Yuhani 14

Ku Yesu Kadalranane, Patengane ka sabulrwane, Niake

1Ku Yesu la iyanga kai liniane, “Madha kwalri kwi kidremedreme numi; kasalrwa ki Twaumase#14.1 “kasalrwa ki Twaumase” ku wahunyake madu iya kai “masalru ki Twaumase”., la kasalru nakwane. 2Ikai ki daane ki Ama talukalrale ku taikaiyane, ku akatwasaneli lri pasikaiyaku numiane padulru ku taikaiyane; ana kaika miyaiya kai, nai kainaku iya kikai kawriva#14.2 “Ikai ki daane ki Ama talukalrale ku taikaiyane ... nai kainaku iya kikai kawriva” ku wahunyake madu iya kai “Ikai ki daane ki Ama talukalrale ku taikaiyane, lu kaika ngiamia kai, manemane ku pelaelaelali numiane iya kai, lri mwaku si pasikai numiane padulru ku taikaiyane?”. 3Lu katwasenga naku pasikai numiane padulru ku taikaiyane, lri kainganai naku ngusela, si malramalra numiane mwa nakwane, pakai ku ataelreane numi nakwane ikai kwini. 4Kwini amwaneli, wathingale numi kudra kadalranane.”

5Ku Tumase la iya kai, “Tamatama, kai nai wathingale lulri mwasu inu, anai maka thingale kwini kadalranane?”

6La iya kai ku Yesu, “Amaniaku ku kadalranane, ku patengane ka sabulrwane, ku niake; alaiyasi kai ngukai nakwane, kadrwa ku umawmase ku lri dulru mwa ki Ama. 7Kudra wathingalenga numi nakwane, lri mialri numi thingale ki Ama#14.7 “Kudra wathingalenga numi nakwane, lri mialri numi thingale ki Ama”. Yakai ku lasidrumane ka hungu ka amia kai “alaiyasi thingale numi nakwane, lri tara thiingale numi ki Ama”.. Twalai kai, wathingale numi iniane, la drelenga numi iniane.”

8Ku Pilripi la iya kai ki Yesu, “Tamatama, padrela naiane ki Tama, la nai ngulwadhane.”

9La tubalre ku Yesu, “Pilripi, kai tataelreaneli numiane maulainga turamuru, kaisu wathingaleana nakwane? Ku wadrele nakwane, amani ku wadrelenga ki Ama. Asu kawrivana ‘Padrela naiane ki Tama’ iya? 10Yakaiyaku adringi ki niake ki Ama, la ikai adringi ki niakeli ku Ama, kaisu masaalru? Kai taiyaneli numiane kaika twalai nakwane, twalai ki yadringi nakwane ka Ama, ka ngiakakamani pia ku awnganeini. 11Kunumi kasalrwaili, yakaiyaku adringi ki niake ki Ama, ku Ama la ikai adringi ki niakeli; alaiyasi kai numi kasalru kikai vaga, ngwaladha ki awnganeli si kasalru. 12Lri pudriadriingadhaku pelaela numiane, ku masalru nakwane ku umawmase lri mialri thingale pia ku piali ku awngane, si lri pia ku maadradrau, asi lwiyane lri mwaku ki Ama. 13Lu pangukai numi ki naganeli, adravane lu kitubi numi ku manemane, lri tara pangimiaku, pakai ku apangukaiyane ki Lalake si paathingalane ku lrigu ki Tama. 14Lu pangukai numi ki naganeli, si papia nakwane kitubi ki manemanenga, lri tara pangimiaku.”

Nipalraingane ku aparalubane ki Siri

15“Alaiyasi kilibake numi nakwane, paluluda kai drekaseli. 16Lri kitubiaku ki Ama, lai lri baai numiane ku drumane ka tangea ka tarasasasa si paralubu, lri kapalralrawthunga tapalra numiane. 17Amani ku Ri ki patengane ka sabulrwane. Kai laumawmase kai tarwamara iniane, asi lwiyane kai lalasu kai maka wadrele iniane, la kai thingale iniane. Ai kunumi wathingale numi iniane, asi lwiyane yakai adringi ki niake numi, si ka tatapalraane numiane.

18“Lri kainaku cilri si paapakulrulrulu numiane; lri siwlriaku mwa numiane kikai. 19Lri kai tarathainunga, kai yakawmasane lai kai lri maka drelenga nakwane; ai lri drele numi nakwane, si ngwalai ku tapanianiakaneli, lai lri mialri numi panianiake. 20Lu kelanga kwini vai, lri thingale numi ala ka yakaiyaku ki niake ki Ama, lai lri ikai numi adringi ki niakeli, mia ku tayadringaneli ki niake numi.

21“Ku tarwamara kai drekaseli si paluludu, amani ku kialibake nakwane. Ku kialibake nakwane, ku Ama lri tara kilibake iniane; lai lri kilibakaku iniane, lai lri utaluvaivadhaku padrele iniane.”

22Ku Yuda (kaika Yuda ka swa Isekaliwte) la kivaga, “Tamatama, asi papia naiane sikakathane adrelane, la kai papia ki yakawmasane ka laumawmase adrelane?”

23Ku Yesu la tubalre, “Ku kialibake nakwane lri thingale si makitu paluludu ku vagali. Ku Ama lri tara kilibake iniane, si ku Ama si kwaku lai lri mwa nai iniane kwini, si taelre iniane. 24Ku kai kialibake nakwane lri kai paluludu ku vagali. Kikai kilalra numi kai vaga kaika twalai nakwane, twalai kudra ki siakawlu nakwane pakainganai ka Ama.

25“Saikaiyanaku taelre numiane, peaelaelanga naku kikai vaga. 26Ai kudra tarasasasa si paralubu, ka Ama ka ngwalai ki naganeli si pakainganai ka Siri, lri pelaela numiane patuelre, lai pangulringau numiane ku taiyaneli numiane patuelre.

27“Lri suraku ku sulivatane si baai numiane, lri baadhaku kai sulivataneli numiane. Ku baaili numiane, kai mararamau ku baai ki yakawmasane. Madha kwalri kwi kidremedreme numi, la madha ukuludru. 28Kialalranga numi ku taiyaneli, ‘Lri katwasenga naku, ai lri kelanaku.’ Alaiyasi kilibake numi nakwane, lri ngwalai numi ku tamwaneli ki Ama si kiragai, asi lwiyane madradrau nakwane. 29Sakaiyana ngimia kikai, paswalaku pelaela numiane, pakai ku akasalrwane numi kudra lu ngimianga. 30Kikai lri kainaku akukalralenga kawriva numiane, asi lwiyane kikai warathudu ki yakawmasane lri kelanga. Papia nakwane kadrwa ku puku lini; 31ai kai yakawmasane nai thingale ka kialibakaku ki Ama, lakamani ku paluluduli ku drekaseini patuelre.

“Ngidrakala, lata katwase!”

Currently Selected:

Yuhani 14: NDV

Highlight

Copy