Tabekacane 41
41
Ku Yusepe walalrwai pelaela ku patharevane ki sipi ki talialalai
1Sa taradrusanga ka caili, ku talialalai ki swa Izipiti la sipi ku vaeva, kwi lasu acegecege ikai babiabila ki kadravane Nile, 2la drele ku pitu ku tariicucuru si tadradrau ku tina ka lwange ku twalai kwini kadravane mubelenge, ikai babiabila kanekane ku ubulu. 3La pacungulu, ikai ku pitu ku tariarilai si lridralridralriidrau ku tina ka lwange mialri singikai ki kadravane mubelenge, acegecege ithili kwini ki pitu ka tina ka lwange. 4Kwini latariarilai ka pitu ka lwange la kirimu kane kwini ki taricucuru si tadradrau ka pitu ka tina ka lwange. Kikai ku talialalai la alrigilrigi. 5La eerekenga, la siipinga ku maelane, la drele ikai ku taluvale ku mugi la tupitu ku ricingi si sueteane ku mabea ku madru, 6la ceebenga ku pitu ku lrailraici si mia ki kiamwa ki culwane ka saseverane ka kulalama ku madru ki mugi; 7kikai pitu ka lrailraici ka madru ka mugi la malra kane kwini ki pitu ka swaeteane ku madru ka mugi. Sa pacununga ku talialalai ala pulringau ka sipi. 8Sakakaiyane ki mialrealre, ku talialalai la kaupungu kai kathaithariri ku kidremedremeini, la padawlu si sarubu ki yakai Izipiti ki sanaka taraivigi si tarasilrilrigu ki latariau kela mucucubungu iniane, la pelaela kwini sipini liniane, ai kadrwa ku maka wadulru pelaela lalrwai ki sipini.
9Kikai yai, kudra taramarasikaikai ki bava la iya kai ki talialalai, “Kaikameane ngwalringavaku ku tapasalrivaneli. 10Yakai saka kingivaalane, la kalisisu ka talialalaili, si drekase emenge ki taramarasikai ki akaneane si kunaku pwa ki taememengane ki kiacapili ki tarakadrenge. 11Ikai sakamaungu, la tara sipi nai, la makaela ku pacugane ku tasipiane nai. 12Ikai kwini la ikai ku tangea ku palra nai kiemenge ka yacengecenge ka swa Hiburu, kwini lasu nasasiakawlu ki kiacapili ki tarakadrenge. La pelaela nai iniane kwini sipi nai, la pelaela lalrwai kwini ki sipi nai. 13Sakabilrilanenga, ala ngimia kwini talalrwadhaneini: Kusu ka talialalaili la pasiwlrisu nakwane kai awnganeli, ai wamalrasu takeakelrai papacai ki taramarasikai ki akaneane.”
14Ku talialalai la padawlu mwa ki Yusepe. Kwi lalasu la makakaai katwase malra iniane pulatadre ki taememengane; deemele ku lringauini, kipabalrithi ku laimai, la kela mucucubungu ki talialalai. 15La iya kai iniane ku talialalai, “Wasipiaku ku vaeva, laka kadrwa ku umawmase ku maka walalrwai; la kilalraku wathingale lalrwai ki sipi iya muswane.”
16Ku Yusepe la tubalre, “Talialalai, kainaku wathingale ngikakamani lalrwai ku sipi, ai ku Twaumase lri baai muswane ku ngiaesadhane kathariri ku talalrwadhane.”
