Lk 1

Lukas atil mbëmbë foe asu Teofil

1Mbol abui bod bëdzo #1,1A mëtari më Mbëmbë Foe atili Lukas, bialaṅ na Lukas ayi na atoan mana til e mam mësë ya mënë ai mfi a enyiṅ Yesus, e kan ya bod bëfë bëbò ya adzo te. ya na batòṅ ndòṅ e mam mëngayënan a zaṅ dzan, 2e kan e bod bëngayen ai mis ai e ba bëngavëṅan bësye bë Ebugu bëngalig ai bia dò, 3ndò hm ma mëyen na anë mbëṅ na mëbie mam mëte mësë a zut atarigi a mëkèè mbëṅ mbëṅ ai evag esë, mëtil wa, a ndindiṅ Teofil#1,3 Teofil anë mvoe Lukas. Bialaṅ fë dzoe die a mëtari më kalara Bisye bi Apostel., 4asu yë na oyëm na e mam ongayègè mënë etere.

E MAM MËNGALOD OSUSUA

Babende abyali Yohannes Ndu-Bodo

5Angabò na#1,5—2,52 «Mbëmbë Foe Yesus mòngò». Lukas angatil Nlaṅ hi kan etam, hë anë Maria emen ṅnyè angalèè nyè mam mëte. Biayen fë ete na enyiṅ Yohannes Ndu-bodo ai e dzi Yesus biafulan a mëtari. Dzam da Yesus alod Yohannes. E bia ya ete (dzia Zakarias, dzia Maria, dzia Simeon), binë ngogëlan ya bëkarëga kogëlan a mënda-bikoan., e mëlu Herodes angabë nkukuma#1,5 Herodes angabë nkukuma ya edzoe Roma engatele. Angadzoe Palestina a mbu 40, akui a mbu 4 osusua abyali Yesus. Nkukuma David angakab bëfada mënda mëwom mëbè ai mënyii. E ngab Abia engabë e nyi mwomo. Nda bëfada esë engabë na yasye biyòṅ bibè a mbu. Dzam da, lëngabë fë dzam bò na fada ziṅ akë wu nnom, tègè ai na asye a tempel, amu bëkarëga boe ngam asu yë na bëyen e mod akë sye. ya Yudea, fada ziṅan yiṅi we, dzoe na Zakarias, fada ya nsamba Obia, ngal atoa a ngab bëngòn bë Aaron, dzoe na Elisabet. 6Bò bësë bëbè bëngabë sosoo a mis më Zamba, bëbaala mëmvende mësë, tègè ai atòn a mam më mvende. 7Bëngabë tègè ai mòn, mbol Elisabet angabë nkokom, bò bësë bëbè bëntoa ya fë ban mimbu. 8Ndò fò labò na, eyòṅ angabë na abò esye fada dzie a mis më Zamba eyòṅ angakui na nsamba woe wasye, 9e kan tum bëfada yayi, ndò batòb nyè na atum otu a nda Zamba#1,9 E fada ya ngam ebi angabë yean tuni otu a mëtari më ngogëlan, abog te atuni mbuman eyëm a mëmana (dzam bò a mëwola mëlè)., 10nkunda bod osë okogëlan a nsëṅ a awola mëtunëṅa. 11Ndò englès Nti ayene nyè, englès atëlë a wò mbo-nnomo alatar mëtunëṅa, 12Zakarias asigan ai ṅyënan angayen nyè, wòṅ oku nyè a nyòl. 13Englès nyè ai nyè na: Të wambara, a Zakarias, amu ngogëlan dzoe ewogëban, ndò nyò ngal Elisabet ayi wa bye mòn, wayi nyè yole na Yohannes. 14Ayi bò mintag mie ai mëfon moe, ndò fë abui dzam layi tag ai abyali die. 15Ayi bò mfaṅ a mis më Nti, ndò fë ayi ki nyu mëyòg tò bilam, ndò fë ayi dzie ai Mfufub Nsisim atarigi a abum nyia, 16ayi vëṅan abui bòn bë Israel abë Nti Zamba waban. 17Nti Zamba ayi nyè wulu osu ai nsisim ai ngul Elias, ayi vëṅan minnëm besya abë bòn, e ba bënë mëlò a mbindan sosoo, akomëzan Nti ayòṅ lënë a ngomëzan. 18Zakarias nyè ai englès na: Mayi yëm e mam ma ai dze? Amu ma ha, mënë nnom, ndò fë ngal wama antoa ya mimbu#1,18 Zakarias ayëbë ki etye etye, asu te englès avë nyè ndëm ya enë endëgëlë.! 19Englès nyè ai nyè na: Mënë Gabriel; ma makad tëbë Zamba osu, ndò mënë nloman na mëzu wa kad, mëbende fë wa e mam ma. 20Ndò hm wayi ku mvug, tègè dzam kòbò akui amos mam mëte mayi yenan, etòm ya na waandzëki ṅyëbë bibug biama ya biayi toban a abog daban. 21Bod bëngayanga Zakarias ha, bëngakam na alaṅan abim kòm te a nda Zamba. 22Akui angakui, tègè dzam kòbò ai bò#1,22 Fada akarëga kub bod nsalan a mëmana më ngogëlan., ndò bazu yëm na angayen dzam a nda Zamba ete. Nyè ha hë abò ndëm ai mò, alaṅan mvug. 23Eyòṅ mëlu më esye moe mëngatoban, ndò angadugan a nda dzie. 24A mvus mëlu mëte, ndò ngal woe Elisabet anòṅ abum, asòbò a nda ete ngòn etan nyè na: 25Nti abò e kan nyi e mëlu abëbë ma ndò avaè ma osòn a bod#1,25 Mbol Yuden bëdzoo na eyòṅ obëlë bòn, Zamba adiṅ wa, antoa hm na nkokom mininga osë ongabë anë e mod abëlë eyòg a nyòl..

