Luk 7

Uvaʼs ibʼant quBʼaal Jesuus bʼaʼn val u taqʼonvil val viqʼesal sol

Tio 8.5-13

1Yaʼetz kuxh vet Jesuus tiʼ talax jankʼal inqʼa yol xoʼl inqʼa xaol, inqʼa motx abʼin, tul okaʼp vet Jesuus tu tenam Kapernauum. 2Atichetz val u qʼesal sol uvaʼ loqʼelich val u taqʼonvil taʼn. Oybʼalichetz u aqʼonvil. Atz bʼiitich kuxh vet ikameʼ. Poro atichxh taanima u qʼesal sol tiʼ u taqʼonvil.

3Tabʼietz viqʼesal sol itziulal uvaʼ mamala bʼaʼnil nikich ibʼan Jesuus, tul itxhaq vet bʼen jolol iqʼesal inqʼa tij imam Israeel tiʼ ijaqax bʼaʼnil te Jesuus, tiʼ uvaʼ laʼich ul til Jesuus u aqʼonvil uvaʼ oybʼaliche. Tul laʼich ibʼan bʼaʼn tu yaabʼil.

4Aqʼbʼetz vet inqʼa iqʼesal inqʼa tij imam Israeel tiʼ ijaqax bʼaʼnil te Jesuus, tul echaq tal te Jesuus s-eche: —Ul oʼ savatz tiʼ ijaqax vaʼl nimla vatz bʼaʼnil see tiʼ val u taqʼonvil naq val viqʼesal sol tetz u qutenam. Tul ikʼulelxhtuʼ uvaʼ laʼ abʼan bʼaʼnil te naq, 5tan atxh taanima naq tiʼ u qutenam, oʼ inqʼa tij imam Israeel. Tul qat itxhoj naq ibʼitix vaʼl qotzotz tetz kʼulbʼal qibʼ, —xeʼtaq te Jesuus.

6Yaʼne bʼen vet Jesuus tiʼ inqʼa iqʼesal. Bʼiitichetz kuxh taqʼbʼ vet Jesuus kʼatz u totzotz viqʼesal sol, tul itxhaq tzaan viqʼesal sol kaʼt u tamiʼk. Tul ech u yol tal te Jesuus s-eche: —«Inbʼaal, yeʼ koq nik tel avaanima tiʼ avul siinxeʼ. Tan bʼane in koq tij imam Israeel. Echetz jit inkʼulel uvaʼ laʼ ukuʼl axh tu votzotz. 7Atz jitat inkʼulel uvaʼ laʼ bʼen inkʼul axh, tul laʼ ul axh siinxeʼ. Pet al kuxh u yol, tul yek toq ibʼan u vaqʼonvil bʼaʼn tu yaabʼil. 8Tan vootzaqle uvaʼ at aviqleʼm. Tul echat kuxh u vatine, tan atat ok in jaqʼ tiqleʼm viqʼesal. Tul atat ok sol jaqʼ viqleʼm uvaʼ nik inbʼekʼeʼ. Tan taʼn kuxhte nik inbʼekʼ ibʼen invaʼq inqʼa insol, tul nik ibʼenaʼ. Atz echat kuxh nik vale te invaʼte, nik insikʼle, tul nal kuxh nik tuleʼ. Atz echat kuxh nik vale te u vaqʼonvil tiʼ kam uvaʼ laʼ ibʼana, tul nik ibʼaneʼ,» chich naq u quqʼesal, —xeʼtaq te Jesuus.

9Tabʼietz vet Jesuus u yol uvaʼ ul tal inqʼa itxhaq viqʼesal sol, tul yekichxh chiibʼ Jesuus s-tiʼ. Tan tira ikʼuqbʼa ikʼuul tiʼ Jesuus. Yaʼne sutxhqʼ Jesuus, tul ech tal Jesuus te inqʼa xaol, inqʼa txhʼuyich s-tiʼ, s-eche: —Toq val sete uvaʼ: Yaʼnxh invaʼl vinaqe qat vila uvaʼ sibʼxh kʼuqlebʼal ikʼuul s-viʼ, tul jitoq tij imam Israeel, —xeʼt Jesuus.

