Jɔɔnn 10
10
Pekpaarik barjouk
1Ki Yisa bia yetib a “Barmɔniie ki n beeri na, nirɔ nba ki tɔkin pelook tammɔb ki kɔɔ, ŋaan doo joonn ki kɔɔ, li yɔɔe tee nanyukɔɔ. 2Ŋaan nirɔ nba tɔkin pelook na tammɔb ki kɔɔ, li yɔɔe tee pei maŋ kpaarik. 3U-i taŋŋi baat a wun kɔɔ, tammɔguurɔ na sa loote, wun kɔɔ; ki u yi u mɔŋ mɔŋ pei na sana, ki bi gbia u mɔb, ki u nyintib. 4U-i nyinn u mɔŋ pei kur yoonba, u tuu gar bi tɔɔnn nie, ki bi waa u poor, kimaan bi mi u kunkɔr. 5Ŋaan bi kan wei saamɔ ŋarimi, kimaan bi ki mi u kunkɔri. See ki bi chiar.” 6Yisa din yimm barjouk na, ŋaan ki bi ki bann li paaki.
7Li paak, ki u bia ŋamm ki betib a “Barmɔniie ki n beeri na, mine tee pelook na tammɔb. 8Ŋaan binba kur gar n tɔɔnn ki baar na tee nanyukibe nan fatiteeb, ŋaan pei na ki gbia bi mɔbu. 9Mine tee tammɔb na, ki daanɔ nba wein ki kɔɔ, ŋɔɔe sa la tinnu, ki sii yɔɔ gaar kɔɔ, ki ŋmat nyi, ki laat jeŋant. 10Nanyukɔɔ ŋarin baat a wun tan jan pei nae, ki bia kpib, ki bia biirib. Mine baar a niib-n la manfoor nba tee manfoor nan barmɔnii.
11“Mine tee pekpaaŋaŋ, ki pekpaaŋaŋe kpenn u pei paak. 12Ŋaan wunba kpaar pei likirii paak, ŋaan ki ki tee pekpaarik nan mɔnii, ki bia ki yen pei na, li-i tee ki u la ki kinkatir tan baat yoonba, see ki u chiar ŋaan nyik pei na; ki kinkatir-n ji baar ki soorib, ki pelei na-n yat. 13U tuu chiare, kimaan u kpaar pei na likirii paake, ki u baka kaa pei na ni. 14-15Mine tee pekpaaŋaŋ. N Baa Yennu nba min, ki n mun miu na, li mun bia tee nnee ki n mi n pei, ki bi mun min, ki n sa lu n miar bi paak. 16Pelei be ki tee n yab, ŋaan ŋamm ki tee pelook maŋ ni yabi. See ki n baar nan ŋamm mun biak, ki bi sa sak n mɔb, ki bi kur ji sii tee pebooryeŋ, ki mɔk pekpaaryeŋ kɔɔ.
17“N Baa Yennu loonin, kimaan n yaa n nyinn n manfoor, ki li poorpo ki n bia sa ŋamm la n manfoor maŋ. 18Sɔɔ kaa ki sa nyinn n manfoor maŋi, ŋaan n mɔŋ mɔŋe yaa n nyinnir, kimaan n mɔk yikoo ki sa nyinnir, ki bia mɔk yikoo ki tan sa lar. Nnee ki n Baa betin a n tun.”
19Wa yet nna yoonba, ki Juu teeb yudamm bia ŋamm bɔkit; 20ki bi siab bonchiann yaa a “Narinbiiuk be u ni, a ki waatuk bia mɔkɔ; ki bee teen ki i gbiintir u maami?” 21Ki leeb mun yaa a “Nirɔ nba ki narinbiiuk be u ni na kii piak nna. Nlee ki nirɔ nba ki narinbiiuk be u ni na sa fit nyɔɔnt jɔɔŋi?”
