Pi zi tiki 21
21
Wii na wiini Isaak
1EPIƊ-ƊAI a ziɗi pɗem wiiɗi Sara maini n'a muɗaŋ ɗa nɵa, a za siɗi pini ɵinini-ha n'a ziŋɗi. 2Te tika fel war wuliɗi, te wiini ahi wiini Abraham war mefeŋ n'Alaw a miɗiɗi miɗini. 3Ahi na Sara te wiŋni ɗa Abraham a sini yiki ɓa Isaak. 4A ɵini gurgle wiini Isaak, won hlai n'a za mefeŋ mitwis, maini n'Alaw a miɗiŋni nɵa. 5Abraham a za buza miya ɗaw, won hlai n'a wa Isaak.
6Sara te ɗuula te muɗa: “Alaw a zaŋa aŋ wala zi yewere, asiya ɗi paŋ n'a ɵina seŋ hanɗa li ɗa aga a riya pa”.
7Te muɗa pra: Ɗif n'a kiɗa a miɗini wiini Abraham ɓa mefeŋ ktai Sara aga te sa fiyaw mini ahiɗi asiya ɗa? Paŋktai, mu wiini ahi ktai war welni.
8Ahiyagwi a za daidai, Sara te cakaŋ edi min fiyaw par. Mefeŋ n'e cikiŋ edi, Abraham a ziti fet n'amai. 9Sara te tala ahi na Hagar, na Egipte par te wiiŋni wiini Abraham a na ɵa dawaŋ gaini Isaak. 10Te miɗini wiini Abraham, “birgiti bagai hanɗa edi gaini ahiɗi paŋ” buri ahiɗi bagai aga a mula bulum gaini ahiya na Isaak ɗa kai. 11Abraham a bunda gaini hiy n'abai burini seŋ hanɗa, buri Ismayel ɗa a ahini lai. 12Amma Alaw a miɗini: “Ku za hiy burini arwagwi gaiɗi bagaiku kai. Yima seŋ paŋ na Sara te muɗuŋku ɗa. Buri pinziba n'aga a ka yikuku wuzani a halasi sin Isaak par. 13Amma burini ahiɗi bagai ɗa, aga mu sini pinziba lai, buri ni a pinzibaku. 14Abraham a faka amai gorof, a mula peŋ, a tikiti agulai zi yem lai, a siŋɗi wiiɗi Hagar. A tikiɗi arwagwi amai wulaɗi, a tikiɗi piɗi. Te hala, te hina edi war basga na kaɗataŋ na Berseba blaŋ aŋ giliŋi. 15Won hlai na yem na warɗi agulaiɗi a vadali, te bula arwagwi azumai pin kukuɓ ktai su; 16asakal par te hala te sumnasi edi par dam, arbaɗi daidai luwiiɗi ɓûrwi zi ɵiɓi ta. Buri te hiina warɗi maini nɵa “a pɗem ɓa mu tala mrini ahiya ɗa kai”. Te sumna azumai dam, te tuwa gaini wulaɗi amai.
17Alaw a ɵina wulani arwagwi, amai war fuŋni par ɵeŋ na wiini Alaw a yikitisi Hagar, a zilbiti: Hagar a zuku ɗa a maɗa? Ku huna kai, buri Alaw a ɵina wulani arwagwi won hlai n'aŋ won na ɗa, 18Faka amai, yima arwagwi amai, yima tini, buri mu zaŋ fu aŋ pinziba n'abai. 19Alaw a miliɗi arɗi edi, te tiliti kiliŋi zi yem tiɓ. Te hala te vitisi agulai gaini yem, te sini wiini arwagwi ɗa.
20Alaw a za gaini arwagwi hanɗa, a wula amai, a sumna edi war basga na kaɗataŋ, a ɗif zi ɵiɓi ɓaraw. 21A sumna edi war basga na kaɗataŋ na Paran, emini te tikitini muni na midini afti na Egipte par.
Bonu na Beer-seba n'arbani Abraham gaini Abimelek
22Paŋktai, war mefeŋ hanɗa, Abimelek gaini Pikol n'abaiɗi askaraini a miɗini wiini Abraham: Alaw a na gaiku war wazagai na ku zaŋ paŋ. 23Haŋa wala muku gaini Alaw tiyana won na, ɓa aga ku za wala na meefeŋ sa kai, siɗi aliya kai, sini pinzibaŋa kaalai. Aga ku za pɗem sa ta, sini afti na ku sumna miɗini ɗa, kal kal maini na mu zaŋ suku tuku nɵa. 24Abraham a wiyini seŋ: Gaini Alaw jaŋ. 25Mefeŋ ktai, Abraham a yika midiɗi ɗaini Abimelek zi sda, wuzani Abimelek buri kiliŋini n'e tikiti tini gaini gdaŋ, 26Abimelek a muɗa: “Mu sɗa ni n'a za hanɗa kai, ku muɗaŋa gai seŋ hanɗa kai, ta ɗi, mu ɵinaŋ na girna hai”. 27Abraham a mula haakai gaini adumai gaini ɵaakai lai, a siŋni wiini Abimelek, gai suliɗi e zi bonu arbaɗi.
28Abraham a mula adumai muguzak na war farani par, a mulaŋ edi kiini. 29Abimelek a miɗini wiini Abraham: Adumai na muguzak na ku mulaŋ edi kiini hanɗa, sdani ɗa a maɗa? 30Abraham a wiyini seŋ: “Adumai na muguzak hanɗa, mu suŋku wiiku, kapai a za aŋ wala zi zaida buriya ɓa mu ɓiliti kiliŋi hanɗa mu ta”.
31Buri nɵa e yiki hlai hanɗa ɓa Beer-seba, buri ɓa nagai na sulu e hi wala miɗi wiiɗi marɗi woni.
32E zi bonu gaiɗi marɗi a Beer-seba. Abimelek gaini Pikol n'abaiɗi askaraini e fiki e wiyi midini afti na wiiɗi Filistrekai.
33A pa luwuŋ Tamaris a Beer-seba, woni a siiwa Epiɗ-ɗai Alaw n'a vada kai gaini yiki na ɓa EPIƊ-ƊAI. 34Abraham a sumna midini aftiɗi Filistrekai buza viya.
Currently Selected:
Pi zi tiki 21: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
