Yuhani 18

Takipwalrane ki Yesu

(Matai 26.47-56; Maruku 14.43-50; Luka 22.47-53)

1Saiyanga kai inulri ku Yesu, la karedele ki lasitu katwase, sa talubalrenga ki drakerale Kiderunge. Ikai kwini yakai ku taluvale ka babengelradhane, ku Yesu si lasitu la mwa kwini makanaelre. 2Kudra kialangai ki Yesu ka Yuda wathingale kwini, asi lwiyane ku Yesu si lasituini twatamwane kwini irurubu. 3Ku Yuda la ililuku ku vaeva ka sakaredelane ku kwapingi ki swa Ruma, si madredresenge ki marudrange ki barakalai, si kudra pakainganai ki swa Palrisai ka tarakadrekadrenge ki daane ki Twaumase, la mwa kwini ki babengelradhane. Kwi lalasu makitwa iluku makanaelre ku sakikaruburuburane, la iluku ku tinaki si sitaliwlare. 4Ku Yesu wathingale patuelre ku lrika angimiane ikai iniane, la arwa cucubungu si kivaga liniane, “Wasilasilape numi ki aneane?”

5Kwini lalasu la tubalre, “Swa Nazarethe ka Yesu.”

Ku Yesu la iya kai, “Amaniaku.”

Saicengecenge kwini, kudra kialangai iniane ka Yuda la mialri acegecege ikai liniane. 6“Amaniaku”, sa iya kai ku Yesu, la arwa lrilrikudru tubakebake icakena makanaelre. 7Ku Yesu la peelana kivaga, “Wasilasilape numi ki aneane?”

Kwini lalasu la tubalre, “Swa Nazarethe ka Yesu.”

8Ku Yesu la iya kai, “Peaelaelanga naku numiane, amaniaku. Alaiyasi ka amaniaku ku silasilape numi, pakatwasanga ki kikai ki laumawmase.” 9Ku taiyane kai ki Yesu, ngiamianga kudra nataiyaneini iya kai, “Ama, ku baaisu nakwane ku umawmase, kadrwa ku natangeeanga ku pakawlrauli.”

10Ku Simune Pitiru mailuku ku vaeva ka lrabu; la usudru kwini lrabu, si calrigi papia ki Maleku ka sasiakawlu ki abebeelengenga ki barakalai, la pwa lrathipi ki tali vanale ki calringa kwini ki lasu. 11Ku Yesu la iya kai ki Pitiru, “Sawlria kwini lrabu! Kai mwabangalre ungulu ku baai ki Ama ku mapalili ka yakupwane amiasu nakwane?”

Yacucubungu ki Anase ku Yesu

12Kudra vaeva ka sakaredelane ka kwapingi ki swa Ruma si kiacapili ki kwapingi, marededele ki tarakadrekadrenge ki daane ki Twaumase ki swa Yuda ruthuku ki Yesu, si kerenge, 13paswala baai pucucubungu ki Anase; ku Anase tama ki taelrelre ki barakalai ka Kayapa, yacengecenge ka abebeelengenga ki barakalai kwini ki caili. 14Kikai Kayapa nakawarivanga ki lamabelenge ki swa Yuda, lu pasikai pacai ki kinawacekelane ku tangea ku umawmase mathariri ka awngane iya.

Ku Pitiru kai wathingale ki Yesu

(Matai 26.69-70; Maruku 14.66-68; Luka 22.55-57)

15Ku Simune Pitiru si tangea ka situ mabibilrili ki Yesu; kwini situ thingathingale ki abebeelengenga ki barakalai, kwi lasu la kabibilrili ki Yesu mukalatadrane ki daane ki abebeelengenga ki barakalai. 16Ku Pitiru la asuru ikai tali latadre ki lrawlrawdru. Kudra wathingathingale ki abebeelengenga ki barakalai ka situ la ulatadre, si akuvale kawriva ki taradrangalrungalru ki lrawlrawdru ka ababai, ala ililuku ki Pitiru udaane. 17Kudra taradrangalrungalru ki lrawlrawdru ka ababai la kawriva ki Pitiru, iya kai, “Kaisu ka mialri ka amani kwidra situ ki kavai ki lasu?”

Ku Pitiru la iya kai, “Kainaku kaamani!”

18Yacengeecenge kakecelre, kudra lasasiakawlu si latarakadrekadrenge la twapui ku lrangele, la idididiu makanaelre; ku Pitiru la mwa arwakai, si taelre liniane acegecege idididiu.

Ku abebeelengenga ki barakalai kiavavaga ki Yesu

(Matai 26.59-66; Maruku 14.55-64; Luka 22.66-71)

19Ku abebeelengenga ki barakalai kiavavaga ki Yesu patharukai ki lasituini si tabulrubulrwaneini. 20La tubalre ku Yesu, “Lu kawrivaku ki umawmase tara paathingalanaku. Taikaikaiyaneli bulru ki umawmase ki rarubwane ki swa Yuda si daane ki Twaumase, kadrwana ku takibubulianeli kawriva ku manemane. 21Asu kivavaga nakwane? Lu kivaga kudra ki lakialalranga ku takawrivaneli, wathingale ka manemane ku taiyaneli.”

