Jɔɔnn 9

Yisa nba din nyɔɔnt jajɔɔŋ biaŋinba

1Li poorpoe ki Yisa din gɔrin saa ki tan la jɔɔŋ nna, ki u tee jɔɔŋ u maaru niwa. 2Ki u poorpoweiteeb boiɔ a “Chanbaa, ŋmee toonbiite te ki bi mar jɔɔ na jɔɔŋi? Li daa tee u mɔŋ toonbiit amii u damme?” 3Ki u jiimm a “U toonbiit paak kaa te ki u jɔɔni. Li mun bia ki tee u damm toonbiit paak kaa, ŋaan u jɔɔn a Yennu-n te ki wun nyɔɔnte, ki niib-n la Yennu toonjaann. 4Yoo nba ki yentu daa be na, li kpaa talase ki tii tuun wunba tumin na toona na, kimaan nyiɔk baat, yoo nba ki sɔɔ kan fit tun toonni. 5Ma daa be tingbouŋ nna, n tee tingbouŋ na niib yentue.”

6Wa yet nna maŋ poorpoe ki u siir mɔsant tiŋ ni, ŋaan buun tant, ki pɔr jɔɔŋ na ninbina paak, 7ŋaan betɔ a “I saa Siloam biɔuŋ ni ki saa yibir.” (Siloam paak tee “ti tun sɔɔ.”) Ki u saan ki saa yibir, ki nyɔɔnt ki kun.

8Ŋanne ki u leeb nan niib nba tuu laatɔ ki u mei likirii na boi bi leeb a “Jajɔɔŋ nba tuu mei na kaa na-aa?” 9Ki siab yaa a “Ŋɔɔe,” ki leeb yaa a “Aaii, li ki tee ŋɔɔ kaa. U naanɔe.” Ŋanne ki jɔɔ maŋ tiauŋ yet a “Mine na.” 10Ki bi boiɔ a “A nunii na teen nlee ki tan nyɔɔnti?” 11Ki u jiimm a “Jɔɔ nba ki bi yiu Yisa na, ŋɔɔe buun tant ki jii ki pɔr n ninbina paak, ŋaan betin a mii saa Siloam biɔuŋ ni ki saa yibir; ki n saan ki saa yibir ki nyɔɔnt.”

12Ki bi boiɔ a “U be lee?”

Ki u jiin yetib a u ki mi.

Farisiinba nba boi jajɔɔŋ na nyɔɔntu maŋ po biaŋinba

13Ŋanne ki bi jii jɔɔ maŋ ki saan nanɔ Farisiinba boor. 14Daar nba ki Yisa din buun tant ki nyɔɔnt jɔɔŋ na, li daar din tee foon daare. 15Ki Farisiinba na bia ŋamm boi jɔɔ na, a u teen nlee ki nyɔɔnti. Ki u betib a “Yisae buun tant, ki jii ki pɔr n ninbina paak, ki n yibir ki nyɔɔnt.”

16Ki Farisiinba siab yet a “Yisa ki nyii Yennu boor ni kaa, kimaan u tuun toonn foon daar. Ŋannii want nan u ki dia foon daar sennu.”

Ki bi siab mun boi a “Nlee ki biitdaanɔ sii fit tuun toonjaana na booru?” Ki bɔkitu baar Farisiinba na sinsuuk ni.

17Li paak ki bi bia boi jɔɔ na a “Jɔɔ na nba nyɔɔnta na, a dukii nlee u po?”

Ki u bia pak jiimm a “U tee Yennu sɔkiniie.”

