Yuhani 13

Ku Yesu patawdrapale ki lasituini

1Aswala ki atulrisisiane ki Takilragavane ka lrisi, ku Yesu wathingale ka wakelanga ku akatwasaneini kai kawmasane, siwlri mwa ki Tamaini. Sakwa kadaalame kudra ki yakai kawmasane ku umawmaseini, la kai kaelaela ku kilibakane liniane.

2Ku Yesu si situini sa tukwauawbu, ku aidridringane yakainga ki kidremedreme ki Yuda ka swa Isekaliwte ka lalake ki Simune, kai lasu la kalrithethenga ku akilangadhane ki Yesu. 3Wathingale ku Yesu ki Tamaini ala ka wabaainga iniane patuelre ku puku; la thingale ku Yesu ala ka twalai ki Twaumase kainganai, lai lri siwlri katwase mwa ki Twaumase. 4La twalai ki taetalaneini ngidrakale, si mwalra ku ebeleini, la malra ku sibini si cingase pwa ki tasilakelaketaneini, 5la gugu ku acilai pwa ki vintange, si pathagili patawdrapale ki lasitu, la arakai ku sibini sakidri pakameale. 6Sa kainganai mucucubungu ki Simune Pitiru, ku Pitiru la iya kai, “Tamatama, lri patawdrapalesu nakwane?”

7Ku Yesu la tubalre, “Kai tapianeli kikai, kaiasasane kaisu wathingale, ai lukakaiyaiyanenga lri thingalesu.”

8Ku Pitiru la iya kai, “Lri kainaku kipatawdrapale muswane!”

Ku Yesu la iya kai, “Alaiyasi kainaku patawdrapale muswane, lrika kadrwanga ku tamacacapilaneta.”

9Ku Simune Pitiru la iya kai, “Tamatama, lukamiyaiya kai, madha patawdrapale nakwane sikakathane, adravane kai alrimali si awlruli mialria pabanau!”

10Ku Yesu la iya kai, “Ku siakelrenga mabulanga palraelre ku kinawmasaneini, lri tawdrapale sikakathane#13.10 Yakai ku lasidrumane ka hungu ku kai wapacase kikai “lri tawdrapale sikakathane” ka vaga.. Kunumi mabula numi, ai kaika mabuula makanaelre.” 11(Ku Yesu wathingalenga ka aneane ku lri kilangai iniane, lakamani ku iyaini kai, “Kaika mabuula makanaelre.”)

12Samaka patawdrapalenga liniane ku Yesu, si silaimainga ku sapakabelengane, la siwlringa mwa ki taetalaneini. La kivaga ki lasitu, “Wathingale numi kwi tapangimianeli numiane kwasane? 13Pacengecenge numi ku tawsakenane numi nakwane tu Sinsi, tu Tamatama, asi lwiyane miyaiyaku kwini. 14Amaniaku ku Tamatama, ku Sinsi numi, la patawdraapaleana naku numiane, kunumi la mialria mapatawdrapadrapale. 15Pasiakaiyaku numiane cegecege ku atwalralravane numi, ku lrika apangimiane numi ku tapatawdrapalaneli numiane. 16Twakuciingalraku pelaela numiane, ku sasiakawlu kaika madradrau ki tawki, ku nisikawlane la kaika makuciacingalre ki amani ku siakawlu iniane. 17Wathingalenga numi ki kikai, alaiyasi dulru numi pangimia lri kaesai numi turamuru!

18“Kikai vagali kainaku ka papia numiane makanaelre kawriva, wathingalaku ku pilrili ku umawmase. Ai ku taiyane ki Sisiu, ‘Kudra kiabalrubalrulu nakwane, ala arakaai ku drapale tetere nakwane’, kikai vaga yai lri tara ngimia. 19Sakaiyana ngimia kikai paswalaku pelaela numiane, pakai kudra sakaiyana ngimia ku akasalrwane numi ka amaniaku kudra ‘Ngiaikai laka palralrawthu ikai.’ 20Lri pudriadriingadhaku pelaela numiane, kudra tarwamara paswadalru ku sikawluli, amani ku tarwamara pasudalru nakwane; ku paswadalru nakwane, amani ku tarwamara pasudalru kudra ki siakawlu nakwane.”

