Luka 18

Nawngmädi lömai hai tärae cei saite kung

1Tupyng-a Isu lä äkähui na tea aethawsi y käla aetang jawjaw he kae näkha mätae te lo haetä hai mätu pa dy. 2Isu ma “Märü haetä-a tärae cei saite kung lawngtä awng. Äni lä Säthaw tea la ri te y. Khimi ce tähang la dawngpa te y vi. 3Honi märü-a la nawngmädi lömai lawngtä lä awng vi. Äni lä tärae cei saite kung tea ‘Kai üng bälungkae-i na ma kanglai ca y hethang kai tea säbawng kü jo’ näkha ly ea aebai pa vi. 4Kätü käno kha tärae cei saite kung lä äni üng aebai saite lo tea tängai pa te y vi. Tungaila kangkhüng-a äni lä äma üng bälung thung-a ‘Kai lä Säthaw tea ri te y khimi ce tähang la dawng hai te y. 5Tukä ea la hini nawngmädi lömai lä kai tea xhu hai ai te phüng-a äni lä kätüng saite dang hethang kai ma säbawng pa si ä. Tukä ea ni kangkhüng-a lä äni ma kai tea ly kha bäsae te py y ai dy’ näkha nä dy.”

6Tukha Isu ma “Kätüng y-a tärae cei saite kung ma thui te lo kähawi-a aedawng ö. 7Säthaw re saite khimi na ma mäkai jawjaw dylä Säthaw lä äni ce kätüng saite dang hethang säbawng pa te vi. Äni ce tea säbawng hethang Säthaw lä mänung te y. 8Tängai ö. Säthaw lä äni ce tähang kätüng-a tätang sa dawde pa vi ai. Tungaila Kai, Khimi üng Cäpaw, ly haile te kätü-a lä älawngpre-a awng saite khimi na lä kai tea yng ai mang mei” näpa.

Pharisai hai angko cawng saite khimi

9Äma ce tea lä khimi cüng saite näkha aedawng ea khimi qütä tea tämö khai y saite khimi phütä na tea, Isu ma hini mätae te lo hai thui pa. 10Äni ma “Khimi lawng netä lä Säthaw üng Ingkäcai thung-a aetang hethang ly hawi dy. Honi thung üng lawngtä lä Pharisai kha kälang lawngtä lä angko cawng saite khimi vi.

11“Pharisai lä aedaw ea äma phüng hai aetang pa te lä ‘Säthaw ä, kai lä khimi kälang na, kangru na, käsi sa saite na, täkübäjang sa saite na hai honi angko cawng saite khimi kätyng y te phüng-a nang tea kawng bärai ba. 12Kai lä käni säritä-a bö qengnetä jae kha kai üng dang saite angxynlyng na thung üng hawtä-a haetä la nang tea py te vi’ näpa.

13“Tungaila angko cawng saite khimi lä kähanglaw mang aedaw ea khösang mang-a mäteng thyngdyng vawng y te hai ma ‘Säthaw ä, Kai khimi hunghö tea bäheng kü jo ba’ näkha äma üng tatärang-a aekätung kha aetang pa dy. 14Tängai ö. Hini khimi vawi haile te kätü-a Säthaw lä äni tea khimi käcüng-a nung pa vi dy. Pharisai tea lä hokä nung pa y. Mä-ai ma tea aemäsang saite khimi tea lä Säthaw ma mäneng pa vi ai. Tukha mä-ai ma tea aemäneng saite khimi tea Säthaw lä mäsang pa vi ai” näpa.

Isu ma nade na tea tähang kähawi py pa

Mat 19:13-15; Mar 10:13-16

15Khimi ce lä äma ce üng äby na bung tähang kähawi py hai hethang Isu tea nähai ö pa by vi dy. Äkähui na ma äni ce bung nung te kätü-a lä äni ce tea mäkhang pa ö vi. 16Tungaila Isu ma nade na bung ka ea “Nade na bung kai tea ly hai ö mai sy. Mäkhang pa ö hang. Säthaw üng pre lä honi nade kätyng awng saite khimi na tähang vi. 17Tängai ö. Hini nade na la Säthaw tea sanphrang kätyng lady ö te vi. Hini nade na kätyng sa y saite khimi lawngtä lä Säthaw üng pre thung-a kung haw y lyng” näpa.

Mätawngky khimi känang

Mat 19:16-30; Mar 10:17-31

18Mätawngky lawngtä ma Isu tea “Särae kähawi ä, dungtäsa hing te dang hethang kai lä makä sa he kae mei” näkha düng pa.

19Isu ma äni tea “Nang lä ätephüng-a särae kähawi näkha kai tea thui te vi mei. Ämi lawngtä la hawi te y. Säthaw lawngtä xyng ni hawi te kae be. 20Säthaw üng särilo na nang mäny be. ‘Täkübäjang sa hang, khimi bung bädü hang, bäru hang, khimi ce phüng tüng y saite na jung kai-a tho hang, nang nä-awi ni nang pä-ai tea tämö khai’ näkha tärü te vi” näpa.

