Jɔɔnn 7

Yisa waarii nba ki teenɔ yada biaŋinba

1Li poorpoe ki Yisa ji din be Galilee tiŋ ni, ŋaan lin leŋ digbana ni. U din ki loon wuu be Judea tiŋ ni, kimaan Juu teeb yudamm din loon bin kpiu. 2Ki Juu teeb jaamm nba ki bi yir lanbont jaamm na tan per. 3Ŋanne ki Yisa waarii yetɔ a “Nyikin nna, ŋaan saan Judea tiŋ ni, ki a poorpoweiteeb nba be leŋ na-n la toona nba ki a tuun na. 4Li-i tee ki nirɔ loon wun wann u mɔŋ nan u tee sɔɔ, li ki ŋan ki wun bɔr toona nba ki u tuumi. Li-i tee ki a tuun toonjaana, fan wann niib paanu ni nan a set tee li daanɔe.” 5U waarii na lek din ki teenɔ yada; li paak ki bi din pakɔ nna maŋ. 6Ki Yisa jiimm a “Li daa ki baar nan yoo nba ki n sa saani. Yimm ŋarin, li ki bi nan ki i saani, 7kimaan tingbouŋ na ŋaateeb ki namiini, ŋaan min ŋarin bi namin, kimaan ma beerib a bi sɔnii ki ŋan na paak. 8Tɔn, yimm-ii saa jaamm maŋ, ŋaan min ŋarin daa ki saa, kimaan n sinsaan yoo daa ki baari.” 9U din betib nnee, ŋaan biar be Galilee.

Yisa nba din saan jaamm maŋ biaŋinba

10Yisa waarii na nba din saan jaamm na, ki li poorpo ki Yisa tan wei ki saan. U din ki saan peee peee kaa, ŋaan u din bɔre ki saan.

11Ki Juu teeb yudamm din lin ki loonɔ jaamm maŋ ni, ki boi niib a “U be lee?” 12Ki niib bonchiann nba be leŋ na burin ki piak bonchiann ki jikit saa u po; ki siab yaa a “U tee niŋanɔe,” ki leeb yaa a “Aaii, a u kpann niib nae;” 13ŋaan sɔɔ din ki pak u po peee peee ni, kimaan bi tiin Juu teeb yudamm jaŋmaaniie.

14Ki jaamm na yoo sinsuuk ni, ki Yisa saan kɔɔ Yennu jiantu ŋasaakak ni, ki piin ki want niib Yennu maan. 15Juu teeb nba gbiintirɔ yoonba, ki li teemm bakitnauŋ; ki bi boi a “Nlee ki nirɔ na mantik jia mi gbouŋ nna, ŋaan ki kɔɔ ti sakursaakari?” 16Ki Yisa yetib a “Ma want wannu nba na, li ki tee n mɔŋ mɔŋ wannu kaa, ŋaan li nyii Yennu nba tumin na boore. 17Wunba loon wun tun Yennu yanbɔɔtoona, ŋɔɔe sa bann linba ki n piak ki want na nan li nyii Yennu boor amii n boor. 18Daanɔ nba piak u mɔŋ mɔŋ wannu, ŋɔɔ loon nibaakir ki teen u mɔŋe. Ŋaan wunba loon a niib-ii baakit wunba tumɔ na, ŋɔɔe tee popeendaanɔ, ki ki mɔk biiti.

19“Li ki tee Moses kaa din turi ti sennu-uu? Ŋaan i sɔɔ ki dia li sennu maŋi. Ki bee ki i loon ki i kpimi?” 20Ki niib nba na yetɔ a “Narinbiiuk be a ni! Ŋmee yaa wun kpiani?” 21Ki Yisa jiin betib a “N tun toonjaann foon daar ki te ki nirɔ paak, ki li toonn maŋ teen i kura bakitnauŋ. 22Ŋaan li-i tee ki i pot bonjabik foon daar, i mun tuu tuun toonn foon daarii na. Li din tee Mosese din senn yaa a yii porii bonjabis, ŋaan i yejamme din piin punpotu sinsinn. 23Tɔn, li-i tee ki i pot bonjabis foon daar, a i daa bot Moses sennue, nlee ki i donn wutoor n paak a ma te ki baatɔɔ paak foon daar na? 24Daa gorii nirɔ nanyer po ki bu u buuti, ŋaan i tuu dukin bonŋann ki la nan li mɔnii.”

Niib nba boi bi leeb Yisa po biaŋinba

25Ŋanne ki Jerusalem nisiab boi bi leeb a “Nirɔ nba nee ki bi yabii a bin kpiu na-aa? 26Gotir, u ki yeen ki bɔrii niib ni, ki sɔɔ mun bia ki pak siar a wun tiau. Li pasiar ti yudamm dukii a u tee Yennu Niganntɔɔ Masia na. 27Ti mi jɔɔ na nba nyii siaminba, ŋaan Yennu Niganntɔɔ Masia na-i taŋŋi baar, sɔɔ kan fit bann wa nyii siami.”

