Mak 9
9
1Go Yecu ke yɔɔk, Ye we ya yɔɔk neyic, Ya kɔk ke keekɔc kaac eneke aaci bi guɔ thou, aŋootki e ke ken ceŋ de Nhialic kan ŋem ne bɔ ne riɛl.
2Na ci nin ya dhetem ke Yecu lom Petero, ku Jakob, ku Jɔn, ku leer ke ne kuur nom kepɛc: go Yecu guɔp rɔt wel ne kenhiim: 3ku ci alɛthke ɣɛɛr, a cik gualegual; acin ran de piny nom leu alath ɣɛɛr yiya. 4Ku tul yi Elija kene Mothe enɔŋ keek; ku jamki kene Yecu. 5Go Petero dhuk ku yook Yecu, Ye Rabi, apiath te tɔ wɔ ene: ne wɔ loi ɣoot keediak; tok ke yin, ku tok kene Elija, ku Mothe ke tok. 6Petero ee kuc ke bi luel; aake ci riɔɔc areet. 7Go piol bɛn ku kum ke piny: ku bɔ ror ne piolic, Ye yekene kee Wendien nhiar, yaka piŋ. 8Ana yi liecki kekɔth, ke cin ran beerki ŋem, aye Yecu kene keek.
9Na yi biki piny ne kuur nom, go ke lɛk bik ka cik ŋem cuɔk lɔ lɛk kɔc, agut te bi Wen de raan rɔt jɔt ne thouic. 10Goki ke ci lɛk keek muk, ku yeki roth thiec yi ye jon de rɔt ne thouic ŋo. 11Goki thiec, jamki, Yi kayee dugɛɛr luel yi Elija abi bɛn dhiil tueŋ. 12Go ke yɔɔk, Ye Elija abi kan bɛn eyic, ku dhuk kaŋ kedhia; ku ci gɔɔr yade ne Wen de raan, ya bi kajuec guum, ku bi jai? 13Ku we ya yɔɔk, Ya Elija ee bɛn, ku kacik luɔi ke de kepiɔth, ci man e cene ye gɔɔr ne yen.
14Na cik bɛn enɔŋ kɔcpiocke, goki duut ŋem kene keek, ku dugɛɛr thiec keek ne kaŋ. 15Go duut ebɛn, wen cik kek ye ŋem, goki gai, ku riŋki enɔŋ en bik lɔ muɔth. 16Go thiec, Ye yeŋo yaka thiɛc keek? 17Go ran toŋ de duut jam, Ye Dupioc, an ci wendie bɛi enɔŋ yin, anɔŋ guɔp jɔŋ cie jam; 18na ci ye dɔm, e kacuɛt: ku cuuth amoth, ku reem yelec ku riir wei: yeneka can kɔckuk piɔceke thiec ya bik nyaai; goki cuɔk leu. 19Go dhuk yook ke, Ye kuan cin gam, ba ya reer wɔne week anana? ba gum ne week anana? Yiɛne ɣɛn. 20Goki yiɛn en: go ye ŋem, go jɔŋ rac dai rɛt ne rɛɛc de yepiɔu; ku cuɛt rɔt piny, ku cuuth amoth ne yethok. 21Go Yecu wun thiec, Ye ne dɔm na? Go jam, Ye nelan e yen meth. 22Ku kaye cuat mɛɛc ku ne piu yic, bi nɔk, yen na ye kaŋ leu, ke yin kace piɔu ne wɔɔk, ku kony wɔ. 23Go Yecu yɔɔk, Ye na ye kaŋ leu! Kaŋ kedhia aaye leu ne ran ye gam. 24Go wun e meth eyic dai yaat, ku jiɛm, Ye an gɛm; kony gam kɛn an guɔ gam. 25Na wen ŋem Yecu duut ne bɔ ke kat, go jɔŋ rac waai, yook, Ye yin jɔŋ cin thok ku ca miŋ, yin ya yɔɔk, ya bar bei ne yeguɔp, ku duk beer lɔ thin. 26Go coot, ku ret areet, ku bii bei: go meth jal ciɛt ke ci thou; go biak dɛ de duut cɔɔl, Yii ci thou. 27Go Yecu dɔm ciin, ku miit nhial; go rɔt jɔt. 28Ɣɔn ye bii ɣot, go kɔcpiocke thiec neluɔɔŋ, jamki, Yi kacuk leu ne nyiɛi. 29Go jam, Ye ke cit yekene acie leu ne nyiɛi, ee lɔŋ yetok yeneka leue yen.