22Ku Yesu saiyanga kikai, kudra yathili kadrekadrenge la camilrigi iniane, si iya kai, “Asu thuru iya kai tubalre ki abebeelengenga ki barakalai!”

23La iya kai ku Yesu, “Alaiyasi pasalriu kwi taiyaneli, pelaela ku tapasalrivaneli; alaiyasi pacengecenge ku taiyaneli, asu lrumai nakwane?”

24Kikai kwidra kiakeerengeana ku Yesu, ku Anase la malra iniane pwa ki Kayapa ka abebeelengenga ki barakalai.

Ku Pitiru apapelaela kithungu kai thingale ki Yesu

(Matai 26.71-75; Maruku 14.69-72; Luka 22.58-62)

25Kikai kwidra, ku Simune Pitiru acegeecegeana idididiu. La ikai ku amia kai iniane, “La mialrisu kaisu ka situ ki kavai ki lasu?”

Ku Pitiru la kithuungu iya kai, “Kainaku kaamani!”

26Yakai kudra tangea ku sasiakawlu ki abebeelengenga ki barakalai, retesane kudra ki thiabe ki Pitiru pacalringa, la iya kai, “Kainaku ka wadrele muswane sa taelresu kavai ki umawmase ikai babengelradhane?”

27Ku Pitiru la iya kai, “Ini!” Sa iya kwini ala kuuka.

Yacucubungu ki Pilatu kisaibange

(Matai 27.1-2, 11-14; Maruku 15.1-5; Luka 23.1-5)

28Kwi lalasu la patwalai ki daane ki Kayapa iluku ki Yesu si mwa ki taikaiyane ki sutuke. Sakamani kwidra malialiare. Ku lamabelenge ki swa Yuda kai mwadaane ki taikaiyane ki sutuke, ngiababulabula ki atulrisisiane, pakai ku akaneane ku niputalekane ngukai ki Takilragavane ka lrisi. 29La kainganai ulatadre ku Pilatu kikawriva liniane, si kivaga liniane, “Lri arakai numi ku manemane ku pasalrivane si kukusu kai ki lasu?”

30Kwi lalasu la tubalre, “Ana kai pia ku malisi kai lasu, naikai nai iluku iniane mwa kai baai muswane.”

31Ku Pilatu la iya kai liniane, “Lu katwasa ngikakamani iluku iniane, si singikai ku hulrice numi saibange iniane!”

Ku swa Yuda la iya kai, “Ai, kikai kadrwa ku puku nai pathavungu papacai.” 32Kikai ngiamianga ku nataiyane ki Yesu, ku lrika angimianeini pacai.

33Ku Pilatu la udaane ki daane ki sutuke, si dawlu ki Yesu, la kivaga iniane, “Talialalaisu ki swa Yuda?”

34Ku Yesu la tubalre, “Kai takivaganesu kikai yai, ngiakakamanisu kivaga, kialalrasu ki palrapalra lu matikaikai nakwane?”

35Ku Pilatu la iya kai, “Swa Yuda amiasu nakwane? Sakacekelesu si marudrange ki barakalai ka wamalra muswane si baai nakwane. Manemane ku piasu?”

36Ku Yesu la iya kai, “Ku kunili kaika swakai kawmasane; alaiyasi ku kunili ka swakai kai kawmasane, ku laumawmaseli nai tara pasikai nakwane kikaruburu, la nai kainaku kipwalra ki swa Yuda. Ini, ku kunili kaika swakai kawmasane!”

37Ku Pilatu la iya kai, “Laka talialalaisu?”

La tubalre ku Yesu iya kai, “Talialaladhaku, kikai yai amanisu ka amia. Ku awnganeli yai apasikaiyane ki patengane ka sabulrwane pelaela, pasiakaiyaku kikai kitulalake, la pasikaiyaku kikai kainganai mwa kawmasane. Sanaka swakai ki patengane ka sabulrwane ku umawmase, lri tara kilaalra ku vagali.”

38Ku Pilatu la kivaga, “Manemane kwini patengane ka sabulrwane?”

Ku Yesu lri kipathavungu kipapacai

(Matai 27.15-31; Maruku 15.6-20; Luka 23.13-25)

Ku Pilatu la mulaatadrenga, si papia ki swa Yuda iya kai, “Kainaku maka kiadringai lukamanemane ku pasalrivane kai ki umawmase. 39Ai yakai kwidra tapiapianenga numi, ikai ki Takilragavane ka lrisi, kudra lrika apasikaiyaneli numiane pulatadre ku tangea ku kiaemenge. Ani pasikai naiane pulatadre ki talialalai ki swa Yuda amia numi nakwane?”

40Kwini lalasu la pela akwadrau kawriva, “Inai iniane! Lri malra nai ki Barabase!” (Kai Barabase papacai ki umawmase.)

Currently Selected:

Yuhani 18: NDV

Highlight

Copy