Utandiko 24
24
Muci wakwe Isaki
1Lyene Abulaamu aya umukote cuze nga Yawe wamupolelile muli vyonsi vino wacitanga. 2Alino Abulaamu anena muomvi wakwe uwali akalolela wa vyuma vyakwe vyonsi ati, “Pisya makasa yako mu mpamba zyane nu kulapa. 3Nkulonda ulape mwi zina lyakwe Yawe, Leza uwa mwiyulu na pano nsi, ukuti utalalondela umwana wane mukazyana wakutwala ukufuma mu mpanga ya Kenani, mukwene muno nkwikala. 4Ulinzile ukuya ku mpanga yakumwitu, ku akazi kane akuno ukalondele umwana wane Isaki umuci.”
5Lelo muomvi auzya ati, “Uzye cilaya uli ndu mukazyana waca wakana ukwiza nani kuno? Uzye ndatuma umwana wako umonsi ku mpanga ino wemo wafumileko?”
6Abulaamu akana ati, “Cisi cakwezya ukutuma umwana wane umonsi kuku! 7Yawe, Leza uwa mwiyulu, uwandesile kuno ukufuma kuli tata nu kufuma ku mpanga ya antu aluko lwane, wandaya nu mulapo ukuti alapeela impanga ino ku ana yane. Alatuma mungeli kunuli kuti akwazwe kulondela umwana wane umuci ukufuma kweneko. 8Ndu mukazyana wiyo waca wakana ukwiza nawe, lyene ule waya wakaele ku mulapo wane. Nga nalyo kwene utalinzile kusenda umwana wane umonsi umutwale kuno nafuma.” 9Lyene muomvi wakwe Abulaamu aika makasa yakwe pakasi ka mpamba zyakwe Abulaamu umusambazi wakwe, nga alapa kulingana na vino wamunenyile.
10Lyene muomvi atoola ingamila ikumi ni vyuma vingi vyakwe Abulaamu, vya mpango, atenuka aya ku musumba kuno Nawoli akaikala, ku katutu ka mpanga ya Mesopotamya. 11Lino wafika afukamika ingamila lwa pa cifula, kunzi ya musumba. Yali insita ya manguzi lino anaci yakaya ku kusemba amanzi.
12Alino apepa ati, “We Yawe, Leza wakwe Abulaamu umusambazi wane, ilelo fikilizya ulayo wako ku musambazi wane. 13Indi pano pa cifula pano akazyana amu musumba yamaiza ku kusemba amanzi. 14Indi nu kwizalanda ku mukazyana inti, ‘Napapata tembeleka nsembo ya manzi imwe.’ Ndi amaiza ati, ‘Mwini, nga ni ngamila zyako kwene namazipela amanzi zimwe,’ ale awiyo kwene awino watusolwela muomvi wako Isaki. Nda vino ciza citika, nkwiza imanye vino wasunga ulayo uno walavile umusambazi wane.”
15Lino atacili amale kupepa Labeka afika ni nsembo ya manzi pa ciye. Wali umwana umwanaci wakwe Betuele, wino nyina wali a Milika. Milika wali umuci wakwe Nawoli, mwina wakwe Abulaamu. 16Labeka wali muyembe cuze, umukazyana atatala wamanya umonsi. Atentemuka aya ku cifula, asemba amanzi azuzya insembo, nga awela.
17Muomvi wilya wakwe Abulaamu asimula ku kumukomenkanya nga avwanga ati, “Napapata mpeko utumanzi twamu nsembo yako imwe.”
18Mukazyana wilya avwanga ati, “Mukwai nayamwe,” nga zuwazuwa atembeleka insembo amupeela amanzi amwa.
19Lyene lino wamala kumwa Labeka avwanga ati, “Namaletela ni ngamila zyako amanzi zimwe ndi muno zikulondela.” 20Acino zuwazuwa aitulwila amanzi mu mulangu uno inyama zikamwelamo, asimula aswilila ku cifula ku kusemba amanzi nayauze, nga asembelezya amanzi mu mulangu mpaka ngamila zya muomvi wakwe Abulaamu zimwa zyonsi. 21Muomvi wakwe Abulaamu ala akumulolekesya cimyamya kuti alole ndi Yawe watamupeela cino walondanga.
