San Marcos 9

1Saa ndikaꞌan ka ra xiꞌin na kachi ra saa:

―Ña ndaa kaꞌan yu xiꞌin ndo, chi sava ndoꞌo na ndee yoꞌo vichin, ra kuni nuu ndo nuu xaꞌndia Ndioxi chiñu xiꞌin takundiꞌi ndie̱e̱ ra, ra saa vi ke kuvi ndo ―kachi ra xiꞌin na.

Ndanama Jesús

2Ra saa kuu ndiyaꞌa i̱ñu̱ kii, saa ndakiꞌin Jesús ra Pedro xiꞌin ra Jacobo, xiꞌin ra Juan kuaꞌan ndia xiꞌin ra iin xiki sukun. Ra ikan ndanama ra xini ndia. 3Ra tikoto ña ndixi ra, ra iin yeyeꞌe nduu ña, ra iin taxa taxa nduu ña, ra yàà ka vi nduu ña, iin mii kachi̱ nduu ña; ndia nii yuvi ra kuchüun na ndasayaa ni na tikoto ta kuꞌva nduu tikoto ra yoꞌo, nii na ndakatia ni va na ña. 4Saa ra tuꞌva ndituvi va ra Elías xiꞌin ra Moisés, ra xaꞌa ndia ndatuꞌun ndia xiꞌin Jesús ndita ndia. 5Ra saa ndikaꞌan ra Pedro xiꞌin Jesús, kachi ra saa:

―Tata Maestro, tiaa ni vaꞌa ña ndee yo yoꞌo vichin, tu kuni kun ra na savaꞌa ndi uni veꞌe tuvíxi̱n vali, iin ña koo yoꞌo, ra iin ña koo ra Moisés, ra iin ña koo ra Elías ―kachi ra xiꞌin Jesús.

6Su ndi ra saa ka ndikaꞌan va kuvi ra, saa chi nii ndikundäa ini vi ra ni ke ndikaꞌan ra, ra iin kuaꞌan ini ndia ndee ndia ña iyuꞌvi ni ndia. 7Ra saa nduxinu vi̱ko̱ ndasi ña sata ndia. Ra tiañu vi̱ko̱ kan tiaku ndikaꞌan Ndioxi, kachi ra saa:

―Ra yoꞌo ku Seꞌe yu ra ^kuꞌvi ni ini yu xini yu, ra na kandixa ndo ña kaꞌan ra xiꞌin ndo, ―kachi tachi Ndioxi kan xiꞌin ndia.

8Ra te sakuꞌun nuu ndia ndakotoꞌni ndia, ra nii ka yuvi köo ndixini ndia, ra ndia siin ndaa mituꞌun saa va Jesús ndichi xini ndia.

9Ra te saa kuu ndia nandiko ndia vaxi nuu ndia iku kan, saa ndikaꞌan Jesús xiꞌin ndia ña na ndatüꞌun ndia xiꞌin ndia nii yuvi xaꞌa ña xini ndia kuu iku kan, chi ndiakua te na ndatiaku ra xaa yoꞌo vichin, ra saa vi ke kundaa ini na. 10Ña kan ke ndia nii yuvi nindatüꞌun ndia xiꞌin xaꞌa ña xini ndia. Ra xika ka vi ini ndia xaꞌa ña ndikaꞌan ra ña ndatiaku ra, chi ndikundäa ini ndia ni ke kuni kachi ña. 11Saa ndindakatuꞌun ndia Jesús kachi ndia saa:

―Tata, ¿nichuun kachi na maestro na sañaꞌa ley Ndioxi ña xiꞌna ka ra Elías ku ra xiniñuꞌu kunuu kixi? ―kachi ndia.

12Ra saa ndakuiin Jesús kachi ra saa xiꞌin ndia:

―Ña ndixa ke, xiꞌna ka ra Elías ku ra kunuu kixi sanduvi takundiꞌi ña xiniñuꞌu kunduvi. Ra ta kuꞌva kaꞌan tuꞌun Ndioxi xaꞌa yuꞌu, ra xaa yoꞌo vichin, ña xiniñuꞌu ndoꞌo ni yu ra kundasi ni na yuꞌu. 13Ra ña ndixa ke kaꞌan yu xiꞌin va ndo, chi ra Elías ra xa kixi va ra, ra xa xa na ña kuni̱ mii na xiꞌin va ra, ta kuꞌva kachi tuꞌun Ndioxi ña ndakani ña xaꞌa ra ndia kuꞌva ke ndoꞌo ra ―kachi Jesús xiꞌin ndia.

