Mateyo 15
15
Miko ya kimuntu nkaina bontokelo.
1-20.
1Haja Mafaliseyo na watabaluwangwa weanduka Yelusalemu wazamwizila, wazamuti: 2Nini wahina wako wakibana vitigo vya wakale? Hambu nkawahaka mikono wakija nkande. 3Azawalandula angwe: Nini inywi nenywi mkibana mlaγilizo wa Mulungu kwa mbuli ya vitigo vyenyu? 4Hambu Mulungu azalonga: Gimbika isho na nyokwe! Ṅdiye amlonge ishe ao nine vibada akatakoṅwa! 5Miyainywi mwaγamba: Muntu akimγamba ishe ao nine: Viya vyeniagiza kukushuγa navyo, nizavimunka Mulungu, kangi ivyoho asheshindemgimbika ishe ao nine; 6ne mubushizevyo mbulingwa ya Mulungu kwa mbuli ya vitigo vyenyu. 7Mwahemba inywi! Mbuli yenyu Yesaya azaiteγanya vitana akiγamba: 8Mbali inu yanigimbika na milomo yawe, miya myoyo yawe i hale ṅa imi. 9Wanivika bule, hambu mbuli, wazofuza wantu, ni milaγilizo ya kimuntu.
Vyekandanya.
10Azaitanga wantu na kwakwe, azawati: Teγelezai, mwive! 11Vyeingila mwe kanwa cha muntu sivyo vyemgela muntu kisitama, miya vyelawa mwe kanwa cha muntu ne vyemgela muntu kisitama. 12Ne wahina wakwe wahomwizila angwe: Wataila, kuti Mafaliseyo wazaihilwa wakiiva inu mbuli? 13Azawalandula angwe: Kila muti Tate ywa kilwingu ashihandilewo utazaṅofulwa. 14Walekei! Ni matuntu yekunda kuγesa matuntu weyae wawe; miya tuntu jikimγesa tuntu ṅwiyae, woshe waili watakina mwe lwina. 15Petelo azahitula angwe: Tibontwele ulu lushimo! 16Angwe: Kumbe hata inywi nkamwiva na inu mishi? 17Nkamtaila kuti vyoshe vyeingila mwe kanwa vihita na mwe ifu, kangi vyaushiγwa na sila yawe? 18Miya vyelawa mwe kanwa vianduka kwe moyo, ne vyegela muntu kisitama. 19Hambu mwe moyo mwalawa ntongonyezi mbada: Kukoma, ulesi, kilanga, kubawa, kushinga, kukanka. 20Ivi ne vyemgela muntu kisitama; miya muntu akija na mikono ishihakiγweyo, nkavimgela kisitama.
Mvyele ywa Kikanaani.
21-28.
21Yesu azakulawa, azahita mwe shi ya Tilo na ya Sidoni. 22Kuna mvyele ywa Kikanaani mweanduka mwe ziya shi, azamkemela angwe: Zumbe, ṅwana Dawidi, nifa mbazi! Ṅwanangu ywa kindele aisa kulumiziγwa ni mpepo. 23Miya yuja nkamlandule mbuli hata. Wahina wakwe wazamwizila, wazamhembeleza angwe: Mshungule! 24Hambu atitongela na kukema. Azalandula angwe: Situmiγwe kutuhu, nitumiγwe du kwe ngoto ziaγilezo za mbali ya Isilayeli. 25Yuja mvyele azaiza, azamkinila angwe: Zumbe, niambiza! 26Miya yuja azamlandula angwe: Nkavilama, muntu akiγuwa nkande za wana, akizitambikila vikuli. 27Angwe: Ni vivyo, Zumbe; kangi vikuli viyaja mpuγutishi zegwa he meza za wababa zawe. 28Ne Yesu ahomwitikila angwe: Mlala, kitozesheze chako ni kikulu; uvyokunda vikubontokele! Ija ngela ne ṅwanae ahonileho.
Yesu ahonya watamu.
29Yesu azahauka, azahita kwe bahali ya Galileya, azakwela mwe mulima, azaikala. 30Wantu wangi wazamwizila, wena weyae wawe washiwodahaγenda, wahololewo mili, washiwoona, washiwolonga, hata wanyonge wangi watuhu, wazawaika he milundi yakwe, azawahonya. 31Ne wantu wahomaka wakiona kuti: Mabubu yalonga, wahololewo mili wahona, washidahawo kuγenda waγenda, matuntu yaona; kwa ivyoho wazamiogola Mulungu ywa Isilayeli.
Aiγusha wantu 4000.
32-39.
32Yesu azaitanga wahina wakwe, azawati: Nabulwa ni utungu na awa wantu, hambu mishi mitalu wazahumula kunu kwangu, kangi nkawana vya ja; miya sikunda kuwashungula, waishijile, washezagwa mshale silai. 33Angwe ni wahina: Kunu nyika tilavye na hi nkande za iγushiza wantu weinga aha? 34Angwe ni Yesu: Muna migate ingahi? Angwe: Mfungate na vikapala viγeke. 35Azaiaγiliza wantu, waikale shi, 36azaγuwa ija migate mfungate na yaja makapala, azalavya ntogolo, azaibendulabendula, azaiinkila kwa wahina wakwe, wahina wakwe wazaiinkila kwa wantu. 37Woshe wazaja, wazaiγuta, kangi mpuγutishi zishiγalezo wazazidodola, zizamema ngahu mfungate. 38Waja wajilewo wazaγelemuka waγoshi du makulija mane, kushima wavyele na wana. 39Vikibinda azashungula waja wantu, azaingila mwe chombo, azahita mwe shi ya Magadala.
Currently Selected:
Mateyo 15: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