28Yisa nba want niib wannu na Yennu jiantu ŋasaakak ni na, ki u tan pak sanpaapo ki yetib a “I dukii nan i min bonŋann, ki bia dukii a i mi ma nyii sian. N ki baar n mɔŋ baaru kaa. Daanɔ nba tumin na, ŋɔɔe mɔk barmɔnii kur; ki i ki miu. 29Ŋaan min miu, kimaan n tuu be u boor nie, ki u tan tumin nna.”

30Ŋanne ki bi din yabii a bin soorɔ, ŋaan ki sɔɔ ki soorɔ, kimaan u sooru yoo daa din ki baari. 31Ki nibur na ni niib bonchiann din teenɔ yada, ki boi bi leeb a “Yennu Niganntɔɔ Masia na-i taŋŋi baar, u sii tuun toonjaana bonchiann ki gar jɔɔ na yaraa?”

Yisa nba yaa a u sa yaata

32Ki Farisiinba din gbat niib nba burin burin piak nna maŋ Yisa po na, ki ŋamm nan Yennu jiantu yudamm din tun Yennu jiantu ŋasaakak lanjimanba a bin saan ki saa soor Yisa. 33Ŋaan ki Yisa din bet nibur na a “N sii be nani yoo waaminne, ki li poorpo ki n ŋmat ki saan wunba tumin na peŋ. 34I tan sa lon n boor, ŋaan i kan lami, kimaan siaminba ki n tan sii be na, i kan fit baar leŋi.” 35Ki Juu teeb na boi bi leeb a “U yaa wun tan saan lee, ki ti kan lau? U yaa wun tan saan Griik doi ni siaminba ki Juu teeb be na, kii sii want Griik teeb na amii? 36Wa yet nna, li paak tee bee? a ti tan sa lon u boor ŋaan kan lau, a ki bia tan kan fit saan siaminba ki u sii be na.”

Manfoor nyun labaar

37Tɔn, ki jaamm maŋ gbennu daar din tee dajaanne. Li daar maŋe ki Yisa fiir set ki pak sanpaapowa a “Wunba ki nyunyukiru gbatɔ, wun baar n boor ni ki tan nyu, 38kimaan Yennu gbouŋ yet a ‘Wunba teenin yada, a manfoor nyun sii tɔ nyunkpanae ki nyi u par ni.’ ” 39Yisa nba din piak na, li din want Yennu Seyeeŋ poe; ki binba din tee Yisa yada na din yaa bin tan la Seyeeŋ maŋ. Li yoo na dinn, Yennu daa din ki tur niib Seyeeŋ maŋi, kimaan u daa din ki donn Yisa sanpaapo.

40Niib bonchiann nba din be nigbouŋ na ni ki gbat ki u yet nna maŋ, ki bi yet a “Jɔɔ na set tee Yennu sɔkiniisɔɔ nan barmɔniie,” 41ki siab yaa a “U tee Yennu Niganntɔɔ Masiae,” ki leeb mun yaa a “Yennu Niganntɔɔ Masia na kan nyi Galilee. 42Yennu gbouŋ wann a Masia na tan sii tee David yaaboonne, a ki bi bia tan sa marɔ Betlehem doo nba din tee ŋɔɔ David doo na nie.” 43Ki niib na ji soor bɔkit kimaan Yisa paak. 44Ki siab bia loon bin soorɔ, ŋaan bi ni sɔɔ ki soorɔ.

Juu teeb yudamm nba yêt yada teenu biaŋinba

45Li poorpoe ki lanjimanba na ji ŋmat Yennu jiantu yudamm nan Farisiinba na boor ni; ki bi boib a “Bee teen ki i ki jen nanɔ?” 46Ki lanjimanba na jiin betib a “Sɔɔ daa ki mi ki pak maan kaman nan jɔɔ na mabooru nba ki u piak na.” 47Ki Farisiinba na boib a “Ki u mun kpanniinii? 48I tan mi ki la ki ti yudamm nan Farisiinba sɔɔ teenɔ yada-aa? 49Ŋaan nigbouŋ na nba ki mi Yennu sennu na, mɔbiir be bi paak.”

50Ki yudamm maŋ ni yenɔe din tee Nikodemus. Ŋɔɔe tee daanɔ nba din saan a wun saa la Yisa na; ki u betib a 51“Ti sennu ni ki wann nan ti bu nirɔ ki biirɔ, ŋaan daa ki gbat u mɔb ni ki bann u biiti.” 52Ki bi boiɔ, “A mun tee Galilee nirɔee? Gotir Yennu gbouŋ ni. A sa la nan Yennu sɔkinii ki mi nyii Galilee tiŋ ni.”

Currently Selected:

Jɔɔnn 7: BIM

Highlight

Copy