Sandaꞌa Jesús iin ra loꞌo tiin tachi ndivaꞌa

14Saa te ndandiko Jesús xaa ra nuu nindoo sava ka ndia xika xiꞌin ra, ra xa iin tiꞌvi chee va yuvi ndakaya ndee xiꞌin ndia xini ra, ra ikan ndee tu sava na maestro na sañaꞌa ley Ndioxi ña tiin taꞌan na xiꞌin ndia xika xiꞌin Jesús, ra ndaꞌyu na nuu ndia. 15Ra saa te xini na yuvi kan Jesús ra ndakanda ka vi ini na, saa ra ndikun ndakuita takundiꞌi na ra xinu na ndixaa na kaꞌan ndioxi na xiꞌin ra. 16Saa ndindakatuꞌun ra ndia xika xiꞌin ra kachi ra saa:

―¿Ni ke xakuachi ndo xaꞌa xiꞌin na yuvi kaa ―kachi ra xiꞌin ndia.

17Saa ndakuiin iin ra ndikaa tiañu na yuvi kan, kachi ra saa:

―Tata Maestro, yoꞌo xaa iin seꞌe yu xiꞌin yu nuu kun, chi tachi ndivaꞌa ke ndikaa ñaꞌa, ra täxi ña kaꞌan ra. 18Ra te ^xaa tachi ndivaꞌa yoꞌo tiin ña ra ndia ndia ka mii nuu ndúꞌu̱ ra, ra tiin ña ra kuun ña ñuꞌú, ra xaꞌa iin kee lolo yuꞌu ra, ra iin ndakaxi taꞌan nùꞌù ra, ra iin kutuun ra xa ña. Ra xa ndikaꞌan yu xiꞌin ndia xika xiꞌin kun ña na tava ndia tachi ndivaꞌa yoꞌo ini seꞌe yu kuꞌun ña, su ndi ndikuchüun ndia xiꞌin ña ―kachi ra xiꞌin Jesús.

19Saa ndakuiin Jesús kachi ra saa xiꞌin ndia xika xiꞌin ra:

―¿Nichuun ndaku ni ini ndo? ¿Ni ka ke kachi yu xiꞌin ndo, ña na kundaa ini ndo? Kundiëe ka ini yu nuu ndo. Naꞌa ndo xiꞌin ra loꞌo ñaa yoꞌo ―kachi ra xiꞌin na.

20Saa ndixaa na xiꞌin ra nuu Jesús. Ra te xini tachi ndivaꞌa kan Jesús, ra ndikun iin xaꞌni yiꞌi ña ra, ra iin kee ndaꞌa ra, iin kee xaꞌa ra kanduꞌu ra, ra iin chichi ñuꞌu ra ndiakua kee lolo yuꞌu ra. 21Saa ndindakatuꞌun Jesús iva ra loꞌo kan, kachi ra saa:

―¿Xa ndixaa kuiya ke ndoꞌo ra saa? ―kachi ra xiꞌin ra.

Saa ndakuiin iva ra kachi ra saa:

―Te loꞌo vi ra ke kiꞌin ña ra, Tata. 22Ra tachi ndivaꞌa yoꞌo, ra nii ndiäꞌvi ichi xaa ña sakoꞌni ña ra nuu ñuꞌù, xiꞌin nuu tiakuii, ña kuni̱ ña kaꞌni ña ra; ña kan ke nduku yu ña mani nuu kun, tu na kuvi chindiee taꞌan kun xiꞌin ndi, Tata, ra na kundaꞌvi ini kun kuni kun nduꞌu, ra na sa kun ña mani xiꞌin ndi, chi ndaꞌvi ni ndi ―kachi ra xiꞌin Jesús.

23Saa ndakuiin Jesús kachi ra saa xiꞌin ra:

―Tu na kandixa kun saa ra kuvi va, chin takundiꞌi na kandixa ra köo ña uꞌvi nuu na kan ―kachi Jesús xiꞌin ra.

24Ra saa ndikun ndiee ka vi ndikaꞌan iva ra loꞌo kan, kachi ra saa:

―¡Kandixa va yu, Tata, ra chindiee taꞌan ka xiꞌin yu, ña na kandixa vaꞌa ka yu yoꞌo! ―kachi ra.

25Ra te xini Jesús ña xaꞌa iin kutiꞌvi na yuvi kuxaa na, saa ra ndikaꞌan ra xiꞌin tachi ndivaꞌa kan, kachi ra saa:

―Tachi ndivaꞌa ña miꞌmi, xiꞌin ña xïni soꞌo, yuꞌu ku ra xaꞌndia chiñu nuu kun. Ra na kita kun kuꞌun kun, ra nandïko ka kun tiin kun ra loꞌo yoꞌo ―kachi Jesús xiꞌin ña.

