Jɔɔnn 11
11
Lasarus kuun labaar
1Tɔn, jasɔɔ nna din be Betani, ki u sann yi Lasarus, ki u din tan yiar. Betani din tee Mari nan u yɔɔrɔ Maata dooe. 2Mari din tee daanɔ nba but tulaarii ti Yomdaanɔ Yisa taa paak, ŋaan jii u yut ki fiar fiar na. Ŋɔɔ Mari ninja Lasaruse yiar. Wa tan yiar na, 3ki u niipoob Mari nan Maata tun toomii a wun saan ki saa bet Yisa a “Ti Yomdaanɔ, a naasinyɔɔk nba ki a mantik loonɔ na yiare.”
4Yisa nba gbat nna yoonba ki u yet u poorpoweiteeb na a “Lasarus nba yiar na, yiaru maŋ ki tee u manfoor terik kaa na, ŋaan li tee linba ki niib sa dont Yennu sann li paake, ki bia sa dont min Yennu Bija sann mun biak.”
5Tɔn, Yisa din loon Maata nan Mari nan Lasarus. 6Wa gbat a Lasarus yiar na, ŋaan u din teen daa ŋannlee ki daa be leŋ.
7Li poorpoe ki u din tan bet u poorpoweiteeb na a “Ŋaant man ki tin ŋmat saan Judea.” 8Ki bi yetɔ a “Chanbaa, daa ŋannlelee na, ki Juu teeb yudamm na daan yaa bin jaata tana, ŋaan ki a bia yaa ti ŋmat leŋii?” 9Ki Yisa betib a “Yentu tuu be yendo po mɔkmɔk nan yenbaa poe. Li-i tee ki nirɔ somm yennu ni, u kan gbiati, kimaan u laat tingbouŋ na yentu na. 10Ŋaan u-i somm nyiɔk, u gbiatire, kimaan yentu kaa.” 11Yisa din yet nnee, ŋaan bia yet a “Ti yɔɔk Lasarus gɔɔnte, ŋaan n sa saan fiinɔwa.” 12Ki u poorpoweiteeb na yetɔ a “Ti Yomdaanɔ, li-i tee ki u gɔɔntie, u sa la laafiawa.” 13Yisa din want ki li tee a Lasarus kpoe, ŋaan ŋamm din mi a u want a Lasarus gɔɔnte. 14Li paak din te ki u betib gbenn a “Lasarus kpoa, 15ŋaan i paak n mɔk parpeenn nan ma daan kaa u boor ni na, kimaan ŋannii sa te ki i fit lian teenin yada. Ŋaant tin saan u peŋ man.” 16Ki Tomas, wunba ki bi yiu Jaak na, yet u leeb a “Ŋaant ki ti mun-n saan man. Li-i sii tee kuun, timm nan ŋɔɔ-n kpo.”
17Yoo nba ki bi tan per Betani na, ki u gbat a ba pii Lasarus, li daa ŋannae na. 18Betani din ki fɔk nan Jerusalemi; li fɔkint din tee kaman nan maar ŋannlee nee. 19Li paak din teen ki Juu teeb bonchiann din baar Maata nan Mari peŋ, a bin maan bi para, kimaan bi ninja na kuun paak.
Wunba fiint kpeemm ki teemm manfoa na labaar
20Maata nba tan gbat a Yisa baat yoonba, ki u nyii chetɔ, ŋaan ki Mari ŋarin biar be ŋaak ni. 21Ki Maata bet Yisa, “N Yomdaanɔ, li-i tee ki a daan bo be nna na, n ninja na daan bo kan kpo. 22Ŋaan n mi nan mɔtana gbaa, li-i tee ki a miar Yennu linba kur po, u sa turawa.”
23Ki u betɔ, “A ninja sa fiir kuun niwa.”
24Ki Maata jiinɔ, “N mi nan u tan sa fiir kuun ni dunia gbennu daar, daar nba ki kpeemm tan sa fiir kuun ni na.”
25Ki Yisa betɔ, “Mine fiint kpeemm ki teemm manfoa. Daanɔ nba teenin yada, ŋɔɔe sii mɔk manfoor, u lekii kpo gbaa; 26ki daanɔ nba mɔk manfoor ŋaan teenin yada, u kan mi ki kpo. A teen yada nan linba na-aa?” 27Ki u jiin a “N Yomdaanɔ, nn, n teen yada nan fine tee Yennu Niganntɔɔ Masia, ki bia tee ŋɔɔ Yennu Bija wunba ki ti tuu daan u baaru na.”
28Maata nba yet nna maŋ, ŋaan ŋmat kun, ki saa yiin u waarɔ Mari soonna, ki betɔ a “Wanntɔɔ na be nnawa, ŋaan yiia.” 29Mari nba gbat nna yoonba, ki u fiir yian yian, ki saan u boor ni. 30Ki Yisa din daa ki baar digbanbik maŋi, ŋaan daa be siaminba ki Maata chetɔ nee. 31Ki Juu teeb nba be nan Mari ŋaak ni ki maant u par na, ba la ki u nyii yian yian na, ki bi mun wei nyii, kimaan bi mi a u saa kaauk boore a wun saa bui kpemɔnii.
