Lk 2

Abyali Yesus

Mt 1,18-25

1Ndò fò angabò na, mëlu mëte, ndò abende Kaiser Augustus#2,1-3Kirinus angabò elaṅ bod biyòṅ bibè a Palestina. Kaiser Augustus angadzoe atarigi a mbu 31 osusua abyali Yesus, akui a mbu 14 a mvus abyali Yesus. angasò na si esë etilban a elaṅa. 2E dzili te engabë elaṅa osu ebòban hala Kirinus abëlë edzoe a Siria. 3Bod bësë bëngakë tilban, anë mod, a tisòn abyali dzie. 4Yosef nyè fë angatye a Galilea, a tisòn Nazaret, abëdë a Yudea, a tisòn David ya baloe na Betleem, (amu angabë mod ya nda-bod ai dzal David) 5na akë tilban ai Maria ya angabë ai nyè mëtiṅ më alug#2,5A mëtum më Yuden, e mininga anë mëtiṅ më alug ai fam antoa ya ngal woe.; Maria atoa hm abum ha. 6Bëtoa we, ndò mëlu yë na abye mëngatoban, 7ndò angabye ntol ndoman#2,7Ntol mòn onë ndindiṅ mòn, e nyò ya abëlë edzoe a nda esya ai nyia. woe, amana nyè woge a biyie, aboe nyè a ebëg, amu afola angabë ki asu daban a nda-bëyëṅ.

Bënòni biyëm ai benglès

8Bënòni biyëm bëngabë a nnam te, bëboo a nsëṅ, bënòniṅi mintomba miaban ai alu. 9Ndò englès Nti angasubu bò babi, duma Nti ayaman abë bò, bëngambara eyëgan. 10Englès nyè ai bò na: Të miambara, amu mayëdan mina sug ya abui mintag; mintag mite miayi bò asu nnam osë, 11na, ana hi, nkode ya anë Kristus Nti abyali mina a tisòn David. 12Ndëm nyi mavë mina: Miayi kòb ebòbòg mòn efaṅa a biyie, eboo a ebëg. 13Etye te, mod nkunda ya minkan ya yob antoa ai englès, bëngalugu Zamba, bò na: 14Duma ai Zamba a yob ete; mfa ya si, mvoè a zaṅ e bod adiṅ. 15Eyòṅ benglès bëngakèan ai bò ha, bëkëlë a yob, bënòni mintomba bëngadzo bò bò na: Ntaman kë a Betleem na bikë yen e dzam abòban di, a Nti akuli bia di. 16Mbò bakë ba avol avol, bëkòbò Maria ai Yosef, ai ebòbòg eboo a ebëg. 17Ayënë bëngayen, bëyëmë e dzam bëngakad bò atyan ai e mòn nyò. 18E bod bësë bëwogo bëngakam e mam bënòni biyëm bëkada bò. 19Maria abaala e mam ma, abindigi mò a nnëm woe. 20Bënòni biyëm bëdugan, bëtaman, bëluugu Zamba asu e mam mësë bëwogo, bëyënë fë anë bëngakad bò. 21Eyòṅ mëlu mwom mëngatoban na bakele nyè#2,21Bakele Yesus amu ayi na abò dzom esë anë e mod ya si mu, mod ya ayòṅ die., ndò bayole nyè na Yesus akyaè ya englès angayole nyè osusua yë na anòṅëban a abum.

Batuni Yesus a tempel

22Eyòṅ mëlu më efubu nyòl mëngatoban anë mvende Moses yabende, ndò bakë ai nyè a Yerusalem na batuni nyè Nti, 23akyaè ya lënë ntilan a mvende Nti na: E mòn fam osë ayaè esog nyia ayi bò ngab Nti#2,23Mb.13,2.12.15, 24ai na bëtuni akyaè ya anë mbendan a mvende Nti: Abëṅ abè, ngë ki na bitòṅ bi adu bibè#2,24Bl 12,8.. 25Ndò hm, mod ziṅan gabë a Yerusalem dzoe na Simeon, mod te atoa sosoo, atoa fë mod ngogëlan, ayanga evòli Israel, Mfufub Nsisim atoa abë nyè. 26Mfufub Nsisim angakuli nyè na angâyen ki awu osusua yë na ayen Kristus#2,26ebug Kristus enë a nkòbò ebrea na «Meshiah», Messias. Nala watyan na e mod anë ṅwòban mbòn. E bod bëkarëga fubu mbòn nala bëngabë na: fada, profèt, ai nkukuma. Nti. 27Ndò hm akë a tempel ai ngul Nsisim. A bëbonde bënyian ai Yesus na babò ai nyè mëtum më mvende, 28nyè anòṅò fò nyè a mò ha, angataman Zamba nyè na:

