Tabekacane 42
42
Ku labetakane ki Yusepe wamwa Izipiti kibungu
1Ku Yakubu sa kilalra yakai tali Izipiti ku taleke iya, la kawriva ki lalalakeini iya kai, “Anu kai kidredredreme ku apangimiane? 2Kialalraku ku yakai Izipiti ku taleke amia, lu mwa kavai kibungu, amani lu pacaita kiarasilravane.” 3Kwini labetakane ki Yusepe ka tamangeale la mwa ka Izipiti makanaelre kibungu ku taleke. 4Ai ku Yakubu kai patwapalra liniane kwini agi ki Yusepe ka Biniyamingi, asi lwiyane ku Yakubu mwakuludru ki lasu lu kipadradresenge ku amatikurwane.
5Ku lalalake ki Yakubu si drumane ku umawmase la mwa kibungu, asi lwiyane ikai tali Kanange mialri kakalasilravane. 6Ku Yusepe yakai ka Izipiti asutu, ka amani ku marasiakai kilangai ku lataleke baai ki la wakela ku umawmase. Lakamani, ku lataka ki Yusepe wakela mucucubungu iniane, guruthungane icakena sukubu iniane. 7Ku Yusepe sa drele ki latakaini la thiingale ka amani lini, ai ngiakakukulrungane kai thingale, la akucaeme kivavaga liniane, “Twalai numi inu kainganai?”
Kwi lalasu la tubalre, “Twalai nai Kanange kela kibungu.”
8Ku Yusepe wathingale ki latakaini; ai kwi lalasu kai wathingale iniane. 9La ngulringau kudra natasipianeini, la raanau iya kai liniane, “Kunumi yai taralrilriu numi, ka wakela lrilriu kai ki tangimiamiane ki kuni nai.”
10La tubalre kwini lalasu, “Tamatamali, kunai ka lasasiakawlusu kaika taralrilriu, wakela nai ki kuni numi kibungu. 11Mabetabetake nai makanaelre, ka mwalecege ka umawmase, kaika taralrilriu.”
12Ku Yusepe la kakeecenge iya kai, “Ini! Kai kela numi walrilriu kai tangimiamiane ki kuni nai.”
13La iya kai kwini lalasu, “Tamatamali, kai lasasiakawlusu nata 12 ka mabetabetake, ka tangeangea ku tama ku twalalake; kwi lasu yakaikai ka Kanange. Ku agiaginga taelre ikai ki tama nai, la ikaiyana ku tangea ku agi nai ku maulrawnga.”
14Ku Yusepe la kecenganeana, “Ini! Ku amianga naaku kuasane, kunumi yai tengatengane numi ka taralrilriu. 15Lri kithiathingalaku numiane luka patengatengane numi lukaini. Lri cubungaku ki nagane ki talialalai kiketekete: Lu maalra numi iluku mwa kai kwini ki agiaginga ka betakane numi, lutuumane kainaku lri pakatwase numiane. 16Lri pakatwase numi ku tangea ku lri mwa malramalra iniane kainganai; ku drumane lri kiemenge ikai kai, mukalava ku sapathingalane kwini la taiyane numi. Sana kai ngimia kwini, lri papiaku ki niake ki talialalai kiketekete, amani numi ku taralrilriu makanaelre.” 17Kwini lasu ala malra liniane emenge makatulrulu.
18Saka samakatulrulu, ku Yusepe amia kai liniane, “Mwasakenaku ukuludru ki Twaumase, luiyasi tarumara numi kikai puvagali, lri pacepaku ki niake numi. 19Pakai ku sapelaelane ala ka patengatengane ku takaumawmasane numi, ala pasura ku tangea ikai kai taememengane tusapakiravasane; ku drumane lani katwase mubalriu, iluku kwini kibungu numi ka lataleke baai ki mwabaibaisi ka lawacekecekele numi, 20ala mailuku ki agiaginga kela kai nakwane. Lu mia kwini athingalane kwi vaga numi ka patengatengane, lai lri kai numi kipapacai.”
Kwini lalasu la tarumara kwini nipuvagane, 21la maiyaiya kai, “Sakamani kwidra pakwalrita ki agimita, kikainga kiapaucugungata! Wadreleta ku takipakwalrianeini, kiatubi mitane, la kaita thengete! Alakamani kikai kipadradresengengata kai amatikurwane.”
