Yuhani 9

Pawadringai ki singikalrulai ka mukimukici

1Ku Yesu wadrele sa ikai kadalranane ku singikalrulai ka mukimukici. 2Ku lasituini la kivaga iniane, “Sinsi, kikai umawmase singikalrulai kamukici, ngwalai ki pasalrivane ki aneane? Pasalrivaneini, pasalrivane ki marudrawdrangeini?”

3La tubalre ku Yesu, “Ku takamukicaneini kaika pasalrivaneini kaika pasalrivane ki marudrawdrangeini, lri ikai ki kinawmasaneini putaluvaivai ku puku ki Twaumase. 4Sakavaiyaneana, lri tara piyata ku awngane kudra ki siakawlu nakwane; sana kainganai ku dradrimitane, lri kakadrwanga ku umawmase ku lri dulru kaungu. 5Sa ikaiyaku kai kawmasane, amaniaku ku ledra ki yakawmasane.”

6Sa iyanga kwini kawriva, ku Yesu la sungalrai pucakena, si arakai ku ngalraini thalre ki dae, la drisisi pwa ki maca ki mamukici, 7si iya kai iniane, “Lu mwa Siluame ka baibaiyu si tawmaca.” (“Kiasikawlu” amia ku pacugane kwini Siluame). Kwini lasu la katwase tawmaca, sa kainganainga, la dulrunga drele.

8Kudra lapasiagiagisini si kudra taradredrele iniane lu abababange ku aga la iya kai, “Kikai umawmase kaika amani kwidra taneneane ikai kai si abababange ku aga?”

9Yakai ku amia kai, “Amani kai lasu”; la ikai ku amia kai, “Kaika amani, ai ngiamia iniane.”

Kwini lasu la kawriva, “Amaniaku kwini iyaiya numi.”

10Kwini lalasu la kivaga, “Watumanesu si drele?”

11Kwi lasu la tubalre, “Amani kwidra sia Yesu, wathalre ku dae la pwa drisisi ki macali, si iya kai nakwane, ‘Lu mwa ki baibaiyu Siluame tawmaca.’ La katwasaku, sa tawmacaku la cegengaku.”

12Kwini lalasu la kivaga, “Kwini umawmase yakainu?”

Kwi lasu la tubalre, “Kainaku wathingale.”

Ku swa Palrisai kiavavaga ku takipawdringadhane ki mamukici

13Kwini lalasu la ililuku kwini ki namamukici mwa kikawriva ki swa Palrisai. 14Ku Yesu sa thalre ku dae si pacege drele ki macaini kudra vai kwini yai Taisadrasadrane ka vai. 15Ku swa Palrisai la peelanga kivavaga kwini ki lasu, luka pangiatumane ku macaini si cegenga. Kwini lasu la pelaela liniane, “Arakai ku nithalreane ka dae sakidri ki macali, sa tawmacaku la maka drelengaku.”

16Yakai kudra la swa Palrisai ku amia kai, “Kudra paiya kikai ku umawmase kai lrika twalai ki Twaumase, asi lwiyane kwini lasu kai paluludu ku kakudhane ki Taisadrasadrane ka vai.”

Kudra drumane ku laumawmase la iya kai, “Kudra yakai ku pasalrivane ku umawmase ala dulru pia ku miyaiya kai ka pinangu Twaumasane ka puku?” Kwini lalasu la ngwalai kikai si madrikidrikisi ku vaga lini.

17Kwini la swa Palrisai la tupela kivavaga kwini ki umawmase, “Kudra pawadringai ki macasu, lu kidremedremesu kwini lasu ngitwatumane ka umawmase?”

Kwini lasu la tubalre, “Kwini lasu yuginsia.”

18Kwini lamabelenge ki swa Yuda kai masalru ki lasu ka namamukici, laka wacegenga kikai; sa daaulunga ki marudrawdrangeini, 19kwini lalasu la kivaga, “Kikai lalake numi? Singika vavalake kamukici kainu ka amia? Kikai ani maka dreelenga?”

