Mateyo 19
19
Utanda wa unyumba.
1-9.
1Yesu akibinda kulonga izi mbuli, azainuka kuja Galileya, azahita mwe shi ya Yudeya sheja ja muto wa Yolodani. 2Wantu wangi wazamtongela, azawahonya kuja. 3Mafaliseyo wazamwizila, wamγeze angwe: Kumbe nkavina ṅwiko, muntu akihalekana na muke? 4Azawalandula angwe: Nkamfyomile, kuti Kiumbe aho kale azaumba mγoshi na mvyele? 5Azawati: Ne vihokaleka, mγoshi akimwasha ishe na nine, aandakane na muke, awa waili waγaluke, viya ni ṅwili muṅwe. 6Kwa ivyoho awa so waili, miya ni ṅwili muṅwe. Kangi viya, Mulungu agombekezevyo, muntu ashezavigombola! 7Wamuti: Lushe ni zeze, Mose akilaγiliza kuinkana vyeti vya kukoma unyumba, vikibinda walekane? 8Angwe: Kwa mbuli ya kutoγa kwa myoyo yenyu Mose azamikundiza kulekana na wavyele wenyu; miya kuja kuandiila nkaviγosholwe ivyoho. 9Miya imi namiti: Muntu akilekana na muke, ati so kwa mbuli ya kilanga, akiγuwa mtuhu, alenda kilanga naye. 10Angwe ni wahina wakwe: Ati mbuli ya mγoshi na muke yaγenda ivyoho, lushe kuγuwa mvyele so kwedi. 11Azawati: So woshe wetaila bontokelo ja inu mbuli, ni waja du wejifumbwilwa. 12Hambu kuna washiwoanga na wavyele, ne wavyelwevyo ni wanine zawe. Vituhu kuna washiwoanga na wavyele, miva watekundilwa ni wantu; vituhu kuna washiwoanga na wavyele, watekikundila wenye kwa mbuli ya uzumbe wa lwingu. Mwedaha kuiva neaive!
Yesu aviṅaza vizana mesho.
13-15.
13Haja azaletelwa vizana, avibadikile mikono na kuvihembelezeza, miya waja wahina wazawavaila. 14Miya Yesu azawati: Lekai vizana, viize na kwangu mshevifingize! Hambu we ivyoho 15uzumbe wa lwingu ni wawe. Azavibadikila mikono, vikibinda azahita.
Mbwanga mzuli.
16-30.
16Muntu azamwizila, azamuti: Mfuzi mtana, niγoshole mbuli ani ntana, kangwe nezeniinkwe nkalamo ya kale na kale? 17Azamuti: Nini ukiniitanga mtana? Nkakuna mtana kushima Mulungu ike du; ati wakunda kuingila he nkalamo, γoshola milaγilizongwa! 18Angwe: Ihi? Angwe ni Yesu: Ija ya kuγamba: Ushekome! Ushetende kilanga! Ushebawe! Ushemshinge ṅwiyawo ukilonga uwona wa lulimi! 19Gimbika isho na nyokwe! Umkundishe ṅwiyawo, sa uvyokikundisha ṅwenye! 20Angwe ni yuja mubwanga: Ivi vyoshe nizaviγolokela, vivyo nikuzilevyo; nishiγaze mbwai? 21Yesu azamuti: Ati wakunda kubontoleza, hita, ukataγe vyoshe, uvyona navyo, uviinkile kwa wakiwa! Ne ndivyo utende mali mwe lwingu; ukibinda uize, unitongele! 22Yuja mubwanga akiiva inu mbuli azahita na ukiwa, hambu ne aina kitende chingi. 23Yesu azalonga wahina wakwe angwe: Kweli namiti: Mzuli ana ntoγo za kuingila mwe uzumbe wa lwingu. 24Vituhu namiti: Ngameya ntoγo zakwe za kuingila mwe kihula cha singano nkaziinga sa ziya, mzuli azoona za kuingila mwe uzumbe wa lwingu. 25Wahina wakwe wakiviiva wazashentukisha angwe: Lushe ndiye adahe kuzahona, ni ndai? 26Yesu azawaolela, azawati: Kwa wantu nkavidahikana, miya kwa Mulungu vyoshe vyadahikana.
Upokezi wa waja wemtongela Yesu.
27Petelo azahitula, azamuti: Olela! Ishwi tizaasha vyoshe, tizakutongela; lushe nezetiinkwe mbwai? 28Yesu azawati: Kweli namiti: Inywi mzanitongela; aho ndiho vyoshe vihozauziγwa uhya, ṅwanangwa ywa muntu ahozaikala mwe kiti chakwe cha utana, ne ndiho hata inywi nezemwikale mwe viti kumi na vili, mulahe ziya mbali kumi na mbili za Isilayeli. 29Kila mweasha nyumba ao wakuluwe ao wanduγuze ao walumbuze ao ishe ao nine ao wanae ao miγunda kwa mbuli ya zina jangu atazaviuziziγwa na kuzisa, kangi hata nkalamo ya kale na kale ataiinkwa. 30Miya wangi walongolewo watazashilikiza, kangi washilikizewo watazalongola.
Currently Selected:
Mateyo 19: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
