Jɔɔnn 15

Tiik barjouk

1Li poorpoe ki Yisa yet a “Mine tee barmɔnii tiik na, ki n Baa Yennu tee li ŋammtɔɔ; 2ki u tuu chɔɔ yiinu kur nba gaa n paak ŋaan ki lôon lɔɔna na. Ŋaan yiinii kur nba ŋarin lôon lɔɔna na, u tuu gbat gbat ŋanne, ki lin ŋamm ki lôn lɔɔna bonchiann. 3Mɔtana, yimme tee nifoyeemm, maan nba ki n pak ki turi na paak. 4Yii gaa n paak man, ki n sii be i ni. Tiyiinu kan fit lon lɔɔna, see ki u gaa tiik paak. Li mun bia tee nnee, i kan fit lon lɔɔna, see ki i gaa n paak.

5“Mine tee tiik maŋ, ki yimme tee li yiinii. Wunba gaa n paak, ki n mun be u ni, ŋɔɔe sii lôon lɔɔna bonchiann, kimaan mi-i kaa i ni, i kan fit tun siari. 6Ki jenna, wunba ki yɔɔ gaa n paaki, Yennu sa chɔɔe ki lu kaman nan ba tuu chɔɔ tiyiinu nba ki lu ki wun koor na. Li tiyiinboorue ki bi tuu tikir ki joo muu. 7Ki bia jenna, li-i tee ki i yɔɔ gaa n paak, ki n maan na be i ni, miat Yennu linba kur ki i loon, ki i sa lawa. 8Li-i tee ki i lôon lɔɔna bonchiann, ŋanne sa wann nan i set tee n poorpoweiteeb nan barmɔnii, ki n Baa Yennu sa la dontir.

9“N Baa Yennu nba loonin biaŋinba na, n mun looni li biaŋe. Yii gaa n paak, ki n loomm sii be i ni. 10Li-i tee ki i saak n mɔb, n loomm sii be i ni. Li mun bia tee nnee ki n saak n Baa Yennu mɔb, ki u loomm mun be n ni.

Leeb loommu labaar

11“N pak na ki turi a n parpeenn na boorue mantik-ii be i ni, ki saa yakir. 12Nee tee n sennu ki n senn ki turi, ma yii loon i leeb kaman nan ma loon yimm biaŋinba na. 13Loonjaansiar kaa ki gar nirɔ-n sak ki gaar u yɔɔsinba paak ki kpo.

14“Li-i tee ki i tuun ma beti biaŋinba na, i tee n yɔɔsinbae. 15N ji kan yiini daaba, kimaan daabir ki mi u yomdaanɔ dudukiti. Ma yi-i n yɔɔsinba na, kimaan labaar kur nba ki n gbat n Baa Yennu peŋ na, ŋanne ki n wanni. 16Yimm kaa gann mine, ŋaan mine gann yimm, ki turi toona ma yii saa kii lôon lɔɔna bonchiann, lɔɔna nba sii be mɔkmɔk nan mɔkmɔk, a n Baa Yennu-n turi linba ki i miarɔ n sann ni. 17Linba nee ki n pak senn ki turi, ma yii loon i leeb man.

Tingbouŋ na ŋaateeb naŋ labaar

18“Tɔn, li-i taŋŋi tee ki tingbouŋ na ŋaateeb nami, yin bann nan bi poŋ nan minewa. 19Li-i bo-i tee ki i tee tingbouŋ na ŋaaniibie, tingbouŋ na ŋaateeb bo sii looni kaman nan ba loon bi mɔŋ niib biaŋinba nee. Ŋaan n ganni ki nyinni tingbouŋ na niib niwa, ki i ji ki tee tingbouŋ na ŋaateeb yabi; li paake teen ki bi nami. 20Yii tian maan nba ki n paki na man, a ‘Daabir kaa ki chee u yomdaanɔ.’ Tɔn, bi-i mukisin, bi mun sa mukisiiwa; ki bi-i sak n maan, bi mun bia sa sak i maama. 21Bi set sa mukisiiwa, kimaan ya tee n yab na, ki jenna, ba ki mi Yennu wunba tumin na paak.

22“Mi-i diŋŋi kii sik ki tan pak ki turibi, bi bo kii mɔk biiti. Ŋaan ma sat ki sik pak turib na, sɔnsau ji kaa ki bi sa fit bɔr bi biiti. 23Ŋaan wunba namin, u nan n Baa Yennue mun. 24Mi-i bo-i kii tuun toonjaana nba ki sɔɔ daa ki mi tun na bi boor ni, bi bia bo kii mɔk biiti. Bi lek la toonjaana nba ki n tuu tuun nawa, ŋaan nan min nan n Baa Yennu. 25Linba na teen nnee, a ba din sɔb linba n po bi sennu ni na sa fit lian teen mɔnii, ki li sɔb a ‘Bi namin, ki li ki mɔk paaki.’

26“Tɔn, n sa tun Sommtɔɔ i peŋ, wunba tee Yennu Seyeeŋ ki want barmɔnii wannu na. U sa nyi n Baa Yennu boore ki baar i peŋ; ki u baaru maŋ ni, u sii piaki n po. 27Ki i mɔŋ mɔŋ sii piak n po ki teen niib, kimaan i poŋ yɔɔ be nanin, la din nyii yoo nba ki n din piin ki tuun n toonn na.

Currently Selected:

Jɔɔnn 15: BIM

Highlight

Copy