaḡo ago adufoꞌi! Eḡe mazao fioꞌi! ꞌOugine, ḡa aboḡoꞌe bare ḡabodiꞌuma.”

51Ebu ze oname Iairo neo feuriro. Iesuꞌa Petero, Iakobo, Ioane zu roḡae komeꞌa viꞌa moga daꞌo tutuze neo diuḡiro, u vaze ꞌahoga ꞌahogaꞌe mene zamaze zouziro. 52Ze diuḡirotene, vaze niduꞌaꞌa ne zamaḡano harae niau radiunu. Ebu Iesuꞌa ziro, raenaꞌa, “Ago nianoꞌi! Aniꞌe mene rudaneha, rehano bazeꞌohe.” 53Zeꞌa ani eḡofoharo, mazaḡa zeꞌe roḡae tahiꞌaꞌa rudanataꞌaꞌe edeḡa. 54Ebu Iesuꞌa roḡae komeꞌa abine ḡihinadu hune niro, raenaꞌa, “Eḡe tahiꞌa, iḡunoꞌi!” 55Eꞌe zamaḡano ani viganiꞌa bare onaadu ḡarihe hune ḡabode iḡuniro. Ebu Iesuꞌa eꞌea radiroteꞌe azaḡa ziro, raenaꞌa, “Ogomu nu hanoꞌi!” 56Ani viꞌa mogaꞌe zaguzagau rudaro. Rehano Iesuꞌa ḡoere riḡa zinaꞌa, “Naginiꞌa fureranataꞌe vaze ago zoꞌi!”

Currently Selected:

Luka 8: KSJ

Highlight

Copy