Mateyo 24
24
Yelusalemu neuchakulwe.
1Yesu akilawa mwe vikilongwa azahita. Wahina wakwe wazamwizila, wamwonyeshe mizengele ya vikilongwa. 2Miya yuja azawalandula angwe: Nkamwona ivi vyoshe? Kweli namiti: Nkezehalekwe iwe, jikiandakana na ṅwiyae, jikishechakulwa. 3Akiikala he mulima wa miziyaγembe, wahina wakwe wazamlawila he njama angwe: Utiγambile, ati ni lini, ziya mbuli zikizabontoka! Kangi lwitangilo lwa kuuya kwako na lwa bindilizo ja inu ngulu ngima yoshe ni luhi? 4Yesu azawahitula, azawati: Oleleshai, muntu ashezamiazaγanya! 5Hambu wantu wangi watazalawila mwe zina jangu wakiγamba: Imi ni Kilisito, wataazaγanya wangi ivyoho. 6Shuti muneiva mbuli za nkondo na ulongo wa nkondo; violelei, mshevishentuke! Hambu viya shuti vibontoke, miya hata aho bindilizo nkajizati jibule. 7Hambu mbali na mbali zitainukilana, hata wazumbe na wazumbe weyae wawe, hantu haṅwe na haṅwe hatagwa sala, hata mididimo neizinke. 8Viya vyoshe ne chandilo cha mishango.
Wahina watalumiziγwa.
9Haja watamigela ukiwa, wamikome; nemshukiziγwe ni mbali zoshe kwa mbuli ya zina jangu. 10Ne ndiho wangi nezewaihilwe, wainkilane wenye na wenye kwa kushukizanya. 11Wateγanyi wangi wa ulongo watainuka, wataazaγanya wangi. 12Kwa kuti ubezi wa mbulingwa utagisa koshe koshe, wangi lukundisho lwawe lutahola. 13Miya ndiye azizimize mpaka bindilizo, ne ndiye ahone. 14Kangi unu uiau wa uzumbengwa unebilikilwa mwe ngulu ngima, uγalukile mbaii zoshe uwona! Ivi vikibontoka, bindilizo jitakinta.
Uchakuzi webuza useli.
15Aho ne ndiho nezemwone, uja uchakuzi webuza useli ukilawila hantu haṅazi, sa vilongiγwevyo ni mteγanyi Danyeli; mwefyoma aha hantu ateγeieze vyedi! 16Mishi ija we mwe shi ya Yudeya wanyilike kwe milima! 17Mwebulilwa aiikale mwe nyumba ulanga, asheshindeingila kwa γuwa ntanu ze nyumbai! 18Mwe nkoi asheuye kwa γuwa shuke zakwe! 19Wena nda na weonkeza wataona ukiwa mishi ija. 20Hembelezai, kuja kunyilika kwenyu kusheteγane na mishi ya nyota ao mushi wa sabato! 21Hambu haja hatagwa ukiwa ukulu washaonekawo kale hoshe, vikiandiila haja, shi ikiumbiγwa, mpaka ivi lushe, kangi nkezeuoneke vingi. 22Ati mishi ija nkaidwishiγwa, anga nkakuna muntu mwehona; miya kwa mbuli ya waja washaγulwewo ija mishi yadwishiγwa. 23Haja muntu akimiti: Shuyu Kilisito!, ao: Shuyuja!, mshetozeshe! 24Hambu Wakilisito wa ulongo na wateγanyi wa ulongo watazainuka, watazaγoshola vilozo na vimaka vikulu, waazaγanye, ati vyadahikana, hata waja washaγulwewo. 25Shivyo, nizavimiγambila, vishizati vikinte. 26Lushe wakizamiti: Shuyuja, a mwe nyika!, mshezahita! Ao du: Shuyuja, a mwe nyumbangwa!, mshetozeshe! 27Hambu sa viyaho lumuli luvyolawa kuja kwelawa zuwa lukimulika he lwingu lwoshe mpaka kuja kweingila zuwa, ne ndivyo kuuya kwa ṅwanangwa ywa muntu kulawile. 28Hena vundile, ne ngwilizi zihokaungananilana.
