TIBIRIK 21
21
Isaac dog Biranak
1TUHAN nyiberkat Sarah, nanyam janji-i ngga ayŭh, 2#Heb 11.11 ka ayŭh bite ka biranak ndi anak dari yŭn Abraham kan ayŭh mbŭh minyamba. Anak dari anŭ dog biranak di tika adi Tapa ko nang ayŭh taŭn re dog biranak. 3Abraham kadŭn ayŭh Isaac, 4#Tib 17.12; Png 7.8 ka kan Isaac mbŭh mai andu umbur-i, Abraham nyunat ayŭh, nanyam ka pesan Tapa. 5Abraham mbŭh 100 sawa umbur-i kan Isaac dog biranak. 6Ka Sarah nang, “Tapa mbŭh nggen pinyigaŭn adi bada aku tawŭh.#21.6 Tawŭh: Dŭn Isaac, rati-i darŭm piminyu Hebrew “ayŭh tawŭh” (tingga gŭh 17.17-19). Sopŭrŭg daya adi dingah kayuh ati re sua tawŭh ngga aku.” 7Komŭnŭ ayŭh nang, “Asi re kidaan di Abraham nang aku re mira biranak? Ka aku meh mbŭh biranak ndi anak dari yŭn-i, darŭm ayŭh mbŭh minyamba.”
8Anak anŭ masang baga, ka kan ayŭh mbŭh dŭh tia sisuh di sindŭ-i, Abraham ndai gawai bās.
Hagar ngga Ishmael dog Pibu.
9Agi ndi andu, Ishmael anak Abraham ngga dayung bangsa Egypt adi dŭn Hagar agi birubi ngga#21.9 birubi ngga; puan kah: napat. Isaac anak Sarah.#21.9 Kada pimindai adi jah nang: anak Sarah; mating nang sakati darŭm piminyu Hebrew. 10#Gal 4.29-30 Kan Sarah kiris ngara duwŭh birubi, ayŭh nang di Abraham. “Pibu dayung urun anŭ ngga anak-i Ishmael so ti. Amai anak dari urun anŭ dŭh bisa sua dapŭd ani ani utung so buat-rata mu adi anak ku Isaac re dapu.” 11Pinganang Sarah nyusah atin Abraham, amai Ishmael taŭn mbŭh anak adŭp-i gŭh. 12#Rom 9.7; Heb 11.18 Pak Tapa minyu di Abraham, “Dŭhnyah kuu susah pasar anak mu Ishmael ngga urun mu Hagar. Tunda adŭ pinganang Sarah, amai so Isaac inŭh kuu re dapŭd bara sesang adi Aku muko janji di kuu. 13Aku re nggen bagŭ anak gŭh di anak dayung urun mu anŭ isa ngara bisa jadi ndi bangsa. Ayŭh anak mu gŭh.”
14Awar isan isan andu jawa ndi, Abraham nggen pinguman ngga piin ndi bŭrŭh-kurit ndu Hagar inged-i. Ayŭh na Ishmael di punok Hagar yŭn kabis ka bada ngara bu. Hagar bu ka bigandon di tarun tana-pajam Beersheba. 15Kan piin inged-i mbŭh abo nok-i, ayŭh pasan ka tingge anak-i di ribo anak tŭngŭn kayuh, 16ka guru atur 100 mita jo-i so ayŭh. Ayŭh minyu darŭm asŭng-i, “Dŭh aku raan kiris anak ku kabŭs.” Darŭm ayŭh guru diginŭ, ayŭh#21.16 ayŭh; agi ndi pimindai adi jah nang: anak anŭ. rasu sien.
17Tapa dingah anak anŭ sien, ka malaikat Tapa minyu so rangit ngga Hagar, “Mani kuu susah Hagar? Dŭhnyah taru. Tapa mbŭh dingah anak mu sien. 18Makat meh ka di tambit anak anŭ ka nyaduh ayŭh. Aku re ndai ndi bangsa adi bās so sesang-i.” 19Jadi Tapa kuka batŭh Hagar ka ayŭh kiris ndi prigi. Ayŭh di ngisi bŭrŭh-kurit anŭ ngga piin, ka nggen piin anŭ di anak-i.
20Tapa agi ngga anak anŭ sitadŭn ayŭh masang baga bigatung; ayŭh rŭŭ di tarun tana-pajam Paran ka jadi pingasū adi raru pandai. 21Sindŭ-i dapŭd ndi naan dayung daya Egypt ka nggen di ayŭh ndu sawŭn.
Pekat-Janji Abraham ngga Abimelech
22 #
Tib 26.26
Di tipuh anŭ Abimelech ayō Phicol, adi pingibās bara soldadu-i, di tudu Abraham ka nang di ayŭh, “Tapa agi ngga kuu darŭm sopŭrŭg kayuh adi kuu ndai. 23Sabab anŭ bipayu meh digiti di sirung jawin Tapa, nang adŭp mu dŭh re nipu aku, anak anak ku, ka bara sesang ku. Aku mbŭh tian-ti tŭtŭd ngga kuu. Ngapŭi bijanji meh ngga aku nang adŭp mu re tŭtŭd ngga aku ka ngga rais ati adi yŭn mu rŭŭ.”
24Abraham nang, “Aku bijanji.”
25Abraham ngadu di Abimelech pasar ndi prigi adi daya-gaji Abimelech mbŭh ngaku. 26Abimelech nang, “Aku dŭh puan asi adi mbŭh ndai simŭnŭ. Kuu mating kidaan di aku; muran aku dingah pasar kayuh anŭ.” 27Komŭnŭ Abraham nggen di Abimelech kada biri ngga sapi, ka ngara duwŭh rasu ndai pekat-janji. 28Abraham nyidŭrŭ 7 anak biri so kaban biri-i, 29ka Abimelech siken di ayŭh, “Mani kuu ndai simŭnŭ?”
30Abraham nam, “Trima 7 anak biri ati. Darŭm kuu trima-i, kuu ngaku aku ati adi kareh prigi ati.” 31Ngapŭi meh tarun anŭ dog kadŭn Beersheba,#21.31 Beersheba: Rati dŭn ati darŭm piminyu Hebrew “Prigi Payu” puan kah “Prigi Ju” (tingga gŭh 26.33). amai diginŭ inŭh ngara duwŭh ndai payu-i.
32Ripas ngara muko ndai pekat-janji anŭ di Beersheba, Abimelech ngga Phicol pari ka Philistia. 33Komŭnŭ Abraham purun ndi tŭngŭn tamarisk di Beersheba ka nyambah TUHAN, adi Tapa adi udip adu adu. 34Abraham rŭŭ di Philistia mua tian-i.
Currently Selected:
TIBIRIK 21: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