10Yaʼne qʼaʼv vet inqʼa bʼanol txhaq. Tul bʼaʼnich vet u aqʼonvil uvaʼ oybʼaliche uvaʼs motx taqʼbʼ vet inqʼa bʼanol txhaq tu otzotz.

Uvaʼs titzʼeʼvsat quBʼaal Jesuus tal val u txakay ixoq tu tenam Naiin

11Paletz vet tuulbʼal inqʼa yol inqʼae, tul bʼen vet Jesuus t-vaʼt u tenam uvaʼ Naiin ibʼij. Tul mamala inqʼa nikich itxhus tibʼ kʼatz Jesuus ok bʼen s-tiʼ tuchʼ mam tenam. 12Aʼetzxh taqʼbʼ vet Jesuus titziʼ vijubʼalil u tenam, tul aalichaq tel vet tzaan xaol tiʼ imuqux val u kamnaʼq; tal val u txakay ixoq. Tul taʼnichxh vaʼl vatz ixaak u txakay ixoqe. Tul mamala xaol, aj Naiin, txhʼuyich vet tiʼ u ixoq.

13Tiletz vet quBʼaal Jesuus, tul itxum Jesuus ivatz u txakay ixoq. Tul ech tal Jesuus s-te s-eche: —Yeʼ kuxh oqʼ axh, —xeʼt Jesuus te u ixoq.

14Yaʼne ijetxhoʼk tibʼ Jesuus kʼatz u kamnaʼq. Tul ikan Jesuus u tzeʼ, u txhelebʼ tetz kamnaʼq. Tul yekich motx txakeʼv vet inqʼa txhelen tetz u kamnaʼq.

Yaʼne ech tal Jesuus s-eche: —Chelem xaak, nik val see: ¡Itzʼeʼven! Tul ¡lakpen! —xeʼt Jesuus.

15Tul yekich kʼuqeʼv vet u chelem xaak, uvaʼ maʼtich ikameʼ. Tul xeʼt vet yolon. Yaʼne taqʼ vet Jesuus u xaak te vitxutx.

16Tul tira motx kaj vet taanima inqʼa xaol s-kaqaayil uvaʼs tilt tul taanima u kamnaʼq inpaqte. Tul toksa vet inqʼa xaol iqʼij quBʼaal Tiuxh. Tul echaq motx tal vet s-eche: —¡Uyetz vet val u qʼexsan tetz viyol quBʼaal Tiuxh s-quxoʼl uvaʼ sibʼxh tiqleʼm! Atz qat taqʼl tzaan quBʼaal Tiuxh val u lotxhol qetz, oʼ inqʼa itenam, —xeʼtaq veteʼ. 17Echetz ipaxin vet ele vitziulal vibʼaʼnil Jesuus tuulbʼal jankʼal Judeea, atz t-inqʼa tenam uvaʼ naql s-kʼatza.

Uvaʼs itxhaqt Xhun kaʼl inqʼa nikich itxhus tibʼ s-kʼatza tiʼ tabʼil inuqul val u yol te quBʼaal Jesuus, Xhun, u aqʼol kuʼ xaol xeʼ aʼ

Tio 11.2-19

18Atichetz jaʼ Xhun t-tzeʼ, u aqʼol kuʼ xaol xeʼ aʼ. Tul til inqʼa nikich itxhus tibʼ kʼatz Xhun inqʼa kaebʼal aanima uvaʼ nikich ibʼan Jesuus. Tul exaq tal vet s-kaqaayil te Xhun. Yaʼne isaʼ Xhun kaʼvaʼl inqʼa nikich itxhus tibʼ s-kʼatza. 19Tul itxhaq vet bʼen Xhun kʼatz Jesuus tiʼ tabʼil te Jesuus oq uvaʼ, aʼich Jesuus u Kriisto uvaʼ alelich ka u tulebʼal taʼn inqʼa qʼexsanich tetz viyol quBʼaal Tiuxh, pet maq laʼich txʼebʼex tul invaʼtoʼq.

