Marko 16

1Ore pee eishari enkolong nayeng'iyeng'areki, neinyang'u Mariamu Magdalene o Mariamu ng'oto Yakobo, o Salome iila naarropil pee epuo aael ninye. 2Ore tadekenya oleng te nkolong e nkiterata e wiki, nepuonu enkurare eilepua enkolong, 3ejokino maate, “Ae ng'ae ade oret iyiook aibeleleng'oo, osoit te nkutuk e nkurare?” 4Nejo maing'ura, nedol aajo eidipaki aaibeleleng'oi osoit aaiwuang'ie amu ae sapuk apa oleng. 5Ore pee ejing enkurare, nedol oltung'ani lelerue eitashe te nkalo e tatene, neishopito olkila oibor; neing'asia ninche. 6Nejoki ilo ninche, “Eming'asia; Yesu le Nasaret ing'oruru, otashoki. Etopiwuo, metii ene; eng'ora enapa wueji neirragieki ninye. 7#Mat 26.32; Mk 14.28 Kake enchom, entoliki ilooiteng'eni lenyena o Petero nchere, keituruk alo Galilaya; te ine ipuopuo aadol, anaa enatiaaka intae.” 8Nepuku aapuo neipirri aaing'uaa enkurare; amu einepua olokirikiri o enkiputukuny, neitu eliki likae tung'ani, amu etureishote.

ENKITING'OTO NAADO E MBUKU E MARKO

(Mat 28.9-10; Yhn 20.11-18)

9[Ore pee epiu Yesu enasirie te nkolong e nkiterata e wiki. Mariamu Magdalene etang'asa aipang'aki enapa nataararie loiriruani oopishana. 10Nelo ninye aliki lelo apa ooiriamariyie ninye, eishirita ninche neilisho. 11Kake ore pee ening ninche aajo eishu netoduaa ninye, neitu sii eiruk.

Eitalioo Yesu kewan metoduaa ilooiteng'eni lenyena

(Lk 24.13-35)

12Ore te siadi nena, etawale ninye atum ae mua, neitalioo kewan te kulikae aare lenye epuo nkurman. 13Nerrinyo lelo aapuo aaliki lkulikae, kake eitu ninche eiruk.

Eitanapa ilooiteng'eni lenyena neirriwaa

(Mat 28.16-20; Lk 24.36-49; Yhn 20.19-23; Iat 1.6-8)

14Ore te siadi nena, neipang'aki lelo tomon oobo etoni aadaa; neisikong ninche te nkaraki engolon oo lukuny enye o te nkaraki nemeeta enkirukoto amu eitu eiruk lelo ootoduaa ninye eidipa atopiu. 15#Iat 1.8 Nejoki ninye ninche, “Enchom enkop pooki entoliki ltung'ana pooki ele rorei supat. 16Ore oloiruk neibatisae nejeu; ore olemeiruk nedung'okini enkiguana. 17Naa kulo lmonek ooiriamariyie lelo ooiruk te nkarna ai earaa loiriruani; neiro too nkutukie ng'ejuko. 18Nedumu lasuriaa, naa te neok entoki ake pooki nayaisho nemeeta enaiko ninche; neiteleiki ltamueyia nkaik, neishiu.”

Eilepa Yesu alo keper

(Lk 24.50-53; Iat 1.9-11)

19 # Iat 1.9-11 Neaku ore pee eidip Olaitoriani Yesu airorie ninche, neilepieki aaya shumata, neton te nkaina e tatene e Nkai. 20Nedumunye ninche aapuo aalikioo ilo rorei too wuejitin pooki, neasisho Olaitoriani te nebo ninche neitadedeyie ilo rorei too lmonek ooiriamariyie. Esai.]

ENKITING'OTO DORROP E MBUKU E MARKO

[ 9 Kake etolikio Petero too ndorropu, o lelo ooboitare nena naatolikioki ninche. 10 Ore te siadi nena, neitanap Yesu makewan ninche mewaita enkilepunoto neya endoyioroto elikioroto sinyati e njeunoto nemeish nebik intarasi.]

Currently Selected:

Marko 16: MBS

Highlight

Copy