26Saa ra iin kokoꞌo nindaꞌyu tachi ndivaꞌa kan, ra iin xaꞌni yiꞌi tuku ña ra loꞌo kan, saa kita ña kuaꞌan ña, ra iin ta kaa ra ndixiꞌi kaa ra kanduꞌu ra xa ña, ra saa ndikaꞌan takundiꞌi na ndita kan kachi na saa: “Ndixiꞌi va ra loꞌo kaa” ―kachi na.

27Saa tiin Jesús ndaꞌa ra loꞌo yoꞌo ra ndoniꞌi ra ra, ra ndikun ndakoo va ra.

28Ra saa ndikiꞌvi Jesús iin veꞌe ndakunduꞌu ra xiꞌin ndia xika xiꞌin ra, ra saa ndindakatuꞌun ndia ra kachi ndia saa:

―Tata, ¿nichuun ndikuchüun ndi tava ndi tachi ndivaꞌa kan? ―kachi ndia xiꞌin ra.

29Saa ndakuiin ra, kachi ra saa xiꞌin ndia:

―Ña xiniñuꞌu sa yo ke kaꞌan ni yo xiꞌin Ndioxi, ra na koo suꞌun yo küxi yo, ra saa ke kuchuun yo tava yo tachi ndivaꞌa ―kachi ra xiꞌin ndia.

Xa ichi uvi ke ndatuꞌun tuku Jesús xiꞌin ndia ña kuvi ra

30Saa kuu ndakiꞌin Jesús kuaꞌan ra xiꞌin ndia xika xiꞌin ra. Ra chi Galilea ke kuaꞌan ndia, ra ndiküni Jesús ña kundaa ini na yuvi xaꞌa ra. 31Chi takua ndia xika xiꞌin va ra kuvi ndia ndakani ra nuu, ra kachi ra saa:

―Yuꞌu, ra xaa yoꞌo, ra ndataxi na yuꞌu ndaꞌa na ñuu, ra kaꞌni na yuꞌu, su ndi kii uni ra ndatiaku tuku va yu ―kachi ra xiꞌin ndia.

32Ra ndia xika xiꞌin ra, ra nii kundäa ini ndia ni ke kaꞌan ra, ra nii xandiëe ini tu ndia ña ndakatuꞌun va ndia ra xaꞌa ña kaꞌan ra, chi iyuꞌvi ni ndia.

¿Yoo kuu ra chee vaꞌa ka?

33Saa ndixaa ndia ñuu Capernaum. Ra te xa ndee ndia veꞌe kan, saa ndindakatuꞌun Jesús ndia kachi ra saa xiꞌin ndia:

―¿Ni xaꞌa ke ndatuꞌun kuachi ndo xiꞌin taꞌan ndo vaxi ndo ichi kan? ―kachi ra xiꞌin ndia.

34Ra nii ndindäkuiin ndia, saa chi xaꞌa iin ra kunuu kaꞌndia chiñu nuu va ndia ke ndatuꞌun ndia vaxi ndia ichi kan. 35Saa ndakunduꞌu Jesús, ra ^ndakana ra uxi uvi saa ndia, ra ndikaꞌan ra xiꞌin ndia kachi ra saa:

―Ndoꞌo, ndia kuni̱ kunuu, ra xiniñuꞌu ndakundikun ndo ndia chi sata takundiꞌi na, ra xiniñuꞌu chindiee taꞌan tu ndo xiꞌin takundiꞌi va na ―kachi ra xiꞌin ndia.

36Saa kana ra iin ra loꞌo ra xanindichi ra ra maꞌñu ndia, ra saa ndakunu ndiaa tu ra ra loꞌo kan, ra ndikaꞌan ra xiꞌin ndia, kachi ra saa:

37―Yuvi, na ndakiꞌin mani̱ iin ra loꞌo tan ra yoꞌo xaꞌa yuꞌu, ra yuꞌu va ku ra ndakiꞌin mani̱ na, ra na ndakiꞌin mani̱ yuꞌu, ra süvi takua yuꞌu kuvi ra ndakiꞌin mani̱ na, chi ra tiꞌvi yuꞌu vaxi va yu kuvi ra ndakiꞌin mani̱ na ―kachi Jesús xiꞌin ndia.

Yuvi na kuëe kataꞌan xiꞌin yo, ra ndie̱e̱ va yo ke kuaꞌan na

38Saa ndikaꞌan ra Juan xiꞌin Jesús kachi ra saa:

―Tata Maestro, ikan xini ndi xika iin tiaa ra tava ra tachi ndivaꞌa xiꞌin kivi kun, su ndi itäꞌan ra xiꞌin yo, ña kan ke ndikaꞌan ndi xiꞌin ra ña na sä ka ra saa, saa chi süvi ra xika xiꞌin yo kuvi ra, ―kachi ra xiꞌin Jesús.

