Marko 15

1Ore ake pee ekenyu, neiguana ilapolosak kituaak, o lpayiani o lasirak o enkiguana pooki nalulung'a. Neen Yesu, nerik neitarasaki Pilato. 2Neikilikuan Pilato ajoki, “Ira doi iyie Olaiguanani loo Lyahudi?” Newaliki ajoki, “Iyie otejo neijia.” 3Neitang'or ilapolosak kituaak ninye too mbaa kumok. 4Neigil Pilato aikilikuan ninye ajoki, “Aimiata hoo embae niwalu? Nidol eneba mbaa nikintang'orie ninche?” 5Kake eitu hoo ewaliki Yesu, metaba anaa neing'asia Pilato.

6Naa ore apake te ilo sirua kelaaki apa ninye ninche oltung'ani obo oena, naa olotoomonutuo ake. 7Ore too ltung'ana oopidilare enkitoria ooena te korokoroni, neitayutuo loikop ina kata, netii oltung'ani oji Barabas. 8Nelotu ina siamo neiter aaikilikuan Pilato meitaasa enoshi ake naitaas. 9Newaliki ajoki, “Iyieuu nalaaki intae Olaiguanani loo Lyahudi?” 10Amu etayiolo Pilato ajo olom ake eitarasarie ilapolosak kituaak Yesu. 11Kake einuaakita ilapolosak kituaak olorere metejo pee elaakini ninche Barabas. 12Neitoki ake Pilato ajoki ninche, “Paa kaa naa aitaas ele tung'ani lijojo Olaiguanani loo Lyahudi?” 13Neilepilep aaigil aajo, “Tasho ninye.” 14Nejoki Pilato ninche, “Ainyoo, kaa torrono etaasa ninye?” Kake eilepilepa oleng aajo, “Tasho ninye.” 15Ore amu keyieu Pilato neitiship ina siamo, nelaaki Barabas neng'as aishooyo Yesu metooshi too nkeenta neitoki aitarasaa metashei.

Etadalare sikarini Yesu aasurdaany neinyal

(Mat 27.27-31; Yhn 19.2-3)

16Neriku sikarini ninye atua enkaji e nkitoo naji praitorio; neipotu esikari e sirit nalulung'a. 17Neishopoki ninye olkila mugie neshetu olmarisian loo lkiku neishopoki Yesu elukunya. 18Neiter aairoroki aajoki, “Olele Olaiguanani loo Lyahudi!” 19Neigilie aaosh elukunya te ntiyani, nenotaki, negilaki kung aaitaakuno keserem. 20Ore pee eidip aatadalare, neoru ilo kila mugie neishopoki nkilani enyena. Nerik auluo pee epuo aashe.

Etashoki Yesu to lchani oirrataat

(Mat 21.32-44; Lk 23.26-43; Yhn 19.17-27)

21 # Irm 16.13 Nearaki olpayian obo oji Simon le Kirene, odoku ti ae kop, menye taa Aleksanta o Rufus, metanapa osalaba le Yesu. 22Nerik o meitabaiki Golgota eji ewueji e mborbor. 23Neisho enaisho natipikaki entoki naji manemane, kake etanya ninye eok. 24#Olke 22.18 Neshe ninche ninye, neorikino lkilani lenyena, neoshie enkukuo pee etum oloya. 25Naa saa uni ina kata pee eshe ninche ninye. 26Ore embae naitanang'aki ninye neigero ajo, “Olaiguanani loo Lyahudi.” 27Netashoki lapurrok aare te nebo ninye, atii obo te tatene netii olikae te kedienye. 28#Isa 53.12 Neitabari olkigeroto ojo, “Eikenayioki ninye te nebo ilarruok.” 29#Olke 22.7, 109.25; Mk 14.58; Yhn 2.19 Ore lelo oopuaya oloim ine, nesurdaany ninye eing'unie lukuny, nejo, “Hoo! Eiyie doi ojo agil enkaji e Nkai nintoki ashetu too nkolong'i uni? 30Intajeu kewan tadou te ilo salaba!” 31Neiko sii ninche neijia ilapolosak kituaak aaikordod ejokino maate, “Kulikae ake eitajewuo; nemeidim aitajeu kewan. 32Nchoo naa duoo Kristo. Olaiguanani le Siraeli, edou to salaba matodol pee kiruk.” Ore lelo ootashoki te nebo ninye nemor sii ninche.

Enkeeya e Yesu

(Mat 27.45-56; Lk 23.44-49; Yhn 19.28-30)

33Ore pee eipir enkolong, nerip enaimin enkop pooki o metabaiki saa naaudo. 34#Olke 22.1 Ore pee eaku saa naaudo nebuak Yesu to ltoilo sapuk ajo, “Eloi, Eloi, lama sabaktani?” eji, “Enkai ai, Enkai ai, ainyoo pee kitung'uayie?” 35Ore pee ening kulikae ooitashe te ine nejo, “Ining, Eliya eipoto.” 36#Olke 69.21 Nekuet obo, neiput osuguroi enaisho naisuisho naji siki, nepik oloomi neisho metooko, ejo, “Ntasho matodol te naa kelotu Eliya aitadou.” 37Nebuaku Yesu oleng, nedung'o tau. 38#Ena 26.31-33 Neiperra aaku are olkarasha oor enkaji e Nkai, eiteru te shumata o meiting'o ti abori. 39Ore pee edol osajini oitashe aipirare ninye, ajo etaa etundung'e tau, nejo, “Edede Oinoti le Nkai ele tung'ani.”

40 # Lk 8.2-3 Netii sii nkituaak naaing'orita elakuaniki inaatii Mariamu Magdalene, o Mariamu ng'otonye Yakobo oti o Yosef, netii sii Salome, 41ninche napa, etii ninye Galilaya, naatusujutua neisiaai. Netii sii kulie kituaak kumok naairiamunore ninye epuonu Yerusalem.

Enukaroto enye

(Mat 27.57-61; Lk 23.50-56; Yhn 19.38-42)

42Ore pee eaku teipa, naa enkolong e Nkitobirakinoto, aa enoshi olong taa pee eyookini enkolong e nkiyeng'iyeng'ata. 43Neshirraki#15.43 Neshirraki nelo metii enkuretisho Yosef le Arimatea, obo loo looyanyiti le nkiguana, olaa keanyita ninye enkitoria e Nkai, nelo enetii Pilato neomonu osesen le Yesu. 44Neing'asia Pilato pee eji eidipa Yesu atua, ore pee eipotu osajini, neikilikuan te naa keidipa atua. 45Ore pee ening to sajini ajo etua, neisho Yosef ilo sesen. 46Neinyang'u ninye olkarasha le kitani, neirragie te nkurare nataguetuaki to soit, neibeleleng'oki osoit enkutuk e ina kurare. 47Netoduaa Mariamu Magdalene o Mariamu ng'otonye Yosef eneirragieki ninye.

Currently Selected:

Marko 15: MBS

Highlight

Copy