20Aqʼbʼaqetz vet vatz Jesuus, tul ech motx tal te Jesuus s-eche: —Qat itxhaq tzaan oʼ Xhun, u aqʼol kuʼ xaol xeʼ aʼ, tiʼ tabʼil see uvaʼ: «¿Aʼetz kol axhe, chi, u Kriisto, uvaʼ alel ka vavulebʼal taʼn quBʼaal Tiuxh? Pet ¿maq toq nal qutxʼebʼ tul invaʼtoʼq, chi?» nik tal Xhun, —xeʼtaq te Jesuus.

21Tul sebʼtich ibʼant Jesuus bʼaʼn mamala xaol, inqʼa oybʼaliche, uvaʼs motx ul tabʼit inqʼa yol te Jesuus. Tan nikich ibʼan bʼaʼn inqʼa xaol, inqʼa kam kuxh yaabʼilil nikich bʼanon, atz tuchʼ inqʼa atich ok demoonio t-taanima. Atz kʼuxh inqʼa tzot, tan nikich tilon vet taʼn Jesuus.

22Yaʼne ech tal Jesuus te kaʼvaʼl inqʼa nikich itxhus tibʼ kʼatz Xhun s-eche: —Aʼ kuxh bʼen etal te Xhun kam uvaʼ nik etileʼ, atz kam uvaʼ nik etabʼi. Atz bʼenoq etaleʼ uvaʼ: «–Il vet inqʼa tzot nik motx tiloneʼ. Atz il vet inqʼa koyel ibʼenaʼ; bʼaʼn vet ixaoneʼ. Atz kʼuxh inqʼa qʼajchil nik bʼanon vitxhiʼoʼl, tan ile nik motx ibʼan bʼaʼn. Atz kʼuxh inqʼa txhakan, tan ile nik tabʼin veteʼ. Atz kʼuxh inqʼa kamnaʼq, tan ile nik motx titzʼeʼvy inpaqte. Atz kʼuxh inqʼa meebʼaʼ, tan il inqʼa bʼaʼnla txhaq yol nik motx tabʼi tiʼ vibʼaʼnil quBʼaal Tiuxh.#Isaiias 35.5-6 23At vibʼaʼnil quBʼaal Tiuxh tiibʼa inqʼa xaol uvaʼ yeʼ laʼ itzʼeq u kʼuqlebʼal ikʼuul s-viʼ, –chich naq,» chaq ex te Xhun, —xeʼt Jesuus.{*}#7.23 ¿Kam s-tiʼil nikich ibʼan Xhun kaʼl ikʼuul tiʼ quBʼaal Jesuus oq aʼich quBʼaal Jesuus u Kriisto? Tiʼ uvaʼ tan, at kam nikich ibʼan quBʼaal Jesuus uvaʼ alelich ka taʼn inqʼa qʼexsanich tetz viyol quBʼaal Tiuxh uvaʼ laʼich ul ibʼan u Kriisto. Tul at kam yeʼ nikich ibʼan quBʼaal Jesuus inpaqte uvaʼ alelich ka taʼn inqʼa qʼexsanich tetz viyol quBʼaal Tiuxh uvaʼ laʼich ibʼan u Kriisto. Pet aʼ taqʼ quBʼaal Jesuus tootzaqi Xhun kam uvaʼ alelich ka taʼn Isaiias tiʼ u Kriisto tiʼ ibʼant inqʼa yaabʼ bʼaʼn. Echetz aʼ tal bʼen quBʼaal Jesuus uvaʼ yeʼ laʼ itzʼeq Xhun kʼuqlebʼal ikʼuul tiʼ quBʼaal Jesuus. Tan aʼich quBʼaal Jesuuse u Kriisto. Tul kamal aʼ atichat ok tiviʼ Xhun uvaʼ, aʼ quBʼaal Jesuus laʼich txhʼaʼoin inqʼa iqʼesal uvaʼ tatxhʼelich inqʼa tij imam Israeel taʼn.