21Honi mätawngky ma lä “Hini Ubädi na kai lä nade üng hai ma tängai pyng te vi dy” näpa.

22Hikä Isu ma thai te kätü-a lä, äni tea “Nang lä haetä sa hethang awng te vi rawng. Nang üng awng saite angxynlyng na jaw king kha honi tangkae lä khimi kangtang na tea py pa. Tudylä Känipre ingthawng lä nang dang ai mang. Tupyng dylä ly kha kai leithung hui” näpa. 23Hini lo mätawngky ma thai te kätü-a lä, äni lä bälung hawi y phi pa vi dy. Ätephüng-a mei nädylä äni lä tawngnang phi pa te phüng-a vi.

24Isu ma äni tea kheng kha “Khimi känang na Säthaw üng pre thung-a kung hethang lä rae bärai vi. 25Tätang, khimi känang lawngtä Säthaw üng pre thung-a kung hethang qawng-a lä cäphrüng khaw-a säphö känawngjang käsa metä kung te lä jaky vi ai rawng” näpa.

26Hini lo thai saite khimi na ma lä Isu tea “Tudylä Säthaw lä ämi bung aeqang ai mei” näpa.

27Isu ma “Khimi ce sa haw y saite tea Säthaw lä sa haw te vi” näkha mäthang pa dy.

28Peterae ma Isu tea “Kai ce lä kai ma ce pyng saite angxynlyng na khaisö ea, nang leithung hui ö te vi dy” näpa.

29-30Isu ma äni ce tea “Tängai ö, khimi lawngtä lä Säthaw üng pre tähang-a äma üng ing, nawngpui, kangby jä-ai, änä-awi äpä-ai hai caw nade na bung kädesö dylä, äni lä vaihi hing te thüng-a khaisö saite na qawng-a cang y tähang kähawi na awng mang-a dang rae vi ai. Tukä cang y vaimaw mang-a la dungtäsa hing saite la dang be vi ai” näpa.

Isu lä äma dü ai näte phüng thui rüng pa

Mat 20:17-19; Mar 10:32-34

31Isu lä äkähui hawlai netä xyng na bung ka kha “Tängai ö. Mä-ai lä Jerusalem märü mang-a khölawng tho ö te vi. Kai, Khimi üng Cäpaw, phüng buisaw na ma tärü te lo angxynlyng na lä cungrü vi ai dy. 32Khimi ce ma kai bung lä ceng kälang na üng kö thung-a a ö vi ai. Äni ce ma kai bung mänui hai, kaejae py te hai, mäce mäthawi kha bo ea bädü ö vi ai. 33Tukha käni thungtä kätü-a lä kai lä kädü thung üng aetha haile tyng vi ai” näpa.

34Tungaila äkähui na lä hikä thui saite lo tea bälungva ö y vi. Säthaw lä honi älo älawngsai tea äni ce tähang ho pa te phüng-a vi. Tukha Isu thui saite phüng äni ce lä mäny ö pa y vi.

Isu ma ämi kangjö lawngtä bung hawi sa pa

Mat 20:29-34; Mar 10:46-52

35Isu lä Jerikhaw märü teng-a tyng ea, ämi kangjö lawngtä lä lolang teng mang-a aety kha tangkae mäkai pa dy. 36Khimipui na ly te tüng ämi kangjö khimi ma thai te kätü-a äni lä “Äte makäte vi nang mei” näkha düng pa dy.

37Khimi ce ma lä äni tea “Nazare märü üng Isu ly te ti ä” näkha thui pa.

38Tukätephüng-a äni lä “Isu ä, Sanphrang Davidae üng Cäpaw ä, kai tea bäheng kü jo” näkha aethaw hai hang pa dy.

39Ämaw-a ly mang saite na ma lä äni tea sitäri-a awng hethang mäkhang pa. Tungaila äni lä “Sanphrang Davidae üng Cäpaw ä, kai tea bäheng kü jo” näkha ätüng kälengky hai-a a rae pa vi dy.

40Tukha Isu lä aedaw ea “Honi khimi bung kai tea vähai” näpa. Isu teng-a äni tyng ea lä, 41“Nang tähang kai lä äte sa pa ai mei” näkha düng pa dy.

Tukha äni ma Isu tea “Areng ä, kai lä ämi aevang haile hethang ngai vi” näpa.

42Isu ma äni tea “Nang üng ämi aevang lawi sy. Nang yng te phüng-a Säthaw ma nang tea hawi sa te dy mang” näpa.

43Tukha ämi kangjö lä ämi aevang haw praw pa vi dy. Tudylä äni lä Säthaw tea bälaw kha Isu leithung hui pa vi dy. Khimi angxynlyng na ma hokä nung te kätü-a lä äni ce la Säthaw tea bälaw ö by vi dy.

Currently Selected:

Luka 18: cekNT

Highlight

Copy