Babende abyali Yesus

26A ngòn samëna, ndò Zamba angalom englès Gabriel a tisòn ya Galilea dzoe na Nazaret 27abë ntud ngòn otoa mëtiṅ më alug ai fam dzoe na Yosef, mod ya nda bod David; dzoe e ngòn mininga nyi angabë na Maria. 28Ndò azu abë nyè, nyè na: Ovuma, wa ya ongadzie ya ai maa#1,28 Mësugan më englès malëdë na Zamba angatòb ya Maria okoba., Nti anë ai wa. 29Angakam e bibug bi, angasili na e kan mësugan nyi endzò yatyan ya! 30Englès nyè ai nyè na: Të wambara a Maria, amu oyen maa abë Nti. 31Ndò wayi nòṅ abum, obye mòn, oyole nyè dzoe na Yesus. 32Ayi bò mfaṅ, bayi nyè loe na mòn mëdaṅa-yobo, ndò Nti Zamba ayi nyè vë etoa nkukuma esya woe David, 33ayi dzoe a nda Yakob a kòm anë nkukuma, ndò fë edzoe dzie yayi bò tègè ai amana. 34Maria nyè ai englès na: Nala wayi bò ya, ṅnyie anë ma tègè yëm fam? 35Ndò englès adzo ai nyè na, Mfufub Nsisim ayi sus abë wa, ngul mëdaṅa-yobo ekubu wa a nyòl. Asu te, e dzi yayi byali mfufub yayi loeban na mòn Zamba. 36Ndò ki yënë, manyòṅ Elisabet nyè fë anë abum a ayom die, e ngòn samëna nyi asu die, ṅnyè hm baloe na nkokom. 37Amu dzom ziṅ yasë ki dzam bò të bòban abë Zamba. 38Maria nyè na: Yënë etuga Nti, abò ai ma anë wadzo#1,38 Maria avë englès eyalan edzòdi-nyòl. Ayëm na Zamba ayi nyè dzala akyaè ya emen ayi.. Ndò englès akaan ai nyè.

Maria akë yen Elisabet

39Mëlu mëte, ndò Maria angakodo a si, akëlë a minkol avol avol, a tisòn Yuda, 40ndò anyian a nda Zakarias, asugu Elisabet. 41Ndò hm, ṅnyie anë Elisabet angawog mësugan më Maria, mòn angafoṅan#1,40-41 Maria anyian ai maa abë manyaṅ Elisabet. nyè a abum, ndò Elisabet adzie ai Mfufub Nsisim, 42abede kiṅa yob nyè na: Olugu ai wa a zaṅ bininga, ndò fë olugu ai ebuma ya abum doe. 43Mambë ai dò he na nyia Nti wama azu abë ma? 44Yënë na, etye etye ya mësugan moe mëkui ma a mëlò, mòn angafoṅan ma ai mintag a abum. 45Ndò fë, mvòm ai e nyò ayëbë na e mam Nti akad nyè mayi toban. 46Maria nyè na#1,46-55 Dzia Maria yataman Zamba mbol avoan ki mimbubua ai e bod bënë edzòdi-nyòl. Akyaè dzia te ndò fë Anna, nyia profèt Samuel angayia Zamba (1Sam 2,1-10). Maria akaṅ Zamba asu e mam abò nyè, ai e mam abò si-ndon ai e mam abò Israel.:

47Nnëm wama walugu Nti,

ndò fë nsisim wama wafon abë Zamba nkode wama.