17Ku talialalai la iya kai, “Wasipiaku la acegecegaku ikai babiabila ki kadravane Nile. 18Yakai ku pitu ku tariicucuru si tadradrau ku tina ka lwange twalai kwini kadravane mubelenge, ikai babiabila kanekane ku ubulu. 19La pacungulu ikai ku pitu ku tariiarilai ku tina ka lwange mubelenge singi aciacilai, ka kadrwana ku dreleanali ikai Izipiti ku paramia kikai ku riladhane ku lwange. 20Kwini tariarilai ka lwange la kirimu kane kwini ki taricucuru si tadradrau ka pitu ka lwange, 21ai sakamiyana karilai, kadrwa ku taathingalane ku takirimwane lini kane kwini ki taricucuru ka lwange. Kikai kwidra la alrigilrigaku. 22La siipingaku ku maelane: Wadrelaku ikai ku taluvale ku mugi la tupitu ku ricingi si sueteane si kabea ku madru, 23la ceebenga ku pitu ku lrailraici si mia ki kiamwa ki culwane ka saseverane ka kulalama ku madru ki mugi. 24Kikai lrailraici ka madru ka mugi la malra kane kwini ki pitu ka swaeteane ku madru ka mugi. La pelaelaku ki lataraivigi kikai sipi, ai kadrwa ku umawmase ku wadulru lalrwai kikai sipili.”
25Ku Yusepe la iya kai ki talialalai, “Ku patengatengane kikai drusa ka sipi lri malra madu tuvaeva lalrwai, mararaamau ku pacugane. Ku Twaumase pakanaswalanga kudra apangimianeini pelaela muswane ka talialalai. 26Kwini pitu ka taricucuru si tadradrau ka tina ka lwange amani ki pitu ka caili, kwini pitu ka swaeteane ka madru ka mugi thadalrane ka pitu ka caili; kikai drusa ka sipi thadalrane ku patharevane. 27Kudra pacungulu tabelenge kwini pitu ka tariarilai ka tina ka lwange si kwini pitu ka lrailraici ka mia ki kiamwa ki culwane ka saseverane ka madru ka mugi amani ki pitu ka caili ka akasilravane. 28Mia kwini pelaelali muswane ka talialalai, ku Twaumase pakanaswalaanga pelaela ki talialalaili ku lrika angimiane. 29Kai Izipiti lri tukalabucukane ku kaika tangimianeana tarapitu ka caili, 30ala lri pacungulu tukalasilravane tarapitu ka caili. Kwini kalasilravane lri palraelre tulisi ki swa Izipiti, lai pakarimuru ki laumawmase ala ka nayakai ku kalabucukane. 31Ku pakilringavane ku kalasilravane lri kawlrawnga ku laumawmase ka nayakai ku kalabucukane. 32Kwini ededesu sipi kwi drusa ka talialalaili, sapelaelane ki Twaumase ka lri tara pangimia ku nau pia iyaiyaini, si lalri padaalrunga si pangimia.
33“Lakamani, talialalaili asu arakai ku malrigili si maka pwadaili drele ku umawmase, sikawlu iniane marasikai ki awngane Izipiti palraelre amiaku, 34la sikawlu ki drumane ki kiacapili, ikai ki nitarapitwane ka kalabucukane ka caili, malra ku padulru ku taleke ki kuni palraelre ngutaingeane ki nipawlrimane. 35Drekase liniane ikai kwini ki lri kela ka kalabucukane ka caili sekete ku taleke, ikai ki cacekecekele sekete ku lataleke, la sikawlu ki umawmase pamarasikai. 36Lu edede kela ku kalasilravane tarapitu ka caili, kikai niseketane ka taleke lri kamani ku taragelane ki mapapangale, kamani ku paudripi si kai kiarasilravane pacai ku mapapangale.”
