Utandiko 20
20
Abulaamu na Abimeleki
1Abulaamu wafumile ku Mamule aya ku mpanga ya Negebu ukuya ikala pakasi ka Kadesyi na Syuli. Lelo watazile atulila mu Gelali. 2#Uta 12:13; 26:7 Mu Gelali alanda ati, “Sala akaci wane.” Caleka Abimeleki umwene waku Gelali alonda kutwala Sala. 3Uwanda ulya usiku, Leza aloleka kuli Abimeleki mu ciloto nga amunena ati, “Umafwa pano Sala umuci wa mwine.”
4Lelo walanga Abimeleki atali amanye Sala, acino avwanga ati, “Mwene, nene wakaele! Uzye ukasi ungonone kumwi nu mutundu wane? 5Abulaamu umwisikulu uwanenyile ukuti Sala akaci wakwe, na Sala kwene wanena cili cimwi. Namanyile ukuti usi mulandu kumutwala, nupya ntaponzile.”
6Mu ciloto kwene Leza amunena ati, “Endi, nimanya ukuti wamanyile ukuti usi mulandu acino nakucinkula kuti utiifya kunondi pa kwingila ng'anda na Sala. 7Acino ndakai swilizya mama wiyo kuli iya. Iya a kasema amakupepela kuti utafwa. Lelo ndi utaswilizye mama wi kuli iya nakusoka ukuti umafwa, wewe na antu yako onsi.”
8Uca katondo Abimeleki atuma akuya ama aomvi yakwe yonsi akwisano ayanena vino Leza amunenyile mu ciloto. Aomvi yuvwa intete. 9Lyene Abimeleki aama Abulaamu amuuzya ati, “Uzye icani cino wacitila ci kunotuli? Ukuponga kuno natimponga ukwa musango cii kwakuti ulete ukuvunukwa panondi napa wene wane? Wancitile cino utalinzile ukucita. 10Uzye pacani cino wacitila cii?”
11Abulaamu aasuka ati, “Mu mano yane natiile kuno kutangaya umuntu akaopa Leza, nga nu kuti yangankoma yatole nu muci wane. 12Nga nu mucumi Sala akaci wane nupya tuvilwe tata wenga, lelo tupusine sile muli yamayo. Awino natwala. 13Caleka lino Leza wanenyile ukufuma ku akazi kane ukuya mu masi, nanenyile Sala nati, ‘Pakulanga kuyela kunondi ufwile walanda konsi kuno twaya ukuti nene kalume wako.’ ”
14Lyene Abimeleki aswilizya Sala kuli Abulaamu, apeela na Abulaamu imfwele, ing'ombe na azya. 15Amunena ati, “Mpanga yonsi iyakwane. Ungikala konsi kuno ukasi.” 16Nupya anena Sala ati, “Napeela kalume wako impiya zyakwe siluva izimbi lyonga kuti ciye cimanyililo kuli yano muli nayo ukuti wewe wakaele. Nu muntu wensi alamanya ukuti usi nu mulandu.”
17Lyene Abulaamu wapepile Abimeleki na Yawe amupozya, nga apozya nu muci na azya yakwe akazyana pakuti lyene yakwata ana. 18Pano walanga Yawe wanyepa ukwasi mu anaci ali mwi sano lyakwe Abimeleki pamulandu wakwe Sala umuci wakwe Abulaamu.
Currently Selected:
Utandiko 20: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
