Tabekacane 31
31
Ku Yakubu matwase mubere ki Labange
1Ku Yakubu la kilalra ki lalalake ki Labange sa kalisilisi iya kai, “Ku Yakubu waribici patuelre ku tacekecekelane ki tamaita; ku tacekecekelaneini patuelre yai tamaitane patuelre.” 2Ku Yakubu la patarathingalenga ku Labange kaika miyaiyanga ku siaswalane kathaithariri iniane. 3Sakamani kwini, ku Tamatama amia kai ki Yakubu, “Lri siwlrisu mwa ki cekelesu, mwa ki cucungulanesu si laretesanesu; lri tapalraku muswane.”
4Ku Yakubu la sikawlu ku wamwa pelaela ki Rakile si Lria, si cunu liniane madredresenge mwa ki tapagwagwane ki lakiu. 5Kwi lasu la pelaela liniane, “Patarathingalengaku ka tama numi kai maiyanga ku siaswalane kathaithariri nakwane; ai ku Twaumase ki ama tatapalrane nakwane. 6Kunumi ka tadrusa la thingale numi, akaelrenga naku ku pukuli pasikai ki tama numi kaungu, 7ai walrilrigili nakwane, kingimangeale tupela ku mulrawlrauli ku paisu; ai ku Twaumase kai palraingi iniane ku pwalrigili nakwane. 8Alaiyasi iya kai ku Labange, ‘Ku gugurirane ku kiu sapawlrawlravane ki takaunganesu,’ kwini lakiu patuelre la tulalake ku lagugurirane; kwi lasu alaiyasi iya kai, ‘Ku vuvulrikane ku kiu sapawlrawlravane ki takaunganesu,’ ku lakiu la tulalake ku vuvulrikane ku kiu. 9Ku Twaumase wamalra ku lakiu ki tamasu si baai nakwane.
10“Yakai saka kiningivalane, saka kalakibalavane ki kiu, wasipiaku: Ikai ki sipili wadrelaku kwini mababalabalau ka labalase ka kiu yadreepele ka gugurirane, vuvulrikane si udiwdingane. 11Ku sasiakawlu ki Twaumase la ikai ki sipili iya kai, ‘Yakubu!’ La tubalreaku, ‘Yakaiyaku kai.’ 12La iya kai, ‘Drela, kikai lawabalabalau patuelre kai labalase ka kiu yadreepele ka gugurirane, vuvulrikane si udiwdingane. Ku tapangimianeli kikai, amani sa pia kwini muswane ku Labange, wadrelaku patuelre. 13Amaniaku kwidra yakai Bithele adrelane muswane ka Twaumase. La ikaisu kwini cegecege ku vaeva ku lrenege tusangulringalringavane, la paralikilikisu arakai ku lawlau ki ulrive, si ikai kwini papia nakwane kiketekete. Kikai, padulrwa ku asiwlriane mwa ki takitulalakanesu.’ ”
14Ku Rakile si Lria la tubalre ki Yakubu, “Kikai kai nai lri mucungulu ku namaneemanenga ki ama. 15Twapalrapalranga naiane. La kilangainga naiane, la ngitatumaneemanenga ku lapaisu nai. 16Kwini malra ki Twaumase patwalai ki ama kwini tacekecekelane yai nanaiane si nalalakane nai. La singikaiya ku taiyane ki Twaumase muswane katwase pangimia.”
17-18Ku Yakubu la padulrunga, lri siwlri mwa ka Kanange ki tamaini ka Isake. La pangukai ki lrakeda ki lalalakeini makanaelre si taelrelreini, si ililuku ki lanilapulapwane, la mailuku kwini ngirarubuini kwini tacekecekelane ikai Mesuputamia, si katwasenga. 19Sakamani kwidra, ku Labange matwase kaciane ku ubale ki kiu; ku Rakile sa kai ibalriu ku tamaini la mwa kupa malra kwini lasamiamiange ki daane lini. 20Ku Yakubu kai peaelaela ki Labange kiabubuli katwase. 21Kwi lasu wailuku demedeme, si kiraririimu katwase, la talubalre kadravane Yuparati, papia talikai Gileade lregelrege.