30Goki jaal etɛɛn, ku bakki Galili yic; ku kɔr bii kɔc cuɔk nyic. 31Ee pioc kɔcpiocke, yook keek, Ye Wen de raan ee taau e kɔc cin, abik nɔk; ku na cik ye nɔk, e kabi rɔt bɛɛr jɔt ne nin keediak. 32Go yejame cuɔk lɔ ne kenhiim, ku riɔcki ne thiɛc bik kek ye thiec.
33Ɣɔn e kek lɔ Kapernaum: ana ye tɔ ɣot, e ke thiec keek, Ye yeŋo e luɛlka dholic? 34Goki mim: ake teer dit dholic, ne ran bi dit. 35Go nyuc piiny, ku cɔɔl thiɛrkurou; ku yook ke jiɛm, Ye na ye ran ye piɔu naŋ bi dit, e kee tɔ ciɛn ne raan ebɛn, ku ye raan ebɛn luɔi. 36Ku loom mɛnhthi, ku tɛɛu ne keciɛl yic: ku boom, ku yook ke, 37Ye ran ye mɛnhthin cit yemɛnhe loor ne rincie, e kee ɣa loor: ku ran ye ɣa loor, e kacie ɣan e ye loor, e ke yen yen man ci a tuɔc.
38Go Jɔn yɔɔk, Ye Dupioc, wɔ ci raan yok ke ciec jak rac ne rinku: goku jai, ne ke cen wɔ ye biɔth. 39Go Yecu yɔɔk, Ye duɔka jiɛi: acin ran leu kadit ne luɔi ne rincie, leu jam arac ne ɣan. 40Ran cie ter ke wɔ ee ya randa. 41Na yin raan we piu ke dek ne rincie, ne ke ye we kɔc ke Kritho, we ya yɔɔk neyic, Ya ke ariɔmde aci bi maar. 42Ku ran bi toŋ de keemithka cɔk kɔth, e kee ŋuan te cene ye ruok yeth kuur diit de guɛr, ku cuɛte bɛɛr. 43Na cɔk ciindu yi kɔth, ke tɛɛme wei: aŋuan enɔŋ yin ba lɔ ne piiric ke yin ye ciin tok, ne ba naŋ cinku keerou, bi yi cuat giɛna nɔŋic many ce leu ne piɔk: 44te ci liɔŋden ye thou, ku ci mac ye yai. 45Na kathe, ke yin tɛɛme yicok wei: aŋuan enɔŋ yin ba lɔ te piir yin, ku ye cok tok, ne ba naŋ cok keerou ku bi yi cuat giɛna, 46te ci liɔŋden ye thou, ku ci mac ye yai. 47Na cɔk nyindu yi kɔth, ke tuk bei: apiath ba lɔ ne ceŋ de Nhialicic we nyin tok, ne ba naŋ nyin keerou, ku bi yi cuat giɛna: 48te ci liɔŋden ye thou, ku ci mac ye yai. 49Raan ebɛn abi riir ne mac. 50Awai ee piath: ku na ci wacde jaal, ke bak bɛɛr cɔk wac wuɔde? Yaka awai cɔk tɔ ne wegup ku ye ŋɛk ke ŋɛk reer ne dɔɔr.
Currently Selected:
Mak 9: LEKJOT
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1940, 2017
Learn More About Lek Jot de Jecu Kritho 1940