18Juu teeb yudamm na, ki li lek paar nan bin teen yada nan bi marɔ jɔɔŋe ki u tan nyɔɔnt. Ŋanne ki bi yiin u damm, 19ki tan boib a “U tee i bijae-ee? I set yaa a i marɔ jɔɔŋee? Ki li teen nlee ki u ji laat mɔtana na?” 20Ki bi jiin yetib a “Ti mi nan u tee ti bija ŋarime, ki ti bia mi nan ti marɔ jɔɔŋe. 21Ŋaan ti ki mi la teen biaŋinba ki u tan nyɔɔnti, ki ti bia ki mi wunba nyɔɔntɔ. U mɔŋ ji ki tee bik kaa. Boimɔ man. U sa fit pak u mɔŋ paaka.” 22U damm din yet nna maŋ, kimaan bi tiin Juu teeb yudamm na jaŋmaanii, kimaan yudamm maŋ poŋ taan mɔb ki yet a wunba yaa a Yisae tee Yennu Niganntɔɔ Masia, see ki bi nyinnɔ bi Yenjiantu ni. 23Li paak te ki u damm din yaa a u ki tee bik kaa, a bi mɔŋ-n boiɔ.

24Ki li taar munnlee nie ki bi bia ŋamm yiin jɔɔ nba tuu tee jɔɔŋ ŋaan tan nyɔɔnt na, ki tan betɔ a “I teen Yennue nibaakir nan niipoouk; kimaan ti mi nan Yisae tee biitdaanɔ.” 25Ki jɔɔ na yetib a “Wa tee biitdaanɔ, amii wa ki tee, n ki mi. Ŋaan min ŋarin mi bonyenne: n tuu tee jɔɔŋe, ŋaan mɔtana n ji laat.”

26Ki bi ŋamm bia boiɔ a “U teen nlee ki nyɔɔntani?” 27Ki u jiimm a “N poŋ betiiwa, ŋaan ki i ki gbati. Bee ki i jin loon ki n betiini? I mun loon ki i teen u poorpoweiteebee?” 28Ŋanne ki bi wutoor ji doo, ki bi sukiiɔ, ŋaan betɔ a “Fine tee nirɔ maŋ poorpoweitɔɔ, ŋaan timm ŋarin tee Moses poorpoweiteebe. 29Ti mi nan Yennu din piak nan Moses, ŋaan nirɔ na ŋarin, ti ki mi wa nyii siami.” 30Ki jɔɔ nba nyɔɔnt maŋ yetib a “Bee paruko mani, ki i tan yaa a i ki mi wa nyii siami, ŋaan ki u nyɔɔnt n nunii. 31Ti mi nan Yennu ki gbia biitdamm miaru, ŋaan u gbia damm nba jiantirɔ ki tuun wa loon biaŋinbae. 32La nyii dunia piinu niwa, ti daa ki mi gbat a sɔɔ nyɔɔnt wunba ki bi marɔ jɔɔŋi. 33Li-i bo-i tee ki jɔɔ maŋ ki nyii Yennu peŋi, u bo kan fit ki tun bakitnauŋ toonn na booru.”

34Ki bi jiin ki yetɔ a “Fin nba ki bi mara nan biit na po, a tee ŋmee ki want timmi?” Ki bi nyinnɔ bi Yenjiantu ni.

Ninyentir labaar

35Yisa nba gbat a bi nyinnɔ bi Yenjiantu ni na, ki u tan lomɔ ki lau, ki boiɔ a “A teen nisaarik Bik na yada-aa?” 36Ki u jiin boiɔ, “Chanbaa, ŋmee tee nisaarik Bik na? Betirin wa tee wunba, ki n teenɔ yada.” 37Ki Yisa betɔ, “A poŋ mi lauwa. Ŋɔɔe bia tee min nba piak nana na.” 38Ki jɔɔ na yetɔ a “N Yomdaanɔ, n teena yadawa,” ŋaan gbaan u tɔɔnn po ki pukiiɔ.

39Ŋanne ki Yisa yet a “N baar tingbouŋ na ni a n bu niib buut, ki bia yent binba ki mɔk ninyentir numm po, ŋaan dɔkin binba mɔk ninyentir numm po.” 40Ki Farisiinba siab nba be leŋ na gbat ki u yet nna, ki bi boiɔ “A yaa a ti mun ki mɔk ninyentiree?” 41Ki u jiimm a “Li-i bo-i tee ki i ki mɔk ninyentiri, i bo kii mɔk biiti, ŋaan ya sat yaa a i mɔk ninyentir na, i mɔk biit.”

Currently Selected:

Jɔɔnn 9: BIM

Highlight

Copy