Luka 14
14
Yezu be banabagatɔ dɔ kɛnɛya lafiɲɛlon na tugu
1Lafiɲɛlon dɔ la, Yezu tagara *Fariziɲɛw ka kuntigi dɔ ka soo ka dumuni kɛ. Mɔgɔ minw tun be yen, olu tun b'a kɔlɔsira. 2Cɛɛ dɔ tun be Yezu ɲafɛ, funubana tun b'a la. 3Yezu ye kuma ta ka sariya karamɔgɔw ni Fariziɲɛw ɲininga ko: «A daganin bɛ ka banabagatɔ kɛnɛya lafiɲɛlon na wa, walima a daganin tɛ?»
4Nga u m'a jaabi. O tuma na, Yezu magara banabagatɔ nin na k'a kɛnɛya. O kɔ, a y'a fɔ a ye ko a be se ka taga. 5#Mat 12.11 A sɔrɔla k'a fɔ u ye ko: «Jɔn le be yan aw cɛma n'a dencɛ, walima a ka misi benna kɔlɔn kɔnɔ lafiɲɛlon na, n'a tena o bɔ joona?»
6U ma se ka o ɲiningali jaabi.
Yɛrɛboɲala bena dɔgɔya
7Ka Yezu to o dumunikɛyɔrɔ nin na, mɔgɔ minw tun welela yen fana, a ye ladili di olu ma, bari a tun y'a kɔlɔsi k'a ye ko mɔgɔ nunu be sigiyɔrɔɲuman le ɲinina. O la, a y'a fɔ u ye ko: 8#Tal 25.6-7 «Ni mɔgɔ dɔ y'i wele kɔɲɔdumuni na, kana taga sigi sigiyɔrɔɲuman na. E b'a sɔrɔ tuma dɔ ko mɔgɔ wɛrɛ welela min ka fisa i ye. 9Mɔgɔ min y'aw fila bɛɛ wele, ni ale nana k'a fɔ i ye ko i ka wili ka sigiyɔrɔ nin d'a ma, o tuma na, i bena wili ni maloya ye, ka taga sigi mɔgɔ bɛɛ kɔfɛ. 10Nga n'i welela o ɲɔgɔn na, taga sigi kɔfɛ waasa n'i welebaga nana tuma min na, a k'a fɔ i ye ko: ‹N teri, na sigi ɲafɛ.› O cogo la, i bena kunkɔrɔta sɔrɔ i dumunikɛɲɔgɔnw ɲana. 11#Mat 23.12; Luka 18.14 Mɔgɔ o mɔgɔ b'a yɛrɛ boɲa, o tigi bena majigi. Mɔgɔ o mɔgɔ b'a yɛrɛ majigi, o tigi bena boɲa sɔrɔ.»
12Min tun ye Yezu wele dumuni na, a y'a fɔ o fana ye ko: «N'i ye dumuniba labɛn mɔgɔw ye, kana i teriw wele, walima i badenw, n'i balimaw, an'i sigiɲɔgɔn nafolotigiw. Bari u fana be se k'i wele dumuni na k'i ka juru sara. 13Nga, n'i bena dumuniba di mɔgɔw ma, i ka fantanw ni senkelenninw ni namaraw ani fiɲɛntɔw wele. 14N'i y'o kɛ, i bena duba sɔrɔ, bari olu te se k'i ka juru sara, nga Ala bena i sara sini.»#14.14 A fɔra girɛkikan na ko: «...mɔgɔtilenninw kununlon na.»
Mɔgɔweleninw talen
(Mat 22.1-10)
15Dumunikɛlaw kelen ye kuma nin mɛn minkɛ, a y'a fɔ Yezu ye ko: «Mɔgɔ minw bena dumuni kɛ Ala ka masaya la, olu nisɔn bena diya dɛ!»
