Mateyo 23
23
Yesu ashunda watabaluwangwa na Mafaliseyo.
1Haja Yesu azalonga wantu haṅwe na wahina wakwe angwe: 2Mwe kiti cha Mose kuikala watabaluwangwa na Mafaliseyo. 3Vyoshe, ndivyo wamiγambile, viγosholei na kuviγolokela! Miya miγoshwele yawe msheitongele! Hambu walonga, kangi nkawaviγoshola. 4Washunganya miziγo mikulu, waibadika mwe maeγa ya wantu, miya wenye nkawakunda kuidowa na chala kiṅwe du. 5Ndima zawe zoshe waziγoshola, waolelwe ni wantu. Hambu wakuza matalatasi ya vikila, walefya mataiaza ya shuke zawe, 6wakundisha kuikala ha wafuṅwa wakilalikwa kwe nkande, hata mwe mavikilo wakaikala mwe viti vya wazumbe; 7watamilwa ni kuluγushiγwa he ndumi, wakiitangwa wakulu ni wantu. 8Miya inywi msheitangwe wafuzi! Hambu mfuzi ywenyu ni muṅwe, inywi nyoshe mu wanduγu. 9Mushemwitange muntu kunu shi kuti: Tate! Hambu ishe ywenyu ni muṅwe, ni yuja ywa kilwingu. 10Kangi msheitangwe vilongolezi! Hambu kilongolezi chenyu ni muṅwe, ni Kilisito. 11Mkulu ywenyu shuti amilumikile! 12Ndiye akikuze ṅwenye, atazapunguziγwa, ndiye akipunguze ṅwenye, atazakuziγwa. 13We ukiwa ni nywiyo watabaluwangwa na Mafaliseyo! Mwahemba inywi, kwa kuti mwazuγaila wantu uzumbe wa lwingu! Wenye nkamwingila, kangi wekunda kuingila nkamuwakundiza kuingiia. 14We ukiwa ni nywiyo watabaluwangwa na Mafaliseyo! Mwahemba inywi, kwa kuti mwaja nyumba za wavyelengwa wafilwewo ni waγoshi, kangi mwakionyaonya, viya mtaisiiza kuwahembelezeza! Kwa ivyoho mtazalahwa masa yezinka ya wenyu. 15We ukiwa ni nywiyo watabaluwangwa na Mafaliseyo! Mwahemba inywi, kwa kuti mwaanga na kuomboka bahali na shi, kangwe mγalushe muntu muṅwe mhina; kangi akioneka, mwamγalusha ṅwana ywa kuzimu mwemizinka kaili! 16We ukiwa ni nywiyo vilongolezi vifilevyo mesho! Kwa kuti mwaγamba: Muntu akikilisha na vikilongwa, nkavina mbuli; miya akikilisha na zahabu ya vikilongwa atakola masa. 17Mu wababashi, kangi mu matuntu! Hambu vikulu ni vihi? Zahabu hambu vikilo jeinka zahabu utana? 18Vituhu mwaγamba: Muntu akikilisha na okelo ja ṅombe za mviko, nkavina mbuli; miya akikilisha na ṅombe ya mviko yekomelwa mumo atakola masa. 19Mu wababashi, kangi mu matuntu! Hambu vikulu ni vihi? Ṅombe ya mviko ao okelo jeinka ṅombe ya mviko utana? 20Mwekilisha na okelo ja ṅombe za mviko akilisha najo ṅwenye haṅwe na vyoshe vye mumo. 21Mwekilisha na vikilonngwa akilisha najo ṅwenye haṅwe na yuja mweikala mumo. 22Mwekilisha na lwingu akilisha na kitingwa cha Mulungu haṅwe na yuja mwechiikaila. 23We ukiwa ni nywiyo watabaluwangwa na Mafaliseyo! Mwahemba inywi, kwa kuti ngoγwe na ntunduja na mpilipili mwazilavya fungu ja kumi, miya viya vye ntoγo vya mulomongwa mwavileka du, milahile ya masa na mifile ya mbazi na mitozesheze yeagiza. Inu anga mwaibasha haṅwe na kusheleka viya. 24Mu vilongolezi vifilevyo mesho! Mbu mwaishwa, miya ngameya mwaimeza! 25We ukiwa ni nywiyo watabaluwangwa na Mafaliseyo! Mwahemba inywi, kwa kuti vinywelo na vijiilo muvichunta se, miya uko ndai viigisize mumpa na usaba! 26Iwe Faliseyo u tuntu! Bosi anachunta kinywelo uko ndai, vikibinda chidahechuntiγwa hata se! 27We ukiwa ni nywiyo watabaluwangwa na Mafaliseyo! Mwahemba inywi, kwa kuti mwafanana na mbila zihambiγwezo, zikiolelwa vye se ziyatama, miya uko ndai ziimemile mavuha ya wafilewo na usaba woshe! 28Vivyoho hata inywi, wantu wakimiolela, muvyooniγwa, mwafanana, viya mu watanda, miya uko ndai mwe myoyo yenyu mwigisize mihembo na ubezi wa mulomongwa. 29We ukiwa ni nywiyo watabaluwangwa na Mafaliseyo! Mwahemba inywi, kwa kuti mwazenga mbila za wateγanyingwa, kangi mwahamba mazikilo ya watanda, 30mwaγamba: Ati ishwi ne tii haho mishi ija ya wababa zetu, anga nkativangane nawo mwe iyo mbuli ya kukoma wateγanyingwa. 31Ivyoho mwakilongela uwona, kuti mu wana wa waja wakomilewo wateγanyingwa. 32Lushe memezai kihimo cha waishe zenyu! 33Mu nyoka, mu wana moma! Nemnyilike zeze masa ya kushindikwa na kuzimu? 34Ne vyelongwa kuti: Imi natuma kwenyu wateγanyi na watalizi na walabaluwangwa, kuṅwe nemuwakome na kuwaamba mwe miti, kuṅwe mlawatowa mwe mavikilo yenyu, vikibinda mtawaγulusha mwe kila muzi, 35ndimo waingile, kangwe mwingile mwe masa yoshe ya mpome ya watanda iitilweyo kunu shi, kuandiila kwe mpome ya Abeli, hambu ne ai mtanda, mpaka kwe mpome ya Zakaliya, ṅwana Balakiyo, mumkomileye haja he vikilo na he okelo ja ṅombe za mviko gati. 36Kweli namiti: Inu mbali yenyu neilahwe aya masa yoshe.
Mlaho ndiwo ubulile Yelusalemu.
37Yelusalemu! Yelusalemu! Wakoma wateγanyingwa watumiγwewo na kwako, wawahomela mawe! Ni kangahi, nikikunda kuunganyanya wanawo, sa viyaho nguku ivyounganyanya visiyo mwe mawawa yakwe? Miya inywi mzalemela! 38Shivyo, nyumba zenyu neziashiγwe mahuzu! 39Kweli namiti: Nkezemkeniona kuandiila ivi lushe, mpaka ndiho mulonge: Atogolwe mweiza mwe zina ja Zumbe!
Currently Selected:
Mateyo 23: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
