Mateyo 16
16
Mafaliseyo walonda lwitangilo.
1-12.
1Mafaliseyo na Masadukeyo wazamlawila, wazamγeza wakimhembeleza, awaonyeshe lwitangilo lweanduka mwe lwingu. 2Azawalandula angwe: Kukishwa mwakalonga kuti: 3Nekuche vitana, hambu lwingu lwalungulika; kukicha mwakalonga kuti: Lelo nekulende nyota, hambu lwingu lwalungulika, kangi luna zisima. Mwahemba inywi! Viya vya lwingu, muvyoona, mwataila kuvibunkula, miya ntangilo za mishi zamilema. 4Inu mbali mbada yeγenyeza kilanga yalonda lwitangilo, kangi nkezewainkwe lutuhu kushima luja lwa Yona. Azawaasha azahita.
Shimbi ja Mafaliseyo.
5Wahina wakwe wakihita na sheja wazajala kuinula migate. 6Yesu azawati: Olelai, mkiγojeshe kwa mbuli ya shimbi ja Mafaliseyo na ja Masadukeyo! 7Waja wazafanyanya mwe myoyo yawe kuti: Ni kwa kuti nkatiinule nkande. 8Yesu akivitaila azawati: Nini mkifanyanya ivyoho mwe myoyo yenyu? Nini mkishetozesha vyedi? 9Ni kwa kuti nkamna migate? Nkamzati mtaile? Nkamfukila ija migate mishano, iiγusheyo waja wantu makulija mashano, kuti ni ngahu zingahi, mwinulezo? 10Hata ija migate mfungate iiγusheyo waja wantu makulija mane nkamuvifukila, kuti ni ngahu zingahi, mwinulezo? 11Lushe ni zeze, mkisheiva, kuti sitemilonga ivyoho kwa mbuli ya nkande? Kiγojei miya kwa mbuli ya shimbi ja Mafaliseyo na ja Masadukeyo! 12Haja wazaiva lushe, kuti nkalongile: Wakiγoje kwa mbuli ya shimbi jegelwa mwe migate, miya wakiγoje kwa mbuli ya mifuzize ya Mafaliseyo na ya Masadukeyo.
Petelo alaviliza kuti Yesu ni Kilisito.
13-20.
13Yesu akibula mwe shi ya Kesaliya ya Filipo azauza wahina wakwe angwe: Wantu walonga, kuti ṅwanangwa ywa muntu ndiye ndai? 14Angwe: Kuṅwe waγamba: Ndiye Yohana Mubatizi, watuhu: Ndiye Eliya, watuhu: Ndiye Yelemiya ao mteγanyi mtuhu. 15Angwe: He inywi mγamba kuti: Ni miyo ndai? 16Simoni Petelo azahitula angwe: Iwe u Kilisito, ṅwana Mulungu mwe moyo. 17Yesu azamwitikila angwe: Simoni, ṅwana Yohana, una nyemi! Hambu vye nyama na mpome nkavikufumbwile inu mbuli, ni Tate mweikala mwe lwingu. 18Nami nakuti: Iwe u Petelo, mwe iji kungu nezenizenge bumba jangu, hata nkili za kuzimu nkezezijivote. 19Nezenikunke funguwo za uzumbe wa lwingu; ndivyo ushunge kunu shi, viishungiγwe mwe lwingu vivyoho; ndivyo ushungule kunu shi, viishungulwe mwe lwingu vivyoho. 20Aho azawashunda wahina wakwe, kangwe washezamγambila muntu, kuti ndiye Kilisito.
Yesu aandiila kuonyesha wahina ndivyo alumiziγwe.
21-28.
21Mishi ija Yesu Kilisito azaandiila kuonyesha wahina wakwe, kuti vyamtala kuhita Yelusalemu, alumiziγwe vikulu ni waγolokezi na wavikizi wakulu na watabaluwangwa, mpaka akoṅwe, afufuke mushi wa ntatu. 22Petelo azamwinula he njama, azaandiila kumshunda angwe: Zumbe, ukataikala mpeho! Ivi vikashetakubulila! 23Yuja azahituka, azamlonga Petelo: Uka kwangu, Satani! Waniihila, hambu nkutongonyeza viya vya Mulungu, utongonyeza viya vya wantu. 24Ne Yesu aholonga wahina wakwe angwe: Ati muntu akunda kunitongela, shuti akilemeze ṅwenye, ainule muti wakwe wa kukomelwa, ne ndivyo adahe kunitongela. 25Hambu mwekunda kukihonya atazakihosa, miya mwekihosa kwa mbuli ya imi, atazakihonya. 26Hambu muntu nezeaonele mbwai, hata akimota ngulu ngima, ati ahosiγwa ṅwenye? 27Hambu muntu alavye makombo ani, ndiyo akikombole nayo? Hambu ṅwanangwa ywa muntu atazalawila na utana wa ishe haṅwe na walau wakwe, ne ndiho amwuzize kila muntu kwa miγoshwele yakwe. 28Kweli namiti: Awa weγoloka aha weyae wawe kuṅwe nkewaone kifa, shuti wanemwona ṅwanangwa ywa muntu, akiiza mwe uzumbe wakwe.
Currently Selected:
Mateyo 16: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
