Yona 3
3
Yona Nagyenda Ni̱neeva
1 Mukama yaab̯u̱ni̱a yaaweera Yona naakoba yati, 2“Byokya, ogyende mu rub̯uga lukooto lwa Ni̱neeva, orangiire bantu baamwona, b̯ukwenda b̯u̱nku̱heeri̱.”
3Mwomwo Yona yaakora nka Mukama kuyaali amu̱weereeri̱, yaagyenda Ni̱neeva. Ni̱neeva lwali rub̯uga lukooto, lukutwala biro bisatu kululibata okalurabamu. 4Yona b̯u̱yaamaari̱ kulibata lugyendu lwa kiro ki̱mwei̱ mu rub̯uga, yaatandika kurangiira bantu baamwona naakoba yati, “Hasi̱geeri̱yo biro maku̱mi̱ ganei, rub̯uga lwa Ni̱neeva luhwerekerezeb̯we.”
5Bantu ba Ni̱neeva bei̱ki̱ri̱i̱ze b̯ukwenda b̯u̱ru̱gi̱ri̱ hali Ruhanga, baarangiira kisiibo. Bantu bensei̱, kurugiira ki̱mwei̱ hali mu̱handu̱ waab̯u kudwera ki̱mwei̱ hali akusembayo, baalwala maku̱u̱ti̱ya kwolokya nti, baali ni̱bakwezi̱ramwo.
6B̯ukwenda b̯ub̯u b̯u̱b̯wadwerereeri̱ mukama wa Ni̱neeva, yaabyoki̱ri̱ yaaruga ha ntebe gyamwe gya b̯ukama, yaasomolamwo bilwalu byamwe bya b̯ukama, yaalwala maku̱u̱ti̱ya, kandi yeicaara mwi̱syanu̱. 7Mukama yaarangiira kiragiro mu Ni̱neeva gyensei̱ naakoba yati,
“Kiki kyokyo kiragiro kyange, gya mukama hamwenya na bahandu̱ bampondera, kinkuragira ninkoba yati,
“Hatabbaho muntu yensei̱, rundi kisolo, kudya kantu kensei̱. Nab̯ugyabba nte, rundi mbu̱li̱, gitadya kandi gitanywa kantu kensei̱. 8Bei̱tu̱ b̯uli muntu, akuragirwa kulwala maku̱u̱ti̱ya, kandi na b̯uli kisolo baki̱lwalye maku̱u̱ti̱ya. B̯uli muntu akuteekwa kwesengereerya Ruhanga na maani hoi̱, kandi akuragirwa kuleka bikorwa byamwe bibiibi na b̯wemi̱ b̯wamwe. 9Naani yeegi̱ri̱? Ruhanga asobora kuhindula ncwamwo gyamwe, naatukwatirwa mbabazi̱, ki̱ni̱ga kyamwe kinene nikigwa, naaleka ku̱tu̱hwerekereerya.”
10Ruhanga b̯u̱yaaweeni̱ bi̱baakoori̱, kandi beezi̱ri̱ri̱mwo bikorwa byab̯u bibiibi, yaabakwatirwa mbabazi̱, atakabahwerekereerye nka kuyaali akobi̱ri̱.
Currently Selected:
Yona 3: LUGUNGU
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.