22Ku Riwbingi la iya kai, “Madha tulisilisi kavai ki vavalake naamiaku numiane, la kai numi kilalra; kikai kiame ka erai lri kamaningata ka wasawlri.” 23Ku Yusepe wathingale kilalra kwini vaga lini, ai kwini lalasu kai wathingale ki lasu ala ka wathingale kilalra, asi lwiyane kwini lu makawrivariva tara yakai ku tarapatululu. 24Ku Yusepe la ngibangulu katwase kwini, la tubi kawlai, ala kainganai siwlri kikawriva liniane, si pilri ki Simiune, picucubungu liniane kerenge iniane.
Ku lataka ki Yusepe siawlri mu Kanange
25Ku Yusepe la cunu ki umawmase pasaela pasuete ki lumase ku taleke ki latakaini, la malra kudra paisu sawlri pwa ki lalumase lini, la padulru ku akaneane lini ikai kadadalranane. Pudriadriingai suragele patuelre, 26la malra kwini kibungu lini ku lataleke pasiamece ki laruba, la katwase. 27Ikai kwini ki tasuladhane lini, ikai liniane la ikai ku mwatenge ki lumase lri pakane ki laruba, la drele ku paisuini ikaaiyana adringi ki lumasane. 28Kwi lasu la iya kai ki labetakaneini, “Kudra lalasu wasawlri nakwane kai paisu! Drela, kai yakai ki lumaseli!” Kwi lalasu makanaelre la makitu kasamali si kathathiburu, mukuludru iya kai, “Ku Twaumase ani piakai marasikai mitane?”
29Kwi lalasu la siwlri mu Kanange, mwa ki tama lini ka Yakubu, la pelaela iniane singibila ku tangilribalribatane lini. 30Kwi lalasu amia kai, “Kudra sutu ki swa Izipiti akwacaeme kawriva naiane, kaelaela naiane ka wamwa lrilriu ku tangimiamiane ki kuni lini. 31La tubalre nai, ‘Amani nai kudra patengatengane ku takaumawmasane, ka kaika taralrilriu; 32ta 12 nai ka sawvalai ka mabetabetake, ka vaeva ku tama nai. Yakai ku tangea ku agi nai ku maulrawnga kawmasane, ku agiaginga la asuru ikai Kanange ikaikai ki tama nai.’ 33Kwini sutu la iya kai, ‘Lri kithiathingalaku numiane luka patengatengane numi luka ini. Kunumi lri pasuraku ku tangea ikai kai, ku drumane kai lri katumane katwase siwlri, malra kikai lataleke baai kwini ki lamwabaibaisi ka wacekecekele numi, 34ala mailuka kwini ki agiaginga numiane mwa kai nakwane. Lu mia kai lri kipawtengaku numiane ka patengatengane numi ku takaumawmasane, ka kaika taralrilriu. Lai lri malraku ki betakane numi sawlri baai numiane; lai lri mialri numi dulru maka asuru ikai kai, thathathakai.’ ”
35Sakabilrilane, kwi lalasu sa gugugu kwini lataleke yai, la makitu drele kwini tapaiswane lini ka sakamiana ilumasane. Kwini lalasu si tama lini sa drele kwini tapaiswane, la makitu mukuludru turamuru. 36Ku Yakubu la iya kai liniane, “Ani kawlrase nguelre ki lalakeini amia numi nakwane? Kadrwanga ku Yusepe! La kakadrwanga ku Simiune! Kikai lalri iluku numi ki Biniyamingi! Kai amatikurwane kainganainga mwa nakwane!”
37Ku Riwbingi la papia ki tamaini kiketekete iya kai, “Alaiyasi kainaku iluku ki Biniyamingi pasiwlri, kai lri katumane lu papacaisu ki tadrusa ka sawvalai ka lalakeli. Pasirapalaili ki agili, lri tara mailukaku iniane siwlri.”
38Ai ku Yakubu amia kai, “Kikai lalakeli kai lri maka tupalra numiane mwa! Ku kabetakananeini wapacainga, laka kathanengaini tangeangea! Lu ikadalranane alau lri kipadradresenge ku apacadhane. Kunumi ani makalautu ki tatubiane mwadringi ki tadralredralrekane amia numi nakwane?”
Currently Selected:
Tabekacane 42: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
