Yuhani 11

Tapacadhane ki Lazaru

1Yakai ku tangea ku macaeme ka sia Lazaru, yakaikai ka Bithani, ku Malria si takaini ka Maretha la mialri ikai kai ki cekele kai. 2(Kikai Malria amani kwidra naarakai ku lawlau padelreme ki drapale ki Tamatama, la arakai ku isiuini sakidri pakameale. Kwini macaeme ka Lazaru yai agini.) 3Kwini lamataka la pakatwase sikawlu ki umawmase kikawriva ki Yesu, si iya kai, “Tamatama, kudra kadalamesu ka talragisu macaeme.”

4Sakilalra ku Yesu la iya kai, “Kwini caemane ki Lazaru kai lri pacai, amani ku lri lrigu ki Twaumase, si ku Lalake ki Twaumase lri ngwalai kai si kilrigu.”

5Ku Yesu madalame ki Maretha si agini, la mialri kadalame ki Lazaru. 6Sakilalra ka macaeme ku Lazaru yai, pacunguluana makapusale ikai kwini taikaiyane lini. 7Ala iya kai ki lasituini, “Ila tamuana ka Yuda.”

8Kwi lasitu la iya kai, “Sinsi, ku paswalala ku swa Yuda lri malra ku lrenege si cabiri muswane, nau mwana ngusela kwini amiasu?”

9La iya kai ku Yesu, “Ku vaiyane kaika 12 ki tuki? Kai umawmase wadadavace lukavaiyane, la kai tubakebake, asi lwiyane kwi lasu maka wadrele kai ki ledra kawmasane. 10Kai umawmase lu ikai ki madradrimiti ka maungu, lri tubakebake, asi lwiyane kwini lasu kadrwa ku ledraini.” 11Ku Yesu samaka iyanga liniane kikai, la iyanga kai, “Ku talragita ka Lazaru masipelrenge, lai lri katwasaku aceace iniane.”

12Ku lasitu la iya kai, “Tamatama, kwi lasu alaiyasi ka masipelrenge, lri dulru udringai si ngidrakale.”

13Ku patengatengane, ku pacugane ki Yesu wapacainga ku Lazaru amiya, ai kwini lalasu patengatengane ka masipelrenge amiamiya singikai ku taiyane ki Yesu. 14Ku Yesu ala kirimu cungucungu pelaela liniane, “Wapacai ku Lazaru, 15pakai ku akasalrwane lini, mathaithariri lu kainaku ikai iniane kavai. Kaiasasane ila tamwanga drele iniane.”

16Ku Tumase (kiapasi Tukapiane) la iya kai ki drumane ki lasitu, “Ila takatwase karedele ki sinsi, si tatupalra iniane pacai!”

Tamatama ki asielane panianiake si niake

17Ku Yesu sakela Bithani, wathingale ki Lazaru ala ka makasupatelenga ku takidralrekane. 18Ku tamadadailane Yerusalrime si Bithani kai wadaruru ki tulru ka kunlri; 19takaalra ku swa Yuda ku kaiyanganai lrikape ki Maretha si Malria, wakela sasa liniane ku tapacadhane ki agi lini.

20Ku Maretha sa thingale ka wakelakela ku Yesu, la katwase mulatadre kidredresenge ki Yesu; ai ku Malria asuru itavanane. 21Ku Maretha la iya kai ki Yesu, “Tamatama, ana ikaisu kai, kai agili naikai pacai! 22Ai wathingalaku, adravane kaiasasane, ku kitubisu ki Twaumase, lri tara baai muswane.”

23Ku Yesu la pelaela iniane, “Kwi agi lri tara siela”.

24Ku Maretha la tubalre, “Wathingalaku ikai ki bibiilrilinga ka vai lri tara siela.”

25Ku Yesu la iya kai iniane, “Kunaku amaniaku ku asielane, amaniaku ku niake. Ku masalru nakwane ku umawmase, adravane pacainga, lri tara panianiakeana; 26ku panianianiakeana si kasalru nakwane ku umawmase lutuumane kai lri pacai palralrawthu. Kusu masalrusu kikai patuelre?”

27La tubalre ku Maretha, “Tamatama, unu! Masalrwaku kusu ka amani kwidra lri kainganai kai kawmasane ka Kirisitu ka Lalake ki Twaumase.”

Watubi ku Yesu

28Sa maka iyanga kai ku Maretha, la siwlri mutavanane, la akutiki pelaela ki agini ka Malria iya kai, “Wakela ka sinsi, wadawdawlu muswane.” 29Ku Malria sakilalra kikai vaga, la makakai ngidrakale, si mwa drele ki Yesu. 30(Kikwini ku Yesu kaiyana mwadaane ki cekele, yakaiyana ki tadarurane ki Maretha kidredresenge.) 31Kudra la wakela ku swa Yuda saasa ki Malria, sadrele iniane sa karaacange ngidrakale si katwase, la tupapalra iniane, alau lri mutadralredralrekane tubi amia.

32Ku Malria la kainganai mwa ki Yesu, sadrele iniane, la pidruru guruthungane ikai cucubungu ki drapale ki Yesu, si iya kai, “Tamatama, ana ikaisu kai, naikai pacai ku agili!”