32Mari nba baar Yisa boor ki lau yoonba, ki u gbaan u tɔɔnn, ŋaan yetɔ a “N Yomdaanɔ, li-i tee ki a daan bo be nna na, n ninja na daan bo kan kpo.” 33Ki Yisa la ki u mɔ, ki Juu teeb nba weiɔ ki baar na, ki bi mun mɔ, ki ninbaauk soorɔ bonchiann, ki u kurii u par ni. 34Ki u boib, “I piiu lapoe?” Ki bi betɔ, “Ti Yomdaanɔ, baat ki tan got.” 35Ki Yisa bui. 36Ki Juu teeb na yet a “Gotir man wa jia loon Lasarus biaŋinba.” 37Ki siab yaa a “Daanɔ nba nyɔɔnt jɔɔŋ na, u daan bo kan fit te ki Lasarus daa kpennii?”
Yisa nba fiin Lasarus kuun ni biaŋinba
38Ki Yisa yan bia ŋamm yêt, ki u saan kaauk na boor ni. Kaauk na din tee tanfiɔko, ki katanu bii li mɔb. 39Ki Yisa betib a “Biitir kaauk maŋ man.”
Ki Maata wunba tee kpeemɔ na niipoo, yetɔ a “N Yomdaanɔ, li sii pɔi hei, kimaan ba piiu, li daa ŋannae na.”
40Ki Yisa boiɔ, “N bo ki beta a li-i tee ki a teenin yada, a sa la Yennu nba mɔk panchiauŋ biaŋinba-aa?” 41Ŋanne ki bi biit kaauk na. Ki Yisa gokit sanpaapo, ŋaan yet a “N Baa Yennu, n teena niipoouk nan fa sak n miaru na. 42N mi nan yoo kur a saak n miaru, ŋaan ma yet nna na, kimaan n loon ki nibur nba be nna na-n gbat ki teen yada nan fine tumin.”
43Wa yet nna maŋ, ŋaan yiin sanpaapowa a “Lasarus, nyimin na.” 44Ki kpeemɔ na nyii; ki u taa nan u nii ki li fin fin nan katiŋ, ki chinchenbik boob u numm po. Ki Yisa betib a “Fintir katiŋ maŋ ki ŋaau.”
Yudamm nba lor a bin kpi Yisa biaŋinba
(Matiu 26.1-5; Mak 14.1-2; Luk 22.1-2)
45Ki Juu teeb bonchiann nba din baar a bin maan Mari par na, ki ba la linba ki Yisa tun, ki bi teenɔ yada. 46Ŋaan bi siab saan Farisiinba peŋ, ki saa betib linba ki Yisa tun.
47Li paak ki Farisiinba maŋ nan Yennu jiantu yudamm yiin tintaankaanu, ki bi tikir; ki bi boi bi leeb a “Ti sa teen nlee? Jɔɔ maŋ tuun toonjaana bonchiann. 48Ti-i ŋaan ki u ŋammit ki tuun nna ki pukii, sɔɔ kur sa teenɔ yadawa, ki Rom teeb-n baar ki yeer Yennu jiantu ŋasaakak na, ŋaan bia boont ti niib.” 49Ki bi yenɔ, wunba yi Kayafas, ki tee Yennu jiantu yudaanɔ li binn ni na, yetib a “Yimm ŋarin ki mi siari. 50I ki mi nan li ŋan ki niyenɔkɔɔ-n gaar niib na kura paak ki kpo, ki gar ki ti niib kur-n boontii?” 51U din ki pak linba na nan u mɔŋ kaa, ŋaan wa din tee Yennu jiantu yudaanɔ binn maŋ ni na, ki Yennu te ki u pak bunt buntir, a Yisa tan sa gaar Juu teeb na paak ki kpo. 52Ŋaan li ki tee Juu teeb kuukɔɔ kaa ki u tan sa gaar bi paak ki kpo, ŋaan nan binba kur tee Yennu niib ki yat be tingbouŋ na ni nae ki u sa gaar bi paak ki kpo, ki bin taan nan leeb mɔyomm.
53Ki li daar maŋ ki jii saa ki Juu teeb yudamm na lor soor a bin kpi Yisa. 54Li paak ki u ji din ki somm paanu ni Juu teeb tiŋ ni, ŋaan ki u tan yaat saan doo nba ki bi yi Efreem, ki li kpia nan tanbiinpaanu na; ki ŋɔɔ nan u poorpoweiteeb ji be leŋ.
55Tɔn, ki Juu teeb yukitgar tiaru jaamm tan per, ki niib bonchiann nyii digbana ki baar Jerusalem, a bin daa ŋamm bi mɔŋa, ki fit lian teen bi mɔŋ siir ki di jaamm na. 56Ki niib na din loon Yisa. Ba tikir Yennu jiantu ŋasaakak ni yoonba, ki bi boi bi leeb a “I dukii nlee? U mantik kan baar jaamm na amii?” 57Ki Yennu jiantu yudamm nan Farisiinba na tur mɔb a “Wunba mi u boor, wun baar ki tan ŋmaa ti taar ki tin soorɔ.”
Currently Selected:
Jɔɔnn 11: BIM
Highlight
Share
Copy
Want to have your highlights saved across all your devices? Sign up or sign in