Ku Yesu wayugingi ku akikilangadhaneini

(Matai 26.20-25; Maruku 14.17-21; Luka 22.21-23)

21Sa iyanga kikai ku Yesu, ku kidremedremeini kwalri turamuru, la pelaela, “Lri Pudriadriingadhaku pelaela numiane, ikai numiane yakai kai lri kilangai nakwane.”

22Ku lasitu la madredreele, kai wathingale luka papia ki aneane ku taiyane. 23Ki lasitu yakai kudra tangea ku kadalame ki Yesu, wanene ithili ki Yesu, 24ku Simune Pitiru la pakilriu iniane, si iya kai, “Ala kivavaga iniane, si dredrele luka amani ki aneane.”

25Ngwalai kai, kwini situ la arwa deethe ki Yesu, si kivaga iniane, “Tamatama, aneane?”

26La tubalre ku Yesu, “Lu dapengaku kikai vaeva ka pange si baai ki aneane, kwini amani.” Sa maka iyanga kikai, la malra ku vaeva ka pange si dapenge, la baai ki Yuda ka lalake ki Simune ka swa Isekaliwte. 27Sa tarumara ku Yuda ku pange, ku Satange la muadringi ki kidremedremeini. Ku Yesu la iya kai iniane, “Lu kirimwa pia, ku lrika apianesu!” 28Ku lawanene la kai thingale makanaelre ku pacugane ku takawrivane ki Yesu iniane. 29Asi lwiyane ku Yuda amani ku marasiakaikai ku paisu, la ikai ku situ ku alau Yesu ka kawarivariva ku apalangadhane iniane ku satulrisisiane ku lamanemane amia, si alau iluka ku lamanemane si apavavala ki matiakukuru amia.

30Ku Yuda sakanenga kwini pange, la makakaai katwase. Kwidra yacengeecenge ka maungu.

Bavane ka padradrekase

31Ku Yuda sakatwasenga, amia kai ku Yesu, “Kaiasasane kai Lalake ki Umawmase wamalranga ku lrigu; ku lrigu ki Twaumase la mialri athingalanenga ikai ki kinawmasane ki Lalake ki Umawmase. 32Kudra lrigu ki Twaumase pangwakainga ki Lalake ki Umawmase paathingalane, lalri ngikakamani paathingalane ku lrigu ki Lalake ki Umawmase, si lai makakaai lrigu iniane. 33Lalalake, kaika thaininunga ku vai ku ataelreaneli numiane. Lri silape numi nakwane; ai kaiasasane lri pelaelaku numiane, mia ku tapelaelanengali ki lamabelenge ki swa Yuda iya kai, ‘Ku amwaneli, kai numi lri maka mwa.’ 34Lri baadhaku numiane ku taingeane ka bavane ka padradrekase: Kunumi yai makilibalibaka. Ku tapangimianeli kilibake numiane, mialria tungimiyaiya makilibalibake. 35Alaiyasi makilibalibake numi, kai yakawmasane lri thingale numiane ala ka situli numiane.”

Wayugingi ki Pitiru ku angikawlrawlravaneini ki Yesu

(Matai 26.31-35; Maruku 14.27-31; Luka 22.31-34)

36Ku Simune Pitiru kiavaga ki Yesu, “Tamatama, lri mwinusu?”

La tubalre ku Yesu, “Ku lrika amwaneli, kaiasasane kaisu lri maka tupalra nakwane, ai lubibilrili lri dulrusu tupalra nakwane.”

37La iya kai ku Pitiru, “Tamatama, anaku kai maka tupalra muswane kaiasasane? Palraingaku pasikai muswane cilri kai niakeli.”

38Ku Yesu la iya kai, “Palraingisu pasikai nakwane cilri ku niake? Nau pudriadringai pelaela muswane, lu kaiyana kuka, lri kingitulrulusu ngikawlrawlravane kaithingale nakwane.”

Currently Selected:

Yuhani 13: NDV

Highlight

Copy