33Ku Yesu la drele ki Malria sa tubi, la mialri drele sa tubitubi kudra papalra ki alisu ka la swa Yuda, la adirivane turamuru ku kidremedremeini, 34la kivaga liniane, “Piainu numi dralreke iniane?”

La iya tubalre kwini lalasu, “Tamatama, bwala drela.”

35La tubi ku Yesu. 36Ngwalai kai, ku swa Yuda la iya kai, “Drela, kai lasu madalame turamuru kai ki umawmase!”

37Ai yakai ku laumawmase ku amia kai, “Panwamacanga ki mamukici, bekace si kai papanianiake ki Lazaru?”

Pasiaela papanianiake ki Lazaru

38Adirivane turamuru ku kidremedreme ki Yesu. Kai lasu kaiyanganai mucucubungu ki takidralrekane; kwini tadralredralrekane yai nilrukwane tubarungulu, ikai kwini ki lrawlrawdru yakai ku vaeva ku lrenege ku saelelebane. 39Ku Yesu la kawriva, “Ala mwalra kwini lrenege!”

Ku Maretha ka taka ki wapacai la iya kai, “Tamatama, makasupatelenga ku takidralrekaneini, lri sangulisinga ku kinawmasane!”

40Ku Yesu la iya kai iniane, “Kainaku ka peaelaelanga muswane, alaiyasi kasalrusu, lri drelesu ku lrigu ki Twaumase?” 41Kwini lalasu ala kirimu patanuela kwini lrenege. Ku Yesu la paswabelenge, si iya kai, “Ama, kiaseasenaku muswane, asi lwiyane kialalrangasu nakwane. 42Wathingalaku takilalraanesu nakwane; ai lu iyaku kai amanimaniaku kilakikai ngiathalringulu kai ka laumawmase, pakai ku lrika akasalrwane lini ala ka siakawlusu nakwane pakainganai.” 43Samaka iyanga kai kawriva, la akwadrau kawriva, “Lazaru, bwala mulatadra!” 44Kwini wapacai la kainganai. Ku alrimaini si drapaleini cinabwane arakai ku makalrilau, ku lingau la mialri ka nicabwane ara makalrilau. Ku Yesu la kawriva liniane iya kai, “Mulrepelrepa iniane, la padadavace iniane!”

Tamadrekadrekasane ku apapacadhane ki Yesu

(Matai 26.1-5; Maruku 14.1-2; Luka 22.1-2)

45Ku wakela lrikape ki Malria ku swa Yuda, takaalra ku wadrele ku tapangimiane ki Yesu, si la kasalru iniane. 46Ai yakai kwidra laumawmase ku matwase kikawriva ki swa Palrisai, la pelaela liniane ku tapiane ki Yesu. 47Ngwalai kikai, ku swa Palrisai si lamarudrange ki barakalai si irubu madrekadrekase, la iya kai, “Ki kikai umawmase paiya ku makaalra ku pinangu Twaumasane ka puku, lri pangitumaneta iniane? 48Alaiyasi palraingita iniane piapia kai, la makanaelrenga ku umawmase kasalru iniane, ku swa Ruma lri kainganai ravase ki daane ki Twaumase si minzukuta!”

49Ikai liniane yakai ku tangea ku sia Kayapa, ikai kwini ki caili amani ku abebeelengenga ki barakalai. Kai lasu la avavaga iya kai, “Kadrua ku thingale numi! 50Ani tangea ku atalingikaiyane pacai ki laumawmase makanaelre, amani lu kipapacai makanaelre ka minzuku. Kai numi maka wadrele kikai yai papia numiane mamamwa turamuru?” 51Ku patengatengane, kikai vaga kaika twalai iniane, ngwalai sakamani icengecenge ki caili kaamani ku abebeelengenga ki barakalai, wayugiyugingi ki Yesu ka lri atalingikaiyane ki swa Yuda pacai; 52kaika atalingikaiyane liniane pacai sikakathane, lri mialri sarubu si pataelre ka vaevanga ki ngiasarade ikai kidruanga ku lalalake ki Twaumase.

53Ku lamabelenge ki swa Yuda, la twalainga kwini pathagili ku lrika apangimiane papacai ki Yesu. 54Ngwalai kwini ku Yesu la kai ikainga tali Yuda pathingale adrelane ku tangivelevelaneini. La mwa kudra ki adeethe calragulragu ka cekele ka sia Iparaime, la ikai kwini taelre ki lasitu.

55Lri padalrunga si kainganai ku atulrisisiane ki swa Yuda ki Takilragavane ka lrisi. Sa kaiyana kainganai ki atulrisisiane, takaalra ku twalai ki latatitiki ka cekele si papia ka Yerusalrime, lri ikai kwini si pangimia ngibabula. 56Kwini lalasu la mwa kidruanga silape ki Yesu; kwini lalasu sa irubu ikai ki daane ki Twaumase, la makivagavaga iya kai, “Lu kidremedremesu ngitwatumane kwini lasu, kai lri kainganai tulrisisi?” 57Ku marudrange ki barakalai si swa Palrisai padrekadrekaseenga iya kai: Alaiyasi ikai ku wathingale ku taikaiyane ki Yesu, tara pelaela, lani katwase pwalra iniane.

Currently Selected:

Yuhani 11: NDV

Highlight

Copy