Luk 16

Ɛnjaba cɛ muafa bɔnɔ́mɛ mu menjiŋé

1Búmɔtɛ́ buɔ́sɛ́, Yésus ŋaá laána bááyɛ́ *baákɔ́nɛ́na ɔsɛ : « Ɛnɔ́mɛ cɛ ɔɔcɔ a cɛmɔtɛ́ ŋaá bá na muafa bɔnɔ́mɛ ; baacɔ ŋé keé ciíci laána báyɛ muafa bɔnɔ́mɛ eémú ŋa cáŋɛna búáyɛ́ bɔnɔ́mɛ. 2Ci ŋé muúmu lɔ́ŋɔ́kɔ, mbá cɛsɛ : “Ɛ ŋá mɛ lɔ́kɔ́máka bɛɛbɛ́ bɛ́ bɛsana oówo e nyiínyi, mi tóŋgínyi háyɛ ɔ́ ŋɔɔ́ bɛ́kɛ́lɛ́na na búámɛ bɔnɔ́mɛ, anyía ɔ tɛ kɔ́ háná ɔbá múámɛ muafa bɔnɔ́mɛ.” 3Mbá muafa bɔnɔ́mɛ eémú ŋé túme obíkéti e uúye ɔtɛ́má mɔsɛ : “Anyána míɔ cɔba ɔ ɔkɛlaka, háyɛ ciamɛ́ síkíne yɔ́ cɔ́ba ɔ ɔ mɛ aáŋíá e buólí e ? Ɛ tɛ ámɛ bá na makɛ́nda ma ɔnyiɔkɔ bisíéné ; yaŋɔ́ na aatɔ́ ɔlama o húlé lɛba. 4Ɛ́hɛ́ɛ ! I ŋe mí menyi anyána míɔ cɔba ɔ ɔkɛlaka, anyía baacɔ e búle ábɔ́ mɛ káha bɔmbányɛ a maabɔ́ meébe ekúlú ayɛ́ bá káá mɛ aáŋíá e buólí bɔ́ ɔwaafa bɔnɔ́mɛ.” 5Nyíáyɛ́ nyɛlɔ́ŋɔ́kɔ eényí ɔmɔtɛ́ ɔmɔtɛ́ baacɔ bekime abá cíáyɛ́ síkíne ci buólí ŋaá bá cɛá bátaka mehíne ; mu ŋá laána u buúse mɔsɛ : “Aátɛ́ ciamɛ́ síkíne ŋɔ yɔ́ɔ batá e ?” 6Mbá ɔsɛ : “Tutókótókó tɔ́ bɛsɔŋɔ etíne atáánɔ.” Muafa bɔnɔ́mɛ mɔsɛ nááyá : “Núɔ́wɔ nufule nú buhíné eenu, tényí límine ɔ ɔmɛsɛ́, ɔɔ́ŋɔ́kɔ etíne éfendí ne imbuke cíɔ́hátá.” 7Mbá mɔsɛ ná u ɔláta : “Kuɔŋɔ́ʼo, aátɛ́ ú ŋɔ yɔ́ɔ batá e ?” Mbá ɔsɛ : “Ikute cí iŋeŋé hɔ́ndɛ́tɛ ɛ́táánɔ.” Muafa bɔnɔ́mɛ mɔsɛ né oócí : “Núɔ́wɔ nufule nú buhíné eénú, ɔɔ́ŋɔ́kɔ hɔ́ndɛ́tɛ ínyíse.” 8Aáná síkíne cɛ muafa bɔnɔ́mɛ ŋeé lémbíki#16.8 Cɛ́mɔtɛ́ Ciɔɔ́ŋɛ́ cɛ́ buáyá áŋa na « … ŋeé kéké » aabɛ́ yɛ́ muafa bɔnɔ́mɛ eéyé, anyía yɛ́ ŋa kɛ́láka menjiŋé. Yááŋa anyía, baacɔ a bá ŋa bɔ́ látɛ́na bɛsana bɛ́ ɔmɛsɛ́ áŋa ne injiŋé beébe ne beébe a bɛsana abɛ́ bá ŋa bɔ́ kɛ́la ɔ ɔhɔla baacɔ a bá ŋa bɔ́ látɛ́na eese e yí ŋé húle ná Bandɔ́mɛsɛ́.

