Yuhani 10
10
Patharukai ki takivane ka pathalrilriku
1Ku Yesu la iya kai, “Lri pudriadriingadhaku pelaela numiane, kudra kai ngwakai ki lrawlrawdru mudaane ki takivane, la ngukai talidrumane si kapa mudaane, amani ku tarakupawpa, kaamani ku saadre. 2Kudra ngwakai ki lrawlrawdru mudaane, ala amani ku taraagwagu ki kiu. 3Ku taradrangalrungalru ki lrawlrawdru mwaelebe iniane, ku kiuini wathingale ku lingauini. Kwini lasu singiakai ku nagane dawlu ki kiuini, si ililuku liniane ulatadre. 4Sana iluku pulatadre ki kiuini, matwase kaswalala liniane; kudra kiuini la tupapalra iniane, asi lwiyane kudra lakiu wathingale ku lingauini. 5Kwini lakiu kai twapapapalra ki kaika thingale lini ku umawmase, mwabeerelringa, asi lwiyane kai wathingale ku lingau ki kaika thingale lini ku umawmase.”
6Ku Yesu amia kikai pathalrilriku liniane, ai kai lalasu ku taiyaneini kai wathingale ku pacugane.
Mathariri ka taraagwagu ku Yesu
7Lakamani, ku Yesu amiyanga kai liniane, “Lri pudriadriingadhaku pelaela numiane, amaniaku ku lrawlrawdru ki lakiu. 8Kudra aswala nakwane kainganai tarakupawpa makanaelre, ka amani ku saadre; ku lakiu kai kialalra liniane. 9Lrawlrawdraku; kudra ngwakai nakwane mudaane, lri tara kipasavidhi, si lai dulru masasawlri mulatadre si mudaane, lai lri kidringai ku laakaneane ku ubulu. 10Lu mudaane ku saadre, pakai ku akupane, lri papacai, lri kabebetethe; ku kelali ku tangadrane pakaiyaku ku amalrane lini ku niake, si ka ngiaesadhane paramuru ka niake.
11“Amaniaku ku mathariri ka taraagwagu; ku mathariri ka taraagwagu palraingi cilri ku niake pasikai ki kiu. 12Kudra nipawlrawlravane kaika taraagwagu, ku kiu la kaika iniane. Kwini lasu sana drele ki tawpungu ubulane lu kaingananganai, wacilri ki kiu si ubere; ku tawpungu ubulane la pwalra ki kiu, si pathirakupu ki lakiu. 13Kudra ubere ki nipawlrawlravane, amani saka nidawlane pakauawngu sikakathane, kaika makalithi ki lakiu. 14-15Amaniaku ku mathariri ka taraagwagu. Mia kudra tathingalane ki Ama nakwane, la thingalaku ki Ama. Thadaalrane, wathingalaku ki kiuli; la mialri thingale nakwane. Palraingaku pasikai liniane ngiacacilri ku niake. 16Yakaiyana ku drumane ku kiuli ku kai yakai kai ki takivane, lai tara malraku ililuku liniane, kwini lakiuli kialalra kai lingauli; kwini taidrusane lri maelre si ka taingeangeanenga, lri kathadalranenga ikai ki tangeangea ka taraagwagu.
17“Ku Ama madalame nakwane, asi lwiyane palraingaku ngiacacilri ku niake, pakai ku amalraanenga ku niake. 18Kadrwa ku umawmase ku lri ribici kai niakeli, amaniaku ka palraingi ngiacacilri; yakai ku pukuli ngicacilri, la ikai ku pukuli malra sawlri. Kikai yai drekase ki Ama pia kwini iya nakwane.”
19Ku swa Yuda la ngwalai kikai ki lavaga si makalilisi karivu. 20Ikai liniane takaalra ku amia kai, “Kai lasu kiaikai ki aidridringane! Amamama! Asingithanga kilalra iniane?”
21Ku drumane la iya kai, “Ku kiaikai ki aidridringane kai lri dulru kawriva ku miyaiya kai ku vaga! Ku aidridringane wadulru pacege kudra ki mamukici?”