20Ku marudrawdrangeini la tubalre, “Kai lasu lalake nai, sakitulalake mamukiciinga, ka thingalenga nai. 21Ala kikai ku tangimianeini si makadrelenga, ka aneane ku pawadringai ki macaini, kai nai wathingale. Kavai pwacacuganenga, lu mwa kivaga iniane, lani kamani ka twabalre numiane!” 22Kudra taiyane kwini ki marudrawdrangeini kawriva mwakuludru ki lamabelenge ki swa Yuda; kikwidra kwi lalasu madrekadrekasenga, alaiyasi ikai ku Kirisitu ku Yesu amia kawriva ku umawmase, lri pakatwasenga ki rarubwane ki swa Yuda. 23Lakamani ku tubalre ki marudrawdrangeini iya kai, “Ka pwacacuganenga, lu mwa kivaga iniane!”

24Kwini lalasu la peelanga dawlu kwini ki singika vavalake kamukici, si iya kai iniane, “Tara tukapatengatengana icucubungu ki Twaumase kawriva! Wathingale nai ki Yesu ka yakai ku pasalrivane ka umawmase.”

25Kwi lasu la tubalre, “Ku yakai, ku kadrwa ku pasalrivane kwini lasu, kainaku wathingale; ai wathingalaku ku taingeane: Namamukicaku, kikai la dulrunga naku drele.”

26Kwini lalasu la kivaga, “Manemane ku piaini pasikai muswane? Watumane si pacege ki macasu?”

27Kwini lasu la tubalre, “Peaelaelanga naku numiane, la kai numi ubangalre kilalra. Anu kisanu kilalrana kaiasasane? Mialri numi kidremedreme ku asitu iniane?”

28Kwini lalasu la tusinalreme kaelaela iniane, “Amanisu ka asitu iniane; situ nai ki Musi. 29Wathingale nai ku Twaumase kawarivanga ki Musi; ai kwini lasu kai nai wathingale ka twalainu kainganai!”

30La tubalre kwini lasu, “Ani matisamali. Kwini lasu panwamaca ki macali, la kai numi thingale iniane luka twalainu kainganai! 31Wathingaleta ku Twaumase kai kialalra ku inulri ki yakai ku pasalrivane ku umawmase; kialalra sikakathane kudra ki mwasakene sukubu iniane, si kwidra pangiamia ku kidremedremeini ka umawmase. 32Twalai satawbekace, kaita kialalrana ku yakai ku pawadringai ku singikalrulai kamukici ku umawmase. 33Kwini lasu lu kaika twalai ki Twaumase kainganai, kadrwa ku naika adulrwaneini pia ku manemane.”

34Kwini lalasu la kaelaela iniane, “Kusu ka maadrau ikai ki pasalrivane, asu bulrubuulrunga naiane!” Kwini lalasu la patwalai ki rarubwane ki swa Yuda pakatwase iniane.

Mamukici pangukai ki takisuswane

35Ku Yesu kialalra ka pakatwase iniane ki rarubwane ki swa Yuda kwini lalasu. Sakabilrilane ku Yesu la kidringai iniane, si iya kai iniane, “Masalrusu ki Lalake ki Umawmase?”

36La iya tubalre kwini lasu, “Sinsi, pelaelaili kwini Lalake ki Umawmase lukaaneane la nau kasalru iniane!”

37Ku Yesu la iya kai tubalre iniane, “Wadrelengasu iniane, kikai kikawrivarivasu ala amani.”

38Kwini lasu la iya kai, “Tamatama, masalrwaku!” Sa iya la papia ki Yesu guruthungane sukubu.

39Amia kai ku Yesu, “Ku patharevane ku kelali kai kawmasane yai asaibangane, lai dulru drele ku mamukici; ku wadulru drele, lai ngibaalrelringa kamukici.”

40Kikai vaga sakilalra kudra yakai kwini ku la swa Palrisai, la kirimu kivaga iniane, “La mialrisu paelre naiane tumamukici?”

41La tubalre ku Yesu, “Alaiyasi ka mamukici numi, lri kakadrwa ku pasalrivane numi; kwini ‘Wadulru nai drele’ amia numi, luka ngimiyaiya kwini, yakaiyana ku pasalrivane numi.”

Currently Selected:

Yuhani 9: NDV

Highlight

Copy