Yuhani 12

Kiapadelreme ikai Bithani

(Matai 26.6-13; Maruku 14.3-9)

1Salri makanemelenga si tulrisisi ku Takilragavane ka lrisi, ku Yesu wamwa Bithani, amani kwidra taikaiyane ki Lazaru (ku Yesu nayakai kikai pasielane ki Lazaru). 2Yakai ku yakai kwini ku pasiakai ki Yesu padulru ku kwaubu; ku Maretha la paraluralubu pasudalru, ku Lazaru si drumane ka badhabadha la taelre ki Yesu kalringulringulu. 3Sakamani kwini, ku Malria la malra ku yadidilrungane ka tinukucingalrane ka lawlau, si gugu pwa ki drapale ki Yesu, la arakai ku isiuini sakidri; ku sangulremane salraelre ki daane. 4Ku tangea ka situ ki Yesu, amani kwidra lri kilangai iniane ka swa Isekaliwte ka Yuda, amia kai, 5“Ani kai malra kikai sapasangulrelremane si kilangai tu 300 ka gingi la baai pavavala ki lamatiakukuru?” 6Ku taiyaneini kikai, kaika tengane ka makalithi ki matiakukuru, amani saka tarakupawpa; ka amani ku tarapikaikai ku paisu lini ka sakaredele, la kupawpa si arakai.

7Ai ku Yesu amia kai, “Singikaiya iniane! Rururubuini ka pasiakai kudra lrika takidralrekaneli ka vai. 8Ku matiakukuru taikaiyane si taelre numiane palralrawthu, ai kainaku lrika taikaiyane numiane.”

Tamadrekadrekasane ku apapacadhane ki Lazaru

9Kudra la swa Yuda ku laumawmase sakilalra ka yakai Bithani ku Yesu iya, matwase mwa kwini. Kaika ngwalai ki Yesu ku mwa lini sikakathane, mialri apidrele kudra pasiela ki Yesu ka Lazaru. 10Ngwalai kai, ku tamadrekadrekasane ki lamarudrange ki barakalai adravane ku Lazaru pasana kipaelre kipapacai, 11asi lwiyane, takaalra ku swa Yuda ku ngwalai iniane si katwase liniane, la kasalru ki Yesu.

Masasialrigu mucekele Yerusalrime

(Matai 21.1-11; Maruku 11.1-11; Luka 19.28-40)

12Sakakaiyane, kudra wamwa Yerusalrime tulrisisi ku laumawmase tapangale turamuru, kialalra lri kainganai mucekele ku Yesu iya. 13Kai lalasu wamalra ku vasau ki abare si katwase kidredresenge iniane, la kiraragai makakawkau iya kai, “Takiraragai ki Twaumase! Ku Twaumase ani subulrubulru kwini ki nipangukaiyane ku nagane ki Tamatama si kainganai! Ku Twaumase ani subulrubulru ki talialalai ki swa Iseraylri!”

14Ku Yesu kiadringai ku vaeva ka ruba, la ubelenge si katwase, mararaamau ku tapacasane ki Sisiu:

15Lalalake ki cekele Ziyungu,

madha ukuludru.

Drela, kwi talialalai numi

kaiangananganai ngukai ki lrulai ka ruba!

16Sakapathagilane, ku situini kai wathingale ku pacugane pangukai kikai, sadarurunga ku tamalrane ku lrigu ki Yesu, ala ngulringau ku taiyane ki Sisiu ka papia iniane kawriva, si kai lalasu la pangimia ku taiyane.

17Sa dawlu ku Yesu ki Lazaru, si patwalai ki wapacai pasiela iniane, la mulatadre twalai ki tadralredralrekane, kudra yakai taelre ki Yesu ku laumawmase peaelaela ku tadrelane lini. 18Takaala ku laumawmase ku ngwalai ku takilalrane lini ku tapianeini ku pinangu Twaumasane ka puku, matwase kidredresenge makanaelre iniane. 19Ku swa Palrisai la maiyaiya kai, “Kadrwa ku palululudane kai takwalrianeta; drela, kai yakawmasane twapapaalranga iniane!”

Ku swa Gurike kiatubi ku akikawrivane ki Yesu

20Ikai ki tatulrisisisiane, ku wamwa Yerusalrime sukubu yakai kudra la swa Gurike. 21Kai lalasu kaiyanganai kikawriva ki Pilripi ka swa Galrilri ka Bithesaida, kiatubi iniane iya kai, “Sinsi, apia kikawriva nai ki Yesu.”

22Ku Pilripi la katwase pelaela ki Anederiu, la tarudrusa mwa pelaela ki Yesu. 23Ku Yesu la iya kai, “Ku amalrane ku lrigu ki Lalake ki Umawmase ku vai wakelanga. 24Nau pudriadriingai pelaela numiane, ku beraberathane ku mugi lu kai mwadringi ki dae, si pacai, lrika takasakamiane ka takavaevane ka berathe; luiyasi pacai, lri kainganai ku berathe tukaalra. 25Kudra ngiatataulra ku niakeini, lri sakacilri ku niake; ala ku palraingi ngiacacilri ku niakeini ikai kai kawmasane, lrika amaanilringa ku magagemegeme kikai niake pakela palralrawthu. 26Ku aneane ku lri pasikai nakwane, lrika amani ku twapapalra nakwane; ku taikaiyaneli, lri ikai kwini ku sasiakawluli. Kudra pasiakai nakwane ku umawmase, ku Ama lri tara tukucingalre arakai iniane.”