Wasaladha ku Labange ki Yakubu
22Sa makatulrulunga, la ikai ku peaelaela ki Labange, matwase mubere ku Yakubu iya. 23Ku Labange la mailuku ki lasakacekeleini si saladha ki Yakubu. Sa makapitulunga ala padali ki Yakubu ikai lregelrege tali Gileade. 24Sakamaungu, ku Twaumase yakai ki sipi ki swa Arame ka Labange adrelane, la iya kai iniane, “Kusu dradrela! Madha cacacapange kukuludru ki Yakubu.” 25Sakamani kwidra ku Yakubu mialri ikai lregelrege tusasuladhane; ku Labange si laretesaneini la mialri ikai lregelrege Gileade tusasuladhane.
26Ku Labange la iya kai ki Yakubu, “Asu kibubuli nakwane, malra ki lalalakeli ka ababai pangimia ki niravasane katwase iluku? 27Asu kibubuli nakwane, katwase si kai pelaela? Alaiyasi la pelaelasu nakwane, nai tara kiraragadhaku sateatedre kipusau muswane, arakai ku patungutungu si kilrikilringi senai kipusau muswane katwase. 28Kai tapianesu kikai ngiamakulrungu turamuru, adravane ka aumane ki lagaganeli, si lalalakeli, si kipusau liniane la kakadrua. 29Naika wadulrwaku dula muswane, ai kumaungu, ku Twaumase ki tamasu pakiapapawlringau nakwane, kai palraingi cacapange tulisi muswane. 30Wathingalaku kai barengeranesu ki cekelesu, apia mubalriu, ai asu kirimu kupa kwini lasamiamiange ki daane nai?”
31Ku Yakubu la tubalre, “Sana kidremedremaku alau lri arakaisu ku adreme ribici ki lalalakesu, la kirimwaku mukuludru turamuru. 32Ai, lu kidringaisu ikai ki aneane kwini lasamiamiangesu, lri kamaani ku wapacai; ikai cucubungu ki laretesanesu, alaiyasi thingalesu ka yakai ki aneane ku lamanemanesu, malra iluku.” Ku Yakubu kai wathingale ku Rakile ala ka wamalra kudra lasamiamiange ki tamaini.
33Ku Labange la mudaane ki balrawbau ki Yakubu silape, ala pacungulu mwa ki balrawbau ki Lria si tadrusa ka duri, la kai maka kidringai ku manemane; ala mwa ki balrawbau ki Rakile. 34Ku Rakile wamalra kwini lasamiamiange ki daane lini si sekete pikai ki thuthubungu ki lrakeda, la nene ikai belenge. Ku Labange la alraelrenga ki labalrawbau silape, la kai maka kidringai. 35Ku Rakile la iya kai ki tamaini, “Madha kalisilisi. Kikai siaeradhaku, kainaku lri maka paswiva acegecege icucubungu muswane.” Ku Labange la singibilanga silape, la kai maka kidringai kwini lasamiamiange ki daane lini.
36Ku Yakubu la kaliisi si kivaga ki Labange, “Manemane ku pasalriwli, pasalrivaku ku manemane ki kakudhane, la piasu kai saladha nakwane? 37Wasilapengasu singibilanga ki laameceli, la kidringaisu kwini lamanemane numi? Malra putaluvaivai, picucubungu mitane si laretesane, la tadrele makanaelre, lani thingale turingaringau luka saneaneane ku pacengecenge si pasalriu. 38Ku taikaiyaneli ki daanesu taramapusale ka caili, ku lanikubawbalane ka kiu si lakiusu kadrwana ku kialribate; ku labalase ka lakiusu, la kainaku kaneana ka navaevanga. 39Ku kiapapacai ki waudriwdripi ku kiu, kainaku waililuku si padrele muswane, sapathingalane ka kainaku pasalriu, amaniaku ka wathavungu patuelre. Adravane ka vaiyane ka maungu, ku kiu lu kikupa, tara pacugusu nakwane. 40Kainaku watelrai kucengelrau lukavaiyane, lukamaungu la kakecelre turamuru, la kainaku erereke lu apecaku lukamaungu. 41Taramapusalaku ka caili ikai ki daanesu kauawngu; pakai ku akarudranganeli mwa ki tadrusa ka lalakesu, la pasikaiyaku muswane kaungu tara 14 ka caili; pakai ku akibadhaneli ku kiusu, la pasikaiyaku muswane kaungu taraeneme ka caili. Adravane ka miyaiya kikai, la kingimangealeananasu tupela ku sapawlrawlravanesu nakwane ku paisu. 42Ana kaika Twaumase ki cucungulaneli ka Aberahame si Twaumase ka musakene ukuludru ki Isake ka watapalra nakwane, nai tara paliwnaunaisu nakwane pakatwase. Ai ku Twaumase wadrele ku matikurwaneli, ku sakwalrialrili; kumaungu la kaelaela muswane.”