22Lino Labeka wamala kumwesya ngamila, muomvi wakwe Abulaamu atoola cipini cakwe Zaabu camutengo ukome amuzwika pa mpuno, nu tuwangili twakwe zaabu twiili amuzwika ku makasa. 23Amuzya ati, “Uzye so aweni? Napapata unene. Uzye ku mwinu kuli umuputule kwa kulala nene na antu yane?”
24Umukazyana azumila ati, “Tata a Betuele, umwana umonsi wakwe Nawoli muli Milika.” 25“Tukweti ivyakulya vya viteekwa ivivule kumwitu, nga nu muputule wakuti mungikalamo akuno uli.”
26Lyene muomvi wakwe Abulaamu afukama pansi, apepa Yawe. 27Avwanga ati, “Lumbanyini Yawe, Leza wa musambazi wane Abulaamu, wino watafikilizya ulayo wakwe nu utailo ukulu. Leza watantungulula ku ng'anda ya mwina wa musambazi wane.”
28Mukazyana asimwilila kuli nyina nga amulondolwela lyasi lyonsi. 29Lyene Labeka wakweti kalume wakwe, zina lyakwe a Labani. Labani afumila panzi asimwilila ku cifula ku muomvi wakwe Abulaamu. 30Lino walola cipini pa mpuno yakwe Labeka kaci wakwe, nga nu tuwangili twiili ku makasa, na vino uvwile kaci wakwe akunena nyina vino umuntu wilya wamunenyile, apita aya ukwali muomvi wakwe Abulaamu amuzana aimi pipi ni ngamila zyakwe. 31Nga avwanga ati, “Izangini twapita. Wewe uli muntu wino Yawe watapolelela. Uzye pacani cino wimilila kunzi kuno? Nemo ninkuteyanyizizya muputule, nupya kuli ni ncende ya ngamila zyako.”
32Acino muomvi wakwe Abulaamu aya ku ng'anda ilya, na Labani afumya iviya pa nsizi zyangamila, azipela ni sote zyalya. Nga aleta na manzi akuti muomvi wakwe Abulaamu na antu yakwe yafulale ingazo. 33Lino cakulya cateyanyiziwa, mwenyi wilya avwanga ati, “Insikulya suka ntale ndande icindesile.”
Labani ati, “Ale Landa!”
34Atandika kuvwanga ati, “Nene muomvi wakwe Abulaamu.” 35Yawe wapolelela umusambazi wane cuze, nga wene wataya umukama. Wamupeela imfwele ni ng'ombe, siluva na zaabu, aomvi aonsi na anaci, nga na yapunda ni ngamila kwene. 36Sala umuci wa musambazi wane wavyalila Abulaamu umwana umonsi mu ukote, lyene umusambazi wane wapeela umwana icuma consi. 37Musambazi wane wanenyile kulaya nu mulapo kuyela ilamulo lyakwe. Nga wavwanzile ati, “Utaca ulondele umwana wane mukazyana wakutwala ukufuma mu mpanga ya Kenani, mukwene muno nkwikala. 38Lelo uce uye ku aluko lwakwe tata, ku akazi kane akuno ukalondele Isaki umuci.” 39Lyene inuzya umusambazi wane inti, “Uzye cilaya uli ndu mukazyana waca wakana ukwiza nani kuno?”
40Nawe wangaswike ati, “Yawe wino nkayela lyonsi, alatuma mungeli wakwe kunuli ku kwazwa kulondela umwana wane umonsi umuci ukufuma ku aluko lwane, ku akazi kakwe tata. 41Ulaya sile wakaele ku mulapo ndi waca wafika ku akazi kane, nanti nga aliyo yakana ukukupeela umukazyana, nalyo kwene ulaya uwakaele ku mulapo wane.”
42“Lino nalinafika pa cifula ilelo, nalinapepa nati, ‘We Yawe, Leza wa musambazi wane Abulaamu, napapata ngazwe kuti nzane cino nkulonda mu ulendo wane. 43Pano ndi apa cifula. Lino mukazyana amaiza ku kusemba amanzi, namamulenga inti, “Mpeko amanzi akumwa amu nsembo yako.” 44Ndi wiza wazumila nupya wapeela ni ngamila zyane amanzi, wiyo aye ali mukazyana wino wansolwela ukuya umuci wakwe Isaki umwana umonsi wa musambazi wane.