39Ra saa ndakuiin Jesús kachi saa xiꞌin ra:

―Säsi ndo nuu na, saa chi takundiꞌi yuvi na xa iin ña xituꞌun xiꞌin kivi yu, ra kïxi ka ini na kan ña kaꞌan kiꞌvi ka tu na xaꞌa yu. 40Chi yuvi na kuëe kataꞌan xiꞌin yo, ra ndie̱e̱ va yo ke kuaꞌan na. 41Ra ndia ndia ka na na taxi iin yaxin loꞌo tiakuii koꞌo̱ ndo xaꞌa ña ^ndíku̱n ndo yuꞌu, ra ña ndixa kaꞌan yu xiꞌin ndo, chi ndïꞌi uun xaꞌa ña mani̱ kan, chi ndakiꞌin tu na kan va yaꞌvi na, xaꞌa ña mani̱ kan sa Ndioxi ―kachi Jesús xiꞌin ndia.

Nda̱ku̱ na koo ini yo ra ndakäva yo ndaꞌa ña väꞌa

42Ra na kuu mii kuachi sakoyo iin na vali vaꞌa, na ndikun ichi yu, ra vaꞌa ka va yachi na kunuꞌni iin yuu katia chee sukun na, ra koꞌni na na ini mini ―kachi Jesús.

43Saa ndikaꞌan ka ra kachi ra saa:

―Tu ndaꞌa ndo kuvi ña ku mii kuachi sandakava ña ndóꞌo̱ ña sa ndo kuachi, saa ra kaꞌndia ndo ña, saa chi vaꞌa ka va ke na kiꞌvi ndo nuu kutiaku ndo iin ndisaa kii xiꞌin iin xiyo ndaꞌa ndo, nuu ña kuꞌun ndo ndiaya xiꞌin uvi saa ndaꞌa ndo nuu xixi̱ ñùꞌù, ñuu kaꞌñu, ra ndäꞌva ña, 44chi ikan ra ñuu kaꞌñu ke iyoo va tikuxi ra xïꞌi ri, ra nii ñùꞌù ña xixi̱ kan, ra ndäꞌva ña, chin iin nduvi niñuu ke xixi̱ va ña. 45Ra tu xaꞌa tu ndo kuvi ña ku mii kuachi ña sandakava ña ndoꞌo sa ndo kuachi, saa ra kaꞌndia ndo ña, saa chi vaꞌa ka va ke na ni̱ꞌi̱ ndo kiꞌvi ndo nuu kutiaku ndo iin ndisaa kii xiꞌin iin xiyo xaꞌa ndo, nuu ña na kuꞌun ndo ndiaya xiꞌin uvi saa xaꞌa ndo, nuu ndäꞌva ñuꞌù, 46chi ikan ra ñuu kaꞌñu ke iyoo va tikuxi, ra xïꞌi ri, ra nii ñùꞌù ña xixi̱ kan, ra ndäꞌva ña, iin nduvi niñuu ke xixi̱ va ña. 47Ra tu nduchi nuu tu ndo kuvi ña ku mii kuachi ña sandakava ña ndoꞌo sa ndo kuachi, saa ra vaꞌa ka va na tava ndo ña, saa chi vaꞌa ka va ke na ni̱ꞌi̱ ndo kiꞌvi ndo xiꞌin iin xiyo nduchi nuu ndo nuu xaꞌndia Ndioxi chiñu koo ndo, nuu ña na kuꞌun ndo ndiaya xiꞌin uvi saa xiyo nduchi nuu ndo, 48chi ikan, ra ñu̱u kaꞌñu ke iyoo va tikuxi, ra xïꞌi ri, ra nii ñùꞌù ña xixi̱ kan, ra ndäꞌva ña, chi iin nduvi niñuu ke xixi̱ va ña.

49’Chi takundiꞌi yuvi ra xiꞌin ñuꞌù ke ku̱ꞌva takundiꞌi va na, ra takundiꞌi ñaꞌa ña soko na ra xiꞌin ñi̱i̱ ke ku̱ꞌva va ña. 50Ra ña ndixa ke ñi̱i̱ ra ña vaꞌa ni kuvi va ña, ra ndi tu na ndiꞌi xaꞌa ña, ña üꞌva ka koo ña, saa ra, ndiꞌi xaꞌa va ña, ¿Ra ndixaa ka ke sa ndoꞌo ña ndasa uꞌva ndo ña, ra vaꞌa ndakuniñuꞌu tuku ndo ña? Ra ta iyoo ñi̱i̱ yoꞌo ña uꞌva ña, saa na koo ndo, ra vivii na koo ndo xiꞌin na taꞌan ndo ―kachi Jesús xiꞌin na.

Currently Selected:

San Marcos 9: mxvNT

Highlight

Copy