Juu teeb yudamm nba yêt Yisa biaŋinba
22Li poorpoewa ki bi tan mɔk bi jaamm nba ki bi teen Yennu niipoouk bi jiantu ŋasaakak po na. Jaamm maŋ din be Jerusaleme. Li yoo din tee fufuk yooe; 23ki Yisa din somm lin barintir nba ki bi yir Solomon barintir na ni, ki li din be Yennu jiantu ŋasaakak ni. 24Ki Juu teeb yudamm din baar ki tikir ki lintɔ, ŋaan boiɔ a “A yaa lin yukir nleewa, ki tin tan bann nan a tee Yennu Niganntɔɔ Masia? Li-i tee ki a tee ŋɔɔie, fan betit barmɔnii.” 25Ki Yisa jiimm, “N poŋ daan betiiwa, ŋaan ki i ki teenin yada. Toona nba ki n tuun nan n Baa Yennu yaak na ni, ŋannii want ma tee wunba. 26Ŋaan ya ki tee n pei na paak, ŋannii te ki i ki teenin yada. 27N pei saak n mɔb, ki n mib, ki bi waan, 28ki n teemm manfoa nba kaa gbennu, ki bi kan mi ki kpo, ki sɔɔ bia kaa ki sa fit fatib n nuu ni. 29N Baa nba jiib ki teemm n nuu ni na, ŋɔɔe chee gar sɔɔ kur. Li paak teen ki sɔɔ kan fit fatib n Baa maŋ nuu ni. 30Min nan n Baa maŋ tee yomme.”
31Li yoo na ki Juu teeb yudamm na tɔkii tana a bin jaatɔ ki kpiu. 32Ki Yisa yetib a “I poŋ la ki n tun toonŋana bonchiann, linba ki n Baa Yennu yaa a n tun, ki toonŋana maŋ ni, lann paake te ki i ji yaa i jaatimi?” 33Ki bi jiin ki yetɔ a “Ti ki loon ki tin jaata tana toonŋansiar paak kaa, ŋaan fa jikit a mɔŋ ki yek nan Yennu na paak. A kpan tee nirɔe, ŋaan yi a mɔŋ Yennu, ki li tee bonbilankante.” 34Ki Yisa jiin yetib a “Li sɔb i mɔŋ mɔŋ sennu nba be Yennu gbouŋ ni na a ŋɔɔ Yennu yet a niib tee u waase, 35ki ti mun mi nan Yennu gbouŋ kan faar faak fabaa; ki ŋɔɔ Yennu yi niib u waas, kimaan ŋamme tee niib nba ki u din pak u maan ki turib na. 36Ŋaan min ŋarin, n Baa Yennue gannin ki tumin tingbouŋ na ni; ki ma yet yaa a n tee Yennu Bija na, nlee ki i yaa a li tee bonbilankanti? 37Li-i tee ki n ki tuun n Baa Yennu na toonaie, ŋann i daa tee-n yada. 38Ŋaan li-i tee ki n tuun ŋɔɔ Yennu toona maŋie, li-i lekii tee ki i ki teenin yada, ŋaan yin teen n toona maŋ yada. Ŋannii ki i sa bann nan barmɔnii nan n Baa Yennu be n ni, ki n mun bia be u ni.” 39Ŋanne ki Juu teeb na tan yaa bin soorɔ; ki u buut nyii, 40ki ŋmat poot Jɔɔdann mɔk-pootir, ki saa be siaminba ki Jɔɔnn din tuu wuur niib Yennu nyunwuru na. 41Ki niib bonchiann din baar Yisa peŋ, ki din piak nan bi leeb a “Jɔɔnn ŋarin din ki tun toonjaansiari, ŋaan linba kur ki u din piak ki jikit saa Yisa po, li tee barmɔniie.” 42Ki niib bonchiann din teen Yisa yada leŋ.
Currently Selected:
Jɔɔnn 10: BIM
Highlight
Share
Copy
Want to have your highlights saved across all your devices? Sign up or sign in