Ku Yusepe kiasudralru marasikai ki cekele Izipiti
37Ku talialalai si latabebelenge la makitu palraingi kikai lrika kakudhane ka awngane ki kuni. 38Ku talialalai la iya kai ki latabebelenge ki kuni, “Kaita maka kiadringai ku lrika masudaedalepe ki Yusepe, asi lwiyane ku Ri ki Twaumase tapalra iniane!” 39Ku talialalai la iya kai ki Yusepe, “Ku Twaumase kikai peaelaelanga muswane patuelre, lri tara ka malrilriigilingasu ki naneanenga, ka pwadaili drele. 40Lri sikawlaku muswane marasikai ki kunili; kai mapapangaleli lri pasalaladha ku tadrekasanesu makanaelre. Ikai kai ki kuni, kathanenga ku pukuli ku sabebelenge muswane. 41Kikai lri pacegecegaku muswane kamani ku sutu ki swa Izipiti.” 42Ku talialalai la malra patwalai ki galaugawini ku hange ka tara, pasitara ki Yusepe, la malra ku mathaithaariringa ka kaimadhane ka sapakabelebelengane pasilaimai ki Yusepe, la pasidrekere ki Yusepe ku kingi. 43La panene ki Yusepe ngukai ki sakadrusa ka palridingi ki talialalai, yakai ku tarakadrenge ku aswalalala, la tarakadalranane makakaraleale, “Palribata! Palribata!” Laka miyaiya kai, ku Yusepe la kipacegecege asutu, marasikaikai ki swa Izipiti. 44Ku talialalai la iya kai ki Yusepe, “Talialaladhaku, ai ikai Izipiti palraelre, lwiyasi kaisu palraingi, kadrwa ku naneanenga ku umawmase ku lri ngivelevele.” 45-46Ku talialalai la sunagane ki Yusepe ku nagane ki swa Izipiti, pasi Zapenathe Panea, la baai kwini lalake ki barakalai ki swa Heliupulise ka Putipira ka sia Asenathe pasitaelrelre iniane.
Ku Yusepe sa taramatulrulunga ku caili pathagili pasikai ki talialalai ki swa Izipiti kaungu; kai lasu la katwase mulatadre ki daane ki talialalai, mwa lrilriu drele ki lacekele Izipiti. 47Ikai kwini ki nitarapitwane ka caili ka tatutalekane, la ngukalra ku taleke. 48Ku Yusepe la sarubu ku lataleke, ikai ki lacekele pikai ku tapwapwane sekete, sekete ku lataleke ku nisarubwane twalai ki ngiathalringulu ki lacekele. 49Kai lasu la ngukalra sarubu ku taleke, ku kalrane mia ki enai, kaika asiasipane.
50Sa kaiyana daruru kwini kalasilravane, ku taelrelre ki Yusepe ka Asenathe la tulalake ku tadrusa ku lalake ki Yusepe. 51Kwi lasu la iya kai, “Ku Twaumase pasakawlrau nakwane ku takwalrianeli si barengeraneli ki daane ki ama.” Lakamani ku sunagane ki takataakanga ka lalake pasi Manase#41.51 “Manase” ku pacugane “la ... karimuru” amia.. 52Kwi lasu la iya kai, “Ku Twaumase ikai ki takipakwalrianeli pangiaradhekane nakwane.” Kai lasu swanagane kwini ki sakadrusa ka lalake pasi Iparaime#41.52 “Iparaime” ku pacugane “wabaai ... ngiradhekane” amia..
53Ku tangiesadhane kitaleke ki nitarapitwane ka caili ki swa Izipiti paliakainga. 54Ngimia kudra tasakaladhane pelaela ki Yusepe, kwini atarapitwane ka caili tukalasilravane la kelanga. Unu kwini ngiathalringulu ka lacekele twakalasilravane makanaelre, ai ikai Izipiti kiinunga la suete ku taleke. 55Sa lri kasilraunga ku swa Izipiti, la mwa ki talialalai kitubi ku taleke. Ku talialalai la drekase liniane mwa ki Yusepe iya, paluludu ku takelretaneini patuelre. 56La aru pakilringalringau ku silravane, si salraelrenga ki kuni; ku Yusepe la muelebe kwini lataseketane patuelre, la kilangai kwini niseketane ka taleke ki swa Izipiti. 57Kwini la ngiathalringulu ka kuni ka laumawmase mialri kela mwa ki Yusepe kibungu, asi lwiyane twakalasilravanenga kawmasane, ku matikurwane pakialringau turamuru.
Currently Selected:
Tabekacane 41: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