29A Nti, soege hm etuga dzoe etoa dzi a mvoè anë ongadzo,

30amu mis mama mayen akode doe

31ya ongakomëzan a mis minnam misë!

32Mfyè ya wakulan asu mëyòṅ, duma nnam woe Israel.

33Esya ban nyia bëngakam e mam bëdzoo mëtyan ai nyè.

34Simeon angataman bò#2,34-35Simeon ayen na Yesus azu ai mintag, ndò fë bod bëziṅ bayi nyè wog abe. E mintye ya ayi dzugi miayi tubulu nyia nnëm., nyè ai nyia woe Maria na: E nyò anë asu yë na bod bëvòg bëku, bëvòg bëtëbë a Israel, anë fë bò ndëm mimfèd, 35-ndò fë nyamëla okëṅ yayi wa tub nnëm- asu yë na mintsogan ya abui minnëm mikulan. 36Ndò fë Anna, profet mininga, ngòn Fanuel, a ayòṅ Azer, angabë antoa ya nnom eyëgan; eyòṅ angalug ndò anganyiṅ ai nnom bisëb zamgbal, 37ndò angaligi nkus akui a bisëb mëwom mwom ai binyii; angabë të kodo a tempel, alugu Zamba ai eki bidi ai ngogëlan tò ai alu tò ai amos. 38Abog te, ndò angasuan, angakaṅ Zamba, angalèè e bod bësë bëyanga akode Yerusalem adzo die te. 39Eyòṅ bëngadzala mam mësë ya mvende Zamba, ndò badugan a dzal daban Nazaret, a Galilea. 40Mòngò anganaṅ, angawon ai fëg, maa Zamba atoa ai nyè.

Yesus mòngò anë a tempel

41Bëbonde boe bëkarëga kë a Yerusalem mbu osë a abog Paska. 42Eyòṅ angakui mimbu awom ai mibè#2,41-51A ayòṅ ebrea, e man fam osë angakui ya mimbu awom ai milè abëlë na abaala mvende Moses. Bëkarëga kë a tempel, bëngalaṅ a kalara mvende, bod bëngaloe bò na «Bar Mitsva» (Mòn mvende)., ndò babed a abog anë angabë bò fulu, 43mëlu më abog mëmana; A bëdugan ha, Yesus mòngò aligi a Yerusalem, bëbonde boe të yëm. 44Bëngabë tsogo na anë a esamba; ndò bawulu ntye amos, bëkèè hm na badzëṅ nyè a bivuvuman biaban ai mëyëman maban; 45mbol të nyè yen, ndò badugan a Yerusalem, bakë badzëṅ nyè. 46A mvus mëlu mëlè, ndò bakòb nyè a tempel, atoa a zaṅ bëyëgëlë, avogolo bò, asiligi bò minsili. 47E ba bësë bëvogolo nyè bëngakam akëṅ die ai biyalan bie. 48Ayen bëngayen nyè, ndò bakam, nyia nyè ai nyè na: A mònam, a dze ohë bò bia na? Yënë anë bia esoa biakë biadzëṅ wa ai wòṅ osë a minnëm. 49Nyè ai bò na: A dze mihë dzëṅ ma? Nga miayëm na mayean tòbò e hom mam më tara mënë#2,49Yesus akad na mam më esya malod mam më si.? 50Bò ha të wog e dzam akada bò. 51Ndò angasigi ai bò, akëlë a Nazaret, abò bò mëwog. Nyia abaala të e mam mësë ma a nnëm. 52Yesus anganaṅ a fëg ai a mimbu, ai maa asòò abë Zamba ai a bod.

Currently Selected:

Lk 2: NTE12

Highlight

Copy