9Ɛ ŋa mɛ́ banɔ́ láana isíʼo : Ánɔ tákáka mekendinyi, nɔ bɛ́kɛ́lákɛ́na maŋaŋa ma ɔmɛsɛ́ ooci a mááŋa maabɛ́, anyía ekúlú ayɛ́ ma káá mana, Bandɔ́mɛsɛ́ káá banɔ́ káha bɔmbányɛ aáyá a bunɔŋɔ e bú kéé líhéke ekúlú ekime. 10Mbɔ́kɔ ɔɔcɔ ŋa bɛ́kɛ́lɛ́na bɔmbányɛ a tɔsanasáná, wáŋa wu ɔbɛ́kɛ́lákɛ́na tɔ́na bɔmbányɛ a bɛandándá bɛ́ bɛsana ; mbá mbɔ́kɔ ɔɔcɔ ŋa bɛ́kɛ́lɛ́na bɔɔbɛ́ a tɔsanasáná, wáŋa wu ɔbɛ́kɛ́lákɛ́na tɔ́na bɔɔbɛ́ a bɛandándá bɛ́ bɛsana. 11Mbɔ́kɔ nu tɛ ɔ́mɔ́ nɔ́ bɛ́kɛ́lɛ́na bɔmbányɛ aná na buŋaŋa bɔ́ ɔmɛsɛ́ a búáŋa bɔɔbɛ́, ta ɔɔcɔ tɛ káá banɔ́ iínjíe taaká cɛ buŋaŋa. 12Mbɔ́kɔ nu tɛ ɔ́mɔ́ nɔ́ bɛ́kɛ́lɛ́na bɔmbányɛ bɛnyɛ́ma bɛ́ bɔsɔ́ɔ́kɔ́, báányɛ́ bá káá banɔ́ iínjíékíne bíánɔ́ bɛnyɛ́ma e ?

13Ta munyiɔnɔ mumɔtɛ́ tɛ á bá mu ɔnyiɔkɛna síkíne cí moólí mefendí ; anyía mu ké búle é léne a cɛmɔtɛ́, mu lénéke eécí a cɛmɔtɛ́ ɔ ɔhɔla ; ta anyía mu ké búle á bábɛ́na síkíne a cɛmɔtɛ́, mu lɔ́kɔ́mákɛ́na eécí a cɛmɔtɛ́. Nu tɛ anɔ́ bá nu ɔhákɛ́nɛ́na bɔkɔ búmɔtɛ́ na Bandɔ́mɛsɛ́ na bɔnɔ́mɛ bɔ́ ɔmɛsɛ́ ooci. »

Baacɔ ŋá nyɛmána bá ɔlátákɛ́na bikotí bí Moyís

(Mat 11.12-13 ; 5.31-32 ; Mak 10.11-12)

14*Bafalisiɛ́ŋ ŋa bɔ́ bá bábɔ́ lɔ́kɔ́máka bɛsana eébí bikime, bé wuúci ɔɔ́mbɔ́náka anyía bá ŋa bɔ́ bá bébú lénéke mɔɔnyɛ́. 15Mbá Yésus ɔsɛ náábɔ́ : « Nu ŋa nɔ́ áamba anyía baacɔ á banɔ́ hiíteke háyɛ bɛtálɛ́mánánɔ́ bɛ́ baacɔ ; mbá Bandɔ́mɛsɛ́ ŋe ményi cíínú ɛtɛ́má. Yááŋa anyía bɔkɔ abɔ́ baacɔ ŋa bɔ́ lɛ́ca háyɛ bɔmbányɛ ɔ ɔhɔla, Bandɔ́mɛsɛ́ ŋeé buúbu lɛca háyɛ bɔɔbɛ́ ɔ ɔhɔla.

16Bé ŋe yeékúnyíki ne *bikotí bí *Moyís ne eékúnyi cé *behémúnyi bɛsana bá Bandɔ́mɛsɛ́ ɔ ɔkɔɔ́háma a nyɛfaaya nyɛ́ Sáaŋ Batis. O otúme a nyíáyɛ́ nyɛfaaya, bé ŋe húlínyi baacɔ Ambányɛ yɛ́ Ɛsɔ́ma anyía Bandɔ́mɛsɛ́ áŋa Otéŋí a Waáŋá ; buátɛ́ bɔkɔ ɔɔcɔ okime ŋá bɛ́kɛ́ndɛ́na owoofine haála ahá Bandɔ́mɛsɛ́ áŋa. 17Na ɔmɛsɛ́ na ɛŋɔ́lɔ́muaná káá mánaka tɛ́ka ne muuyé na anyía ciɔɔ́ŋɛ́ ɛ́mɔtɛ́ cí bikotí é bínyimisi.

18Ɔnɔ́mɛ okime ewú é kíne oónyí, yɔ́ bátɛ́na oónjú u etémbí, ú má kándaka hɛsɔmɔ ; híáná tɔ́na, ɔnɔ́mɔcɔ́ á bátɛ́na oónjú awɔ́ ɔnɔ́mɛ é kíne, wuúci tɔ́na má kándaka hɛsɔmɔ. »