24Bʼenetz vet inqʼa nikich itxhus tibʼ kʼatz Xhun, inqʼa itxhaq Xhun, tul xeʼt vet Jesuus tiʼ talax kaʼl inqʼa bʼaʼnla yol tiʼ Xhun te inqʼa xaol. Tul ech tal Jesuus s-eche: —¿Kam itxumbʼal Xhun ex etil tu txʼavaʼ uvaʼ yeʼl xaol jeqlel s-tuul? ¿Maq aʼ ex etil invaʼq vinaq uvaʼ nik kuxh temu tibʼ iviʼ uvaʼ jit kʼuqlebʼal kʼuul tatin vatz quBʼaal Tiuxh, eche tzeʼ, u aj, uvaʼ nik kuxh itzʼuʼqʼi tibʼ taʼn kaqiqʼ? Yeʼle abʼa. 25Atz ¿maq aʼ ex etil invaʼq vinaq txʼiol iqʼij uvaʼ bʼaʼnla oksaʼm atoʼk taʼn? Yeʼle abʼa. Tan jatvaʼl naq uvaʼ bʼaʼnla oksaʼm atoʼk taʼn, tan aʼ atil txhaqnaq t-inqʼa mamaʼ txhaq otzotz, totzotz inqʼa mam iqʼesal inqʼa tenam. Tul chiibʼiyaq kuxhtuʼ. 26Pet ¿maq aʼ ex etil invaʼq u qʼexsan tetz viyol quBʼaal Tiuxh? Ee, nuqxhtuʼ. Tan qʼexsan tetz viyol quBʼaal Tiuxh Xhun. Poro palnaʼq tiqleʼm Xhun viʼ jolt inqʼa qʼexsanich tetz viyol quBʼaal Tiuxh s-naʼya. 27Tan tiʼetz Xhune tzʼibʼalik ka val u yol uvaʼ ech nik tal s-eche:

«Toq inbʼaxabʼsa bʼen

val u vinaq savatz

tiʼ tok inqʼa xaol s-jik sinvatz,

eche ibʼaxabʼsal talax

ibʼanax tutxh vaʼq bʼey

vatz vaʼq mam iqʼesal,»

chich u yol.#Malakiias 3.1

28Echetz nik valte sete uvaʼ: Yeʼxhabʼil invaʼq xaol alamal vatz txʼavaʼ, uvaʼ palnaʼql koq viʼ Xhun, u aqʼol kuʼ xaol xeʼ aʼ. Kʼuxhetz echxhte, poro aʼetz inqʼa xaol palnaʼq tiqleʼm vatz quBʼaal Tiuxh, inqʼa nik ibʼan vet quBʼaal Tiuxh iqʼesalil t-taanima, kʼuxh yeʼl tiqleʼm vatz inqʼa xaol nik inatxheʼ.

29Tul mamala xaol motx abʼin inqʼa yol, atz motx inima veteʼ kam uvaʼ tal Xhun. Tul motx bʼenaq vet s-te uvaʼ jikxh vibʼey quBʼaal Tiuxh nikich tal Xhun. Tiʼetz u titzʼataq vet tibʼ t-inqʼa ipaʼv, tul motx aqʼaxaq vet kuʼ xeʼ aʼ taʼn Xhun.

30Pet koq inqʼa fariseeo tuchʼ inqʼa nik txhusun ibʼekʼbʼal inqʼa qumol s-tijaq imam Israeel, tan yeʼ motx toksa s-tuul vibʼey quBʼaal Tiuxh uvaʼ nikich tal Xhun. Tul yeʼaq motx itzaqʼbʼe ikuʼ xeʼ aʼ taʼn Xhun, —xeʼt Jesuus tiʼ Xhun.