16Yezu y'a jaabi ko: «Cɛɛ dɔ tun ye dumuniba labɛn ka mɔgɔ caaman wele. 17Dumunikɛwaati sera tuma min na, a y'a ka baaraden ci ka taga fɔ mɔgɔweleninw ye ko: ‹Aw ka na bari dumuni bɛɛ labɛnna ka ban.› 18Nga u bɛɛ ye yafa daali a fɛ kelen kelen. U fɔlɔ y'a fɔ baaraden ye ko: ‹Ne ye foro dɔ san, ne ka kan ka taga o filɛ. Ne b'i daali, taga fɔ a ye ko a ka yafa ne ma.› 19Mɔgɔ wɛrɛ y'a fɔ a ye ko: ‹Ne ye sɛnɛkɛmisi tan san, ne be tagara baara kɛ n'u ye k'a filɛ. Ne b'i daali, taga fɔ a ye ko a ka yafa ne ma.› 20Dɔ wɛrɛ fana y'a fɔ a ye ko: ‹Ne ye muso furu sisan sisan, o le y'a to ne te se ka taga.›
21«Baaraden kɔsegira ka taga o bɛɛ ɲafɔ a kuntigi ye. A kuntigi dimina k'a fɔ a ye ko: ‹Teliya ka taga dugu forobayɔrɔw la, ani siradaw la, ka fantanw ni namaraw ni fiɲɛntɔw ani senkelenninw wele ka na n'u ye yan.› 22Baaraden nin y'o kɛ ka ban tuma min na, a tagar'a fɔ a kuntigi ye ko: ‹I ye min fɔ, ne y'o kɛ, nga soo ma fa halibi.› 23O la, a kuntigi y'a fɔ a ye ko: ‹Bɔ ka taga dugu dafɛ nankɔw la, i mana mɔgɔ minw sɔrɔ yen, i ka koo bɛɛ kɛ u ka na, waasa ne ka soo ka fa. 24Ne b'a fɔ aw ye ko mɔgɔ minw tun welela, olu si tena ne ka dumuni nin nɛnɛ tugu.› »
Yezu ka kalanden jogo
25O kɔ, Yezu taatɔ dugu dɔ la, jamaba tun tugunin b'a kɔ. A lɔra k'a fɔ u ye ko: 26#Mat 10.37 «Mɔgɔ o mɔgɔ be na ne fɛ, n'a ma ne fisaya n'a faa ye, n'a baa, n'a muso, n'a deenw, n'a balimacɛw, n'a balimamusow, n'a yɛrɛ fana ye, o tigi te se ka kɛ ne ka kalanden ye. 27#Mat 10.38; 16.24; Mar 8.34; Luka 9.23 Ni mɔgɔ min m'a ka gwengwenlɔgɔ ɲun ka tugu ne kɔ, o tigi te se ka kɛ ne ka kalanden ye.
28«Aw cɛma ni mɔgɔ dɔ b'a fɛ ka sangaso jamanjan lɔ, a te sigi fɔlɔ k'a lɔsɔngɔ jati k'a filɛ yala n'a ka wari bena se k'o baara laban wa? 29N'o tɛ, n'a y'o sangaso juu sigi, n'a ma se k'a laban, mɔgɔ minw bɛɛ bena o ye, u bena yɛlɛ a ma, 30k'a fɔ ko: ‹Cɛɛ nin ye soo lɔli daminɛ, nga a ma se k'a laban.›
31«Ni masacɛ dɔ b'a fɛ ka taga masacɛ dɔ wɛrɛ kɛlɛ, a be sigi fɔlɔ ka miiri k'a filɛ n'a be se ni mɔgɔ waa tan (10 000) ye k'a jugu mɔgɔ waa mugan (20 000) tigi kunbɛn. 32N'a te se, a be lasigidenw ci ka taga kɛlɛ bancogo ɲini a jugu nin fɛ k'a to yɔrɔjan. 33N'aw dɔ b'a fɛ ka kɛ ne ka kalanden ye fana, fɔɔ aw k'aw ka bololafɛn bɛɛ to yen.
Kɔgɔ be min ɲa
(Mat 5.13; Mar 9.50)
34«Kɔgɔ ye fɛnɲuman ye, nga ni kɔgɔ ka timiya bɔra a la, mun bena se k'a timiya tugu? 35O tuma na, a te se ka kɛ nɔgɔ ye ka foyi ɲa dugukolo ye. A be fili le. Tulo be min fɛ ka mɛnni kɛ, o ka mɛnni kɛ.»
Currently Selected:
Luka 14: AKKDC08
Highlight
Share
Copy
Want to have your highlights saved across all your devices? Sign up or sign in
La Bible en Jula © Alliance Biblique du Burkina Faso, 2007.