Ku Yesu matiakai ku lrika apacadhaneini

27“Kaiasasane kwalri kai kidremedremeli, manemane ku aiyaneli lai kathariri? Lri kitubiaku ki Ama ku apalribulane nakwane pakidaili kai ki zikange kai? Ai, amaani kikai ku kelali, ku lrika akipadradresenganeli kikai ki akwalriane. 28Ama, asu lrigu ku naganesu!”

Sa icengecenge kwidra, yakai ku lingau ku twalai belenge mulebe, si iya kai, “Walrigunga naku ki naganeli, lai lri peela naku lrigu!”

29Kudra acegecege ikai kwini kudra laumawmase kialalra kikai lingau, la iya kai, “Wadreredrere!”

Kudra drumane ku laumawmase la iya kai, “Sasiakawlu subelebelenge ka kiakawrivariva iniane!”

30Ai ku Yesu amia kai liniane, “Kikai lingau kaika pasiakai nakwane, amani numiane kwini lingau. 31Kikai yakawmasane lri kisaibange; kikai warathudu kawmasane lri kibaebalre. 32Lu kipatwaladhaku lebe kicidingi, lri alraku bilibili ki sanaka umawmase mwa nakwane.” 33(Ki kikai vagaini papia ku lrika angimianeini pacai.)

34Kudra laumawmase la tubalre iya kai, “Ku hulrice nai peaelaela naiane, ku Kirisitu lrika palralrawthu ikai; lri tara kicidingi ku Lalake ki Umawmase asu iya? Kai Lalake ki Umawmase aneane?”

35Ku Yesu amia kai, “Ku ledra ku aikaiyane numiane kai lri tarathainunga, sa ikaiyana kai ledra, naika pacuungulu numi dadavace, amani lu padali numiane ku dradrimitane, asi lwiyane ku yakai kadradridrimitane dadavace ku umawmase kai wathingale ku apapianeini. 36Sa ikaiyana ku ledra kasalrwa tupapalra ki ledra, lanu alalalake ki ledra.”

Kaika kasalru ki swa Yuda

Samaka iyanga kilakikai vaga, ku Yesu matwase liniane, si kai kidredrele. 37Kai lasu adravane icucubungu liniane pia ku makaalra ku pinangu Twaumasane ka puku, kai lalasu kaiyana masalru iniane. 38Kikai yai lri ngimia ku nataiyane ki yuginsia ka Isaiya:

Tamatama, lrika aneane ku masalru kai pelaelaela nai kai vaga?

Ku puku ki Tamatama lri papia ki aneane athingalane?

39Ku ngukai si kai kasalru ki lalasu, amianga ku Isaiya kai:

40Ku Twaumase pakabuti ki maca lini,

la pakasalregesege ku kidremedreme lini,

amani lu drele kwi maca lini,

lu makapulringau kwi kidremedreme lini.

Lakamani ku iya kai ki Twaumase: Kai lalasu kai lri ngibangulu papia nakwane,

la nai pawdringadhaku liniane.

41Ku taiyane kikai lavaga ki Isaiya, amani sadrelenga ku lrigu ki Yesu, laka papia iniane ku takawrivane.

42Adravane ka ngimiyaiya kikai, ku lamabelenge ki swa Yuda maiya takaalra ku masalru ki Yesu, ai mwakuludru ki swa Palrisai, la kai maka surasake ngipapelaela, amani lu kipakatwase ki rarubwane ki swa Yuda. 43Kai lalasu twa makadrwadrwa ku akidrengedrengerane ki umawmase, laka tutitikiane ku akidrengedrengerane ki Twaumase.

Ku vaga ki Yesu lri saibange ki umawmase

44Ku Yesu akwaadrau kawriva iya kai, “Ku masalru nakwane, kaika masalru nakwane sikakathane, mialri kasalru kudra ki amani ku siakawlu nakwane. 45Ku wadrele nakwane, mialri drelenga kudra ki siakawlu nakwane kainganai. 46Aledraku, la mwa kai kawmasane, pakai ku kaika aikaiyane kadradridrimitane kudra ki masalru nakwane. 47Kudra kialalra ku vagali la kai paluludu, kainaku lri saibange iniane. Ku tangadrane ku kelali kaika asaibangane ki yakawmasane, amani ku apalribulane ki yakawmasane. 48Kudra pasiaulri nakwane kai tarwamara ku vagali, yakai ku lri saibange iniane; ikai ki bibiilrilinga ka vai, ku taiyaneli ku vaga lri saibange iniane! 49Asi lwiyane kadrwa ku ngisasingikaili si kawriva ku manemane, amani kudra siakawlu nakwane ka Ama ka wadrekase nakwane ku aiyaneli kawriva. 50Wathingalaku kudra drekaseini mailuku ku palralrawthu ka niake. Lakamani, ku taiyaneli patengane ka iya kwini iya nakwane ki Ama.”

Currently Selected:

Yuhani 12: NDV

Highlight

Copy