31Yaʼne ech tal u [quBʼaal] Jesuus inpaqt s-eche: —¿Kametz vaʼq toq inbʼan eela inqʼa xaol s-tuchʼ, inqʼa itzʼlel s-txheel, inqʼa yeʼ nik qeon viyolbʼal quBʼaal Tiuxh? Atz ¿kam invaʼq nik ibʼan eela s-tuchʼ? 32Eela tuchʼ inqʼa nitxaʼ, inqʼa kʼuqlel kuxh t-kʼayibʼal tiʼ saatxh. Tan nik motx iqʼeqʼun s-vatzaqil. Tul ech nik tal te jolt inqʼa imol s-eche:

«Qat motx qoqʼsal

inqʼa qaj t-chiibʼichil,

tul yeʼl ex qat bʼix ex.

Atz qat qubʼitzlel inqʼa bʼitz

tetz txumuʼm

uvaʼ nik ibʼitzlel

tiʼ invaʼq kamnaʼq,

tul jitoq qat oqʼ ex,»

chichaq s-vatzaq.

Tul echat kuxh uvaʼe nik ebʼane. Tan yeʼ ibʼan sete kam uvaʼ tal Xhun. Tul jitoq nik esaʼ kam uvaʼ nik inbʼaneʼ.{*}#7.32 ¿Kam s-tiʼil ech tal quBʼaal Jesuus s-eche?: —Qat motx qoqʼsal inqʼa qaj, tul jitoq nik motx ebʼixeʼ. Atz qat qubʼitzlel inqʼa bʼitz uvaʼ nik ibʼitzlel tiʼ invaʼq kamnaʼq, tul jitoq qat motx oqʼ ex, —chiche. Aʼ tal quBʼaal Jesuus uvaʼ chiibʼebʼal u tul quBʼaal Jesuus tiʼ talax inqʼa bʼaʼnla txhaq yol tiʼ u kuybʼal, atz tiʼ u akʼ txumbʼal uvaʼ nik ibʼan quBʼaal Tiuxh tiʼ ibʼant iqʼesalil taanima inqʼa xaol tuchʼ viTiuxhil, atz tiʼ inqʼa mam kaebʼal aanima ul ibʼan quBʼaal Jesuus. Aʼetz nik ibʼan quBʼaal Jesuus eelae tuchʼ u toqʼsal u aj, uvaʼ nikich ibʼix inqʼa xaol s-vatz. Tul echatetz koq nikich ichiibʼe inqʼa iqʼesal uqʼeʼybʼal tiʼ inqʼa mam bʼaʼnil uvaʼ ul ibʼan quBʼaal Jesuus s-vatz, atz tiʼ inimal inqʼa bʼaʼnla txhaq yol. Pet ech koqe, tan aʼl motx teesal iqʼij quBʼaal Jesuus taʼn, tul tira yeʼ motx inima. 33Tan ul Xhun uvaʼ nikich aqʼon kuʼ inqʼa xaol xeʼ aʼ, tul bʼenamen nikich imaqt Xhun itxʼaʼon tiʼ inatxhax Tiuxh. Tul jitoq inbʼeeq taʼl qʼuʼich uuva nikich tukʼa Xhun. Echetz nikich tal inqʼa fariseeo tuchʼ jolt inqʼa nikich txhusun ibʼekʼbʼal inqʼa tij imam Israeel tiʼ Xhun s-eche: «Demoonioe atoʼk t-taanima Xhun, tul ech nibʼan Xhun s-eche,» chichiche.

