Mateyo 22
22
Lushimo lwa nteγuzi ya kizumbe.
1-10.
1Yesu azaandiila vituhu kulonga kilushimo, azawati: 2Uzumbe wa lwingu wafanana na zumbe ywa kiinushi mwemubindila ṅwanae nteγuzi. 3Azatuma wabwanga wakwe kwa itanga walalikwewo kwe nteγuzi, miya waja wazalemela kuiza. 4Vituhu azatuma wabwanga watuhu angwe: Waγambilei waja walalikwewo kuti: Shivyo, nizaliγanya mizuγilo yangu, nkambaku na ndama zenona zizabinda kukoṅwa, vyoshe vizaliγaniia, izai kwe nteγuzi! 5Miya waja wazalemela, wazahita, muṅwe nkoi kwakwe, muṅwe kwe uchuluzi wakwe; 6waja watuhu wazagwila wabwanga wakwe, wazawatowa, wazawakoma. 7Miya yuja zumbe azakwelwa ni maya, azatuma ntimizi zakwe, zizabinda waja wampoko, zizaokela muzi wawe. 8Ne aholonga wabwanga wakwe: Nkande za nteγuzi ziiliγanile, miya walalikwewo siwo. 9Hitai lushe kwe sila mpanda, mulalike kwe nteγuzi, ndiwo mwone. 10Waja wabwanga wazahita kwe sila zoshe, wazaleta woshe, waenewo, watana na wabada. 11Zumbe akiingila kwa olela waγeni wakwe, azaona muntu muja ashizwikileye shuke ya nteγuzi. 12Amuti: Ṅwiyangu, uingile zeze na kunu wishina shuke ya nteγuzi? Yuja nkalandule. 13Zumbe azalaγiliza waluγojo wakwe, mumshunge milundi na mikono, mumshindike na mwe lwiza ludala, ne kwena kulila na kukemeza meno. 14Hambu walakwewo ni wangi, miya washaγulwewo ni waγeke.
Utanda wa kodi.
15-22.
15Haja Mafaliseyo wazahita, wazalonga njama, ndivyo wamteγeie na mbuli. 16Wazamtumila wahina wawe haṅwe na wantu kuṅwe wa Helode, angwe Mfuzi, tataila kuti: Iwe u mkweli, ufuza sila ya Mulungu ilivyo kweli, kangi nkushindauza muntu, hambu nkuolela vyeni vya wantu. 17Tiγambile lushe: Uγambai? Vina ṅwiko kumunka Kaiza kodi, hambu nkavina? 18Miya Yesu azataiia ubada wawe azawati: Nini mkiniγeza? 19Mwahemba inywi! Nionyeshai shilingi yeinkilwa kodi! Wazamletela shilingi. 20Awati: Ichi chapa ni cha ndai? Kangi ugonde ni wa ndai? 21Angwe: Ni wa Kaiza. Ne ahowati: Munkei Kaiza viya vya Kaiza, kangi Mulungu mumunke viya vya Mulungu! 22Wakiviiva, wazamaka, wazamleka, wazahita.
Ufufuki ulivyo.
22-33.
23Mushi uja Masadukeyo wazamwizila, ni waja weγamba kuti: Ufufuki nkahana, 24wazamwuza angwe: Mfuzi, Mose azalonga: Ati muntu afa, aishina wana, nduγuye amupale yuja muke, amwinulile mkuluwe mbeleko! 25Kwetu ne kwina wanduγu mfungate, yuja ywa bosi akiγuwa mvyele azafa aishina ṅwana, azamwashiza nduγuye muke. 26Vivyoho hata yuja ywa mbili na ywa ntatu na waja woshe mfungate. 27Kushilikiza yuja mvyele yohena azafa. 28Mwe ufufuki yuja mvyele neaγaluke ywa ndai? Hambu woshe ne waina naye. 29Yesu azawalandula, azawati: Mzaaγilwa, kwa kuti nkamtaila baluwangwa, hata nguvu ya Mulungu nkamwitaila. 30Hambu wantu wakizafufuka nkawaγuwa, nkawaγwiγwa, miya wataikala mwe lwingu, sa walau. 31Kwa mbuli ya ufufuki wa wafilewo nkamfyomile, mwalongwavyo ni Mulungu, akiγamba: 32Imi ni Mulungu ywa Abulahamu na Mulungu ywa Isaka na Mulungu ywa Yakobo? Kangi Mulungu so ywa wafilewo, ni ywa we moyo. 33Wantu wakiviiva wazashentuka mifuzize yakwe.
Mlomongwa mkulu.
34-40.
34Mafaliseyo wakiiva, kuti Masadukeyo azawashita vyanwa, wazaunganana haja. 35Ṅwiyae ywawe muṅwe mwetailisha mulomongwa azamwuza na kumγeza angwe: 36Mfuzi, mlaγilizo mkulu mwe mulomongwa ni uhi? 37Azamuti: Umkundishe Zumbe, Mulungu ywako, kwa moyo wako woshe na kwa mpeho zako zoshe na kwa ntongonyezi zako zoshe! 38Unu ni mlaγilizo mkulu, kangi ni wa bosi. 39Wa mbili wefanana nawo shunu: Umkundishe ṅwiyawo, sa uvyokikundisha ṅwenye! 40Mwe inu milaγilizo mili milomongwa yoshe i mumo haṅwe na mbuli za wateγanyingwa.
Kilisito ni ndai?
41-46.
41Mafaliseyo wakiunganana, Yesu azawauza angwe: 42Muγambai kwa mbuli ya Kilisito, kuti ni ṅwana ndai? Wamuti: Ni ṅwana Dawidi. 43Awati: Lushe Dawidi amwitanga zeze Zumbe kwa viya, avyona mpehongwa? Hambu aγamba: 44Zumbe azamlonga Zumbe ywangu: Ikala kulume kwangu, mpaka ndiho nezeniike wankulu wako shi he milundi yako! 45Dawidi akimwitanga Zumbe, ni ṅwanae vivihi? 46Nkakuna adahileye kumlandula mbuli, kangi kuandiila uja mushi nkakuna atozizeye moyo kumwuza mbuli.
Currently Selected:
Mateyo 22: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
