Luka 14
14
Yesu wapozya umuntu mulwale
1Pa Sabata limwi, lino Yesu waile ku kulya cakulya ku ng'anda ya Mufaliseo wino uwali intunguluzi, antu yauze yamucevya. 2Muntu umwi uwavimvile maulu na makasa wali pa nkolelo yakwe Yesu. 3Lyene Yesu auzya inkonkotela zya Masunde na Afaliseo ati, “Uzye Masunde itu yatuzumilizya ukupozya pa Sabata nanti foo?”
4Lelo yene yataswike. Lyene Yesu alemelela umuntu amupozya, nga amuleka apita. 5#Mat 12:11 Alino ayanena ati, “Uzye aweni munomuli akweti umwana umonsi nanti a masae, wino ndi waponile mu ciwina pa Sabata, atangamufumye lilyo kwene?”
6Lelo yaposiwe ukwasuka.
Kuicefya nu kusungwa
7Lyene lino Yesu walola vino yano amilwe yakusolola vilimba vya ucindami, ayumila mulumbe ati, 8#Map 25:6 “Lino umwi wakwama ku cimulo ca winga, utikala pa cilimba ca ucindami. Pano limwi umwi mucindame kukuluta ale nawe wataamwa. 9Lyene umuntu amwamile mweili angiza nu kukunena ati, ‘Leka wi aliwe aikale pa cilimba cii.’ Lyene wemo ulaya ni nsonyi pa kukufumyapo nu kwikala pa cilimba cisulwe. 10Lelo, lino yakwama, kikale pa cilimba cisulwe, pakuti lino wiyo akwamile amaiza kunuli, akunene ati, ‘Iza kuno cuza wane, ndu wikale pa cilimba cii ca ucindami.’ Alino ulacindikwa pa manso yakwe yao onsi yano ulikala nao pa cimulo. 11#Mat 23:12; Luk 18:14 Pano wensi akaikuzya wene alacefiwa, na wino wensi waicefya wene alakuziwa.”
12Lyene Yesu anena wino uwamwamile ati, “Lino ukupeela vyakulya vya nsita ya musanya nanti mulalilo, utaama yacuza yako nanti aina yako nanti akazi kako nanti ainipamba akama. Pano nao kwene yalakwama, nga mu musango ndi uu ulalipilwa pali cino wacisile. 13Lelo ndi wacita cimulo, ama apina, yakasinta, vilema, ni mpafu, 14Lyene ulapolelelwa, pano yasi na maka akuti yakakuwezezye. Leza alakuwezezya pa wanda uno alalenga antu aololoke yazyukuke kufuma ku afwe.”
Mulumbe wa cimulo cikulu
(Mat 22:1-10)
15Lino wenga uwa muli yao atenzi pamwi nawe pa kulya uvwile cii, anena Yesu ati, “Walongo a wiyo alimulwa mu Wene wakwe Leza!”
16Yesu auma mulumbe kunoli ati, “Pa nsita imwi umuntu wateinye cimulo nga aama antu aingi. 17Lino nsita yafisile iya cimulo, atuma muomvi ku kunena amilwe ati, ‘Izini, pano vyonsi viteyanye.’ 18Lelo onsi, cila muntu nu muze yatandika kulenga uwelelo. Uwankolelo wanenyile muomvi ati, ‘Nati nkala icalo, nupya ndinzile nje nkacilole. Napapata unjelele ntangiza,’ 19Muze nawe ati, ‘Nati nkala yamasae ikumi, lyene naya ku kuyezya. Napapata unjelele ntangiza.’ 20Umuze nawe ati, ‘Natimfumalila, caleka ntangiza.’
21“Alino muomvi waswililemo aya anena mwene wakwe vii vyonsi. Lyene mwine wa ng'anda asoka, nga anena muomvi wakwe ati, ‘Pitisya yanga mu miseo nu mu masansa amu musumba, ukalete kuno apina, yakasinta, impafu, ni vilema.’ 22Muomvi amunena ati, ‘Mwene ilamulo lyako lyati lilondelwa, lelo incende iciliko.’ 23Mwene nawe anena muomvi ati, ‘Pita mu miseo nu umu nzila zyamu mitengo nu kukuulizya antu kuti iize, pa kuti ng'anda yane izule. 24Nakunena vino pasi nanti wenga uwa muli yano amilwe alalya cimulo!’”
Vikalondekwa pa kuya mulondezi
(Mat 10:37-38)
25Lyene maumba akulu cuze yapitanga pamwi na Yesu, nga nawe aseleuka ayanena ati, 26#Mat 10:37 “Wensi angiza kunondi atangaya mulondezi wane suka ndi wantemwa kuluta vino watemwa isi na nyina, nu muci na ana yakwe, aina aonsi, na yakaci yakwe, na vino watemwa umi wakwe kwene. 27#Mat 10:38; 16:24; Mk 8:34; Luk 9:23 Wino wensi asisenda ulupanda lwakwe nu kundondela, wene atangaya mulondezi wane.
28“Uzye aweni uwa munomuli nga kulonda kukuula ulupungu, asyatala aikala pansi nu kupendulula impiya zino angasumbapo, kuti alole ndi akweti zingi zyakumalila mulimo? 29Pasi pano ndi wakuula mufula, nga nu kuposiwa kumalila kukuula, lyene yonsi akulola yalamuseka yati, 30‘Umuntu wii, watandike kukuula lelo waposiwa kumalila mulimo.’
31“Nanti ndu mwene wafuma na antu mazimbi ikumi ku kuya lwisya mwene muze wino akwiza na antu mazimbi makumi yaili ku kumulwisya, uzye nkolelo atangaikale pansi nu kulola ndi ali na maka akuyalwisya mwene muze? 32Ndi atakweti maka, alatuma inkombe ku kukomanya mwene muze, kukumuzya kuti kuye mutende lino mwene acili kutali. 33Mu musango uli onga, namunena vino pasi umwi uwa munomuli angaya mulondezi wane, suka wasya vyonsi vino akweti.”
Umusilya uwasilesile
(Mat 5:13; Mk 9:50)
34“Umusilya uusuma, lelo ndi wazunduka, uzye nupya ungaukalifya na cani? 35Utangazipila musili nanti muvundo. Wene ulasumbwa. Ali na matwi yakuuvwa, auvwe!”
Currently Selected:
Luka 14: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