34Petetz in, uvaʼ at in sexoʼl s-txheel, in, u Kʼaola uvaʼ qat bʼen s-alam aanima, tan nik intxʼaʼoneʼ; atz nik vukʼa taʼl uuva. Tul yeʼl in nik inmaq intxʼaʼon tiʼ inatxhax Tiuxh. Tul yaʼne ech nik motx tal inqʼa fariseeo tuchʼ inqʼa txhusul tetz ibʼekʼbʼal inqʼa qumol s-tijaq imam Israeel s-viʼ s-eche: «¡Oq kuxh itxʼaʼon naq uvaʼe! Atz ¡oq kuxh tukʼ naq qʼuʼich taʼl uuva! Tul aʼ kuxh imol tibʼ naq tuchʼ inqʼa jaqol puaq tetz Rooma, atz tuchʼ jolt inqʼa aj paʼvom,» chichaq s-viʼ. Tul jitoq nik motx iqej in.{*}#7.34 ¿Kam s-tiʼil nikich motx teesa inqʼa iqʼesal uqʼeʼybʼal iqʼij quBʼaal Jesuus, tiʼ uvaʼ yeʼ nikich imaq quBʼaal Jesuus itxʼaʼon tiʼ inatxhax Tiuxh? Echetz s-tiʼil yeʼ nikich imaq quBʼaal Jesuus itxʼaʼon tiʼ inatxhax Tiuxh, tan tiʼ uvaʼ, yeʼ nikich inima quBʼaal Jesuus u qejoʼm uvaʼ nimamalich taʼn jankʼal inqʼa iqʼesal uqʼeʼybʼal. Tan taʼnich kuxh quBʼaal Jesuus s-junal yeʼ saʼon inimaleʼ. Echetz s-tiʼile nikich itxhoʼn te inqʼa iqʼesal uqʼeʼybʼal xoʼl inqʼa tij imam Israeel. ¿Kam s-tiʼil yeʼ nikich imaq Jesuus itxʼaʼon tiʼ inatxht Tiuxh? Tiʼ uvaʼ tan, txumuʼmich talax vimaqax u txʼaʼoʼm tiʼ inatxhax Tiuxh vatz quBʼaal Jesuus. Pet jit txumuʼm ul ibʼan quBʼaal Jesuus. Tan chiibʼichil nikich ibʼan quBʼaal Jesuus tiʼ ikʼutxhux u mam tiqleʼm quBʼaal Tiuxh xoʼl inqʼa xaol vatz txʼavaʼ. Atz nikich ichiibʼ quBʼaal Jesuus tiʼ ichitp inqʼa xaol uvaʼ txeypinaʼqlich taʼn u yaabʼla txumbʼal taʼn Satanaas. Nikichat ichiibʼ quBʼaal Jesuus tiʼ ikʼutxhux u tiqleʼm tiʼ ibʼanax bʼaʼn inqʼa yaabʼ. Xaʼte jit aʼ nikich titzʼa quBʼaal Jesuus itxumun tiʼ imaqt itxʼaʼon tiʼ inatxhax Tiuxh, eche uvaʼ nikich tal inqʼa fariseeo, tiʼ uvaʼ laʼich koq imaq quBʼaal Jesuus itxʼaʼoneʼ. Tan vatz quBʼaal Jesuus aʼich u yaʼbʼe ‹Yaʼbʼ Tetz Aqʼo Chiibʼichil› tuulbʼal uvaʼ atich quBʼaal Jesuus tzitza vatz txʼavaʼ, ech uvaʼe nik tal tu Leviitiko 25.10; Nuumeros 36.4 tuchʼ Esekieel 46.17. 35Pet koq inqʼa xaol, inqʼa nuqxhtuʼ uvaʼ kʼaol imeʼal quBʼaal Tiuxh, tan nik motx ibʼen s-te uvaʼ quBʼaal Tiuxh aqʼon itxumbʼal Xhun, atz quBʼaal Tiuxh nik aqʼon intxumbʼal inpaqte, —xeʼt Jesuus.

