Tabekacane 30
30
1Ku Rakile kai pasiakai ki Yakubu tulalake, la kirimu pathalra ki takaini, la iya kai ki Yakubu, “Baadhaili ku lalake; lu kaisu pia kwini, lri pacadhaku!”
2Ku Yakubu la kalisi ki Rakile, si iya kai, “Kainaku lri maka ngitalikaiyane ki Twaumase; kwini kaika tulalalakesu amanini.”
3Ku Rakile la iya kai, “Kawvai durili ka Bila, tadrusa iniane apece, lani tulalake pasikai nakwane; lu mia kwini, ala nau maka atiatina.” 4Ku Rakile la malra ki durini ka Bila si baai ki tauwaneini tulabaibai, ku Yakubu la tadrusa ki Bila apece. 5Ku Bila la katawbaliri, la tulalake ku lalake ki Yakubu ku vaeva ku sawvalai. 6La iya kai ku Rakile, “Ngiatalikaiyane nakwane mwalra ku sakwalrialrili ku Twaumase, kialalra ku inulrili, la baai nakwane ku vaeva ku lalake ka sawvalai.” Lakamani ku sunaganeini ki lalake pasi Dange#30.6 “Dange” ku pacugane “pusakaiyaili” amia.. 7Ku Bila la katawbaaliringa, la tulalake ku lalake ki Yakubu ku sakadrusa. 8Ku Rakile amia kai, “Maulrudru nai ki kaka, la tau akaciaku.” Lakamani ku sunagane ki lalake pasi Napetali#30.8 “Napetali” ku pacugane “madradrikisi” amia..
9Ku Lria la ngithathingale ala ka kai lri tulalakenga, la malra kwini ki durini ka Zilepa baai ki Yakubu tulabaibai; 10ku Zilepa la tulalake ku vaeva ku sawvalai ki Yakubu. 11Ku Lria amia kai, “Ala sasipianaku!” La sunagane ki lalake ka sawvalai pasi Gade#30.11 “Gade” ku pacugane “sasipiane” amia.. 12Ku Zilepa la tulaalakenga ku lalake ki Yakubu ku sakadrusa ku sawvalai. 13Ku Lria amia kai, “Ala kiasubulrubulrwaku! Sanaka ababai kiasubulrubulru ka alisu lri iya nakwane.” Lakamani ku sunagane ki lalake pasi Asere#30.13 “Asere” ku pacugane “mwaesai” amia..
14Saka kalakitalekane ki mugi, ku Riwbingi yakai ki mamugiane kidringai ku piya ku sapakagaragarangane ki sawvalai ka madru#30.14 “sapakagaragarangane ki sawvalai ka madru” akaneane ka mararamau ki tai. Sapakagaragarangane ki sawvalai ka madru, lu kane ku sawvalai arwa kagarange amia., la malra si baai ki tinaini ka Lria. Ku Rakile la iya kai ki Lria, “Tavalaili pakabekeelane kwini malra ki lalakesu kwi sapakagaragarangane ka madru!”
15Ku Lria la tubalre, “Kaiyana makakelrete ku taribicanesu ki tauwaneli? Kikai nau riibicinga la iyaiyasu kikai sapakagaragarangane ka madru ki lalakeli!”
Ku Rakile la iya kai, “Alaiyasi baaisu kwini sapakagaragarangane ka madru ki lalakesu, kai maungu tadrusanga apece ki Yakubu.”
16Sakamiauawbunga, ku Yakubu la kela singimamugiane; ku Lria la kidredresenge, si iya kai iniane, “Kaimaungu lri tara tadrusata apece, asi lwiyane ngwalai muswane arakaiyaku ku sapakagaragarangane ka madru ki lalakeli balrithi muswane.” Kwini ki maungu, ku Yakubu la tadrusa ki Lria apece.
17Ku Twaumase kialalra ku inulri ki Lria, la katawbaliri kwi alisu, si tulalake ku lalake ki Yakubu ku sakalrima ku sawvalai. 18Ku Lria la iya kai, “Ku Twaumase wabaai nakwane kai pakalreva, asi lwiyane wamalraku ki durili si baai ki tauwaneli.” La sunagane ki lalake pasi Isakare#30.18 “Isakare” ku pacugane “wadawlu arakaikai” si “wamalra ku pakalreva” amia. 19Ku Lria la katawbaaliringa, la tulalake ku sakaeneme ku sawvalai ka lalake ki Yakubu. 20Kwi alisu amia kai, “Ku Twaumase wabaai nakwane kai tinukucingalrane ka saceacebe; kikai ku tauwaneli lri kathariringa nakwane, asi lwiyane pasangwa enemaku tulalake ku sawvalai ku lalakeini.” Lakamani ku sunagane ki lalake pasi Zibulungu#30.20 “Zibulungu” ku pacugane “tarwamara” si “saceacebe” amia.. 21Sakabilrilinga la tulalake ku vaeva ku ababai, la sunagane iniane pasi Dina.
22Ku Twaumase makalithi ki Rakile, la kilalra ku inulrini, ala maka tulalake. 23Kwi alisu la katawbaliri, si tulalake ku vaeva ku sawvalai, kai alisu la iya kai, “Ku Twaumase mwalranga kai kitudreadrekaseli. 24Ku Tamatama ani baaiana nakwane ku vaeva ku sawvalai ka lalake.” Lakamani ku sunagane ki lalake pasi Yusepe#30.24 “Yusepe” ku pacugane “ku Tamatama ani baadhana nakwane ku vaeva” si “ku Twaumase mwalranga” amia..