Kuuya kwa ṅwanangwa.
29Ukiwa wa mishi ija ukizinka, haho du zuwa jitagwa lwiza, hata ṅwezi utaleka kuaka, hata ntondwe zitauka mwe lwingu, hata nguvu za lwingu zitavuwanika. 30Ne ndiho lwitangilo lwa ṅwanangwa ywa muntu lulawile he lwingu, ne ndiho mbali zoshe za shi zitule ndilo zikimwona ṅwanangwa ywa muntu, avyoiza mwe mazunde ya lwingu na nguvu nyingi na utana ungi. 31Ne atatuma walau wakwe, waitozize magunda makulu, waunganyanye waja washaγulwewo ndiye wakiwalavya kwe nyazu zoshe, mpeho ihokalawa, kuandiila lwingu lukoandiila mpaka kuja lukohelela. 32Hinai lushimo mwe mkuyu: Ntimbwati zakwe zikikwela matumba, zikivungula, mwataila kuti: Vuli ji hehi. 33Vivyoho hata inywi mkizaona viya vyoshe tailai kuti: Bindilizo ji hehi! 34Kweli namiti: Inu mbali nkeibanike, mpaka izi mbuli zoshe zinebontoka. 35Lwingu nezelubanike, hata inu shi, miya mbuli zangu nkezezibanike. 36Miya mbuli ya mushi ao ya saa nkakuna mweitaila, hata walau wa lwingu nkawaitaila, hata ṅwanangwa nkaitaila, ni Tate ike du. 37Sa mbuli ziγendilevyo mwe mishi ya Nowa, ne ndivyo ziγende, ṅwanangwa ywa muntu ahozauyiya. 38Hambu sa viyaho waikalevyo mishi ija ilongoleyo uja mlaho wa mazi, wakija, wakinywa, wakiteγula, wakiteγulwa mpaka uja mushi, Nowa akiingila mwe chiya kibweta, 39wakishetaila iyo mbuli, mpaka mlaho wa mazi ukigwa na kuwabinda woshe: Ne ndivyo mbuli ziγende hata aho, ṅwanangwa ywa muntu ahozauyiya. 40Haja hatazaoneka waili we haṅwe nkoi, muṅwe atahokelwa, muṅwe ataashiγwa. 41Waili webunduγa mwe ntuli ṅwenga, muṅwe atahokelwa, muṅwe ataashiγwa.
Gonai mesho.
42Kwa ivyoho gonai mesho! Hambu nkamtaila mushi, ndiwo Zumbe ywenyu alawile nawo. 43Iyo mbuli mwataila kuti: Ati ṅwenye nyumba ataila, mubavi ndiho aizile, anga agona mesho, asheleke nyumbai mwakwe mukibaiγwa. 44Kwa ivyoho hata inywi kiteγei! Hambu ṅwanangwa ywa muntu atazaizila, mushihomwafiza. 45Ni ndai mweγaluka mupuna mkweli mwena viyuγo, baba yakwe akimgimbika mγolokezi ywa nyumba yakwe, ainke wabwanga wakwe nkande, zihokateγana naho? 46Mupuna mwezaona nyemi ni yuja, baba yakwe ayemubulila, akiγoshola ivyoho, ndiho kiawile. 47Kweli namiti: Atamgimbika, aγolokele viya vyakwe vyoshe, avyona navyo. 48Miya ati yuja mupuna ni mubada, akifanyanya mwe moyo wakwe kuγamba: 49Baba yangu nkeaize nguzu, kangi akiandiila kutowa wapuna weyae, aje, 50anywe haṅwe na waja wetengela, baba ywa yuja mupuna atazalawila mushi, ashiwomwafiza, atazaiza ashihotaila; 51ne atamkoma na shime, amlavye nyazu mbili, upokezi wakwe atamunka haṅwe na waja wehemba. Ne ndiko kuivike kuiila na kukemeza meno.
Currently Selected:
Mateyo 24: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