Uvaʼs itxʼaʼon quBʼaal Jesuus xeʼ Simoon, val u fariseeo

36Atichetz val u fariseeo uvaʼ Simoonich ibʼij, tul bʼekʼex Jesuus taʼn tiʼ vaʼl txʼaʼoʼm. Aqʼbʼetz vet Jesuus t-totzotz Simoon, tul yekich vet ok Jesuus txʼaʼon viʼ meexha. 37Atichetz val u ixoq tzitzi tu tenam, val uvaʼ elnaʼqich kuxh iviʼ t-bʼey. Tabʼietz u ixoq uvaʼ sebʼtich itxʼaʼon Jesuus xeʼ Simoon, u fariseeo, tul tiqʼo vet tzaan u ixoq val u txʼumbʼisabʼal uvaʼ, aʼ atich kuʼ tuul val u bʼaʼnla atibʼal uvaʼ sivanxhtuʼ. Tul yekich vet u ixoq tal uvaʼ atich Jesuus.

38Txaklichetz vet u ixoq tiʼ iqul Jesuus, xeʼ kuʼl toq Jesuus, tul xeʼt vet oqʼoq. Tan nikich itxumun tiʼ vipaʼv. Tul tira takʼsa vet inqʼa toq Jesuus tuchʼ taʼl ivatz. Tul itzaqsa vet tuchʼ u xiʼl iviʼ. Atz xeʼt vet tiʼ itzʼubʼux inqʼa toq Jesuus. Tul toksa vet u txʼumbʼisabʼal tiʼ toq Jesuus.

39Tul til vet u fariseeo, uvaʼ bʼekʼon tul Jesuus t-totzotz, kam uvaʼ ibʼan u ixoq te Jesuus. Tul ech titzʼa vet t-taanima s-eche: —Qʼexsan koqxh tetz viyol quBʼaal Tiuxh naq uvaʼe, tul yeketz toq tootzaqi naqe jaʼletze u ixoq uvaʼ nik kanon toq naq. Tan elnaʼq kuxh iviʼ u ixoq t-bʼey uvaʼe, —xeʼt titzʼat Simoon.

40Yaʼne ech tal Jesuus te Simoon s-eche: —Toq val, val u yol see, Simoon, —xeʼt Jesuus.

Tul ech tal Simoon s-eche: —Aala, Txhusul vetz, —xeʼt Simoon.

41Tul ech tal Jesuus s-eche: —Atich val u aqʼol puaq s-kʼam; taqʼ vipuaq s-kʼam te kaʼvaʼl vinaq. Vaʼletz u vinaq kʼamon oʼvaʼl sieen (500) puaq, uvaʼ plaataxhtuʼ, xeʼ u aj puaq. Vaʼt vinaq, laval toxkʼal (50) puaq, uvaʼ plaataxhtuʼ, ikʼam xeʼ u aj puaq.{*}#7.41 Eche inqʼa puaq uvaʼ nik tal tzitza, tan aʼ nik talvat tiʼ vaʼl denaario; vaʼlichetz denaario ijaʼmil vaʼl qʼij s-naʼya. Echetz oʼvaʼlenich sieen (500) qʼij laʼich aqʼonv u vinaq uvaʼe, tiʼ u puaq uvaʼ ikʼama. 42Yeʼetz nikich toleʼv vet inqʼa vinaq tiʼ itxhojox inqʼa itxʼoq. Tul toybʼa vet u aqʼol puaq kʼam ivatz inqʼa aj txʼoq. Tul tzum kuxh ikuyuxaq vet inqʼa itxʼoq s-kaʼbʼil. ¿Jabʼisteetz u aj txʼoq s-te sibʼxh saʼon vet u aqʼol puaq s-kʼam nik anatxheʼ? —xeʼt Jesuus.

43Yaʼne ech tal Simoon s-eche: —Nik vitzʼa uvaʼ, aʼ chiibʼ tiʼ u aqʼol puaq s-kʼam, u vinaq uvaʼ niimxh vitxʼoq kuyux ipaʼv s-tiʼ, —xeʼt Simoon.

Tul ech tal Jesuus s-eche: —Antxhte uvaʼ nik aaleʼ, —xeʼt Jesuus.