Kai kiatarumara ki swa Yuda
22Sa ikai Yerusalrime, wadarurunga kudra tatulrisisisiane ku tapatarumarane ku daane ki Twaumase ka vai; yacengecenge ka kalakecelrane. 23Ku Yesu sa dadadavace ikai ki daane ki Twaumase kudra ki ruka ki Sulumungu, 24ku swa Yuda la ngithalringulu iniane, si iya kai iniane, “Lri pakalrikilrikisu naiane pakela lwigane? Pudriadringadha pelaela naiane, amanisu ku Kirisitu?”
25Ku Yesu la tubalre, “Ku peaelaelanga naku numiane, ai kai numi masalru. Ku pangukaili ku nagane ki Ama si pia ku awngane ala amani ku sapelaelaneli. 26Ai, kai numi ka kiuli, lakamani ku kaika kasalru numi. 27Ku kiuli kialalra ku lingauli, la thingalaku liniane, twapapapalra nakwane. 28Wabaadhaku liniane ku palralrawthu ka niake, lai lri kai pacai; adravane ka aneaneane kadrwa ku lri maka dulru patwalai ki alrimali malra liniane. 29Kudra amani ku wamalra liniane si baai nakwane ka Ama sanianiangenga ki maneemanenga#10.29 “Kudra amani ku wamalra liniane si baai nakwane ka Ama sanianiangenga ki maneemanenga”, yakai ku lasidrumane ka hungu ku amia kai “ku baai nakwane ki Ama sanianiange ki sanaka maneemane”., kadrwa ku umawmase ku lri dulru patwalai ki alrima ki Ama malra liniane ribici. 30Ku Ama si kunaku vaeva nai.”
31Kikai, ku swa Yuda la maalranga ku lrenege si lri cabiri iniane. 32Ku Yesu la iya kai liniane, “Ku taicucubunganeli numiane pia ku pia kwini iya nakwane ki Ama kudra la makaalra ku mathariri ka awngane, amani ki ngwakai ki manemane ku amalrane numi ku lrenege si cabiri nakwane?”
33Ku swa Yuda la tubalre, “Kai nai ka ngwalai ku tapianesu ku mathariri ku awngane si malra ku lrenege cabiri muswane, amani sa tudreadrekasesu ki Twaumase! Umaumasesu sikakathane, asu thuru ngitatu Twaumase!”
34Ku Yesu la iya kai, “Kai wapacase ku hulrice numi, ku Twaumase amia kai, ‘Amani numi ku Twaumase’? 35Wathingaleta ku vaga ki Sisiu kai lri akabalrithi palralrawthu; papia kwidra ki tarwamara ku vaga ki Twaumase, ku Twaumase twa Twaumase liniane. 36Papia nakwane, amaniaku ku pinilriane ki Ama si kisikawlu mwa kai kawmasane. Lalakaku ki Twaumase lu iyaku, twadreadrekase ki Twaumase anu iya nakwane? 37Alaiyasi kainaku ka paiyaiya ku awngane ki Ama, kunumi madha kasalrusalru nakwane; 38alaiyasi ka paiyaku, adravane kai numi kasalru nakwane, nai kasalru numi ki awnganeli, lanu pudriadringai thingale ki Ama ka yakai ki niakeli, la mialriaku ikai adringi ki niake ki Ama.”
39Sa iya kwini kai lalasu la kisanu pwaalranga iniane, ai kai Yesu matwase kidaili liniane.
40Ku Yesu la siwlringa mwa balrealreanane kadravane Yuredange, wamwa kudra nataikaiyane ki Yuhani pabanau, si ikaikai kwini. 41Takaalra ku laumawmase ku kaiyanganai silape iniane, si iya kai, “Ku Yuhani kai paiya ku pinangu Twaumasane ka puku, ai papia kai ki umawmase ku niyaiyane patengane patuelre.” 42Ikai kwini, takaalra ku laumawmase ku masalru ki Yesu.
Currently Selected:
Yuhani 10: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
