JOHN 15

1Kei cu misur ruang taktak ka si, ka Pa cu dûm ngeitu a si. 2Keimah i â pehmi nge, thei a tlai lomi pauh a hlawnh tawn i thei a tlaimi nge pauh a tlai a tam chinchin nâkhnga a thenh tawn. 3Nan sin i ka chimmi bia thawngin nan thiang cang. 4Keimah ah umpeng u, kei zong nanmah ah ka um peng lai. Nge cu a kungah â pehpeng lo ahcun, amah te in thei tlai a chuah khawh lo bantukin nannih zong keimah ah nan umpeng lo ahcun thei tlai nan chuah kho lai lo. 5Keimah hi misur ruang cu ka si, nannih a nge nan si. Keimah ah a um peng i kei zong a mah i ka um pengnâk cu tampi in theitlai a chuah tawn; keimah lo in zeihmanh nan tuah kho lo. 6Keimah i a um peng lomi cu nge bangin hlawnh a si i a uai i mei chungah hlawnh a si i a kâng tawn. 7Nannih ka chungah nan umpeng i ka bia nan chungah a umpeng ahcun nan duhmi pauh ka hal u, nan ca tuah in a um lai. 8Tampi in theitlai nan chuah ah hin ka Pa cu thangṭhat in a um tawn. Cuticun aka zultu nan si lai. 9Pa nih aka dawt bangin kei zong nih kan dawt hna, ka dawtmi in um peng ko u. 10Nannih nih ka nawlpêkmi nan zulh ahcun ka dawtmi in na um peng lai. Kei zong ka Pa nawlpêk ka zulh i a dawtmi in ka um peng bantukin. 11Kâ lawmhnâk nanmah i a umpeng nâkhnga le, nan i lawmhnâk a tlin khawh nâkhnga, hi bia hi nan sinah ka chimmi a si. 12Hihi ka nawlpêk a si, keimah nih kan dawt hna bantukin nannih zong i daw u. 13Minih a hawi caah a nunnâk a pêkmi nâkin a ngan deuhmi dawtnâk ahohmanh nih an ngei lo. 14Nawl kan pêkmi kha nan tuah ahcun ka hawi le nan si lai. 15Sinum kan ti ti hna lai lo, zeitintiah sinum nih a pu tuahmi a hngal bal lo, cucaah hawikawm kan ti cang hna lai; Pa sin in ka hngalhmi vialte nan sinah ka phuan dih cang. 16Nannih nih nan ka thim lo, keimah nih kan thim hna, theiṭha chuah awk le a hmunmi theitlai chuah dingin kan ruahmi hna nan si, ka min in Pa sinah nan halmi pauh an pêk hna nâkhnga. 17Nawl kan pêkmi hna hi pakhat le pakhat nan i dawt khawh nâkhnga caah a si. 18Vawlei nih an huat hna ahcun, an huat hna hlan in keimah anka huat cang ti kha nan hgalh. 19Nannih vawlei mi hei si ulaw, vawlei nih cun amah ta a simi cu a dawt ko lai. Vawlei mi nan si lo. Vawlei in kan thimmi hna nan si ruangah vawlei nih an huat hna. 20Sinum a pu nâkin a ngan deuh lo, timi bia kan chimh cangmi hna kha philh hlah u. Kei anka serhsat ahcun, nannih zong serhsat nan si ve lai. Ka bia an zulh ahcun nan bia zong an zulh lai. 21Sihmanhsehlaw hi thil vialte hna hi ka min ruangah nan cungah an tuah lai, Aka thlah tu an hngalh lo caah. 22Kei ra in an sinah bia chim hlah ninglaw sual an ngei hnga lo. Atu cu an sualnâk chungin sawlhphelhnâk an ngei kho ti lo. 23Aka hua mi pauh nih ka Pa zong a huat. 24Ahohmanh nih an tuah bal lomi an lak ah tuah hlah ning law sual an ngei hnga lo, atu cu annih nih kei le ka Pa ankan hmuh cang i huat zong ankan huat. 25An nawlbia ca-uk ah, ‘chan le sullam um loin anka huat’ tiah ṭialmi kha a tlin nâkhnga caah a si. 26Asinain Bawmtu, Pa sinin ka rak thlah hngami, biatak Thlarau- Pa i a chuakmi cu a rat tikah, ka bia a hngalhter lai. 27Cun nannih zong a hramthawk tein ka sinah nan um caah aka hngalhpitu ah nan um ve lai.

Currently Selected:

JOHN 15: HAKABSI

Highlight

Copy