Ku Yakubu si Labange makakawariva
25Ku Rakile sa tulalakenga ki Yusepe, ku Yakubu amia kai ki Labange, “Ala nau katwasenga! Siwlri mwa ki cekeleli. 26La palraingaili mailuku ki taelrelreli, labaibaili si lalalakeli, la nau katwase; kikai amani ku sakipawlrawlravaneli ku takaunganeli. Wathingalesu ku sakiasamwamulali pasikai muswane kaungu!”
27Ku Labange la iya kai iniane, “Kilalalra kai aiyaneli! Lu asipaku, ku Tamatama ngwalai muswane ala kamani ku subulrubulru nakwane. 28Pelaelaili, lri nguthainusu ku sapawlrawlravane, lri tara baadhaku muswane.”
29La tubalre ku Yakubu, “Wathingalesu ku tapangimianeli kaungu pasikai muswane, ikai ki tadrangalruaneli, kikai lalwangesu, lakiusu luka watumane edhale. 30Sa kainaku kelana, ku pikaisu kaika thaininwana, kikainga kai latacekecekelanesu la padrimanga kakalra turamuru; ku Tamatama ngwalai nakwane si subulrubulru muswane#30.30 “ku Tamatama ngwalai nakwane si subulrubulru muswane” ku wahunyake madu iya kai “adravane lu muinwaku, ku Tamatama tara swabulrubuulru muswane”., kikainga lri ngipapasikainga naku ku angimianeli!”
31Ku Labange la kivaga, “Lalri pangitumanaku ku apangibilrianeli pawlrawlrau muswane?”
Ku Yakubu la tubalre, “Kainaku lri malra ku sapawlrawlravane ku paisu! Luiyasi palraingisu kikai ani pia kwini iyaiyali, lri dulrwaku pacungulu drangalruana ki lakiusu. 32Kaikameane, lri mwaku ki lakiusu, si apawvagavagai ki sanaka cucuriane, vuvulrikane, si icecelrenge, ka nikiubawbalane si cucuriane, vuvulrikane ka kiu, kikai ani kamani kudra sakipawlrawlravane ku tapasikaiyaneli muswane kaungu. 33Luka ngimiyaiya kai lukabibilrili lri pakaduaisu thingale luka patengatenganaku luka ini; lu kelasu drele ku sakipawlrawlravaneli yai, alaiyasi la kidringaisu ku kaika cucuriane vuvulrikane ku kiu ikai ki lakiuli, ku kaika icecelrenge ka nikiubawbalane ka kiu, lri thingalesu kwini ala ka kupali.”
34Ku Labange la tubalre, “Palraingaku kwini taiyanesu, tapangimianga kikai!” 35Sakavaivai kwini, ku Labange la kibubuli malra kwini lavuvulrikane, cucuriane ka balase ka kiu si vuvulrikane, si cucuriane, si maibu ki lrawlrapungu ka tina ka kiu apawvagai, la mialri pawvagai kudra ki laicecelrenge ka nikiubawbalane ka kiu, la padrangalru ki lalalakeini, 36Ala katwase mailuku ki lakiu, mwa kwidra nimakatulrulane ku tadadavacane ku adailane matatukudha ki Yakubu. Ku Yakubu la pagwagu ku tedrane ku lakiu ki Labange.
37Ku Yakubu la malra kudra vasau ka lredelrede ki paiyange ka angatu, alemundu ka angatu si utungu ka angatu, la mubakuru ku bekeelane. Kwini ricingi ki angatu la adrelane ku cucuriane ka lrawlrapungu. 38Kai lasu la malra kikai miyaiya kai ka laricingi ki angatu thethere picucubungu ki lakiu, si taungungulane ki lakiu, asi lwiyane, kwini lakiu lu kela ki acilai ungulu yai la mabalabalau. 39Ku kiu lu icucubungu kai ki miyaiya kai ka ricingi mabalabalau, la tulalake ku vuvulrikane, cucuriane, udiwdingane ku lrulai ku kiu.
40Ku Yakubu la pauvagai ki nikiubawbalane ka kiu si kiu, si paecebe kwini ki vuvulrikane, si icecelrenge ka kiu ki Labange. Ku Yakubu la pangimia kikai si drima ku kiuini, si malra patatukudha kwini ki kiu ki Labange si lakiuini.
41Kwini taricucuru ka kiu lu mabalabalau yai, ku Yakubu la malra kwini miyaiya kwini ka angatu ka ricingi thethere picucubungu ki taungungulane ki kiu, la ikai kwini ki miyaiya kwini ka laricingi mabalabalau. 42Ai lu mabalabalau kwini tariarilai ka kiu yai, la kai thethere kwini miyaiya ka ricingi. La kai tarathainu, ku tariarilai ka kiu laka Labangane, ku taricucuru ka kiu laka Yakubuane. 43La mia kikai, ku Yakubu arwangiradheradheekane, makalra ku lakiu, ku laduri, ku lalrakeda si laruba.
Currently Selected:
Tabekacane 30: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