Ku Yakubu si Labange makaketekete
43Ku Labange la tubalre ki Yakubu, “Kai lamataka lalakeli, kai lagagane laka lagaganeli, adravane kai lakiu laka nakwane; ku patengatengane kikai yacucubungu muswane demedeme nakwane. Kikai kainaku maka waruthuku ki lalalakeli si lagaganeli, 44Maesaesadhaku kiketekete muswane. Ala tarubu si raedre ku lrenege, tusangulringalringavane ki tamakaketeketaneta.”
45Ku Yakubu la malra ku vaeva ku lrenege, si cegecege tusangulringalringavane. 46Kwi lasu la pasarubu ki laretesaneini ku lrenege, si rubu payelrelre ikai thili ki tarubwane ku lrenege. La taelre kanekane ungungulu makanaelre. 47Ku Labange la pasi “Yegare Sahadutha#31.47 “Yegare Sahadutha” ku vaga ki Arame ku pacugane yai “yarubu ka lrenege ka pangualrialringau mitane” amia.”; ku Yakubu la pasi “Galede#31.47 “Galede” ku pacugane “yarubu ka lrenege ka pangwalrialringau mitane” amia.” kwini ki nirubwane ka lalrenege. 48Ku Labange la iya kai ki Yakubu, “Kaikameane, kikai lalrenege yai amaninga kudra sapatuthingalane ku tamakaketeketaneta.” Lakamani kikai kadaengane kai ku kipasi Galede. 49Ku Labange la mialri iya kai, “Lu masasivagaingata, ku Tamatama ani ikai mitane ka tadrusa dredredrele.” Lakamani kikai kadaengane mialri kipasi Mizepa#31.49 “Mizepa” ku pacugane “tadredrelane kadrenge” amia.. 50Ku Labange la pacungulu iya kai, “Alaiyasi tudreadrekasesu ki lalalakeli, ku marudrangeanasu mwa ki drumane, adravane ka kadrwa ku wathingale, pulringaava, ku Twaumase wadredredrele mitane. 51Drela kikai piakaiyaku kabicelrakane mitane sarubu kai lrenege si sadrengedrenge ka lrenege; kikai yai nicegecegane ka sangulringalringavane. 52Kikai nirubwane kai lrenege, kikai nicegecegane tusangulringalringavane yai sapangulringavane pathingale mitane: Lutuumane kainaku lri lribate kikai ki nirubwane ka lalrenege si kikaruburu muswane, lai lri mialrisu kaisu lri maka lribate kikai ki nirubwane ka lalrenege kai nicegecegane tusangulringalringavane si kikaruburu nakwane. 53Ku Twaumase ki Aberahame si Twaumase ki Nahure#31.53 “Ku Twaumase ki Aberahame si Twaumase ki Nahure” ku Aberahame yai tumu ki Yakubu, ku Nahure yai tama ki Labange. ani ikai kabicelrakane mitane turingaringau ku pacengecenge si pasalriu.” Ku Yakubu la papia ki nagane ki Twaumase ka musakene mukuludru ki tamaini ka Isake kiketekete, ku lrika pasuswane kikai nipukawnane. 54Kwi lasu la ikai lregelrege culu kwini nilapulapwane tusapatarumarane ka lrisi, la dawlu ki laretesane taelre kilringulringulu kane; sa maka kanenga, kwi lalasu la ikai lregelrege sulai. 55Sakakaiyane ki mialrealre, ku Labange la uma kipusau ki lagagane si lalalakeini, la subulrubulru liniane, ala katwase kwini, si siwlri mubalriu.
Currently Selected:
Tabekacane 31: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