44Yaʼne isaqi Jesuus u ixoq. Tul ech tal Jesuus te Simoon s-eche: —U ixoq uvaʼe, tan qat takʼsal tiʼ voq tuchʼ u taʼl ivatz. Tul qat itzaqsal inpaqte tuchʼ u xiʼl iviʼ. Pet koq axh, tan qat ukuʼl in tavotzotz, tul yeʼl inbʼeeq vajaʼ tetz txʼajbʼal voq qat aaqʼa. 45Atz yeʼl inbʼeeq txala intziʼ qat atzʼubʼa tiʼ taqʼax bʼaʼnil inkʼuul uvaʼs qat vukuʼl tavotzotz. Pet u ixoq uvaʼe, tan jankʼaxxh vukuʼl tavotzotz, tul yeʼx yaʼoq tiʼ itzʼubʼux inqʼa voq. 46Pet koq axh, tan jitoq kuxh inbʼeeq aseeite qat aaqʼ jaʼ tinviʼ. Petetz u ixoq, tan qat isujoʼk txʼumbʼisabʼal tiʼ inqʼa voq. 47Echetz nik valte see uvaʼ: Kʼuxh niimxh vipaʼv u ixoq, tan qat inkuy sotzsal veteʼ. Echetz s-tiʼile tira yeʼ nik iyaʼ tiʼ insaʼaxeʼ. Pet jaʼl uvaʼ bʼiil kuxh vipaʼv laʼ inkuya, tan bʼiiletz kuxh nik isaʼ ine, —xeʼt Jesuus te Simoon.

48Yaʼne ech tal Jesuus te u ixoq s-eche: —Qat inkuy sotzsal inqʼa apaʼv, —xeʼt Jesuus.

49Yaʼne xeʼt vet inqʼa xaol yolon s-vatzaq, inqʼa kʼuqlich kʼatz Jesuus viʼ u meexha. Tul ech motx tal vet s-eche: —¡Kametzxh txhan vet tiqleʼm naq uvaʼe nik enatxheʼ!, tan aʼ nik tal naq uvaʼ nik ikuy sotzsa naq paʼv, —xeʼtaqe.{*}#7.49 ¿Kam s-tiʼil sotz ikʼuul inqʼa iqʼesal uqʼeʼybʼal tiʼ vikuyt quBʼaal Jesuus vipaʼv inqʼa xaol? Aʼ nikich motx taleʼ uvaʼ taʼn kuxh quBʼaal Tiuxh atich tokebʼal tiʼ ikuyux ipaʼv inqʼa xaol, eche uvaʼ nik tal u bʼekʼbʼal. Tan jitich Tiuxh quBʼaal Jesuus vatz inqʼa iqʼesal uqʼeʼybʼal. Tul atich kʼuul inqʼa iqʼesal uqʼeʼybʼal kam uvaʼ nikich tal u bʼekʼbʼal, tiʼ uvaʼ tira laʼ yatzʼax el jaʼl uvaʼ laʼ kuxh tal tibʼ s-Tiuxh. Pet ech koq vatz quBʼaal Jesuus, tan tootzaqlich quBʼaal Jesuus uvaʼ vaʼlich kuxh tatin tuchʼ quBʼaal Tiuxh. Tul een tzajnaʼqich quBʼaal Jesuus kʼatz quBʼaal Tiuxh. Tul tootzaqich quBʼaal Jesuus uvaʼ aqʼelich tiqleʼm quBʼaal Jesuus taʼn quBʼaal Tiuxh tiʼ ikuyux inqʼa paʼv.

50Yaʼne ech tal Jesuus te u ixoq s-eche: —Tiʼ uvaʼ qat akʼuqbʼa akʼuul s-viʼ, tul chitpiy vet axh [tu kʼaxbʼichil] tiʼ vapaʼv. Pet quxh vet tibʼaʼnil, —xeʼt Jesuus.

Currently Selected:

Luk 7: ixlC

Highlight

Copy