48Amu abëbë edzòdi-nyòl etuga dzie,

atarigi etoa dzi ngongo bod esë yayi ma taman na mënë mvòm.

49Amu Ngungul abò ma mam mënen,

dzoe die anë mfufub;

50ndò fë ngòl dzie enë a ngongo bod esë

asu e ba bakam nyè.

51Angabò ngul ai enam dzie,

amana tsam e ba bënë mëbun a minnëm miaban.

52Mingungul, avaè a bitoa mintomba;

abede e ba bënë edzòdi-nyòl;

53adzala e ba bënë zie ai e byem binë mbëṅ,

asoe minkukuma mò mò.

54Angavòli mbò-esye woe Israel,

adugan tsog ngòl dzie,

55akyaè angakòbò ai bëtara,

ai Abraham ai mvòṅ dzie a kòm ya kòm.

56Maria angatòbò ai nyè dzam bò ngòn elè, ndò angadugan a nda dzie.

Abyali Yohannes ndu-bodo

57Eyòṅ abog abye angakui asu Elisabet, ndò angabye mòn fam. 58Bod bë ngòdò ai bivuvuman bie bëwogo na Nti angabulu nyè wog ngòl, bëngatag ai nyè. 59Ndò a amos lala ha, bëngakë na bakele mòn ndò bayole nyè esya Zakarias. 60Nyia nyè na: Kokoa, anë dzoe na Yohannes#1,60Yohannes: Dzoe te anë a nkòbò ebrea na: Yohannan (Zamba ayen ngòl, anë afu-nnëm). Ngòl Zamba yasò bia bësë abë Yohannes, amu abò na bod bëyanga akode. . 61Bò ai nyè na: Mod ziṅ ya bivuvuman bie asëki dzoe nala. 62Ndò hm basili esya mbol ayi na bëloe nyè. 63Ndò adzaè akòg, atili na: Dzoe die anë na Yohannes. Bò bësë bëngakam. 64Ndò anyu angayaaban nyè etye etye ai oyëm woe, angakòbò, ataman Zamba. 65Wòṅ okuu e ba bësë bëngabë a ngòdò hala a nyòl, e mam ma mëngalèèban a minkol mi Yudea misë, 66e ba bësë bëwogo mò bëngabaala mò a minnëm miaban, bò na: Dze yayi yenan ai e mòn nyò? Amu wò Nti ongabë ai nyè.

Nkòbò profet ya Zakarias angakòbò

67Ndò esya woe Zakarias angadzie ai Mfufub

Nsisim, ndò akòbò anë profèt, nyè na#1,68-79 Zakarias akaṅ Zamba mbol alom bia Messias.:

68Olugu ai Nti, Zamba Israel,

mbol asò yen, akode fë ayòṅ die.

69Angatele tòṅ#1,69 Tòṅ a kode yatyan na e ngul yazu ai akode. akode asu dan,

a nda mbò-esye woe David,

70anë mbol angakad a anyu mimfufub bëprofèt boe atarigi kòm ana,

71na akode bia a minziziṅ mian ai a mò e ba basiṅ bia;

72na ayen bëtara ngòl, adugan tsog mfufub amvoe woe,

73e sòṅ an gakani Abraham esya waan, na ayi bia vë 74na tègè fë ai wòṅ, ṅnyie anë akode ya

bia a mò minziziṅ mian na bisye nyè,

75ai wòṅ a i sosoo, a mis moe, mëlu mësë ya enyiṅ dzan.

76Mfa woe, a mòngò, wayi loeban na profèt mëdaṅa-yobo,

amu wayi kë Nti osu na wakom nyè mëzen,

77na ovë ayòṅ die ṅyëman akode, a evaè minsëm miaban,

78asu ngòl Zamba waan, a Mëkui më kidi#1,78 Mëkui më kidi mënë Nlo dzobo, ṅnyè anë Messias. ayi bia sòṅ yen atyege a yob,

79afyè e ba bëtoa a evovoe ai a awu, na atele mëkol man a zen mvoè.

80Mòngò anganaṅ, angawon a nsisim, atoa a nkod-nnam#1,80 Yohannes angabë toa a nkod-nnam Yuda. Lukas akad ki bia abog angakë we. akui amos ayean kèè esye a Israel a ngëṅ.

Currently Selected:

Lk 1: NTE12

Highlight

Copy