Ɛnjaba cɛ na ɛnɔ́mɛ cɛ ɔɔcɔ na Lasáal

19Mbá Yésus tɔ́na ɔsɛ : « Ɔɔcɔ a wɔmɔtɛ́ ŋaá bá a bunɔŋɔ a bɔ́mɔtɛ́, wuúci na bɔnɔ́mɛ buéŋí ; u ŋaá bá waá láŋabaka bɔmbányɛ bɛlaŋa bɛ́ mɔɔnyɛ́ meéŋí, u bándáka manáka mɔɔ́sɛ́ mekime. 20Ɔsɔ́kásɔ́ka u ɔɔcɔ ŋaá bá tɔ́na hɔ́á ne bibéli cɛɛ́tɔ ikime ; nyíáyɛ́ nyiínyi ŋaá bá ɛ́cɛ Lasáal, u fianakɛna eé buúse bú ehenyi bú ciíbe cɛ ɛnɔ́mɛ cɛ ɔɔcɔ oócí. 21U ŋaá bá wá yáambaka o búle nyíá imbuumbú cɛ́ bɛnyɛ́ma a cɛ́ ŋaá bá cɛ́á kuákɔna ekúlú ayɛ́ ɛnɔ́mɛ eécí ŋaá bá cɛá nyíáka, mbá u tɛ ɔ́mɔ́ bɔ́ŋɔ ohónyí. Aáná tɔ́na ɛɛbɔ́ ŋaá bá cɛ́á fáakɔna ɔ ɔsɔ́sɔ bíáyɛ́ bibéli.

22U ŋeé wé, *bililé bɛ́ masɔ́ma bɛ́ Bandɔ́mɛsɛ́ ŋé bu wuúci cɔbana ɔ Ɔmuaná hoóhi na Taatá *Abɛ́laham ; ɛnɔ́mɛ ŋeé wé tɔ́na, bé ŋé ciíci nyie ; 23cɛ ŋá cɔbá haála ehé biwéewé áŋa, cɛ lɔ́kɔ́máka muuyé buéŋí hɔ́á ; ci ŋé bééti eése, cɛ ŋá lɛcá Abɛ́laham haaca, Lasáal ɔfiánɛ́nánɔ́ a mááyɛ́ mɔɔyɔ́. 24Aáná ci ŋoó bókíté cɛsɛ : “Ééʼ, Taatá Abɛ́laham, mɛ bɛ́cáma mahana ; tɔ́ma Lasáal wé yubé hííyé hɛnɔɔ́nɔ́ e menyífé noómi, mbá wé mi sióŋónyísi okelú ; anyía ɛ ŋá mɛ lɔ́kɔ́ma ɔkála buéŋí aáhá o oocó ooci.” 25Mbá Abɛ́laham ɔsɛ : “Ɔɔ́nɔ́, bɛ́tááka anyía ɔ ŋɔɔ́ lɛcáka bɔmbányɛ ekúlú ayɛ́ ɔ ŋɔɔ́ bá o olíhéke ; ekúlú eéyé, Lasáal ŋaá bá na mahana buéŋí. Aámbáya wa yáaŋa ɔmbányɛ aaha, ekúlú ayɛ́ kuɔŋɔ́ ɔ ŋɔɔ́ lɔ́kɔ́ma ɔkála. 26Aáná tɔ́na, yaandándá yɛ́ nɔɔfia áŋa aá cíásɔ́ ɛkatɛ́katɛ́, ɛ́ɛhɛ́ baacɔ a bá ŋa bɔ́ áamba ɔhatɔna aaha náásɔ́ ɔ ɔcɔba náánɔ́ tɛ á bá bá ɔkɔɔ́háma, híáná baacɔ tɛ á bá bá ɔhatɔna náánɔ́ bɔ́ faáya aaha náásɔ́.”

27Ɛnɔ́mɛ cɛ ɔɔcɔ cɛsɛ : “Mbɔ́kɔ aáná yááŋa, Taatá, cɔ́kɔ́lɛ tɔ́ma Lasáal eé ciíbe cɛ baacɔ ci ciamɛ síkíne, 28anyía ya mɛ́ŋa ne benyíinyí a banɔ́mɔcɔ́ bátáánɔ, wé keé beébe laakɛna anyía bá tɛ kɛ́la háyɛ ɛ́ ŋa mɛ́ kɛláka ; ananyía keyé bá ká ka bɔ́ faáya tɔ́na aaha aá haála hé muuyé eehe.” 29Mbá Abɛ́laham ɔsɛ : “Bɔnɔ́ɔnyia a bɔ́ŋa ne tufule e tú ŋo tóŋínyi ne *bikotí bí *Moyís ne eékúnyi cé *behémúnyi bɛsana bá Bandɔ́mɛsɛ́, bé tuútu látákɛ́na.” 30Mbá cɛsɛ : “Eéʼeé, Taatá Abɛ́laham, mbɔ́kɔ ɔɔcɔ tɛ ŋá háányúá e biwéewé yó koó beébe kúana, bá tɛ ká bɔ́ bɛ́kákálɛ́na maabɔ́ maabɛ́.” 31Mbá Abɛ́laham ɔsɛ : “Mbɔ́kɔ bá tɛ ŋá bɔ látɛ́na ne bikotí bí Moyís ne eékúnyi cé behémúnyi bɛsana, híáná bá tɛ ká bɔ́ bɛ́kákálɛ́na maabɔ́ maabɛ́, ta ɔɔcɔ á háányua e biwéewé.” »

Currently Selected:

Luk 16: lem

Highlight

Copy