45“Lino ntacili male kupepa mu mwenzo wane, indola Labeka akwiza ni nsembo pa ciye, akwiza ku cifula ku kusemba amanzi. Imvwanga kunoli inti, ‘Mpela amanzi imwe.’
46“Nawe zuwazuwa atembeleka insembo, azumila ati, ‘Mwaa, namapeela ni ngamila zyako amanzi zimwe.’ Nali namwa, nga nawe apeela ni ngamila kwene amanzi.
47“Lyene imuuzya inti, ‘Nga so aweni?’
“Nawe wali waasuka wati, ‘Tata a Betuele, umwana umonsi wakwe Nawoli muli Milika.’
“Alino imuzwika cipini pa mpuno nu tuwangili twiili ku makasa. 48Lyene imfukama pansi nu kupepa kuli Yawe. Indumbanya Yawe, Leza wakwe Abulaamu umusambazi wane wino watantungulula ningo ku ng'anda ya mwina wakwe, kuno niza nazana umwizikulu wa mwina wakuti akaye ali muci wa mwana wa musambazi wane. 49Acino ndakai mwemo munene ndi muli nu kulanga uluse nu utailo ku musambazi wane nanti foo, pakuti imanye vyakucita.”
50Labani na Betuele yazumila, nga yati, “Pakuti umulandu uu wafuma kuli Yawe, asi sweswe tuli nu kupingulapo cimwi. 51Labeka auwi musende mupite nawe. Leka akaye umuci wa mwana wa musambazi wako ndi vino Leza watalanda.”
52Lino muomvi wakwe Abulaamu uvwa amazwi yao, afukama pansi afupime nga apepa Yawe. 53Lyene afumya zaabu ni viyembelo vyakwe siluva ni vizwalo apeela Labeka. Apela na mawila amutengo kuli kalume wakwe na kuli nyina.
54Lyene muomvi wakwe Abulaamu na antu yakwe yalya cakulya nu kumwa, nga yalala indo kweneko.
Lino waca katondo muomvi wakwe Abulaamu ati, “Lekini napita nswilile ku musambazi wane.”
55Lelo kalume wakwe Labeka na nyina yavwanga yati, “Tala lekini mukazyana aikale naswe mulungu onga nanti amanda ikumi lyonga, alino mukapite.”
56Lelo muomvi wilya nawe avwanga ati, “Mutandenga nikale. Yawe wataleka nzana cino napitile. Lekini mpite nswilile ku musambazi wane.”
57Nga yamwasuka yati, “Lekini twame mukazyana tuvwe vino nawe amalanda.” 58Nga yama Labeka yamuuzya yati, “Uzye ukulonda ukupita nu muntu wi?”
Nawe azumila ati, “Namapita.”
59Caleka yazumilizya Labeka nkazizyo ukupita, yamupeela nu muomvi umulezi wa kumusukilila, nga yakatuka ulendo pamwi nu muomvi wakwe Abulaamu na antu yakwe. 60Nga yapolelela Labeka na mazwi yaa:
“We kaciwe, wize ukaye nyina wa mazimbi na mazimbi!
Ana yako yakaye yakacimvya ya anisi yao.”
61Lyene Labeka na akazyana aomvi yakwe yaiteyanya vyonsi, yakwela ingamila zyao, yalondela muomvi wakwe Abulaamu, nga yapita.
62Lyene Isaki aiza ku cifula camwangwa ukuti Beeli Laai Loi, nga wikalanga ku mpanga ya Lwanga lwa Negebu. 63Manguzi lino lyatemba Isaki aya aendezya ku vyalo alola ingamila zikwiza. 64Lino Labeka walola Isaki, aika pa ngamila yakwe, 65nga auzya muomvi wakwe Abulaamu ati, “Aweni wilya mu calo wataatukomanya?”
Muomvi wilya nawe aasuka ati, “Wene u musambazi wane.” Acino Labeka avimbala insalu ku manso.
66Lyene muomvi wakwe Abulaamu alondolwela Isaki vya ulendo wakwe na vino waile acita. 67Lyene Isaki asenda Labeka ukwi taalu ilyali ilyakwe nyina Sala, nga amutwala aya umuci wakwe. Isaki atemwa Labeka cuze cakuti atekeziwa na pa ulanda wa kufwilwa nyina.
Currently Selected:
Utandiko 24: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
